Napudno agingga iti Panungpalan
Babaen ti imana, kabaelanyo a tumbaen ti tunggal Goliat nga agparang iti biagyo.
Patpatgek nga agtutubo a gagayyem, ita kayatko a direkta a kasaritakayo—dagiti agtutubo ti Simbaan.
Makatawenen manipud idi naawagan ti Young Women General Presidency-tayo. Adun ti napasamak iti daytoy napalabas a tawen!
Naam-ammomi ti adu kadakayo ken sangkamaysa a nagadaltayo kadagiti pannursuro ni Cristo. Nagkantakami, naaddaan baro a gagayyem, ken nakipagserbikami kadakayo iti komunidadtayo. Napapigsakami iti idedengngegmi iti pammaneknekyo kadagiti komperensia dagiti agtutubo ken pasken iti lubong. Ken nakipagdaydayawkami kadakayo iti balay ti Apo.
Tunggal kanito, imburaymi ti mensahe ni Apotayo a Jesucristo. Ita a sardam saan a maiduma; adda mensahek para kadakayo nga agtutubo ti Simbaan ni Jesucristo.
Dagiti Dadakkel a Saludsod
Napanunotyo kadin no kasano nga agbalinkayo a napudno iti Dios bayat ti panagbiagyo iti lubong ti basol? Sadino ti pangalaanyo iti pigsa nga agtultuloy nga agaramid iti naimbag? Kasano a pasaranyo ti pudno a rag-o?
David ken Goliat
Iti Daan a Tulag, nakigubgubat ti buyot dagiti Filisteo kadagiti Israelita, ket binigat ken minalem, maysa a higante a Filisteo nga agnagan iti Goliat ti nangkarit iti asinoman nga Israelita a makiranget kenkuana.
Maibilang kadagiti tao nga Israelita ni David, maysa nga agtutubo a pastor a basbassit nga amang ngem ni Goliat ngem dakkel ti pammatina ken Jesucristo! Nagtallugod ni David a makiranget. Uray ti ari ket pinadasna a lapdan, ngem pinili ni David ti agtalek ken Jesucristo.
Idi damo, nakiranget ni David iti leon ken kasta met iti oso. Manipud iti bukodna a padas, ammona a sinalakniban ti Dios ken pinagballigina. Ken ni David, ti gapu ti Dios ti kapatgan a gapu. Gapuna, napno iti pammati iti Dios a di mangbaybay-an kenkuana, nangurnong iti lima a nalamuyot a bato, innalana ti palsiitna, ket sinangona ti higante.
Ibaga ti nasantuan a kasuratan a ti umuna a bato nga impuruak ni David ket nagdisso ti muging ni Goliat, a nanggibus iti biagna.
Panagsapsapul iti Sungbat
Idinto a maysa laeng a bato ti inusar ni David a nangpatay ken Goliat, naisagana isuna iti lima. Iti lima! Daytoy ti mamagpanunot kaniak no kasano a maisaganak ti bagik a mangsango iti lubong.
Kasano no tunggal maysa kadagiti bato ni David ket mangibagi iti pigsa a kasapulantayo tapno agballigitayo? Ania ti mabalin a pagbalinan dagita lima a bato? Napanunotko dagitoy a posibilidad:
-
Ti bato ti ayatko iti Dios.
-
Ti bato ti pammatik iti Mangisalakantayo, ni Jesucristo.
-
Ti bato ti pannakaammo ti pudno a pakabigbigak.
-
Ti bato ti inaldaw a panagbabawik.
-
Ti bato ti pannakagun-odko iti bileg ti Dios.
Pagsasaritaantayo no kasano a mabendisionantayo kadagitoy a pigsa.
Umuna, ti bato ti ayatko iti Dios. Ti panagayat iti Dios ti umuna a naindaklan a bilin. Ti pangiwanwan a Para iti Pigsa dagiti Agtutubo isuronatayo: “Ay-ayatennanakayo ti Dios. Isu ti Amayo. Ti naan-anay nga ayatna ti makaparegta kadakayo nga agayat Kenkuana. No ti ayatyo iti Nailangitan nga Ama ti kapatgan nga impluensia iti biagyo, agbalin a nalaklaka ti adu a pangngeddeng.”
Ti ayattayo iti Dios ken ti nasinged a relasiontayo Kenkuana ti mangted kadatayo iti pigsa a kasapulantayo a mangbalbaliw iti puspusotayo ken nalaklaka a maparmek dagiti karittayo.
Maikadua, ti bato ti pammatik iti Mangisalakantayo, ni Jesucristo. Idi immay ni Jesucristo ditoy daga, nagsagaba gapu kadagiti basoltayo ket inawatna iti Bagina dagiti ladingittayo, dagiti saemtayo, dagiti pagkapuyantayo, ken dagiti sakittayo iti bagi ken isiptayo. Dayta ti gapu nga ammona no kasano a tulongannatayo. Ti kaadda ti pammati ken Jesucristo kayatna a sawen ti naan-anay a panagtalek iti siribna, iti panawenna, iti ayatna, ken iti bilegna a mangsubbot kadagiti basoltayo. Ti bato ti pammati ken ni Jesucristo parmekennanto ti aniaman a “higante” iti biagtayo. Maparmektayo daytoy natnag a lubong gapu ta Isu ti immuna a nangparmek.
Maikatlo, ti bato ti pannakaammo ti pudno a pakabigbigak. Ti patpatgentayo a propeta, ni Presidente Russell M. Nelson, insuronatayo a dagiti kapatgan a pakabigbigantayo ket kas annak ti Dios, annak ti katulagan, ken disipulo ni Jesucristo.
Agbalbaliw ti amin no ammok no siasinoak a talaga. No agduaduaak iti kabaelak, masansan nga ulitek iti bagik iti panunotko wenno iti napigsa, “Anaknak a babai ti Dios, anaknak a babai ti Dios,” iti mamin-adu kas kasapulak agingga a mariknak manen ti panagtalek nga agtultuloy.
Maikapat, ti bato ti inaldaw a panagbabawik. Iti pangiwanwan a Para iti Pigsa dagiti Agtutubo , mabasatayo: “Ti panagbabawi saan a pannusa iti basol; daytoy ti wagas a wayawayaannatayo ti Mangisalakan iti basol. Ti panagbabawi ket panagbalbaliw—umadayo iti basol ket umasideg iti Dios. Kaipapananna ti sumaysayaat ken umawat iti pammakawan. Saan a maminsan laeng a pasamak daytoy a kita ti panagbalbaliw; agtultuloy daytoy a proseso.”
Awan ti ad-adda a makawayawaya ngem ti panangrikna iti pammakawan ti Dios ken pannakaammo a nadalus ken naikappiatayo Kenkuana. Posible ti pammakawan iti tunggal maysa.
Maikalima a bato ti bato ti pannakagun-odko iti bileg ti Dios. Dagiti katulagan nga aramidentayo iti Dios, kas iti aramidentayo iti ordinansa ti panagbuniag, ket mangted kadatayo iti pannakagun-od iti bileg ti kinadios. Ti bileg ti Dios ket pudno a bileg a tumulong kadatayo a mangsango iti karit, mangeddeng iti nasayaat, ken mangpadur-as iti kabaelantayo nga agibtur kadagiti narigat a kasasaad. Daytoy ti bileg a pakapagbalinantayo a dumur-as iti kabaelan a kasapulantayo.
Ti pangiwanwan a Para iti Pigsa dagiti Agtutubo ilawlawagna: “Dagiti katulagan ti mangikonekta kadakayo iti Nailangitan nga Ama ken ti Mangisalakan. Isuda ti mangpadakkel iti bileg ti Dios iti biagyo.”
Pagsasaritaantayo maipapan ti koneksion. Malagipyo idi insuro ni Cristo ti pagdumaan ti balay a nabangon iti bato ken iti maysa iti darat? Inlawlawag ni Elder Dieter F. Uchtdorf: “Saan a makalasat ti balay iti bagyo gapu ta napigsa ti balay. Saan met a makalasat daytoy gapu laeng ta natibker ti bato. Makalasat ti balay iti bagyo gapu ta natibker ti pannakaikapetna iti dayta napigsa a bato. Ti pigsa ti koneksion iti bato ti napateg.”
Ti personal a koneksiontayo ken Jesucristo ti mangpatured ken mangpatalek kadatayo nga agtultuloy iti baet dagiti tao a di rumespeto kadagiti patientayo wenno mangbuli kadatayo. Awisennatayo ni Cristo a mangpanunot Kenkuana a kanayon; kunana, “Kitaendak iti tunggal panunot.” Ti panangpanunot iti Mangisalakan ti manglawlawag iti panunottayo a mangeddeng, agtignay a di agbuteng, ken sumungbat iti saan iti maisupiat iti pannursuro ti Dios. No narigat ti aldawko ken mariknak a kasla diakon kabaelan pay, ti panangpanunot ken Cristo ti mangyeg kaniak iti talna ken namnama.
Kasano a magun-odtayo daytoy a bileg ni Jesucristo? Ti panagtulnog iti katulagantayo ken panangpapigsa iti pammatitayo ken Jesucristo ti tulbek.
Tinarigagayak nga adda koma pay maysa a bato ni David; dayta ti bato ti pammaneknekko. Nabangon ti pammaneknektayo iti bukod a naespirituan a padpadas a pakabigbigantayo iti nadiosan nga impluensia iti biagtayo. Awan ti makaala iti dayta a pannakaammo kadatayo. Ti panangammo iti ammotayo iti panagbiagtayo iti naespirituan a padpadastayo ket di magatadan. Ti panagbalin a pudno iti dayta a pannakaammo ti mangted kadatayo iti wayawaya. Mangted rag-o kadatayo! No ipategtayo ti kinapudno, sapulentayo, ket no masarakantayo, saluadantayo.
Maysa nga Awis
Kas met laeng iti piliek a maikanem a bato, idawatko a makipagkitakayo iti klase, korum, wenno pamiliayo ken panunoten no ania pay ti dadduma a pigsa a nasken a gun-odenyo tapno agtalinaed a napudno iti Dios ken, ngarud, maparmekyo ti lubong.
Maysa a Kari
Patpatgek a gagayyem, magagaran ni Cristo a mangkuyog kadatayo iti panagdaliasat ti biagtayo. Ikarik kadakayo, no kumpetkayo iti landok a pagkaptan, makipagnakayto ken Jesucristo. Isu tarabayennakayto, ken Isu isuronakayto. Babaen ti imana, kabaelanyo a tumbaen ti tunggal Goliat nga agparang iti biagyo.
Pammaneknek
Paneknekak nga adda rag-o iti inaldaw a panagkararag, inaldaw a panagbasa iti Libro ni Mormon, iti pannakiranud iti sakramento tunggal Domingo, ken iti ipapan iti seminary—uray iti nasapa a bigat! Adda rag-o iti panagaramid iti naimbag.
Adda rag-o ti panagbalin a napudno iti Dios ti lubong, ti Mangisalakan iti lubong, ti Ari dagiti ari. Adda rag-o iti panagbalin a disipulo ni Jesucristo.
Amatayo ti Dios. Ammona dagiti tarigagay ti pusoyo ken posibilidadyo, ket agtalek kadakayo.
Patpatgek nga agtutubo, tulongannakayo ni Jesucristo nga agbalin a napudno agingga iti udina. Kadagitoy a kinapudno iburayko ti pammaneknekko iti nagan ni Jesucristo, amen.