Dagiti Tignay ti Nailemmeng nga Apoy
Denggen ti Dios ti tunggal kararag nga idatontayo ken sungbatanna ti tunggal maysa kadagitoy sigun iti dana nga intudingna para iti kinanaan-anaytayo.
Kakabsat, nakasursuroak iti nasaem a leksion sipud idi naudi a panangokuparko iti daytoy a pulpito idi Oktubre ti 2022. Dayta a leksion ket: no saankayo a makaipaay iti maitutop a mensahe, mabalin a maparitankayo kadagiti sumaruno a sumagmamano a komperensia. Kas makitayo, naitudingak iti nasapa a paset ti umuna a sesion daytoy. Ti saanyo a makita ket nakaposisionak iti maysa a trapdoor nga addaan iti nalagda unay a rikepna. No saan a nasayaat daytoy a panagsaritak, saankayto a makita iti sumagmamano pay a komperensia.
Iti espiritu dayta napintas a himno manipud iti daytoy napintas a koro, adda nasursurok itay nabiit, a babaen ti tulong ti Apo, kayatko nga ibinglay kadakayo ita nga aldaw. Dayta ti mamagbalin a personal unay daytoy a mensahek.
Ti personal ken nasaem unay kadagitoy amin a nabiit pay a kapadasak ket ti ipupusay ti ay-ayatek nga asawak a ni Pat. Isu ti kasayaatan a babai a naam-ammok—maysa a perpekto nga asawa ken ina, kasta met iti kinasin-awna, ti sagutna iti panagsao, ken ti espiritualidadna. Nangted iti mensahe iti naminsan a napauluan iti “Panangtungpal iti Pagrukodan ti Pannakaparsuayo.” Para kaniak, sibaballigi a naipatungpalna ti panggep ti pannakaparsuana ngem iti impagarup ti asinoman. Isu ket naan-anay nga anak a babai ti Dios, mapagulidanan a babai ni Cristo. Siak ti kagagasatan a lalaki a nangbusbos iti 60 a tawen ti biagko tapno kaduana. No maikariak, ti pannakailantipmi kaipapananna a mabalinko ti makikadua kenkuana iti agnanayon.
Nangrugi ti sabali pay a padasko 48 nga oras kalpasan ti pannakaitabon ni baketko. Iti dayta a panawen, naospitalak gapu iti nakaro a sakitko. Iti innem a lawas a panagtalinaedko iti ospital, uppat a lawas nga addaak iti intensive care ken agkaraawan idi ti puotko.
Kangrunaanna, saanko a malagip ti amin a napadasak iti ospital bayat iti dayta a panawen. Ti saan a napukaw ket ti lagipko iti panagdaliasat iti ruar ti ospital, iti ruar ti kasla patingga ti kinaagnanayon. Diak maibaga a naan-anay dayta a kapadasan ita, ngem maibagak a paset dayta a naawatko ti maysa a pammagbaga nga agsubli iti ministeriok nga addaan iti ad-adda a kinaganat, pannakakonsagrar, panangipamaysa iti Mangisalakan, ad-adu a pammati iti saona.
Gapu iti padasko nariknak nga umaw-awatak iti bukodko a personal a bersion ti paltiing a naited iti Sangapulo ket Dua agarup 200 a tawenen ti napalabas:
“Paneknekam ti naganko … [ket] irakurakmo ti balikasko iti intero a daga. …
“… Iti tunggal bigat; ket isaknapmo koma nga inaldaw ti pammallaag a timekmo; ket dimo itulok nga agdungsa dagiti agindeg no dumteng ti rabii gapu iti saom. …
“Tumakderka[,] … ibaklaymo ti krusmo, [ket] surotennak.”
Patpatgek a kakabsatko, manipud iti dayta a padas, inkagumaak nga ibaklay ti krusko nga ad-adda a sipapasnek, addaan iti ad-adda a determinasion a mangbirok no sadino a makapagsaritaak a kas apostol a mangparegta ken mangpakdaar iti peggad iti agsapa, iti aldaw, agingga iti rabii.
Nga isu ti mangiturong iti maikatlo a kinapudno a dimteng kadagidi bulan ti pannakapukaw, sakit, ken pannakariribuk. Maysa daytoy a napabaro a saksi ken awan patinggana a panagyaman kadagiti napinget a kararag iti daytoy a Simbaan—dagiti kararagyo—a siak ti nagunggonaan. Agnanayon nga agyamanakto kadagiti kararag dagiti rinibu a tao, a kas iti agsagsagaba a balo, a maulit-ulit a nangkiddaw iti panangtulong ti langit kaniak. Nakaawatak kadagiti bendision ti priesthood ken nakitak ti klasek iti haiskul a nagayuno para kaniak, kas iti inaramid ti sumagmamano a ward iti intero a Simbaan. Ken sigurado nga adda ti naganko iti prayer roll iti dandani amin a templo iti Simbaan.
Iti napalaus a panagyamanko iti amin dagitoy, umanamongak iti imbaga ni G. K. Chesterton “a ti panagyaman ti maysa a kasayaatan a kita ti pampanunot; ken … ti kinamanagyaman ket ti ragsak a napaadu babaen ti panagraem.” Iti bukodko a “ragsak a napaadu babaen ti panagraem,” agyamanak kadakayo amin ken agyamanak iti Amak iti Langit, a nakangngeg kadagiti kararagyo ken nangbendision iti biagko.
Kakabsat, paneknekak a denggen ti Dios ti tunggal kararag nga idatontayo ken sungbatanna ti tunggal maysa kadagitoy segun iti dana nga intudingna para iti kinanaan-anaytayo. Naamirisko nga iti agarup isu met laeng a panawen adu ti mangikarkararag iti pannakaisubli ti salun-atko, ti kapadana a bilang—a pakairamanak—ti mangikarkararag iti pannakaisubli ti salun-at ni baketko. Paneknekak a nangngeg ken sinungbatan ti nadiosan a naasi a Nailangitan nga Ama dagita dua a kararag, uray no saan a nasungbatan dagiti kararag para ken ni Pat iti wagas a kiniddawko. Ti laeng Dios ti makaamo dagiti rason no apay a masungbatan dagiti kararag a naisupadi iti wagas a ninamnamatayo—ngem ikarik kadakayo a dagitoy ket mangngegda ket masungbatanda sigun iti di agkupas nga ayat ken nailangitan a panawenna.
No “saantayo a dumawat ti saan a rumbeng,” awan ti limitasion no kaano, sadino, wenno no ania ti rumbeng nga ikararagtayo. Segun kadagiti paltiing, masapul nga “agkarkararagtayo nga agnanayon.” Agkararagtayo, kinuna ni Amulek, para “kadagiti adda iti aglawlawyo,” a mamati nga “adda nabileg a pannakabalin a parnuayen ti kararag ti nalinteg [a tao].” Rumbeng nga iyebkastayo a napigsa dagiti kararagtayo no addaantayo iti pribado a gundaway a mangidatag kadagitoy. No saan a praktikal dayta, rumbeng nga agkararagtayo a siuulimek ken sipapasnek. Kantaentayo a dagiti kararag ket “[dagiti] tignay ti nakalemmeng nga apuy,” a kanayon a maidaton, sigun iti mismo a Mangisalakan, iti Dios nga Agnanayon nga Ama iti nagan ti Bugbugtong nga Anakna.
Patpatgek a gagayyem, ti panagkararagtayo ti kasam-itan nga orastayo, ti “napudno a tarigagaytayo,” ti kasimplean, kasin-awan a wagas ti panagdayawtayo. Rumbeng nga agkararagtayo kas indibidual, iti pamiliatayo, ken kadagiti kongregasion iti aniaman a kadakkel. Masapul nga usarentayo ti kararag kas kalasag maibusor iti sulisog, ken no adda man panawen a ditay kayat ti agkararag, masiguradotayo a ti panagduadua ket saan nga aggapu iti Dios, nga agtarigagay a makisarita kadagiti annakna iti aniaman ken iti amin a panawen. Pudno, direkta nga agtaud iti kabusor ti dadduma a panagregget a manglapped kadatayo nga agkararag. No ditay ammo no kasano wenno no ania ti talaga nga ikararagtayo, rumbeng a rugiantayo, ken itultuloytayo, agingga nga iturongnatayo ti Espiritu Santo iti kararag a rumbeng nga idatontayo. Mabalin a daytoy a wagas ti masapultayo no ikararagantayo dagiti kabusortayo ken dagiti mangidadanes kadatayo.
Kamaudiananna, mabalintayo a suroten ti pagwadan ti Mangisalakan a masansan unay nga agkararag. Ngem kanayon a makapainteres kaniak a no apay a narikna a kasapulan ni Jesus ti agkararag. Saan kadi nga Isu ket perpekto? Ania ti masapul nga ikararagna? Naamirisko nga Isu met, a kaduatayo, kayatna a “biroken ti rupa [ti Ama], patien ti saona, ken agtalek iti paraburna.” Maulit-ulit nga immadayo iti kagimongan tapno agmaymaysa sakbay a serken ti langit dagiti kararagna. Iti dadduma a gundaway, nagkararag a kaduana ti sumagmamano a tao. Ket inkagumaanna ti nagkararag iti biang ti dakkel a grupo a nangpunno iti bakras ti turod. No dadduma, ti kararag idaydayawna ti pagan-anayna. No dadduma, idaydayawna ti rupana. No dadduma nagtakder nga agkararag, no dadduma nagparintumeng, ket iti naminsan inruknoyna ti rupana a nagkararag.
Inladawan ni Lucas ti panagsaba ni Jesus bayat ti panubbotna nga isu ket “nagkararag a nasnasged.” Kasano a ti maysa a perpekto ket ad-adda a sipapasnek nga agkararag? Ipagaruptayo a napasnek ti amin a kararagna, ngem iti panangtungpalna iti pannubbot a sakripisiona ken babaen ti saem a nainaig iti sangalubongan a pannakaisaknapna, nariknana nga ad-adda nga agkararag a sipapasnek, ket gapu iti dagsen ti datonna agbulos ti dara manipud iti tunggal bassit nga abut ti kudilna.
Iti dayta a panangabak ni Cristo iti ipapatay ken ti sagutna kaniak a gundaway nga agbiag iti napapaut, sipapasnek a paneknekak ti kinapudno ti biag nga agnanayon ken ti kinapateg ti serioso a panangplanotayo iti daytoy.
Paneknekak nga inton umay ni Cristo, masapul a bigbigennatayo—saan laeng a kas kameng a nailista iti nakusnaw a rekord ti panagbuniag no di ket kas naan-anay a naikumit, napudno a mamati, dagiti disipulo managtungpal kadagiti katulagan. Napateg daytoy a banag kadatayo amin, amangan no mangngegtayo nga addaan ti nakaro a panagbabawi: “Dikay am-ammo,” wenno, kas ti panangipatarus ni Joseph Smith dayta a ragup ti balikas, “[Saannak] a pulos nga am-ammo.”
Naimbag ta adda tumulong kadagiti trabahotayo—adu ti tumulong. Masapul a mamatitayo kadagiti anghel ken milagro ken dagiti kari ti nasantuan a priesthood. Masapul a mamatitayo iti sagut ti Espiritu Santo, ti impluensia dagiti nasayaat a pamilia ken gagayyem, ken ti bileg ti nasin-aw nga ayat ni Cristo. Masapul a patientayo ti paltiing ken dagiti propeta, mammadto, ken mammaltiing ken ni Presidente Russell M. Nelson. Masapul a mamatitayo a babaen dagiti kararag ken ararawtayo ken ti personal a kinalintegtayo pudno a makasang-attayo iti “Bantay Zion, … iti siudad ti sibibiag a Dios, ti nailangitan a lugar, ti kasantuan iti amin.”
Kakabsat, no agbabawitayo iti basbasoltayo ken situtured nga umasidegtayo iti “trono ti parabur ,” ket ibati iti sanguananna dagiti limos ken naimpusuan a panagpakaasitayo, makasaraktayo iti asi ken pammakawan manipud kadagiti naparabur nga ima ti Agnanayon nga Amatayo ken ti natulnog, naan-anay a nasin-aw nga Anakna. Ket, kaduatayo ni Job ken dagiti amin a nadalusan a napudno, makitatayto ti lubong “a nakaskasdaaw unay” tapno maawatan. Iti nagan ni Jesucristo, amen.