Ni Jesucristo iti Sentro ti Biagtayo
Dagiti nauneg a saludsod ti kararua, dagidiay makita iti kalideman nga oras ken kakaruan a pannubok, masungbatan babaen ti di agkupas nga ayat ni Jesucristo.
No agdaliasattayo iti mortalidad, sagpaminsan a mariribukantayo kadagiti pannubok: ti nakaro a saem ti pannakapukaw dagiti ipatpategtayo, ti narigat a pannakilaban iti sakit, ti pannakariribuk ti kinaawan hustisia, ti nakaam-amak a padas ti riribuk wenno abuso, ti anniniwan ti kinaawan trabaho, ti rigrigat ti pamilia, ti naulimek a sangit ti kinaliday, wenno ti makadadael a bunga dagiti armado a rinnanget. Kadagita a kanito, agtarigagay dagiti kararuatayo iti pagkamangan. Sipapasnek a kayattayo a maammuan: Sadino ti pakasarakantayo iti balsamo ti talna? Siasino ti mapagtalkantayo a tumulong kadatayo a maaddaan iti talek ken pigsa a mangparmek kadagitoy a karit? Asino ti addaan iti anus, ti naindaklan nga ayat, ken ti mannakabalin nga ima a mangitag-ay ken mangsaranay kadatayo?
Dagiti nauneg a saludsod ti kararua, dagidiay makita iti kalideman nga oras ken kakaruan a pannubok, masungbatan babaen ti di agkupas nga ayat ni Jesucristo. Kenkuana, ken babaen ti naikari a bendision ti naisubli nga ebangheliona, masarakantayo ti sungbat a sapsapulentayo. Babaen iti agnanayon a Pannubbotna, maikkantayo iti awan patinggana a sagut—ti namnama, panagagas, ken ti pammatalged ti kanayon, manayon nga adda iti biagtayo. Sidadaan daytoy a sagut Iti amin a manggun-od iti pammati, a mangawat iti talna ken pannakasubbot a siwayawaya nga ipaayna.
Ti Apo yunnatna ti imana iti tunggal maysa kadatayo, maysa a tignay a mismo a kaipapanan ti nadiosan nga ayat ken kinaimbagna. Ti awisna kadatayo nalablabes ngem iti simple nga awag; dayta ti nadiosan a kari, a pinabileg ti di agkupas a bileg ti paraburna. Iti nasantuan a kasuratan, siaayat nga ipanamnamana kadatayo:
“Umaykayo kaniak, dakayo amin nga agrigrigat ken madagdagsenan, ta paginanaenkayto.
“Alaenyo ti sangolko kadakayo, ket agsursurokayo kaniak; ta siak naemmaak ken napakumbabaak iti panagpuspusok: ket makasarakkayto iti inana iti kararuayo.
“Ta ti sangolko nalaka ken nalag-an ti awitko.”
Ti kinalawag ti awisna nga “umaykayo kaniak” ken “alaenyo ti sangolko” ipatalgenna ti nauneg a kaipapanan ti karina—maysa a kari a naan-anay unay a mangiladawan iti ayatna, nga idiayaannatayo iti napasnek a pammatalged: “Makasarakkayto iti inana.”
No sipapasnektayo nga aagkiddaw iti naespirituan a tarabay, rugiantayo ti agbaliwbaliw a biag a mangpatibker kadagiti pammaneknektayo. No maawatantayo ti kinasakup ti naan-anay nga ayat ti Nailangitan nga Amatayo ken ni Jesucristo, napno ti pusotayo iti panagyaman, pakumbaba, ken baro a tarigagay a mangsurot iti dana ti kinadisipulo.
Insuro ni Presidente Russell M. Nelson a “no ti pokus dagiti biagtayo ket iti plano ti Dios iti pannakaisalakan … ken ni Jesucristo ken ti ebangheliona, mariknatayo ti rag-o ania man ti mapaspasamak—wenno saan a mapaspasamak—iti biagtayo. Umay ti rag-o manipud ken gapu Kenkuana.”
Ni Alma, a makisasao iti anakna a Helaman, kinunana: “Ket ita, O anakko a Helaman, adtoy, addaka iti kinaagtutubom, ket ngarud, dawatek kenka a denggem dagiti balikasko ken adalem kaniak; ta ammok nga asino man nga agtalek iti Dios matarabaydanto kadagiti pannubokda, ken parikutda, ken rigrigatda, ket mabitibitdanto iti maudi nga aldaw.”
Ni Helaman, a makisasao kadagiti annakna, insurona daytoy agnanayon a prinsipio a panangisentro iti Mangisalakan iti biagtayo: “Laglagipenyo, laglagipenyo a babaento ti bato ti Mannubbottayo, nga isu ni Cristo, ti Anak ti Dios, a nasken a bangonenyo ti pamuonyo.”
Iti Mateo 14 naammuantayo a kalpasan a nangngeg ni Jesus ti ipapatay ni Juan Bautista, napan a maymaysa. Nupay kasta, simmurot Kenkuana ti dakkel nga ummong. Gapu iti asi ken ayatna, ken dina impalubos a ti ladingitna ti mangsinga Kenkuana iti misionna, inawat ni Jesus ida, a pinaimbagna dagiti masakit a kadakuada. Idi umas-asideg ti rabii, naipasango dagiti disipulo iti nakaam-amak a karit: nakaad-adu ti tao ken bassit ti taraon. Insingasingda ken Jesus a papanawenna ti ummong tapno aggatangda iti taraon, ngem ni Jesus, nga addaan iti dakkel nga ayat ken namnama, kiniddawna kadagiti disipulo a pakanenda ida.
Idinto nga okupado dagiti disipulo iti agdama a karit, impakita ni Jesus ti panagtalek ken panagayatna iti Amana, agraman ti di agkupas nga ayatna kadagiti tao. Inturongna ti ummong nga agtugaw iti ruot, ket innalana laeng ti lima a tinapay ken dua nga ikan, pinilina ti agyaman iti Amana, a binigbigna ti probision ti Dios iti turay ken bilegna.
Kalpasan ti panagyamanna, pinirsapirsay ni Jesus ti tinapay, ket inwaras dagiti disipulo kadagiti tao. Namilagruan, saan laeng nga umdas ti taraon no di ket nawadwad, nga adda pay 12 a basket ti nabati. Ti grupo a nataraonan ket nairaman ti lima ribu a lallaki, agraman dagiti babbai ken ubbing.
Isuronatayo daytoy a milagro iti nauneg a leksion: No maipasango kadagiti karit, nalaka laeng ti mailumlom kadagiti pakarigatantayo. Nupay kasta, impagwadan ni Jesucristo ti bileg a mangipokus iti Amana, mangidaton iti panagyaman, ken mangbigbig a dagiti pangrisut iti pannuboktayo saan a kanayon nga adda kadatayo ngem adda iti Dios.
No maipasangotayo kadagiti pakarigatan, gagangay a panunotentayo dagiti lapped. Dagiti karit a maipasango kadatayo agkasapulan iti atensiontayo, ngem ti prinsipio a panangparmek kadakuada ti ipamaysatayo. Babaen ti panangikabil ken Cristo iti sentro ti pampanunot ken ar-aramidtayo, tuladentayo ti panangmatmat ken pigsana. Daytoy a panagbalbaliw ket saan a mangpabassit kadagiti panagkarigatantayo; ketdi, tulongannatayo a mangsango kadagitoy babaen ti nadiosan a tarabay. Kas bungana, maammuantayo dagiti pangrisut ken suporta a nagtaud iti natantan-ok a sirib. Ti panangyugali itoy a pannirigan a nakasentro ken Cristo ket pabilgennatayo iti pigsa ken pannakaawat a mamagballigi kadagiti pannuboktayo, a mangipalagip a ti kasla dakkel a parikut ket makapagbalin a dana iti dakdakkel a naespirituan a panagdur-as.
Ti estoria ni Alma nga Ub-ubing iti Libro ni Mormon ket mangiparang iti makaallukoy a salaysay ti pannakasubbot ken ti nauneg nga epekto ti panangisentro ti biag ti tao ken Cristo. Idi damo, ni Alma ti bumusbusor iti Simbaan ti Apo, a nangyaw-awan iti adu iti dana ti kinalinteg. Nupay kasta, ti panangilaksid ti Dios, nga intanda ti isasarungkar ti anghel, ken nangriing kenkuana kadagiti dakes nga aramidna.
Iti kalideman nga orasna, a mariribukan iti basol ken desperado a mangbirok iti dalan a rummuar iti naespirituan a ladingitna, nalagip ni Alma dagiti pannursuro ni amana maipapan ken Jesucristo ken ti bileg ti Pannubbotna. Gapu ta il-iliwenna ti pannakaispal, napasnek a nagbabawi ken sipapasnek a nagpakaasi iti asi ti Apo. Daytoy napateg a kanito ti naan-anay a panangisuko, a nangipangruna ken Cristo iti panunotna ken napasnek a panangsapul ni Alma iti asina, ket nangtignay iti nakaskasdaaw a panagbalbaliw. Dagiti nadagsen a pamungo ti basol ken pannakaupay ket napukaw ken nasukatan iti nalaus a rag-o ken talna.
Ni Jesucristo ti namnamatayo ken ti sungbat kadagiti kasaeman iti biag. Babaen iti sakripisiona, binayadan ni Jesus dagiti basoltayo ken inawitna ti amin a sagabaen— ut-ot, kinaawan hustisia, ladingit, ken butengtayo—ken pakawanen ken agasannatayo no agtalektayo Kenkuana ken agbalbaliwtayo iti nasaysayaat. Isu ti Mangngagastayo, a mangliwliwa ken mangpasubli iti puspusotayo babaen ti ayat ken bilegna, kas iti panangagasna iti adu iti kaaddana ditoy daga. Isu ti sibibiag a danum, a mangpennek iti kangrunaan a kasapulan ti kararuatayo babaen ti di agressat nga ayat ken kaasina. Daytoy ti kas iti kari nga inaramidna iti Samaritana idiay bubon, a nangidiaya iti “bubon ti danum nga agubbog nga agturong iti biag nga agnanayon.”
Iburayko ti napasnek a pammaneknekko a sibibiag ni Jesucristo, nga isu ti mangidaulo iti daytoy, ti sagrado a Simbaanna, Ti Simbaan ni Jesucristo dagiti Santo iti Ud-udina nga Aldaw. Paneknekak nga Isu ti Manangisalakan ti lubong, ti Prinsipe ti Kappia, ti Ari dagiti ari, ti Apo dagiti appo, ti Mannubbot ti lubong. Patalgedak nga awan duadua a kanayon nga addatayo iti panunot ken pusona. Kas pammaneknek iti daytoy, insublina ti Simbaanna kadagitoy maudi nga aldaw ken inawaganna ni Presidente Russell M. Nelson kas propeta ken Presidente ti Simbaan iti daytoy a panawen. Ammok nga inted ni Jesucristo ti biagna tapno maaddaantayo iti biag nga agnanayon.
No ikarigatantayo nga isentro Isuna iti biagtayo, maipalgak dagiti palting kadatayo, ken masakupnatayo ti nalaus a kappiana, ken mangyeg ti agnanayon a Pannubbotna iti pananakapakawan ken pannakaagastayo. Isu ti pakatakuatantayo iti bileg a mangparmek, ti tured nga agibtur, ken ti talna a nalablabes ngem iti amin a pannakaawat. Ikagumaantayo koma ti umasideg Kenkuana iti inaldaw, ti paggapuan ti amin a naimbag, ti pagilasinan ti namnama iti panagdaliasattayo nga agsubli iti imatang ti Nailangitan nga Amatayo. Iti sagrado a nagan ni Jesucristo, amen.