Dagiti Adigi ken Raya
Mabalintayo met ti maaddaan iti bukodtayo nga adigi a lawag—maysa a raya ti lawag iti tunggal kanito.
Ti mensahek ket para kadagiti madanagan maipapan iti pammaneknekda gapu ta awan pay dagiti nakaskasdaaw a naespirituan a padasda. Ikararagko a makaipaayak iti sumagmamano a talna ken pammatalged.
Nangrugi ti Pannakaisubli ti ebanghelio ni Jesucristo iti panagsaknap ti lawag ken kinapudno! Maysa a tin-edyer a lalaki iti makin-amianan a paset ti New York, a ti naganna Joseph Smith, ti simrek iti maysa a kakaykaywan tapno agkararag. Madanagan isuna iti kararuana ken no ania ti kapanunotan ti Dos kenkuana. Tinarigagayanna ti pammakawan kadagiti basolna. Ket mariribukan no ania a simbaan ti pakikamenganna. Kasapulanna ti kinalawag ken talna—kasapulanna ti lawag ken pannakaammo.
Bayat ti panagparintumeng ni Joseph nga agkararag ken “indatag[na] ti dawat ti puso[na] iti Dios,” maysa a nabengbeng a sipnget ti nangbalkot kenkuana. Maysa a banag a dakes, mangirurumen, ken pudno unay a manglapped kenkuana—ti nangsimbalud iti dilana tapno saan a makapagsao. Nagbalin a nakaro ti puersa ti sipnget isu nga ipagarup ni Joseph a matay. Ngem “imbukbok[na] iti amin a pigsa[na] nga umawag iti Dios tapno mailisi iti bileg daytoy a kabusor a nangsallukob [kenkuana].” Ket kalpasanna, “iti dayta a kanito a sisasaganan a rumukma iti pannakapaay ken bay-an[nan] ti bagi[na] a madadael,” idi dinan ammo no makaibtur pay, maysa a nadayag a lawag ti nangpunno iti kakaykaywan, a nangwarawara iti sipnget ken ti kabusor ti kararuana.
Maysa nga “adigi a lawag” a naranraniag pay ngem iti init, ti in-inut a nagpababa agingga a nagdisso kenkuana. Nagparang ti maysa a Kinatao, ket kalpasanna ti maysa pay. Ket “artapan ti lawag ken tan-okda ti amin a panangiladawan.” Ti umuna, ti Nailangitan nga Amatayo, inawaganna ti naganna, “intudona ti kaduana—[Joseph!] Daytoy ti Ay-ayatek nga Anakko. Dumngegka Kenkuana!”
Ket babaen iti kaadda dayta a nakaskasdaaw a lawag ken kinapudno, nangrugi ti Pannakaisubli. Sumaruno ti pudno a layus ti nasantuan a paltiing ken bendision: baro a nasantuan a kasuratan, dagiti tulbek ti priesthood a naisubli, apostoles ken propeta, ordinansa ken katulagan, ken ti pannakaipasdek manen ti pudno ken sibibiag a Simbaan ti Apo, nga inton agangay mangpunno iti daga iti lawag ken pammaneknek ken ni Jesucristo ken ti naisubli nga ebangheliona.
Amin dayta, ken dadduma pay, ket nangrugi gapu iti naanep a kararag ti maysa nga ubing ken maysa nga adigi a lawag.
Addaantayo met kadagiti nakaro a panagkasapulan. Kasapulantayo met ti pannakawayawaya manipud iti naespirituan a pannakariribuk ken nailubongan a kinasipnget. Masapul a maammuantayo a mismo. Dayta ti maysa a rason nga inawisnatayo ni Presidente Russell M. Nelson tapno “igamertayo [ti bagitayo] iti nadayag a lawag ti Pannakaisubli.”
Maysa kadagiti naindaklan a kinapudno ti Pannakaisubli ket ti silulukat a langlangit—tapno umawattayo met iti lawag ken pannakaammo manipud iti ngato. Paneknekak a pudno dayta.
Ngem masapul nga agannadtayo iti naespirituan a silo. No dadduma, maupay dagiti napudno a miembro ti Simbaan ken mayadayoda pay ketdi gapu ta saanda a naaddaan iti nakaskasdaaw a naespirituan a padas—gapu ta dida pay napadasan ti bukodda nga adigi a lawag. Imballaag ni Presidente Spencer W. Kimball, “No kanayon a mangnamnama iti nakaskasdaaw, didanto makita ti naan-anay nga agtultuloy a panagayus ti naipalgak a komunikasion.”
Nalagip met ni Presidente Joseph F. Smith a “saan nga inted ti Apo kaniak dagiti pagsidsiddaawan [idi ubingak pay], ket impakitana kaniak ti kinapudno, binatog iti tunggal binatog, alagaden iti tunggal alagaden, sangkabassit ditoy ken sangkabassit idiay.”
Kasta ti gagangay a pagtuladan ti Apo, kakabsat. Imbes nga ikkanatayo ti Apo iti maysa nga adigi a lawag, itedna kadatayo ti maysa a raya ti lawag, ket kalpasanna ti maysa pay, ken dagiti sabali pay.
Agtultuloy a maibukbok kadatayo dagita a raya ti lawag. Isuro ti nasantuan a kasuratan a ni Jesucristo “ti silaw ken … biag ti lubong,” nga “ikkan ti Espirituna iti silaw ti tunggal tao nga umay iti lubong,” ken ti silawna ti “mangpunno iti law-ang,” a mangted “biag iti amin a banag.” Ti SIlaw ni Cristo ket literal nga adda iti amin nga aglawlawtayo.
No naawattayo ti sagut ti Espiritu Santo ken ikagkagumaantayo nga usaren ti pammati, agbabawi, ken dayawen dagiti katulagantayo, ngarud maikaritayo a kanayon nga umawat kadagitoy a nasantuan a raya ti lawag. Iti nakallalagip a balikas ni Elder David A. Bednar, “agbibiagtayo iti paltiing.’”
Ngem agduduma ti tunggal maysa kadatayo. Awan ti dua a tao a naan-anay nga agpadpada ti kapadasanda iti lawag ken kinapudno ti Dios. Panunotenyo no kasano a mapadasanyo ti silaw ken Espiritu ti Apo.
Nalabit a napadasanyo dagitoy a lawag ken pammaneknek bayat a “[naibaga] ti kappia iti panunotyo maipanggep iti dayta a banag” a mangburburibor kadakayo.
Wenno kas maysa nga impresion—bassit a naalumamay a timek—a dimteng “iti panunotyo ken iti pusoyo” a nangparegta kadakayo nga agaramid iti maysa a banag a naimbag, kas iti panangtulongyo iti maysa a tao.
Nalabit nga addakayo idi iti klase iti simbaan wenno iti camp dagiti agtutubo ket nariknayo ti napigsa a tarigagay a mangsurot ken ni Jesucristo ken agtalinaed a napudno. Mabalin a nagtakderkayo pay ketdi ket imbinglayyo ti pammaneknek a ninamnamayo a pudno ket nariknayo a pudno dayta.
Wenno mabalin a nagkarkararagkayo ket nariknayo ti naragsak a pammatalged nga ay-ayatennakayo ti Dios.
Mabalin a nangngegyo ti maysa a nangpaneknek ken ni Jesucristo ket sinagidna ti pusoyo ken pinunnonakayo iti namnama.
Nalabit nga agbasbasakayo iti Libro ni Mormon ket maysa a bersikulo ti nakisao iti kararuayo, a kasla inkabil daytoy ti Dios sadiay para laeng kadakayo—ket kalpasanna naamirisyo nga inaramidna.
Mabalin a nariknayo ti ayat ti Dios iti sabali bayat ti panagserbiyo kadakuada.
Wenno mabalin a marigatankayo a mangrikna iti Espiritu iti agdama gapu iti depresion wenno panagdanag ngem addaankayo iti napateg a sagut ken pammati a manglagip iti napalabas ken mangbigbig kadagiti napalabas a “nadungngo nga asi ti Apo.”
Ti kayatko a sawen ket adu dagiti wagas a panangawat kadagiti nailangitan a raya ti lawag ti pammaneknek. Sumagmamano laeng dagitoy, siempre. Mabalin a saan a dramatiko dagitoy, ngem pasetda amin iti pammaneknektayo.
Kakabsatko, saanak a nakakita iti adigi a lawag, ngem kas kadakayo, napadasak ti adu a nasantuan a raya ti lawag. Iti panaglabas dagiti tawen, inkagumaak nga ipateg dagitoy a padpadas. Makitak a bayat nga ar-aramidek dayta, ad-adu pay ti mabigbig ken malagipko kadakuada. Adtoy ti sumagmamano a pagarigan manipud iti bukodko a biag. Mabalin a saan unay a makapasiddaaw dagitoy iti dadduma, ngem napateg dagitoy kaniak.
Malagipko ti kinaariwawak a tin-edyer iti maysa a miting ti panagbuniag. Bayat a mangrugin ti miting, tinarigagayan ti Espiritu nga agtugawak ken agbalin a nadayaw. Nagtugawak ket nagulimekak iti nabati a paset ti miting.
Sakbay ti misionko, madanaganak ta saan pay la a napigsa idi ti pammaneknekko. Awan pay ti asinoman a kameng ti pamiliak ti nakapagserbi iti mision, ket diak ammo no kabaelak nga aramiden daytoy. Malagipko ti panagadal ken panagkararagko a sipipinget tapno maaddaanak iti natibtibker a pammaneknek ken ni Jesucristo. Ket iti maysa nga aldaw, bayat ti panagpakaasik iti Nailangitan nga Ama, nariknak ti nabileg a lawag ken nabara a rikna. Ket ammok. Ammok lattan.
Malagipko a nariingak iti maysa a rabii kalpasan ti adu a tawen babaen ti rikna ti “natarnaw a sirib” a mangibagbaga kaniak a maawaganak nga agserbi iti korum dagiti elder. Dua a lawas kalpasanna ket naawaganak.
Malagipko ti maysa a sapasap a komperensia a ti maysa a patpatgen a miembro ti Korum dagiti Sangapulo-ket-dua nga Apostol ti nagsao kadagiti eksakto a balikas ti pammaneknek nga imbagak iti maysa a gayyem a ninamnamak a dumngeg.
Malagipko ti panagparintumengmi kadagiti ginasut a kakabsat tapno ikararaganmi ti maysa a maipatpateg a gayyem a naka-ventilator, iti bassit ken adayo nga ospital, kalpasan a nagsardeng ti pusona. Bayat ti panagkaykaysa dagiti pusomi a nagpakaasi para iti biagna, bimmangon ket inikkatna ti ventilator iti karabukobna. Agserserbi itan a kas stake president.
Ket malagipko ti panagriingko nga addaan iti napigsa a naespirituan a rikna kalpasan a natagtagainepko ti maysa a patpatgek a gayyem ken mannursuro a nasapa a pimmusay, a nakariknaak iti nakaro unay a liday. Naisem ken naragsak. Ammok nga OK isuna.
Dagitoy ti sumagmamano kadagiti raya ti lawagko. Addaankayo met kadagiti bukodyo a padas—dagiti bukodyo a napnuan lawag a pammaneknek. Bayat ti panangbigbig, pananglagip, ken panangurnongtayo kadagitoy a raya “tapno mapagkaykaysada amin,” adda nakaskasdaaw ken nabileg a banag a mangrugi a mapasamak. “Ti lawag agsadag iti lawag”—“ti kinapudno arakupenna ti kinapudno.” Ti kinapudno ken bileg ti maysa a raya ti pammaneknek ket pabilgenna ken pagtiponenna ti maysa, ket kalpasanna ti maysa pay, ken dagiti sabali pay. Binatog iti tunggal binatog, alagaden iti tunggal alagaden, sangkabassit a raya ditoy ken sangkabassit a raya idiay—maysa a maipatpateg a naespirituan a kanito iti tunggal kanito—adda dumakkel iti unegtayo a napnuan lawag a naespirituan a padas. Nalabit nga awan maysa a raya nga umdas a napigsa wenno umdas a raniag a mangbukel iti naan-anay a pammaneknek, ngem no agtitiponda agbalinda a silaw a di maparmek ti sipnget ti panagduadua.
“O, no kasta, saan kadi a pudno daytoy?” Sinaludsod ni Alma. “Kunak kadakayo, Wen, agsipud ta daytoy ket silaw.”
“Silaw dayta nagtaud iti Dios,” insuro ti Apo kadatayo, “ket isu nga umawat iti lawag, ken agtultuloy iti Dios, umawat iti ad-adu a lawag; ket rumanraniag a rumanraniag dayta a lawag agingga iti naan-anay nga aldaw.”
Kayatna a sawen, kakabsat, nga iti panaglabas ti panawen ken babaen ti “naindaklan a kinaregta,” mabalintayo met ti maaddaan iti bukodtayo nga adigi a lawag—maysa a raya ti lawag iti tunggal kanito. Ket iti tengnga dayta nga adigi, masarakantayto met ti naayat a Nailangitan nga Ama, nga awagannanto ti nagantayo, a mangitudo iti Mangisalakantayo a ni Jesucristo, ken awisennatayo a “Dumngeg Kenkuana!”
Ipaneknekko ni Jesucristo, nga Isu ti silaw ken biag iti intero a lubong—ken iti personal a lubongmo ken lubongko.
Paneknekak nga Isu ti pudno ken sibibiag nga Anak ti pudno ken sibibiag a Dios, ken Isu ti mangidadaulo iti daytoy pudno ken sibibiag a Simbaan, nga iwanwanwan ken iturturong dagiti pudno ken sibibiag a propeta ken apostolna.
Sapay koma ta bigbigen ken awatentayo ti nadayag a silawna ket pilientayo Isuna imbes a ti kinasipnget ti lubong—iti agnanayon ken awan inggana. Iti nagan ni Jesucristo, amen.