Dagiti Milagro, Dagiti Anghel, ken Bileg ti Priesthood
No tarigagayanyo dagiti bendision ti priesthood, agraman dagiti milagro ken ministerio dagiti anghel, magnakayo iti dalan dagiti katulagan nga inted ti Dios.
Adu ita ti mangibagbaga nga awanen dagiti milagro, a parparbo dagiti anghel, ken naserraanen ti langit. Paneknekak a saan a nagsardeng dagiti milagro, adda dagiti anghel kadatayo, ken silulukat dagiti langit.
Idi ti Mangisalakantayo a ni Jesucristo ket adda ditoy daga, intedna dagiti tulbek ti priesthood iti kangrunaan nga Apostolna a ni Pedro. Babaen iti daytoy a tultulbek, indauluan ni Pedro ken dagiti dadduma nga Apostol ti Simbaan ti Mangisalakan. Ngem idi natay dagidi Apostol, naala ditoy daga dagiti tulbek ti priesthood.
Paneknekak a naisubli dagiti nagkauna a tulbek ti priesthood. Nagparang da Pedro, Santiago, ken Juan ken dadduma pay a nagkauna a propeta kas napagungar a parsua a mangmangted ken ni Propeta Joseph Smith iti inladawan ti Apo a kas “dagiti tulbek ti pagariak, ken dispensasion ti ebanghelio.”
Dagita met laeng a tulbek ket naipasa manipud iti propeta iti sabali a propeta agingga iti propeta ita. Dagiti 15 a lallaki a suportarantayo a kas propeta, mammadto ken mammaltiing ket usarenda dagitoy a mangidaulo iti Simbaan ti Mangisalakan. Kas kadagiti nagkauna a panawen, adda maysa a senior nga Apostol a mangiggem ken autorisado a mangusar kadagiti amin a tulbek ti priesthood. Isu ni Presidente Russell M. Nelson, propeta ken Presidente ti naisubli a Simbaan ni Cristo ita: Ti Simbaan ni Jesucristo dagiti Santo iti Ud-udina nga Aldaw.
Babaen ti Simbaan ti Mangisalakan, awatentayo dagiti bendision ti priesthood—a pakairamanan ti bileg ti Dios a mangtulong iti panagbiagtayo. Babaen dagiti autorisado a tulbek ti priesthood, agaramidtayo iti sagrado a karkari iti Dios ken umawat iti sagrado nga ordinansa tapno maisaganatayo nga agbiag iti imatangna. Mangrugi iti panagbuniag ken kumpirmasion, ket kalpasanna iti templo, agtultuloytayo iti dalan dagiti katulagan nga agturong nga agsubli Kenkuana.
Ti pannakaipataw ti im-ima iti ulotayo, umawattayo met iti bendision ti priesthood, a raman ti panangiturong, liwliwa, balakad, panangagas, ken bileg a sumurot ken ni Jesucristo. Iti intero a panagbiagko naparaburanak iti daytoy naindaklan a bileg. Kas naipalgak iti nasantuan a kasuratan, tukoyentayo daytoy kas bileg ti nasantuan a Melchizedek Priesthood.
Iti kinaagtutubok nagun-odko ti dakkel a panagraem iti daytoy a bileg, aglalo ta naiparangarang iti bendision ti priesthood. Bayat ti panagserbik kas agtutubo a misionero idiay Chile, naaresto ken nagsinakami ken ti kaduak. Di pulos a naibaga kadakami no apay. Panawen idi ti dakkel a napolitikaan a riribuk. Rinibu a tattao ti tiniliw dagiti polis militar ket pulos nga awanen ti nadamag ti maipapan kadakuada.
Kalpasan a na-interrogate-nak, nagmaymaysaak iti selda, a di ammo no makitak pay dagiti ay-ayatek. Nagkararagak iti Nailangitan nga Amak, a sipapasnek nga agpakpakaasi: “Ama kanayon a naisuro kaniak a Bantayam dagiti misionerom. Pangngaasiyo Ama, awan ti naisangsangayan kaniak, ngem natulnogak ket kasapulak ti tulongmo ita a rabii.”
Naimula dagiti bukel daytoy a tulong adu a tawen sakbayna. Kalpasan ti panagbuniagko, nakumpirmaanak a miembro ti Simbaan ken naikkan iti sagut ti Espiritu Santo. Iti panagkararagko, iti likudan dagiti rehas, immay kaniak ti Espiritu Santo ket liniwliwanak. Inyegna iti panunotko ti espesial unay a paset manipud iti bendisionko ti patriarka, a sabali pay a bendision ti priesthood. Iti daytoy, inkari kaniak ti Dios a babaen ti kinamatalekko ket mailantipak iti templo para ita a panawen ken agnanayon iti maysa a babai a napnuan pintas ken imbag ken ayat, nga agbalinkamto a nagannak dagiti napateg nga annak ken mabendisionannakto ken maitan-ok a kas ama ti Israel.
Dayta a naparegta a sasao maipapan iti masakbayak ti nangpunno ti kararuak iti talna. Ammok a naggapuda iti naayat a Nailangitan nga Amak, a kanayon a mangtungpal iti karkarina. Iti dayta a kanito, adda iti pammatalged a mawayawayaanak ken agbiagak a makitak a matungpal dagita a kari.
Makatawen kalpasanna, binendisionannak ti Nailangitan nga Ama iti asawa a napintas, naimbag ken naayat. Nailantipkami ken ni Lynette iti templo. Nabendisionankami iti napateg a tallo nga annak a lallaki ken uppat nga annak a babbai. Nagbalinak nga ama, a maitunos kadagiti kari ti Dios iti bendisionko ti patriarka nga inawatko idi agtawenak iti 17.
“Ngarud, ay-ayatek a kakabsatko, nagsardeng kadi dagiti milagro gapu ta immuli ni Cristo idiay langit? …
“… Saan; saan met a nagsardeng dagiti anghel nga agserbi iti annak ti tao.”
Paneknekak a dagiti milagro ken ministerio ket agtultuloy a mapaspasamak iti biagtayo, masansan a direkta a resulta ti bileg ti priesthood. Matungpal a dagus ti bendision ti priesthood, iti wagas a makita ken maawatantayo. In-inut ti pannakaipaay ti dadduma ken saan a naan-anay a matungpal iti daytoy a biag. Ngem kanayon a tungpalen ti Dios ti amin a karina, kas nailadawan iti daytoy a salaysay manipud iti family historymi:
Ti lolok iti ama, ni Grant Reese Bowen, ket maysa a tao nga addaan iti dakkel a pammati. Nalawag a malagipko nga isalaysayna no kasano nga inawatna ti bukodna a bendision ti patriarka. Iti journalna, insuratna: “Inkari kaniak ti patriarka ti sagut a panangagas. Kinunana, ‘Maagasanto dagiti masakit. Wen, mapagungarto dagiti natay babaen dagiti imam,’”
Kalpasan ti adu a tawen, agpenpen idi ni Lolo iti garami idi a matignay nga agsubli iti balay. Simmabat ni tatangna kenkuana. “Grant, pimmusayen ni nanangmo,” kinuna ti amana.
Adawek manen iti journal ni Lolo: “Diak nagsardeng no di ket nagdardarasak a simrek iti balay ket iti ruar ti sango a beranda adda sadiay a nakaidda iti pagiddaan. Kinitak ket awanen ti nabati a pagilasinan ti biag kenkuana. Nalagipko ti bendisionko ti patriarka ken ti kari a no napudnoak, babaen ti pammatik maagasan dagiti masakit; ket mapagungarto dagiti natay. Inkabilko dagiti imak iti ulona, ket imbagak iti Apo a no pudno ti kari nga inaramidna kaniak babaen ti patriarka, maiparangarang dayta iti daytoy a tiempo ket pagungarek ni Nanagko. Inkarik Kenkuana no aramidenna daytoy, diakto pulos agkedked nga aramiden ti amin a kabaelak para iti pannakabangon ti pagarianna. Bayat ti panagkararagko, linuktanna dagiti matana ket kinunana, ‘Grant, bangonennak. Addaak iti lubong ti espiritu, ngem inayabannak. Kanayon koma a pammaneknek daytoy kenka ken iti dadduma pay a kameng ti pamiliak.’”
Insuronatayo ni Presidente Russell M. Nelson a mangsapul ken mangnamnama kadagiti milagro. Paneknekak a gapu ta naisubli ti priesthood, adda ditoy daga ti bileg ken turay ti Dios. Babaen kadagiti calling ken konseho, makipaset ti lallaki ken babbai, agtutubo ken nataengan, iti trabaho ti priesthood. Maysa dayta nga aramid ti milagro, a timmabunoan dagiti anghel. Aramid dayta ti langit, ket bendisionanna amin nga annak ti Dios.
Idi 1989, agawid idin ti pamiliami, a buklen ti pito, manipud iti ward outing. Rumabii idin. Masikog ni Lynette iti maikanem nga anakmi. Nariknana ti napigsa a prompting a mangikapet iti seat belt-na, a nalipatannan nga aramiden. Di nagbayag dimtengkami iti kurbada iti kalsada; maysa a kotse ti bimmallasiw iti linia a simrek iti lane-mi. Iti panagpatarayko iti agarup 70 miles (112 km) kada oras, limmiklikak tapno diak madungpar ti sumungsungad a lugan. Nagtulatid ti van-mi, naipauyas iti haywey, ket nagdisso iti kalsada nga idi nagsardeng nagpakleb daytoy iti bangir ti pasahero ti lugan a nakasango iti kalsada.
Ti simmaruno a malagipko a nangngeg ket ti timek ni Lynette: “Shayne, masapul a rummuartayo iti ridawmo.” Nakabitinak gapu iti seat belt-ko. Nagpaut iti sumagmamano a segundo sakbay a naammuak ti aramidek. Rinugianmi nga ipangato ti tunggal maysa kadagiti ubbing manipud iti van babaen iti tawak, nga isu itan ti atep ti van. Agsangsangitda, a pampanunotenda no ania ti napasamak.
Di nagbayag, naamirismi a mapukpukaw ti 10 ti tawenna nga anakmi a ni Emily. Impukkawmi ti naganna, awan ti simmungbat. Dagiti kameng ti ward, nga agawid metten, ket dimtengda iti lugar a madanagan a mangsapsapul kenkuana. Nasipnget unay idin. Kinitak manen ti van ket nagusarak iti flashlight ngem nakigtotak, ta nakitak ti bassit a bagi ni Emily a na-trap iti sirok ti van. Impukkawko, “Masapul nga ipangatotayo ti van manipud ken ni ni Emily.” Iniggamak ti tawa ket ginuyodko. Sumagmamano laeng ti nangipangato, ngem simimilagro a timmakder ti van kadagiti pilidna, ket makitan ti awan biagna a bagi ni Emily.
Saanen nga agang-anges ni Emily. Ti rupana ket maris ti purple plum. Kinunak, “Masapul nga ikkantayo iti bendision.” Maysa a gayyem ken miembro ti ward ti kaduak a nagparintumeng ket babaen ti turay ti Melchizedek Priesthood, iti nagan ni Jesucristo, binilinmi nga agbiag. Iti dayta a kanito, immanges a kasla agurok ni Emily.
Kalpasan ti kasla adu nga oras, simmangpet ti ambulansia. Naitaray ni Emily iti ospital. Nag-collapse ti barana ken naderder ti tendon iti tumengna. Maysa a pakaseknan ti mabalin a pannakadadael ti utekna gapu iti panawen a naawanan iti oxygen. Maysa ket kagudua nga aldaw a naka-coma ni Emily. Intultuloymi ti nagkararag ken nagayuno para kenkuana. Naparaburan iti naan-anay a panagimbagna. Ita, da Emily ken ni lakayna a Kevin ket nagannak iti innem nga annak a babbai.
Namilagruan ta, nakapagna ti amin. Ti maladaga a sikog ni Lynette ket ni Tyson. Naispal met isuna iti aniaman a pannakadangran ket naipasngay iti sumaruno a Pebrero. Kalpasan ti walo a bulan, kalpasan nga inawatna ti naindagaan a bagina, nagsubli ni Tyson iti Nailangitan nga Amatayo. Isu ti guardian angel nga anakmi. Mariknami ti impluensiana iti pamiliami ken segseggaanmi ti makikadua manen kenkuana.
Napaliiw dagiti nangipangato iti van manipud ken ni Emily a kasla awan ti dagsen ti van. Ammok a nakikadua dagiti nailangitan nga anghel ken naindagaan nga anghel a nangipangato ti lugan manipud iti bagi ni Emily. Ammok met a napabiag manen ni Emily babaen ti bileg ti nasantuan a priesthood.
Impalgak ti Apo daytoy a kinapudno kadagiti adipenna: “Addaakto iti sangoyo. Addaakto iti makanawanyo ken makanigidyo, ket addanto ti Espirituk iti puspusoyo, ken dagiti anghelko, a mangtarabay kadakayo.”
Paneknekak a “ti Nasantuan a Kinasaserdote, a naibatay iti Urnos ti Anak ti Dios”—ti Melchizedek Priesthood—ken dagiti tulbek, turay, ken bilegna ket naisubli ditoy daga, kadagitoy ud-udina nga aldaw. Ammok a nupay di amin a kasasaad ket agbalin a kas iti namnamaen ken ikararagtayo, kanayon nga umay dagiti milagro ti Dios sigun iti pagayatanna, ti tiempona, ken planona para kadatayo.
No tarigagayanyo dagiti bendision ti priesthood, agraman dagiti milagro ken ministerio dagiti anghel, awisenkayo a magna iti dalan dagiti katulagan nga inted ti Dios iti tunggal maysa kadatayo. Tulongandakayo dagiti miembro ken lider ti Simbaan a mangay-ayat kadakayo nga agaramid iti sumaruno nga addang.
Paneknekak a ni Jesucristo, ti Anak ti Dios, ket sibibiag ken idadauluanna ti Simbaanna babaen kadagiti sibibiag a propeta a mangig-iggem ken agar-aramat kadagiti tulbek ti priesthood. Pudno ti Espiritu Santo. Inted ti Mangisalakan ti biagna tapno paimbagennatayo, subbotennatayo, ken isublinatayo iti pagtaenganna.
Paneknekak a saan a nagsardeng dagiti milagro, adda dagiti anghel kadatayo, ken silulukat dagiti langit. Ket oh, anian ta silulukatda! Iti nagan ni Jesucristo, amen.