Bunga Nga Agtalinaed

Ni Elder Matthew L. Carpenter

Ti Pitupulo

Nasken ti kaadda ti Espiritu Santo a mangpasingked kadagiti ordinansatayo no kayattayo ti maaddaan kadagiti naikari a bendision iti agnanayon.

Idi ubingak, pagaayatko ti kappuros a naluom a peach. Agingga ita, no mapanunotko a kumagatak laeng iti naluom a peach, kayatko la unay ti mangan iti daytoy. No naluom dagiti mapuros a peach, agpautda iti dua agingga ti uppat nga aldaw sakbay nga aglungsot dagitoy. Adda naragsak a lagipko iti pannakikaduak ken ni nanang ken dagiti kabsatko, iti kusinami bayat iti panangpreserbami kadagiti naapitmi a peach babaen iti panangikargami iti garapon. No husto iti panangpreserbami, kadagitoy naimas a prutas ket agpaut iti adu a tawen, saan laeng a dua wenno uppat nga aldaw. No husto ti pannakaisagana ken pannakaipapudotna, ti prutas ket mapreserba agingga a saan madadel ti seliona.

Inturongnatayo ni Cristo a “mapan ken mangyeg iti bunga, … tapno agtalinaed ti bungayo.” Ngem saan nga agsasao Isuna maipapan kadagiti peach. Sarsaritaenna dagiti bendision ti Dios kadagiti annakna. No agaramid ken agtungpaltayo kadagiti katulagan iti Dios, dagiti bendision a nainaig kadagiti katulagantayo ket mabalin nga agsaknap iti labes daytoy a biag ken maitalimeng kadatayo, wenno mataginayon, iti agnanayon, nga agbalin a bunga nga agtalinaed iti agnanayon.

Ti Espiritu Santo, iti nadiosan nga akemna kas Espiritu Santo ti Kari, ti mangpasingked iti tunggal ordinansa kadagiti napudno kadagiti katulaganda tapno agbalin daytoy a balido kalpasan ti mortalidad. Nasken ti kaadda ti Espiritu Santo a mangpasingked kadagiti ordinansatayo no kayattayo ti maaddaan kadagiti naikari a bendision iti agnanayon, nga agbalin a bunga nga agtalinaed.

Nangnangruna a napateg daytoy no kayattayo ti maitan-ok. Kas insuro ni Presidente Russel M. Nelson: “Mangrugitayo nga addaan ti paggibusan iti panunot. … Sigurado, para iti tunggal maysa kadatayo, ti ‘panungpalan’ a kayattayo unay a maragpat ket ti panagbiag nga agnanayon a kadua dagiti pamiliatayo iti natan-ok a kasasaad a sadiay ket addatayo iti sangoanan ti Dios, ti Nailangitan nga Amatayo, ken ti Anakna a ni Jesucristo.” Kinuna pay ni Presidente Nelson: “Ti celestial a kallaysa ket maysa a napateg a paset ti panagsagana para iti biag nga agnanayon. Kasapulan a ti maysa ket makiasawa iti umno a tao, iti umno a lugar, babaen ti umno nga autoridad, ken agtulnog a simamatalek iti dayta a sagrado a tulag. Kalpasanna, mabalin a masigurado ti maysa ti pannakaitan-ok iti celestial a pagarian ti Dios.”

Ania dagiti bendision ti pannakaitan-ok? Iramanda ti panagtaeng iti sidong ti Dios iti agnanayon a kas agassawa, tapno tawiden dagiti “trono, pagarian, prinsipado, ken pannakabalin, … ken panagtultuloy dagiti bukel iti agnanayon,” ken panangawat iti amin nga adda iti Dios Ama.

Impalgak ti Apo babaen ken Joseph Smith:

“Iti celestial a gloria adda tallo a langit wenno tukad;

“Ket tapno magun-od ti kangatuan, nasken a sumrek ti tao iti daytoy nga urnos ti kinasaserdote [kayatna a sawen ti baro ken agnanayon a katulagan ti panagasawa];

“Ket no dina aramiden, saanna a magun-od daytoy.

“Mabalinna ti sumrek iti sabali, ngem dayta ti paggibusan ti pagarianna; awanen ti dur-asanna.”

Masursurotayo ditoy a ti maysa ket mabalin nga adda iti celestial a pagarian, wenno agtaeng iti sangwanan ti Dios, ken awanan asawa. Ngem tapno maitan-ok iti kangatuan a tukad ti celestial a pagarian, masapul a sumrek ti maysa iti panagasawa babaen ti umno nga autoridad ket kalpasanna agbalin a napudno kadagiti katulagan a naaramid iti dayta a panagasawa. Bayat ti panagbalintayo a napudno kadagitoy a katulagan, ti Espiritu Santo ti Kari ket pasingkedenna ti katulagantayo iti panagasawa. Dagita a napasingkedan a bendision agbalinda a “bunga nga agtalinaed.”

Ania ti kasapulan tapno masalimetmetan ti baro ken agnanayon a tulag ti panagasawa?

Insuro ni Presidente Russell M. Nelson nga adda dua a kita ti singgalut no sumrektayo iti daytoy agnanayon a katulagan ti panagasawa: maysa a lateral a singgalut iti nagbaetan ti asawa a lalaki ken asawa a babai, ken ti vertical a singgalut iti Dios. Tapno maipatalged kadatayo dagiti bendision ti pannakaitan-ok ken agtalinaed kalpasan daytoy a biag, masapul nga agbalintayo a napudno nga agpadpada kadagiti lateral ken vertical a singgalut ti katulagan.

Tapno mataginayon ti lateral a singgalut iti asawayo, binalakadannatayo ti Dios nga “ayatenyo [ti asawayo] a naimpusuan, ket … makinaigkayo kenkuana laeng ket awanen ti sabali.” Para kadagiti naasawaan, ti makinaig kenkuana ken awan sabali kaipapananna a sangkamaysa nga agiinnumankayo iti ayat, agiinnayat ken maseknankayo iti tunggal maysa, ipangpangrunayo ti panawen a kaduayo ti asawayo ngem kadagiti interes iti ruar, ken umawagkayo iti Dios a tumulong a mangparmek kadagiti pagkapuyanyo. Kaipapananna met nga awan ti emosional wenno seksual a relasion iti aniaman a kita iti ruar ti panagasawayo, agraman ti panag-flirt wenno panagdeyt, ken awan ti pornograpia, a mangpataud iti derrep.

Tapno agtalinaed ti lateral a singgalut iti katulagan, masapul a tarigagayan ti tunggal partner nga addakayo iti panagasawayo. Nabiit pay nga insuro ni Presidente Dallin H. Oaks: “Ammotayo met nga Isu [ti Dios] ket awan ti pilitenna iti nailaintaip a relasion a maikontra iti pagayatanna. Masigurado dagiti bendision ti nailantip a relasion para kadagiti amin a mangtungpal kadagiti katulaganda ngem pulos a saan babaen ti panangpilit iti nailantip a relasion iti maysa a tao a saan a maikari wenno saan a mangayat.”

Ania ti vertical a singgalut a kinuna ni Presidente Nelson? Ti vertical a singgalut ket maysa nga aramidentayo iti Dios.

Tapno mataginayon ti vertical a singgalut iti Dios, napudnotayo kadagiti katulagantayo iti templo maipapan kadagiti linteg ti panagtulnog, panagsakripisio, ti ebanghelio, kinadalus, ken panagkonsagrar. Makitulagtayo met iti Dios nga umawat iti agnanayon a kaduatayo ken agbalin a nalinteg nga asawa ken nagannak. Bayat ti panangtaginayontayo iti vertical a singgalut, kualipikadotayo kadagiti bendision ti panagbalin a paset ti pamilia ti Dios babaen ti katulagan ni Abraham, agraman dagiti bendision dagiti kaputotan, ti ebanghelio, ken ti priesthood. Dagitoy a bendision ket mabalin a bunga nga agtalinaed.

Bayat a namnamaentayo nga amin a sumrek iti baro ken agnanayon a katulagan ket agtalinaed a napudno ken addaan kadagiti bendision ti pannakailantip kadakuada iti agnanayon, no dadduma dayta a kasasaad ket kasla di tayo maragpat. Iti intero a ministeriok nasarakak dagiti miembro nga agar-aramid ken agtungtungpal kadagiti katulaganda, idinto a saan a kasta dagiti asawada. Adda met dagidiay awanan asawa, a pulos a dida maaddaan iti gundaway a makiasawa iti mortalidad. Ken adda dagiti saan a napudno kadagiti katulaganda iti panagasawa. Ania ti mapasamak kadagiti indibidual iti tunggal maysa kadagitoy a kasasaad?

1. No agtalinaedkayo a napudno kadagiti katulagan nga inaramidyo idi na-endowed-kayo, maawatyunto dagiti personal a bendision a naikari kadakayo iti endowment uray no sinalungasing ti asawayo dagiti katulaganna wenno simmina iti panagasawa. No nailantipkayo ​​ket idi agangay nagdiborsiokayo, ken no saan a makanselar ti panaglantipyo, agtalinaed nga epektibo kadakayo dagiti personal a bendision dayta a pannakailantip no agtalinaedkayo a napudno.

   No dadduma, gapu iti rikna ti pannakaliput ken pudno unay a pannakasair, mabalin a kayat ti napudno nga asawa a kanselaen ti pannakailantipda iti di napudno nga asawana tapno maiyadayoda kadakuada, agpadpada ditoy daga ken iti agnanayon. No madanagankayo ​​nga uray kasano ket maigalutkayo iti di agbabawi a dati nga asawa, laglagipenyo, saanto kadakayo! Saanto a kalikaguman ti Dios ti asinoman nga agtalinaed iti nailantip a relasion iti intero nga agnanayon a maikontra iti pagayatanna. Siguraduento ti Nailangitan nga Ama nga umawattayo iti tunggal bendision nga ipalubos dagiti tarigagay ken pilitayo.

   Nupay kasta, no matarigagayan ti pannakakansela ti panaglantip, marespeto ti kinawaya nga agpili. Adda dagiti espesipiko a pamay-an a mabalin a suroten. Ngem saan koma a gagangay ti pannakaaramidna daytoy! Iggem ti Umuna a Panguluen dagiti tulbek a mangilantip ditoy daga ken sadi langit. Apaman a naited ti pannakakansela ti panaglantip babaen ti Umuna a Panguluen, saanen a maipakat dagiti bendision a mainaig iti dayta a panaglantip; makanselar dagitoy agpadpada iti lateral ken vertical. Napateg a maawatan a tapno maawattayo dagiti bendision ti pannakaitan-ok, nasken nga ipakitatayo a situtuloktayo a sumrek ken simamatalek a mangsalimetmet iti daytoy baro ken agnanayon a katulagan, iti daytoy man a biag wenno iti sumaruno.

2. Para kadagiti awanan asawa a miembro ti Simbaan, laglagipenyo koma nga “iti bukod a wagas ken panawen ti Apo, awan ti bendision a maipadam kadagiti napudno a Santona. Ukomen ken gunggonaan ti Apo ti tunggal indibidual sigun kadagiti naimpusuan a [tarigagay] kasta met iti aramid.”

3. No saankayo ​​a nagtalinaed a napudno kadagiti katulagan iti templo, adda kadi namnama? Wen! Ti ebanghelio ni Jesucristo ket ebanghelio ti namnama. Umay dayta a namnama babaen ken Jesucristo nga addaan iti napudno a panagbabawi ken situtulnog a panangsurot kadagiti pannursuro ni Cristo. Nakitak dagiti indibidual nga agaramid kadagiti nakaro a biddut, a manglabsing kadagiti sagrado a katulagan. Iti regular a wagas, makitak dagiti sipupudno nga agbabawi, a mapakawan, ken agsubli iti dana ti katulagan. No sinalungasingyo dagiti katulaganyo iti templo, igunamgunamko nga agturongkayo ken ni Jesucristo, mabalakadankayo ​​iti bishopyo, agbabawikayo, ken luktan ti kararuayo iti napigsa a pannakabalin a mangagas a magun-od gapu iti Pannubbot ni Jesucristo.

Kakabsat, inted kadatayo ti naayat a Nailangitan nga Amatayo dagiti katulagan tapno magun-odtayo iti amin nga insaganana para kadatayo. Naim-imas dagitoy sagrado a bendision manipud iti Dios ngem iti aniaman a naindagaan a bunga. Mabalin a maitalimeng dagitoy para kadatayo iti agnanayon, bayat ti panagbalintayo a napudno kadagiti katulagantayo iti templo.

Paneknekak nga insubli ti Dios ti turay a mangisinggalut ditoy daga ken iti langit. Masarakan dayta nga autoridad iti Ti Simbaan ni Jesucristo dagiti Santo iti Ud-udina nga Aldaw. Tengtenglen daytoy ti Umuna a Panguluen ken Korum dagiti Sangapulo ket Dua ken maipakat babaen ti panangiturong ni Presidente Russell M. Nelson. Dagiti sumrek iti baro ken agnanayon a katulagan ti panagasawa ken mangtungpal iti dayta a katulagan ket mabalin nga agbalinda a naan-anay ken iti kamaudiananna umawatda iti pakabuklan ti dayag ti Ama, aniaman dagiti kasasaad a dida malapdan.

Mapasingkedan kadatayo dagitoy naikari a bendision a nainaig kadagiti katulagantayo babaen ti Nasantuan nga Espiritu ti Kari ken agbalin a bunga nga agtalinaed iti agnanayon. Paneknekak ngarud iti nagan ni Jesucristo, amen.

Dagiti Nagadawan

1. Juan 15:16.

2. Kitaen iti Dale G. Renlund, “Accessing God’s Power through Covenants,” Liahona, Mayo 2023, 35–38; Doktrina ken Katulagan 132:7.

3. Mapatalgedan ti maysa nga ordinansa no agbalin a balido nga agpadpada iti langit ken ditoy daga gapu ta ar-aramiden dayta ti addaan iti turay ken pinasingkedan ti Espiritu Santo.

   “Panunotentayo ti turay a mangilantip kas mayaplikar laeng iti dadduma nga ordinansa ti templo, ngem kasapulan dayta a turay a mangbalido iti ania man nga ordinansa ken mangibegkes iti labes ti patay. Ti pangilantip a bileg ket mangted iti marka ti kinalehitimo iti panagbuniagmo, kas pagarigan, tapno mabigbig daytoy ditoy ken iti langit. Kangrunaanna, amin nga ordinansa ti priesthood a maannong babaen dagiti tulbek ti Presidente ti Simbaan, ken kas inlawlawag ni Presidente Joseph Fielding Smith, ‘Isu [ti Presidente ti Simbaan] inikkannatayo iti turay, impanna ti bileg a mamaglantip iti priesthoodtayo, gapu ta iggemna dagita a tulbek’ [inadaw ni Harold B. Lee, iti Conference Report, Okt. 1944, 75]” (D. Todd Christofferson, “The Sealing Power,” Liahona, Nob. 2023, 20).

   “Ti aramid a pannakailantip babaen ti Espiritu Santo ti Kari ti pinasingkedan ti Espiritu Santo; maysa dayta nga anamongan ti Apo. Awan ti makaulbod iti Espiritu Santo ken makalasat a di madlaw. … Agaplikar met dagitoy a prinsipio iti dadduma pay nga ordinansa ken aramid iti Simbaan. Gapuna no agpada a ‘nalinteg ken napudno’ ti agpada a partido [iti panagasawa] [Doktrina ken Katulagan 76:53], no maikarida, maikabil ti mangratipikar a pannakailantip iti panagasawada iti templo; no saanda a maikari, saanda a nainkalintegan babaen ti Espiritu ket malapdan ti pannakaratipikar ti Espiritu Santo. Ti resulta ti pannakaikari ipatungpalnanto ti pannakailantip ken ti kinakillo dadaelennanto ti aniaman a pannakailantip” (Bruce R. McConkie, “Espiritu Santo ti Kari),” iti Preparing for an Eternal Marriage Student Manual [2003], 136).

   “Ti Espiritu Santo ti Kari ket ti Nasantuan nga Espiritu ti mangikabil iti selio ti pananganamong iti tunggal ordinansa: panagbuniag, pannakapatalged, panangorden, ken kallaysa. Ti kari ket tapno maawatto dagiti bendision babaen ti kinapudno. No aglabsing ti maysa a tao iti katulagan, iti panagbuniag man, panagorden, kallaysa wenno ania man a banag, ibabawi ti Espiritu ti selio ti pananganamong, ket saanto a maawat dagiti bendision. Napasingkedan ti tunggal ordinansa, nga addaan kari a gunggona a naibatay iti kinapudno. Ikkaten ti Espiritu Santo ti selio ti pananganamong no sadino a nadadael dagiti katulagan” (Joseph Fielding Smith, Doctrines of Salvationcomp. Bruce R. McConkie [1954], 1:45).

4. Russell M. Nelson, Heart of the Matter: What 100 Years of Living Have Taught Me (2023), 15. Masapul a pasingkedan ti amin a katulagan babaen ti Espiritu Santo ti Kari no maaddaanda iti puersa kalpasan ti panagungar dagiti natay (kitaen iti Doktrina ken Katulagan 132:7).

5. Russell M. Nelson, “Celestial Marriage,” Liahona, Nob. 2008, 94.

6. Doktrina ken Katulagan 132:19.

7. Kitaen iti Doktrina ken Katulagan 84:38.

8. Doktrina ken Katulagan 131:1–4.

9. Kitaen iti Doktrina ken Katulagan 132:19–20. “Dayta a kangatuan a pagtungpalan—ti pannakaitan-ok iti celestial a pagarian—isu ti pokus ti Ti Simbaan ni Jesucristo dagiti Santo iti Ud-udina nga Aldaw” (Dallin H. Oaks, “Kingdoms of Glory,” LiahonaNob. 2023, 26).

10. “No kasano a dagiti panagasawa ken pamilia ket makibingbingay iti naisangsangayan a lateral a singgalut a mangparnuay iti naisangsangayan nga ayat, kasta met ti baro a relasion a nabukel no agbegkestayo babaen ti tulag a bertikal iti … Dios inton sumrektayo iti baro ken agnanayon a tulag ti panagasawa (Russell M. Nelson, Heart of the Matter, 41–42).

11. Doktrina ken Katulagan 42:22; kitaen pay ti Sapasap a Hanbuk: Panagserbi iti Simbaan ni Jesucristo dagiti Santo iti Ud-udina nga Aldaw, 38.6.16. Iti panangisalaysayko iti panagasawa ditoy, tuktukoyek ti panagasawa sigun iti linteg ti Dios, a mangilawlawag iti panagasawa kas legal ken nainkalintegan a panagkaykaysa ti lalaki ken babai (kitaen iti “Ti Pamilia: Maysa a Waragawag iti Lubong,”Gospel Library).

12. Kitaen iti “Ti Pamilia: Maysa a Waragawag iti Lubong,” Gospel Library.

13. Kitaen iti Doktrina ken Katulagan 42:22–24.

14. Dallin H. Oaks, “Kingdoms of Glory,” 29; nainayun ti panangyunay-unay.

15. Kitaen iti Doktrina ken Katulagan 86:8 -11; 113:8; Abraham 2:9–11.

16. Kitaen iti Sapasap a Hanbuk, 38.4.1.

    Bayat ti panagserserbik iti Switzerland kas misyonero, imbinglaymi ken ti kaduak ti ebanghelio iti nagsayaat nga 60-años nga agassawa a Swiss. Bayat ti panangisuromi iti daytoy nga agassawa maipapan iti naisubli a Simbaan ni Jesucristo, impakita ti babai ti dakkel nga interes iti isursuromi. Kadagiti simmaganad a lawas, nagun-odna ti pammaneknek iti kinapudno a naisubli ti Simbaan ni Jesucristo, nga addaan iti umno nga autoridad manipud iti Dios, ken ni Jesucristo iturongna ti Simbaanna babaen kadagiti sibibiag a propeta ken apostol. Segseggaanmi ti panangisuromi iti daytoy nga agassawa maipapan iti maysa kadagiti natan-ok unay a doktrina ti Pannakaisubli, ti gundaway para iti agnanayon a panagasawa. Nupay kasta, nakaskasdaaw ta bayat nga insuromi daytoy nga agassawa maipapan iti doktrina ti agnanayon a panagasawa, kinuna ti babai a taga Switzerland nga awan interesna a makikadua ken lakayna iti agnanayon. Para kenkuana, saan a karaman ti langit ti kaaddana ken lakayna a 36 a tawenen a nakiasawaanna. Nabuniagan daytoy a kabsat a babai, ngem saan a nabuniagann ni lakayna. Saanda a pulos a nailantip iti templo.

    Para iti kaaduan, nupay kasta, saan koma a langit ti langit no saan a kadua ti tao a pakiasawaanda. Ti pannakikadua iti asawa nga ay-ayatem iti agnanayon ket pudno a kasla langit. Kas imbinglay ni Elder Jeffrey R. Holland maipapan iti patpatgenna nga asawana a ni Pat, ti langit ket saan a langit no awan isuna (kitaen iti “Scott Taylor: For Elder Holland, Heaven without His Wife and Children ‘Wouldn’t Be Heaven for Me,’” Church News, Hulyo 22, 2023, thechurchnews.com).

17. Kitaen iti Dallin H. Oaks, “Kingdoms of Glory,” 26.

18. Russell M. Nelson, “Celestial Marriage,” 94.

19. Kitaen iti Juan 15:16.