Amin a Banag para iti Pagimbagantayo
Iti panawen ken kinaagnanayon, ti panggep ti panagparsua ken ti kinatao ti Dios Mismo ket ti panamagkaykaysa iti amin a banag para iti pagimbagantayo.
Abril 6 ita—ti anibersario ni Jesucristo a mangisubli iti Simbaanna iti ud-udina nga aldaw—ken paset ti panawen ti Paskua ti Panagungar no siraragsak a paneknekantayo ti naan-anay a biag ni Jesucristo, pangsubbot a sakripisio, ken nadayag a Panagungar.
Mangrugi ti estoria dagiti Tsino idi nakasarak ti anak ti maysa a lalaki iti napintas a kabalio.
“Anian a gasat,” kuna dagiti kaarruba.
“Kitaentayo,” kuna ti lalaki.
Kalpasanna, natnag ti anak iti kabalio ket nadangran a saanen a malaingan.|
“Anian a daksanggasat,” kuna dagiti kaarruba.
“Kitaentayo,” kuna ti lalaki.
Umay ti nadutokan a buyot ngem dida alaen ti nadangran nga anak.
“Anian a gasat,” kuna dagiti kaarruba.
“Kitaentayo,” kuna ti lalaki.
Masansan a marikna daytoy agbaliwbaliw a lubong a maipugpugso, di sigurado, no dadduma nagasat, ken —masansan—a daksanggasat. Ngem, ditoy lubong ti rigat, “ammotayo nga agkaykaysa ti amin a banag para iti pagimbagan dagiti agayat iti Dios.” Kinapudnona, no magnatayo a sililinteg ken lagipen dagiti katulagantayo, “agkaykaysa ti amin a banag para iti pagimbaganyo.”
Amin a banag para iti pagimbagantayo.
Nakakaskasdaaw a kari! Makaliwliwa a namnama manipud iti Dios Mismo! Iti namilagruan a wagas, ti panggep ti panagparsua ken ti kinatao ti Dios Amatayo ken ti Anakna, ni Jesucristo, ket maammuan ti pangrugian ken panungpalan, ipatungpal amin para iti pagimbagantayo; ken isalakan ken itan-oknatayo bayat ti pannakapasantotayo babaen iti parabur ni Jesucristo ken ti Pannubbotna.
Maisalakan ken masubbotnatayo manipud iti basol ti Pannubbot ni Jesucristo. Ngem maawatan met a naimbag ni Jesucristo ti tunggal ut-ot, rigat, sakit, ladingit, isisina. Iti panawen ken kinaagnanayon, ti balligina iti patay ken impierno ti makaatur ti amin a banag. Tumulong a mangagas iti naupay ken natagibassit, makikappia iti napungtot ken naisina, mangliwliwa iti agmaymaysa ken nailasin, mangparegta iti agduadua ken di perpekto, ken mangyeg kadagiti milagro a posible laeng iti Dios.
Agkantatayo iti aleluya ken ipukkawtayo ti hosanna! Iti agnanayon a bileg ken awan patinggana a kinaimbag, iti plano ti Dios ti ragsak ket makapagtitinnulong ti amin a banag para iti pagimbagantayo. Masangotayo ti biag nga addaan talek ken tured.
No mabatitayo a bukodtayo, ditay ammo ti bukodtayo a pagimbagan. No “piliek ti bagik,” piliek met dagiti bukodko a limitasion, pagkapuyan, pagkurangan. Kangrunaanna, tapno maaramid ti kasayaatan, nasken a nasingpettayo. Idinto ta awan ti naimbag malaksid iti Dios, agperpektotayo ken Jesucristo. Agbalintayo laeng a kapudnuan, kasayaatan mismo no ikkatentayo ti nailubongan a tao ken agbalintayo nga ubing iti sango ti Dios.
Babaen ti talek ken pammatitayo iti Dios, maikonsagrar ti dagiti pannubok ken sagabaen para iti pagimbagantayo. Ni Jose, a nailako iti pannakaadipen idiay Egipto, insalakanna ti pamiliana ken tattaona. Ti pannakaibalud ni Propeta Joseph Smith iti Liberty Jail ti nangisuro kenkuana “kadagitoy a banag ket ipaayandaka iti padas, ket agbalindanto a pagsayaatam.” Nagbiag iti pammati, mabendisionannatayo dagiti pannubok ken sakripisio a ditay pulos pilien iti wagas a ditayo pulos napanunot.
Mapapigsatayo ti pammati ken talek iti Apo nga agkaykaysa ti amin a banag para iti pagimbagantayo no gun-odentayo ti agnanayon a panirigan; maawatan ti pannuboktayo nga “apagkanito laeng”; bigbigen a maikonsagrar ti rigat iti pagimbagantayo; bigbigen a dagiti aksidente, di ninamnama nga ipapatay, makapakapuy a sakit ket paset ti mortalidad; ken agtalek a di mangted ti Nailangitan nga Amatayo iti pannubok a mangdusa wenno mangukom. Dina ikkan ti bato iti maysa a dumawdawat iti tinapay, wenno uleg iti maysa nga agdawdawat iti ikan.
No dumteng dagiti pannubok, masansan a kayattayo unay a dumngeg ken kaduaennatayo ti maysa a tao. Iti agdama, di makatulong dagiti gagangay a sungbat, nupay makaliwliwa ti panggepda. No dadduma tarigagayantayo ti maysa a tao a makipagladingit, makipagsagaba, ken makipagsangit kadatayo; ipeksatayo ti saem, pannakapaay, uray pungtot; ken bigbigentayo nga adda dagiti banag a ditay ammo.
No agtalektayo iti Dios ken iti ayatna kadatayo, uray ti kadakkelan a pannubok ket agtungpal iti pagimbagantayo.
Malagipko ti aldaw a naammuak ti maipapan iti nakaro nga aksidente iti lugan a nakairaman dagiti ipatpategko. Kadagita a kanito, iti ladingit ken pammati, mabalin laeng a kunaentayo a kas ken ni Job, “Ti Apo ti nangted, ket ti Apo ti nangala; mabendisionan koma ti nagan ti Apo.”
Iti sangalubongan a Simbaan, agarup 3,500 a stake ken distrito ken agarup 30,000 a ward ken branch ti mangipaay iti pagkamangan ken kinatalged manipud kadagiti bagyo. Ngem kadagiti stake ken ward-tayo, adu a napudno a pamilia ken indibidual ti maipasango kadagiti narigat a karit, uray no ammoda (a dida pay ammo no kasano) nga agkaykaysanto dagiti banag para iti pagimbagantayo.
Idiay Huddersfield, Inglatera, nadayagnos ni Brother Samuel Bridgstock nga addaan iti stage-four a kanser nabiit sakbay ti pannakaaawag ti baro a stake president. Gapu ta nakaro ti sakitna, dinamagna iti asawana a ni Anna no apay a mapan pay laeng painterbyu.
“Gapu ta,” kinuna ni Sister Bridgstock, “maawaganka nga agbalin a stake president.”
Idi damo a naikkan iti maysa wenno dua a tawen a panagbiag, addan iti maikapat a tawenna iti serbisio ni Presidente Bridgstock (nga adda ditoy ita). Adda dagiti naimbag ken narigat nga aldawna. Iti stake-na ket pumigpigsa iti pammati, serbisio, ken panangngaasi. Di nalaka daytoy, ngem agbibiag ti asawana ken pamiliana nga addaan pammati, panagyaman, ken panagladingit nga agtalekda nga agbalinto nga agnanayon a rag-o babaen ti panangisubli ni Jesucristo iti Pannubbot.
No naulimek, nawada, ken naraemtayo, mabalin a mariknatayo ti ngayed, panggep, ken kinatalged ti katulagan nga idiaya ti Apo. Kadagiti sagrado a kanito, mabalin nga ipalubosna a makitatayo ti dakdakkel nga agnanayon a kinapudno a paset ti inaldaw a biagtayo, a pagkaykaysaan dagiti babassit ken gagangay a banag para iti pagimbagan dagiti mangmangted ken umaw-awat.
Ni Rebeca, ti anak ti immuna a mission president-ko, insalaysayna no kasano a sinungbatan ti Apo ti kararagna para iti liwliwa babaen ti di ninamnama a gundaway a mangsungbat iti kararag ti sabali.
Maysa a rabii, gapu ta agladladingit ni Rebeca iti nabiit pay nga ipupusay ni nanangna, adda nalawag nga impresionna a mapan gumatang iti gasolina iti luganna. Idi nakagteng iti gasolinaan, naam-ammona ti maysa a baket a marigatan nga umanges iti dakkel a tangke ti oxygen. Idi agangay, inted ni Rebeca iti babai ti portable oxygen machine ni nanangna. Siyayaman a kinuna daytoy a kabsat a babai, “Insublim kaniak ti wayawayak.” Agkaykaysa dagiti banag no agministertayo a kas iti aramidenna.
Maysa nga ama a nadutokan a kaduana ti baritona a teacher kas ministering kompanionna inlawlawagna, “Ti ministering ket no agbalintayo a kaarruba a mangyeg kadagiti cookies iti mapagtalkan a gagayyem, dagiti umuna a naespirituan nga umaw-awat. Ti panagkameng iti katulagan ni Jesucristo ket mangliwliwa, mamagkaykaysa, mangkonsagrar.
Uray pay iti trahedia, ti naespirituan a panagsagana mapalagipannatayo nga ammo ti naasi a Nailangitan nga Amata dagiti kasasaadtayo no nakapuy ken agmaymaysatayo. Kas pangarigan, ti pamilia nga intaray ti ambulansia ti anakda iti ospital ket naliwliwa idi agangay idi nalagipda nga inyarasaas ti Espiritu Santo a nasaksakbay ti namnamaenda.
No dadduma ti dakdakkel nga agnanayon a realidad nga iparikna ti Apo kadatayo iramanna ti pamilia iti labes ti belo. Nasarakan ti maysa a sister ti rag-o iti kumbersion iti naisubli nga ebanghelio ni Jesucristo. Ngem dua a trahedia ti nangapekto unay iti biagna—ti pannakakitana iti aksidente iti bangka ken ti pannakapukaw ni nanangna, a nagpakamatay.
Ngem pinarmek daytoy a kabsat a babai ti panagbutengna iti danum tapno mabuniagan babaen ti pannakairarem. Ket nagbalin a naragsak unay nga aldaw, nasaksianna ti maysa a tao kas proxy iti pimmusay nga inana iti panagbuniag iti templo. “Ti panagbuniag iti templo pinaimbagna ni nanangko, ken winayawayaannak,” kinuna ti kabsat a babai. “Daytoy ti umuna a gundaway a nariknak ti talna sipud idi natay ni nanangko.”
Masarakan iti sagrado a musikatayo ti pammatalgedna nga agkaykaysa ti amin a banag para iti pagimbagantayo.
Ti Libro ni Mormon ti pakakitaan a maiggamantayo a ni Jesus ti Cristo ken ipatungpal ti Dios dagiti padtona. Naisurat babaen kadagiti naparegta a propeta a nakakita iti aldawtayo, mangrugi ti Libro ni Mormon ti raw drama—maysa a pamilia a maipaspasango kadagiti nalaus a di pagkikinnaawatan. Ngem, no adalen ken utobentayo ti 1 Nephi 1 agingga iti Moroni 10, maallukoytayo ken Jesucristo nga addaan natibker a pammaneknek a ti napasamak sadiay ken kalpasanna ti makabendision kadatayo ditoy ken ita.
No yas-asideg ti Apo babaen ti sibibiag a propetana ti ad-adu a balay ti Apo iti adu kadatayo iti ad-adu a lugar, agkaykaysa dagiti bendision ti templo para iti pagimbagantayo. Babaen ti katulagan ken ordinansa umaytayo iti Dios nga Amatayo ken ni Jesucristo ket manggun-od iti agnanayon a pannirigan iti mortalidad. Maannong a saggaysa, tunggal nagan, idiayatayo kadagiti miembro ti pamilia—kapuonan—dagiti pangisalakannga ordinansa ken bendision ti katulagan iti pagtuladan ti Apo kadagiti manangisalakan iti Bantay Sion.
No umas-asideg kadatayo dagiti templo iti adu a lugar, ti sakripisio a maidatontayo iti templo ket ti masansan a pananggun-od iti kinasanto iti balay ti Apo. Iti adu a tawen, nagurnong, nagplano, ken nagsakripisiokami tapno makapankami iti templo. Ita, no ipalubos dagiti kasasaad, umaykayo koma a masansan iti Apo iti nasantuan a balayna. Ti koma masansan a panagrukbab ken panagserbi iti templo ti mangbendision, mangsalaknib, ken mangparegta kadakayo ken ti pamiliayo—ti pamiliayo ita ken ti agbalinto a pamiliayo ken ti pagbalinanyo iti maysa nga aldaw.
Kasta met, no ipalubos ti kasasaadyo, ibilangyo ti bendision nga adda koma bukodyo a kawes iti templo. Kuna ti maysa a nanumo a lelang nga aniaman a banag ditoy lubong kaykayatna unay ti bukodna a kawes iti templo. Kinuna ti apokona, “Inyarasaas ni Lola, ‘Agserbiak iti bukodko a kawes iti templo, ket inton matayak, maitanemak kadagitoy.’” Ket idi dimteng ti tiempo, kasta ti naaramid.
Kas isuro ni Presidente Russell M. Nelson, “Amin a patientayo ken tunggal inkari ti Dios kadagiti natulagan a tao agkaykaysa nga umay iti templo.”
Iti panawen ken kinaagnanayon, ti panggep ti panagparsua ken ti kinatao ti Dios Mismo ket ti panamagkaykaysa iti amin a banag para iti pagimbagantayo.
Daytoy ti agnanayon a panggep ti Apo. Daytoy ti agnanayon a panniriganna. Daytoy ti agnanayon a karina.
No narikut ti biag ken no saan a nalawag ti panggep, no kayatyo ti agbiag a nasaysayaat ngem diyo ammo no kasano, umaykayo iti Dios nga Amatayo ken ni Jesucristo. Agtalekkayo nga sibibiagda, patpagendakayo, ken kayatda amin a banag para iti pagimbaganyo. Paneknekak nga aramidenda, awan patinggana ken agnanayon, iti sagrado a nagan ni Jesucristo, amen.