Makikaykaysa ken Cristo
Makipagkaykaysatayo iti ayat ken pammatitayo ken Jesucristo ken ti Pannubbotna. Ti kaipapanan ti pudno a pannakaibilang ket ti makikaykaysa ken Cristo.
Sipud pay kinaubingko, nauneg ti panagriknak maipapan iti Pannubbot ni Jesucristo, ngem naawatak ti kinapudno ti Pannubbot ti Mangisalakan idi agtawenak iti 25. Katurturposko laeng iti Stanford Law School ken agad-adalak para iti California bar exam. Timmawag ni nanangko ket imbagana a matmatayen ni apongko a Crozier Kimball, nga agnanaed idiay Utah. Kinunana a no kayatko a makita, nasaysayaat no agawidak. Agtawen iti 86 ni lelongko ken nakaro ti sakitna. Nakaskasdaaw ti isasarungkarko. Maragsakan unay a makakita kaniak ken mangibinglay kaniak iti pammatina.
Idi tallo laeng ti tawen ni Crozier, natay ni tatangna,ni David Patten Kimball, iti edad a 44. namnamaen ni Crozier a ti amana ken ti lelongna a ni Heber C.Kimball ket anamonganda ti biagna ken mariknana a napudno iti tawidna.
Ti kangrunaan a balakad ni lelongko kaniak ket liklikan ti aniaman a riknak nga adda kalintegak wenno pribilehiok gapu kadagitoy a napudno a kapuonan. Imbagana a nasken nga ipamaysak iti Mangisalakan ken iti Pannubbotna. Kinunana nga annaknatayo amin ti naayat a Nailangitan nga Ama. Asino man dagiti naindagaan a kapuonantayo, ireport ti tunggal maysa kadatayo iti Mangisalakan no kasano a tinungpaltayo dagiti bilinna.
Imbasar ni Lelong kas “Agay-aywan ti Ruangan,” a mangitudo iti 2 Nephi 9:41. Imbagana kaniak a mangnamnama nga umdasen ti nagbabawi tapno maikari iti asi ti Mangisalakan.
Nasagidak unay. Ammok a nagbalin isuna a nalinteg a lalaki. Isu ti patriarka ken nagserbi iti sumagmamano a mision. Sinuruannak nga awan ti makasubli iti Dios babaen laeng kadagiti naimbag nga aramid no awan ti pagimbagan ti Pannubbot ti Mangisalakan. Malagipko agingga ita ti dakkel nga ayat ken panagyaman ni Lelong iti Mangisalakan ken ti Pannubbotna.
Idi 2019 iti annongek iti Jerusalem, pinasiarko ti akinngato a siled a mabalin nga asideg iti lugar a nangbugguan ti Mangisalakan iti saksaka dagiti Apostolna sakbay ti Pannakailansana iti Krus. Natignayak a naespirituan ken napanunotko no kasano nga imbilinna kadagiti Apostolna nga agiinnayatda.
Nalagipko ti agpakpakaasi a Kararag a Mangibabaet ti Mangisalakan iti biangtayo. Napasamak daytoy a kararag iti literal a pangserra nga oras ti mortal a biagna kas naisurat iti Ebanghelio ni Juan.
Naiturong daytoy a kararag kadagiti pasurot ni Cristo, agramantayo amin. Iti araraw ti Mangisalakan iti Amana, nagpakaasi “tapno isuda amin agmaymaysada koma; a kas met sika, Ama, kaniak, ket Siak kenka, tapno addada met koma kadata.” Intuloyna kalpasanna, “Ket intedko kadakuada ti dayag nga intedmo kaniak; tapno agmaymaysada, a kas iti panagmaymaysata.” Panagmaymaysa ti inkararag ni Cristo sakbay ti pannakaliput ken Pannakailansana iti Krus. Magun-od ti panagmaymaysa ken Cristo ken ti Nailangitan nga Amatayo babaen ti Pannubbot ti Mangisalakan.
Ti pangisalakan nga asi ti Apo saan nga agpannuray iti kapuonan, edukasion, kasasaad ti ekonomia, wenno puli. Naibasar daytoy iti panagmaymaysa ken Cristo ken dagiti bilinna.
Inawat da Propeta Joseph Smith ken Oliver Cowdery ti paltiing maipapan iti organisasion ken gobierno ti Simbaan idi 1830, nabiit kalpasan a nabukel ti Simbaan. Ti benneg 20 itan a binasa ni Propeta Joseph iti umuna a komperensia ti Simbaan ken isu ti umuna a paltiing nga inanamongan babaen ti sapasap a pammalubos.
Pudno a nakaskasdaaw ti linaon daytoy a paltiing. Isurona kadatayo ti pateg ken akem ti Pannubbot ti Mangisalakan ken no kasano a magun-od ti bileg ken dagiti bendisionna babaen ti pangsubbot a paraburna. Agtawen idi ni Propeta Joseph iti 24 ket nakaawaten iti adu a paltiing ken nakumpletona ti pannakaipatarus ti Libro ni Mormon babaen ti sagut ken bileg ti Dios. Agpada a nabigbig da Joseph ken Oliver kas naordenan nga Apostol, iti kasta addaanda iti turay a mangidaulo iti Simbaan.
Dagiti bersikulo 17 agingga 36 naglaon iti pakagupgopan ti napateg a doktrina ti Simbaan, agraman ti kinapudno ti Dios, ti Panagparsua ti sangkataw-an, ti Pannakatnag, ken plano ti pannakaisalakan ti Nailangitan nga Ama babaen ti Pannubbot ni Jesucristo. Bersikulo 37 naglaon kadagiti napateg a kasapulan iti panagbuniag iti Simbaan ti Apo. Dagiti bersikulo 75 agingga 79 ilawlawagda dagiti kararag ti sakramento nga us-usarentayo iti tunggal Sabbath.
Ti doktrina, prinsipio, sakramento, ken kaugalian nga impasdek ti Apo babaen ken Joseph Smith, ti Propeta ti Pannakaisubli, ket pudno a nagpateg.
Nupay nauneg dagiti kasapulan iti panangbuniag, naidumduma a simpleda. Iramanda ti pakumbaba iti sango ti Dios, ti nasneban a puso ken agbabbabawi nga espiritu, nga agbabawi iti amin a basol, awaten ti nagan ni Jesucristo, agibtur agingga iti panungpalan, ken ipakita babaen iti aramidtayo nga inawattayo ti Espiritu ni Cristo.
Nakapatpateg a naespirituan amin a kualipikasion iti panagbuniag. Awan ti kasapulan a magun-od iti ekonomia wenno kagimongan. Agpada ti naespirituan a kasapulan dagiti napanglaw ken nabaknang.
Awan dagiti kasapulan a puli, katatao, wenno etnicidad. Ilawlawag ti Libro ni Mormon a maawis ti amin makiraman iti kinaimbag ti Apo, “nangisit ken puraw, adipen ken nawaya, lalaki ken babai; … agpapada ti amin iti Dios.” “Naikkan ti amin a tao iti gundaway a kas iti tunggal maysa, ket awan ti mapawilan.”
Naikkantayo iti “kalalanga” iti sango ti Dios, awan unay ti kaipapanan ti panangyunay-unay iti panagdudumatayo. Di umisu ti paregtaendatayo ti dadduma “a mangpanunot nga ad-adda a maiduma dagiti tao iti bagitayo ken iti tunggal maysa ngem iti pudno a kasasaadda. Alaen ti [dadduma] ti pudno ngem babassit a panagduduma, ket padakkelenda ida agingga iti rangkis.”
Ti nayonna, di umisu ti pagarup ti dadduma a gapu ta naawis ti amin a tao nga umawat iti kinaimbagna ken biag nga agnanayon, awan dagiti kasapulan a galad.
Nupay kasta, paneknekan ti nasantuan a kasuratan nga amin nga agsungbat a tattao kasapulanda ti agbabawi iti basbasol ken agtungpal kadagiti bilinna. Ilawlawag ti Apo nga addaan ti amin iti moral agency ken “nawaya a mangpili iti wayawaya ken agnanayon a biag, babaen ti naindaklan a Manangibabaet ti amin a tao, … ken dumngeg iti naindaklan a bilbilinna; napudno iti balikasna, ken mangpili iti agnanayon a biag.” Tapno maawattayo dagiti bendision ti Pannubbot ti Mangisalakan, nasken a natalged nga usarentayo ti moral agency-tayo a mangpili ken Cristo ken agtulnog kadagiti bilinna.
Bayat ti biagko, napagsisisna ken napagdedebatean ti kaipapanan ti “kinawaya nga agpili” ken ”nawaya a pagayatan.” Adu ti napasamak ken agtultuloy nga intelektual nga argumento kadagitoy a topiko.
Iti nabiit pay nga akkub ti maysa a dakkel a publikasion dagiti alumni iti unibersidad, ipapilit ti maysa a nalatak a propesor ti biology, “Awan ti lugar para iti nawaya a pagayatan.” Saan a nakaskasdaaw a naadaw ti propesor iti artikulo a kunana, “Awan ti makunkuna a Dios, … ken awan ti nawaya a pagayatan, ken daytoy ti nalawa, maiduma, ubbaw nga uniberso.” Diak kabalelan a di umanamong nga ad-adda pay.
Ti maysa a kangrunaan a doktrina ti pammatitayo ket addaantayo iti moral agency, a mangiraman iti nawaya a pagayatan. Ti kinawaya nga agpili ket kabaelan nga agpili ken agtignay. Daytoy ti kasapulan iti plano ti pannakaisalakan. No awan ti moral agency, ditayo kabaelan ti agsursuro, dumur-as, wenno pumili a makikaykayysa ken Cristo. Gapu iti moral agency, “nawayatayo a mangpili iti wayawaya ken biag nga agnanayon.” Iti premortal a Konseho iti Langit, nairaman iti plano ti Ama ti kinawaya nga agpili kas napateg nga elemento. Nagalsa ni Lucifer ket “pinanggepna a dadaelen ti kinawaya ti tao nga agpili.” Maitunos iti daytoy, ti pribilehio a maaddaan iti mortal a bagi ket naipaidam ken Satanas ken dagiti simmurot kenkuana.
Inusar ti dadduma pay a premortal nga espiritu ti nawaya a panagpilida a mangsurot iti plano ti Nailangitan nga Ama. Dagiti espiritu a nabendisionan babaen ti pannakayanak ditoy mortal a biag ket agtultuloy iti nawaya a panagpilida. Nawayatayo nga agpili ken agtignay, ngem ditayo makontrol dagiti pagbanagan. “Dagiti pili ti nasayaat ken kinanalinteg ti mangiturong iti ragsak, talna, ken agnanayon a biag, idinto ta dagiti pili ti basol ken dakes ti mangiturong iti liday ken rigat.” Kas kinuna ni Alma, “Saan a kinaragsak ti kinadakes uray kaano man.”
Ditoy napeggad unay a lubong ti kompetision, kanayon nga ikarigatantayo ti agbalin a nalaing. Ti panangikarigatan nga agbalin a kasayaatan a kabaelantayo ket nalinteg ken napateg nga aramid. Maitunos dayta iti doktrina ti Apo. Dagiti agkagumaan a mangibaba wenno mangumsi iti dadduma wenno mangparigat iti balligida ket maisuppiat iti doktrina ti Apo. Ditayo a mapabasol dagiti kasasaad wenno dadduma gapu iti desision nga agtignay a maikontra iti bilin ti Dios.
Iti agdama a lubong, nalaka laeng ti agpokus iti material ken mainaig a balligi. Nalipatan ti dadduma dagiti agnanayon a prinsipio ken pili nga agnanayon ti pategna. Masiribtayo koma a mangsurot iti balakad ni President Russell M. Nelson a,nga “agpanunot iti celestial.”
Dagiti kapatgan a pili a maaramid ti dandani amin a tao aniaman ti talento, abilidad, gundaway, wenno kasasaad iti ekonomia. Napateg ti panangyunay-unay a panangyuna kadagiti pili ti pamilia. Nalawag daytoy iti intero a nasantuan a kasuratan. Panunoten ti pakaammuan iti Nephi a ni Lehi “pimmanaw a napan iti langalang. Ket pinanawanna ti balayna, ken dagiti tinawidna a daga, ken ti balitokna, ken ti pirakna, ken dagiti napateg a banag kenkuana, ket awan ti intugotna, no saan laeng a ti kaamaanna.”
Bayat ti panangsangotayo iti panagbalbaliw ti biag, adu a pasamak ti mapaspasamak a bassit wenno awan ti makontroltayo. Dagiti karit ken aksidente iti salun-at nabatad a mabalin a maibagay iti daytoy a kategoria. Nakaro ti epekto ti kallabes a pandemia ti COVID-19 kadagiti tao nga inaramidda ti amin nga umiso. Para kadagiti kapatgan a pili, adda kontroltayo. Iti panagsublik kadagiti aldawko kas misionario, ni Elder Marion D. Hanks, ti presidentemi iti mision, ket pinayulona kadakami ti paset ti daniw ni Ella Wheeler Wilcox:
Maipapan iti bambanag iti prinsipio, kababalin, panangngilin iti relihion, ken nalinteg a panagbiag, makontroltayo. Ti pammati ken panagdayawtayo iti Dios Ama ken ti Anakna, ni Jesucristo, ket pili nga aramidentayo.
Maawatanyo koma a diak agibumbunannag iti basbassit nga interes iti edukasion wenno trabaho. Kayatko a sawen a no dagiti panagregget a mainaig iti edukasion ken panggedan ket maipangpangruna ngem iti pamilia wenno ti pannakikaykaysa ken Cristo, dagiti di ninamnama a pagbanagan ket mabalin a nakadakdakes.
Ti nalawag ken simple a doktrina a nailanad iti Doktrina ken Katulagan 20 ket makasagid ken makaallukoy ta palawlawagen ken ilawlawagna dagiti sagrado a naespirituan a konsepto. Isurona a dumteng ti pannakaisalakan bayat ti panangpalinteg ken panangpasanto ni Jesucristo kadagiti agbabbabawi a kararua gapu iti parabur ti Mangisalakan. Isaganana ti kangrunaan nga akem ti Pannubbotna.
Nasken nga agkagumaantayo nga iraman dagiti dadduma iti sirkulotayo ti panagmaymaysa. No surotentayo ti balakad ni Presidente Russell M. Nelson a mangummong iti naiwaras nga Israel iti agsumbangir ti belo, nasken nga iramantayo dagiti dadduma iti sirkulo ti panagmaymaysatayo. Kas iti napintas unay nga insuro ni Presidente Nelson: “Iti tunggal kontinente ken iti ballasiw dagiti isla ti baybay, maur-urnong dagiti napudno a tao iti Ti Simbaan ni Jesucristo dagiti Santo iti Ud-udina nga Aldaw. Dagiti pagdudumaan iti kultura, pagsasao, katatao, puli, ken nasionalidad ket agbalin nga awan kaes-eskanna bayat ti iseserrek dagiti napudno iti dana ti katulagan ket umasideg iti patpatgentayo a Mannubbot.”
Mapagkaykaysanatayo iti ayat ken pammatitayo ken Jesucristo kas annak ti naayat a Nailangitan nga Ama. Ti kaipapanan ti pudno a pannakaibilang ket ti makikaykaysa ken Cristo. Dagiti ordinansa ti panagbuniag ken sakramento a nailanad iti Doktrina ken Katulagan 20, agraman dagiti katulagantayo iti templo, pagkaykaysaendatayo iti naisangsangayan a wagas ken palugodandatayo nga agbalin a maysa iti tunggal agnanayon a napateg a wagas ken agbiag iti talna ken tunos.
Paneknekak nga awan duadua a sibibiag ni Jesucristo, ket gapu iti Pannubbotna, mabalintayo ti agmaymaysa ken Cristo. Iti sagrado a nagan ni Jesucristo, amen.