Integridad: Maysa a Kababalin a Kas ken Cristo
Ti panagbiag iti integridad agkasapulan nga agbalintayo a napudno iti Dios, iti tunggal maysa, ken iti nadiosan a kinasiasinotayo.
Kadagiti panggibus nga oras ti panagministro ti Mangisalakan, napan idiay Bantay Olibo iti minuyongan a maawagan iti Getsemani ket inawisna dagiti disipulona nga aguray. Ita nga agmaymaysa, indawatna iti Amana, “No tarigagayam, ikkatem kaniak daytoy a kopa.” Ti panagsagaba, nangipaay Kenkuana, “uray pay ti Dios, ti kaindaklan ti amin, nga aggarigengen gapu iti saem, ken agdara iti tunggal teterreman, … ken saan koma nga uminum iti napait a kopa, ken kumsen.” Ngem itoy a kanito ti nakaro a panagleddaang, saan a kimsen ti Mangisalakan, “ngem nakiranud ken lineppasna dagiti panangisagana[na] kadagiti annak ti tattao.”
Kas Bugbugtong nga Anak ti Ama, adda bileg ni Jesucristo iti patay, ut-ot, ken sagaba ngem saan a kimsen. Impatungpalna ti katulagan nga inaramidna iti amana ket, iti panangaramidna, imparangarangna ti kababalin a kas ken Cristo a napatpateg iti lubong a pagnaedantayo—ti kababalin ti integridad. Nagtalinaed a napudno iti Dios, kadatayo, ken iti nadiosan a kinasiasinona.
Integridad
Ni Jesucristo ti Pagwadantayo. Ti panagbiag iti integridad agkasapulan nga agbalintayo a napudno iti Dios, iti tunggal maysa, ken iti nadiosan a kinasiasinotayo. Agayus ti integridad manipud iti umuna a naindaklan a bilin nga ayaten ti Dios. Gapu ta ay-ayatem ti Dios, pudnoka Kenkuana iti amin a panawen. Maawatanyo nga adda umno ken biddut ken adda naan-anay a kinapudno—ti kinapudno ti Dios. Ti integridad kayatna a sawen a saantayo nga ibaba dagiti pagrukodan wenno kababalintayo tapno maimpres wenno maawatdatayo dagiti dadduma. “Aramidem ti rumbeng” ken “bay-an ti sumaruno a pagbanagan.” Ti kallabes a rebision iti Preach My Gospel a missionary manual makita a nainayon ti integridad kas kababalin a kas ken Cristo.
Adu a tawen ti naglabas, nadutokan ni Elder Uchtdorf a mangulit a mangorganisa iti stake-mi. Bayat ti interbyumi, dinamagna kaniak ti saludsod a diak nalipatan: “Adda kadi aniaman iti biagmo a, no mayeg iti atension ti publiko, pakaibabainan kenka wenno ti Simbaan?” Gapu ta nasdaawak, dagus a nalagipko ti intero a biagko, a pinadasko a lagipen dagidiay a kanito a mabalin a nagbiddutak ken dinamagko iti bagik, no ammo ti dadduma ti amin nga inaramidko, ania ti pagarupenda kaniak wenno ti Simbaan?”
Dayta a kanito, impagarupko nga agsalsaludsod laeng ni Elder Uchtdorf maipapan iti pannakaikari, ngem naawatak itan a maipapan iti integridad ti talaga a saludsod. Pudnoak kadi iti insawangko? Makita kadi ti lubong ti panagtunos dagiti saok ken aramidko? Makita kadi ti dadduma ti Dios babaen ti galadko?
Insuro ni Presidente Spencer W. Kimball, ti “Integridad” ket “ti ….kinatulok ken abilidadtayo nga agbiag kadagiti patpatien ken panagkumittayo.”
Napudno iti Dios
Ti panagbiag iti integridad agkasapulan iti umuna ken ipangpangrunatayo nga agbalin a napudno iti Dios.
Manipud kinaubingtayo, nasursurotayo ti estoria ni Daniel iti rukib dagiti leon. Kanayon a napudno ni Daniel iti Dios. Dagiti naapal a kakaduana “pinadasda ti mangbirok iti gapu a mangbusor [kenkuana]” ket inkeddengda a dagiti didiosenda laeng ti pagkararaganda. Ammo ni Daniel ti paulog ngem nagawid ket—“silulukat dagiti tawana”—nagparintumeng ken nagkararag iti Dios ti Israel iti mamitlo iti inaldaw. Kas bungana, naipuruak ni Daniel iti rukib dagiti leon. Iti kabigatanna, naammuan ti ari a ti Dios ni Daniel ti nangisalakan kenkuana ket nangipaulog iti baro a bilin nga amin a tao “agpigerger ken agbutengda koma iti Dios ni Daniel. Gapu ta isu ti sibibiag a Dios.”
Naam-ammo ti ari ti Dios babaen ti integridad ni Daniel. Makita ti dadduma ti Dios babaen kadatayo—dagiti sao ken aramidtayo. Kas ken Daniel, ti panagbalin a pudno iti Dios ti mangyadayo kadatayo iti lubong.
Ipalagip kadatayo ti Mangisalakan, “Ditoy lubong addanto rigatyo: ngem mananginanamakayo; siak pinarmekko ti lubong.” Imbalakad ni Presidente Nelson: “[Ti panangparmek iti lubong] kayatna a sawen ti panangparmek iti sulisog nga ad-adda a mangipateg kadagiti banag daytoy a lubong ngem kadagiti banag ti Dios. Kayatna a sawen ti panagtalek iti doktrina ni Cristo nga ad-adda ngem dagiti pilosopia ti tattao.” Kasta met, nasken a sarangtentayo ti sulisog a magna “iti bukod[tayo] a dalan, ken iti ladawan ti bukod[tayo] a dios, a ti ladawanna adda iti kaasping ti lubong.”
Ti manangbusor nga impluensia daytoy a lubong ket napateg a paset ti plano ti Dios iti pannakaisalakan. Ti panangsangotayo iti impluensia ket pakailasinan ti kinasiasinotayo—ti pagrukodan ti integridadtayo. Ti impluensia ti lubong ket mabalin a direkta a mangdadael iti pidelidad iti panagasawa wenno nalimed a kas iti panangiposte kadagiti komento ti di am-ammo a tao a mangdillaw iti kultura wenno doktrina ti Simbaan. Ti panangaramat iti integridad iti pilitayo ket makinruar a parangarang iti nauneg a panagkumit a mangsurot iti Manangisalakan a ni Jesucristo.
Napudno iti Dadduma
No kasano nga agtaud ti integridad iti umuna a naindaklan a bilin nga ayaten ti Dios, ti panagbalin a napudno iti tunggal maysa agtaud iti maikadua, nga ayaten ti padatayo a tao kas iti bagbagitayo. Ti panagbiag iti integridad ket saan a biag ti kinaperpekto; dayta ti biag a panangikagumaantayo ti inaldaw nga agbalin a napudno iti Dios ken iti dayta a konteksto agbalin a napudno iti dadduma. Ipalagip ni Presidente Oaks kadatayo, “Ti kinaregtatayo nga agtungpal iti maikadua a bilin ket saan koma a gapu a lipatentayo ti umuna.”
Umad-adun ti panangsurot ti lubong iti integridad babaen ti panangipasdek iti pagannurotan iti galad wenno pagalagadan iti etika a mangiturong iti relasion dagiti tao ken institusion. Nupay nasayaat, dagitoy nga annuroten ket gagangay a di naibatay iti naan-anay a kinapudno ken agparang-ayda a naibatay iti panangawat ti kultura. Kas iti saludsod ni Elder Uchtdorf, dadduma nga organisasion ti mangsanay kadagiti empleado a mangibilang no agbalbaliw dagiti pangngeddeng wenno proseso ti panagdesisionda no maipablaak iti online wenno iti umuna a panid ti dakkel a pagiwarnak. No rummuar ti Simbaan manipud iti kinasipnget, kas ken ni Daniel, masapul a bumangontayo iti ngatuen dagiti nailubongan a namnama ken agbalintayo a rupa ti pudno ken sibibiag a Dios iti amin a panawen ken iti amin a lugar.
Saan nga umdas ti panagkuna nga adda integridadtayo no saan a maitunos ti tignaytayo kadagiti balikastayo. Kasta met a, ti Nakristianuan a kinaasi ket saan a kasukat ti integridad. Kas natulagan a tattao, ken kas lider iti Simbaanna, nasken a ditayo a madusa ken agtungpaltayo kadagiti pagrukodan nga intuding ti Apo.
Ti panagtignay iti integridad mangbukel iti pammati ken talek ken mangpatalged iti dadduma a kalikagumantayo laeng nga aramiden ti pagayatan ti Apo. Kadagiti konsehotayo, supringentayo ti impluensia iti ruar ken surotentayo ti naipalgak a wagas ti Apo nga agsapsapul iti pannakaawat manipud iti tunggal babai ken lalaki ken agtignay a maitunos iti naparegta a balakad a naawat.
Agpokustayo iti Mangisalakan, ket liklikantayo dagiti tignay a maipagarup nga agpaay iti bukodtayo a pagimbagan, pagsayaatan ti pamiliatayo, wenno panangpabor iti maysa a tao a gastos ti sabali. Aramidentayo ti amin a kabaelantayo a mangliklik iti aniaman a pannakaawat a mabalin nga aringan ti pammadayaw ti tattao dagiti tignaytayo, tapno umawat iti bukod a pannakabigbig, mangpataud iti ad-adu a likes, maadaw, wenno maipablaak.
Napudno iti Nadiosan a Pakabigbigantayo
Kamaudiananna, ti panagbiag iti integridad ket agkasapulan a napudnotayo iti nadiosan a kinasiasinotayo.
Adda dagiti dadduma a saan. Naipangparuna ti antikristo a ni Korihor, a nangyaw-awan iti puspuso ti adu, a nangal-allukoy iti “nainlasagan a panunotda.” Ngem, iti maudi a kanito ti biagna, impudnona, “Kanayon nga ammok nga adda Dios.” Insuro ni Presidente Henry B. Eyring a ti panagulbod “ket maisuppiat iti kinatao dagiti espiritutayo,” ti nadiosan a kinasiasinotayo. Inallilaw ni Korihor ti bagina, ket awan kenkuana ti kinapudno.
Kasupadina, sitatalek nga impakdaar ni Propeta Joseph Smith, “Ammok dayta, ken ammok nga ammo ti Dios dayta, ket diak mapaglikudan.”
Inayat ti Apo ti kabsat ni Joseph a ni Hyrum “gapu ti integridad ti pusona.” Nagtalinaedda ken Joseph a napudno agingga iti udina—napudno iti nadiosan a kinasiasinoda, iti lawag ken pannakaammo a naawatda, ken iti tao nga ammoda a pakapagbalinanda.
Panangigibus
Makitunostayo koma “iti pagayatan ti Dios” ken patanorentayo ti kababalin a kas iti integridad ni Cristo. Masurottayo koma ti Pagwadantayo, ti Mangisalakan ti lubong, ket saantayo nga agkedked no di ket agbiagtayo a napudno iti Dios, iti tunggal maysa, ken iti nadiosan a kinasiasinotayo.
Kas kinuna ni Job, “Agtimbangak koma iti nalinteg a timbangan, tapno maammuan ti Dios ti integridadko.” Iti sagrado a nagan ni Jesucristo, amen.