Natantan-ok a Rag-o
Sapulentayo koma amin ken masarakantayo ti natantan-ok a rag-o a bunga ti panangidaton iti biagtayo iti Nailangitan nga Amatayo ken iti ay-ayatenna nga Anak.
Naparaburannak nga agsao iti sapasap a komperensia iti uneg ti tallo a dekada. Bayat dayta a panawen, adu dagiti nagsaludsod kaniak maipapan kadagitoy a mensahe iti intero a lubong. Iti nabiit pay, adda maysa a saludsod a kanayon a rummuar. Gagangay a banag a kastoy: “Elder Uchtdorf, dimngegak a nasayaat iti naudi a mensahem ngem … awan ti nangngegko maipapan iti aviation.”
Bueno, kalpasan ita nga aldaw, nalabit a diak mangngeg dayta a saludsod.
Maipapan iti “the Tumbling Mirth of Sun-Split Clouds”
Narigat a patien a 120 laeng a tawenen ti napalabas idi damo a nagpatayab da Wilbur ken Orville Wright ken nagtayabda iti ngato ti kadaratan ti Kitty Hawk, North Carolina. Uppat nga ababa a panagtayab iti dayta nga aldaw ti Disiembre ti nangbalbaliw iti lubong ken nanglukat iti dalan iti maysa kadagiti kadakkelan nga imbension iti pakasaritaan ti lubong.
Napeggad ti panagpatayab kadagita a nagkauna nga aldaw. Ammo dagiti agkabsat daytoy. Kasta met ti amada, ni Milton. Kinapudnona, mabutbuteng unay a mapukaw ti dua nga annakna iti aksidente a panagtayab ta inkarida kenkuana a dida pulos agkadua nga agbiahe.
Ket dida inaramid dayta—malaksid iti maysa. Pito a tawen kalpasan dayta a napateg nga aldaw iti Kitty Hawk, inted ni Milton Wright ti pammalubosna ket nakitana da Wilbur ken Orville a nagkadua a nagpatayab iti umuna a gundaway. Kalpasan ti panagdisso, nakumbinsi ni Orville ni tatangna nga aramidenna iti kaunaan ken kakaisuna a panagpatayabna tapno makitana a mismo no ania daytoy.
Idi agpangpangato ti eroplano, naallukoy unay ni Milton nga agtawen iti 82 iti ragsak ti panagtayab ta saanen a mabuteng. Naragsakan ni Orville idi impukkaw ni tatangna a siraragsak, “Nangatngato, Orville, nangatngato!”
Daytoy ti tao a kapadak iti panagtayab!
Nalabit ti rason a sagpaminsan nga agsaoak maipapan iti aviation ket gapu ta ammok ti narikna dagiti Wright. “Nalibasak met dagiti naulpit a puersa ti Daga ket nagsalaak iti tangatang nga inusarko dagiti payak a mangyanninaw iti rag-o ken katawa.”
Ti umuna a panagpatayab ti Wright Brothers, a napasamak 37 a tawen sakbay ti pannakayanakko, ket nanglukat ti ruangan ti adbentura, siddaaw, ken natarnaw a rag-o iti biagko.
Ngem, nupay nakaskasdaaw dayta a rag-o, adda pay nangatngato a kita ti rag-o. Ita, iti kaipapanan ti narag-o a pukkaw ni Milton Wright, “Nangatngato, Orville, nangatngato,” kayatko a saritaen daytoy nangatngato a rag-o—no sadino ti paggapuanna, no kasano a sumrek iti pusotayo, ken no kasano a mapasarantayo iti ad-adu pay.
Ti Naan-anay a Panggep ti Kaadda ti Tao
Nalabit a di kasapulan a maisao a kayat ti tunggal maysa ti agbalin a naragsak. Nupay kasta, di pay kasapulan a maisao a saan nga amin ket naragsak. Nakalkaldaang, ta kasla narigat a masarakan ti ragsak para iti adu a tao.
Apay a kasta? No ti ragsak ti maysa a banag a tarigagayan unay dagiti tao, apay a ditay masarakan daytoy? Tapno maibaga ti maysa a kanta ti pagilian, nalabit a sapsapulentayo ti rag-o iti amin a biddut a lugar.
Sadino ti Pakasarakantayo iti Ragsak?
Sakbay a pagsasaritaantayo no kasano a masarakan ti rag-o, palubosandak a mangbigbig a pudno ti depresion ken dadduma pay a narigat a mental ken emosional a karit, ket saan a simple ti sungbat, “Padasenyo ti agbalin a naragragsak.” Ti panggepko ita ket saan a mangpabassit kadagiti parikut iti salun-at ti panunot. No maipasangokayo kadagiti kasta a karit, makipagladingitak kadakayo, ken addaak iti sibayyo. Para iti dadduma a tattao, ti panangbirok iti rag-o mabalin nga iramanna ti panagpatulong kadagiti nasanay a propesional iti salun-at ti isip a nangidaton iti biagda iti napateg unay a panagagasda. Nasken nga agyamantayo iti kasta a tulong.
Ti biag ket saan a di aggibus a panagsasaruno dagiti naragsak a rikna. “Ta nasken, nga adda pagsusupadian ti amin a banag.” Ket no ti Dios Mismo ti agsangit, kas paneknekan ti nasantuan a kasuratan, ngarud sigurado nga agsangittayto met. Ti rikna a naliday saan a tanda ti pannakapaay. Ditoy a biag, ti rag-o ken ladingit saan nga agsina nga agkadua. Kas kadakayo amin, nariknak ti pannakaupay, ladingit, liday ken panagbabawi.
Nupay kasta, napasarak met a mismo ti nadayag a parbangon a mangpunno iti kararua iti napalalo a rag-o a narigat a mailemmeng. Natakuatak a mismo a daytoy natalna a panagtalek ket agtaud iti panangsurot iti Mangisalakan ken pannagna iti Dalanna.
Ti talna nga itedna kadatayo ket saan a kas iti ited ti lubong. Nasaysayaat daytoy. Nangatngato ken nasansantuan. Kinuna ni Jesus, “Immayak tapno maaddaanda iti biag, ken tapno maaddaanda iti ad-adu pay.”
Ti ebanghelio ni Jesucristo ket pudno a “naimbag a damag ti dakkel a rag-o”! Daytoy ti mensahe ti awan kapadana a namnama! Maysa a mensahe iti panangibaklay iti sangol ken panangikkat iti dagensen. Ti panagurnong ti lawag. Ti nailangitan a pabor, nangatngato a pannakaawat, nasansantuan a katulagan, agnanayon a kinatalged, ken agnanayon a dayag!
Ti rag-o ti mismo a panggep ti plano ti Dios para kadagiti annakna. Dayta ti nakaparsuaanyo—“tapno maaddaan[kayo] iti rag-o”! Nabangonkayo para iti daytoy!
Ti Nailangitan nga Amatayo dina inlemmeng ti dana iti ragsak. Saan a palimed daytoy. Magun-od ti amin daytoy!
Naikari daytoy kadagiti magna iti dana ti kinadisipulo, mangsurot iti pannursuro ken ulidan ti Mangisalakan, agtungpal kadagiti bilinna, ken mangdayaw kadagiti katulagan nga aramidenda iti Dios. Anian a nakakaskasdaaw a kari!
Adda Banag nga Idiaya Pay ti Dios
Am-ammotayo amin dagiti tao nga agkuna a dida kasapulan ti Dios tapno agragsakda, ken naragsakda uray no awan ti relihionda.
Bigbigen ken raemek dagitoy a rikna. Kayat ti patpatgentayo nga Ama iti Langit a maaddaan amin nga annakna iti nalaus a ragsak agingga a mabalin, isu a pinunnona daytoy a lubong iti napipintas a pagraragsakan “agpada a makaay-ayo iti mata ken … mangparagsak iti puso.” Para kaniak, dakkel a ragsak ti itden ti panagtayab. Masarakan dagiti dadduma iti musika, iti arte, kadagiti paglinglingayan, wenno iti nakaparsuaan.
Babaen ti panangawis iti tunggal maysa ken panangibinglay iti naimbag a damag ti Mangisalakan a mangyeg iti dakkel a rag-o, ditayo ibilang nga awan pategna dagitoy paggapuan ti rag-o. Ibagbagami laeng nga ad-adu pay ti maited ti Dios. Ti natantan-ok ken naun-uneg a rag-o—rag-o a mangrimbaw iti idiaya daytoy a lubong. Daytoy ti rag-o a mangibtur iti leddaang, mangparmek iti ladingit, ken mangpukaw iti kinaliday.
Ti ragsak ditoy lubong, iti sabali a bangir, saan nga agpaut. Saan a mabalin. Daytoy ti kasasaad ti amin a naindagaan a banag nga agdaan, agrupsa, madadael, wenno agbalin nga awan serbina. Ngem agnanayon ti nadiosan a rag-o, gapu ta agnanayon ti Dios. Immay ni Jesucristo a mangikkat iti temporal kadatayo ken sukatanna ti panagrupsa iti di panagrupsa. Isu laeng ti addaan iti dayta a bileg, ket ti rag-ona laeng ti agnanayon.
No mariknayo a mabalin nga ad-adu pay daytoy a kita ti rag-o iti biagyo, awisenkayo a mangrugi iti panagdaliasat a sumurot ken Jesucristo ken ti Dalanna. Daytoy ti daliasat ti unos ti biag—ken iti labesna. Isingasingko man ti sumagmamano a pangrugian nga addang iti daytoy maikari a daliasat iti panangtakuat iti natarnaw a rag-o.
Umasideg iti Dios
Malagipyo kadi ti babai iti Baro a Tulag a nagibtur iti 12 a tawen a naaddaan iti sakit a panagpadara? Binusbosna ti amin a sanikuana kadagiti mangngagas, ngem kimmaro laeng ti kasasaadna. Nangngegna ti maipapan ken Jesus; nalatak unay ti bilegna a mangagas. Ngem kabaelanna kadi nga agasan? Ken kasano a makaasideg Kenkuana? Ti sakitna pinagbalinna a “narugit” segun iti linteg ni Moises, ket ngarud masapul kenkuana nga agtalinaed nga adayo kadagiti sabali.
Kasla imposible a makaasideg Kenkuana ken agkiddaw iti pannakaagas.
Nupay kasta, impagarupna, “No masagidko la koma ti kawesna, umimbagakto.”
Kamaudiananna, pinarmek ti pammatina ti butengna. Sinarangetna ti panangbabalaw ti dadduma ket nagturong iti Mangisalakan.
Kamaudiananna, nakaasidegen. Inyunnatna ti imana.
Ket naagasan isuna.
Di kadi a maipadatayo amin iti daytoy a babai?
Mabalin nga adu ti rason no apay nga agkedkedtayo nga umasideg iti Mangisalakan. Mabalin a pagang-angawandatayo wenno ikondenadatayo dagiti dadduma. Gapu iti kinatangsittayo, mabalin a ditay patien a napateg unay ti maysa a banag kas iti dayta. Mabalin a panunotentayo a ti kasasaadtayo ti saan a pannakaikaritayo iti panangagasna—a dakkel unay ti kaadayo wenno adu unay dagiti basoltayo.
Kas iti daytoy a babai, nasursurok a no umasidegtayo iti Dios ken sagidentayo, pudno a makaagas, maaddaantayo iti talna, ken rag-o.
Sapulenyo Daytoy
Insuro ni Jesus, “agsapulkayo, ket makasarakkayto.”
Patiek a daytoy simple a ragup ti balikas saan laeng a naespirituan a kari; maysa daytoy a kinapudno.
No agbiroktayo kadagiti rason nga agpungtot, agduadua, gumura wenno agmaymaysa, masarakantayonto met ida.
Nupay kasta, no birokentayo ti rag-o—no birokentayo dagiti rason nga agrag-o ken siraragsak a sumurot iti Mangisalakan, masarakantayonto ida.
Manmano a masarakantayo ti banag a ditayo sapsapulen.
Sapsapulenyo kadi ti rag-o?
Agsapulkayo, ket makasarakkayto.
Makipagbaklay iti Imet ti Tunggal Maysa
Insuro ni Jesus, “Nagasgasat ti mangted ngem ti umawat.”
Mabalin kadi nga iti panagsapultayo iti rag-o, ti kasayaatan a wagas a mangsarak iti daytoy ket ti panangparag-o iti sabali?
Kakabsat, ammoyo ken ammok a pudno daytoy! Ti rag-o ket kas iti barrel ti arina wenno burnay ti lana a di pulos agpatingga. Umadu ti pudno a rag-o no mairanud daytoy.
Saan a kasapulan ti naindaklan wenno komplikado a banag.
Maaramidtayo dagiti simple a banag.
Kas iti panangikararagan iti maysa a tao iti amin a pusotayo.
Panangted iti napudno a pammadayaw.
Panangtulong iti maysa a tao a mapasangbay, maraem, maipateg, ken maayat.
Panangibinglay iti paborito a nasantuan a kasuratan ken ania ti kaipapananna kadatayo.
Wenno uray panagdengngeg laeng.
“No agserbikayo iti padayo a tao agserserbikayo laeng iti Dios,” ket gunggonaannakayto ti Dios iti kinaimbagyo. Ti rag-o nga itedyo iti sabali ket agsublinto kadakayo iti “nasayaat a rukod, a naigamer, ken agliplippias.”
“Anianto ti Aramidentayo Kalpasanna?”
Bayat dagiti dumteng nga aldaw, lawas, ken bulan, awisenkayo koma a:
-
Mangbubos iti oras iti napasnek, naimpusuan a panangikagumaam nga umasideg iti Dios.
-
Sapulen a sipapasnek iti inaldaw dagiti kanito ti namnama, talna, ken rag-o.
-
Mangyeg iti rag-o iti dadduma iti lawlawyo.
Patpatgek a kakabsatko, patpatgek a gagayyem, no sukisokenyo ti balikas ti Dios tapno ad-adda a maawatanyo ti agnanayon a plano ti Dios, awatenyo dagitoy nga awis, ken ikagumaanyo ti magna iti Dalanna, mariknayonto ti “talna ti Dios a mangringbaw iti amin a pannakaawat”. uray iti baet dagiti liday. Mariknayo ti ad-adda pay nga ayat ti Dios nga awan kapadana nga umad-adu iti pusoyo. Ti parbangon ti celestial a lawag rummuarto kadagiti anniniwan dagiti pannubokyo, ket rugianyo a nanamen dagiti di mailadawan a dayag ken nakaskasdaaw a banag ti di makita, perpekto, nailangitan a lubong. Mariknayo ti espirituyo nga umadayo iti grabidad daytoy a lubong.
Ket kas iti naimbag a ni Milton Wright, nalabit ipigsayonto ti timekyo iti panagrag-o ken ipukkawyo, “Nangatngato, Ama, nangatngato!”
Sapulentayo koma amin ken masarakantayo ti natantan-ok a rag-o a bunga ti panangidaton iti biagtayo iti Nailangitan nga Amatayo ken iti ay-ayatenna nga Anak. Daytoy ti napasnek a kararagko ken bendision iti nagan ni Jesucristo, amen.