Ikawesyo ni Apo Jesucristo
Babaen ti panangdayaw kadagiti katulagantayo, ipaay ti Dios dagiti adu a naikari a bendision a nainaig kadagita a katulagan.
Bayat ti panagdakkel ti dua nga inaudi nga annakko, nakatakuatak kadagiti libro a makalinglingay ken makaawis ngem nagusar met iti simbolismo kadagiti estoriada. Bayat ti panagbasami iti rabii, pagay-ayatko a tulongan dagiti annakko tapno maawatanda ti simbolismo nga us-usaren ti autor tapno mangisuro kadagiti naun-uneg a prinsipio, uray dagiti prinsipio ti ebanghelio.
Ammok a mangrugi idin a maawatan daytoy ti in-inaudi nga anakko bayat ti kinaagtutubona. Nangrugi a nagbasa iti baro a libro ket kayatna laeng a tagiragsaken ti estoria, ngem intultuloyna a sinapul ti naun-uneg a kaipapanan ti amin a basbasaenna. Naupay, ngem makaisemak iti unegko
Nangisuro ni Jesus babaen kadagiti estoria ken simbolo—bukel ti mustasa a mangisuro iti bileg ti pammati, napukaw a karnero a mangisuro iti pateg dagiti kararua, nayaw-awan nga anak a lalaki a mangisuro iti kababalin ti Dios. Dagiti pangngarigna ket simbolo a pangisurona iti naun-uneg nga adalen kadagiti “adda lapayagna a pagdengngeg.” Ngem di maawatan dagiti saan a mangsapsapul ti naun-uneg a kaipapanan, kas kadagiti mangbasbasa ti isu met la a libro a binasak kadagiti annakko a dida pulos ammo nga adda naun-uneg a kaipapanan ken ad-adu pay ti masursuroda kadagita nga estoria.
Idi indaton ti Dios nga Ama ti Bugbugtong nga Anakna kas sakripisio para kadatayo, ni Jesucristo mismo ti nagbalin a kapatgan a simbolo ti di agkupas nga ayat ti Amatayo iti Langit kadatayo. Nagbalin ni Jesucristo a Kordero ti Dios.
Addaantayo iti pribilehio ken bendision a maawis iti naitulag a relasion iti Dios, a ti bukodtayo a biag ti agbalin a simbolo dayta a katulagan. Dagiti katulagan ti mangparnuay iti kita ti relasion a mangipalubos iti Dios a mangiwanwan ken mangbalbaliw kadatayo iti panaglabas ti panawen ken mangtulong kadatayo nga agbalin a kas iti Mangisalakan, mangyasideg kadatayo Kenkuana ken iti Amatayo ken mangisagana kadatayo a sumrek iti sidongda.
Tunggal tao ditoy daga ket maipatpateg nga anak a lalaki wenno anak a babai ti Dios. No pilientayo ti agbalin a paset ti katulagan, pasayaaten ken paunegenna ti relasiontayo Kenkuana. Insuro ni Presidente Russell M. Nelson a no pilientayo ti makitulag iti Dios, agbalin ti relasiontayo Kenkuana a nasingsinged ngem idi sakbay a nakitulagtayo, ken bendisionannatayo iti ad-adu pay nga asi ken ayatna, ti ayat ti katulagan a natukoy kas hesed iti pagsasao a Hebreo. Ti dana ti katulagan ket maipapan iti relasiontayo iti Dios—ti relasiontayo a hesed Kenkuana.
Kayat ti Amatayo ti naun-uneg a relasion kadagiti amin nga annakna a lallaki ken babbai, ngem pilitayo dayta. No pilientayo ti umasideg Kenkuana babaen ti relasion ti katulagan , daytoy ti mangipalubos Kenkuana nga umasideg kadatayo ken naan-anay a bendisionannatayo.
Ikeddeng ti Dios dagiti kondision ken obligasion dagiti katulagan nga aramidentayo. No pilientayo ti sumrek iti dayta a relasion, ipakitatayo Kenkuana babaen kadagiti simboliko nga aramid iti tunggal katulagan, a situtuloktayo a tungpalen dagiti kondision nga inkeddengna. Babaen ti panangdayaw kadagiti katulagantayo, ipaay ti Dios dagiti adu a naikari a bendision a nainaig kadagita a katulagan, agraman ti napapigsa a bileg nga agbalbaliw ken agbalin a kas iti Mangisalakantayo. Ni Jesucristo ti sentro kadagiti amin a katulagan nga aramidentayo, ken maipaay dagiti bendision ti katulagan gapu iti pannubbot a sakripisiona.
Ti panagbuniag babaen ti pannakairarem ti simbolo a ruangan a pagserkantayo iti relasion a katulagan iti Dios. Ti pannakairarem iti danum ken panagsang-at manen ti mangisimbolo ti ipapatay ken Panagungar ti Mangisalakan iti baro a biag. No mabuniagantayo, maisimbolo a matay ken mayanaktayto manen iti pamilia ni Cristo ken ipakitatayo a situtuloktayo nga umawat iti naganna. Datayo a mismo ti mangiladawan iti dayta a simbolismo ti katulagan. Iti Baro a Tulag mabasatayo, “Ta adu kadatayo a nabuniagan ken Cristo ti nangikawes ken Cristo.” Babaen ti panagbuniagtayo, maisimbolo ti panangikawestayo ken ni Cristo.
Ti ordinansa ti sakramento ket mangitudo met iti Mangisalakan. Ti tinapay ken danum isimboloda ti lasag ken dara ni Kristo a naibuyat para kadatayo. Ti sagut ti Pannubbotna ket simboliko a maipaay kadatayo iti tunggal lawas no ti maysa a priesthood holder, ti mangibagi mismo iti Mangisalakan, ket idiayana kadatayo ti tinapay ken danum. Bayat nga aramidentayo ti pannangan ken panaginum kadagiti emblema ti lasag ken darana, maisimbolo nga agbalin ni Cristo a pasettayo. Ikawestayo manen ni Cristo bayat ti panagaramidtayo iti baro a katulagan iti kada lawas.
Bayat ti pannakitulagtayo iti Dios iti balay ti Apo, ad-adda a mapaunegtayo ti relasiontayo Kenkuana. Amin nga aramidentayo iti templo ipamatmatna ti plano ti Amatayo kadatayo, a ti kapatgan a pasetna ket ti Mangisalakan ken ti pannubbot a sakripisiona. Isuronatayo ti Apo iti binatog iti tunggal binatog babaen ti simbolismo dagiti ordinansa ken katulagan bayat a lukatantayo dagiti pusotayo ken sikakararag nga ikagumaantayo a maawatan dagiti naun-uneg a kaipapananda.
Kas paset ti endowment iti templo, napusgantayo nga agkawes iti garment ti nasantuan a priesthood. Agpada a sagrado nga obligasion ken sagrado a pribilehio daytoy.
Kadagiti narelihiosuan a tradision, naisuot dagiti espesial a makinruar a kawes kas simbolo ti pammati ken panagkumit iti Dios, ken masansan nga isuot ti seremonial a kawes dagiti mangidadaulo iti serbisio ti panagdayaw. Dagita a sagrado a kawes ket addaan iti nauneg a kaipapanan para kadagiti mangikawes kadagitoy. Mabasatayo iti nasantuan a kasuratan nga idi un-unana a panawen, dagiti sagrado a seremonial a kawes ket naisuot met a mainaig kadagiti ritual iti templo.
Kas miembro ti Ti Simbaan ni Jesucristo dagiti Santo iti Ud-udina nga Aldaw, datayo a nangpili a makitulag iti Dios iti balay ti Apo ket agkawes iti sagrado a seremonial a makinruar a kawes bayat ti panagdaydayawtayo iti templo, a simbolo ti kawes a naisuot kadagiti nagkauna a ritual iti templo. Agkawestayo met iti garment ti nasantuan a priesthood, nga agpadpada bayat ti panagdaydayaw iti templo ken iti inaldaw a panagbiagtayo.
Ti garment ti nasantuan a priesthood ket nauneg a simboliko ken mangitudo pay iti Mangisalakan. Idi nangan da Adan ken Eva iti bunga ket masapul a pumanawda iti Minuyongan ti Eden, naited kadakuada dagiti pagan-anay a lalat a pinagkawesda. Mabalin a naisakripisio ti maysa nga ayup tapno maaramid dagita a pagan-anay a lalat—a simbolo ti bukod a sakripisio ti Mangisalakan kadatayo. Kaphar ti kangrunaan a balikas a Hebreo para iti pannubbot, a ti maysa a kaipapananna ket “tapno maabbongan” Palagipannatayo ti garment-tayo iti templo a ti Mangisalakan ken dagiti bendision ti Pannubbotna ti mangabbong kadatayo iti intero a panagbiagtayo. Bayat ti panangikawestayo iti garment ti nasantuan a priesthood iti inaldaw, agbalin dayta a napintas a simbolo a pasettayo.
Iti Baro a Tulag iti libro ti Taga-Roma, mabasatayo: “Lumabasen ti rabii ket bumigaten. Iwaksitayo dagiti aramid ti sipnget ket ikawestayo dagiti igam ti lawag. … Ikawesyo ketdi ni Apo Jesucristo.”
Agyamanak unay iti pribilehio a mangikawes iti garment ti nasantuan a priesthood a mangipalagip nga agtultuloy nga abbongannak ti Mangisalakan ken dagiti bendision ti awan patinggana a Pannubbotna iti intero a mortal a panagdaliasatko. Ipalagipna pay kaniak a bayat ti panangtungpalko kadagiti katulagak iti Dios iti balay ti Apo, maisimbolo nga inkawesko ni Cristo, nga isu a mismo ket maysa a kabal ti lawag. Salaknibannak iti kinadakes, mangted kaniak iti bileg ken papigsaenna ti kabaelak, ket agbalin a silaw ken tarabayko iti sipnget ken rigat iti daytoy a lubong.
Adda nauneg ken napintas a simboliko a kaipapanan ti garment ti nasantuan a priesthood ken ti relasionna ken Cristo. Mamatiak a ti kinatulokko a mangikawes iti nasantuan a garment ti agbalin a simbolok Kenkuana. Daytoy ti bukodko a personal a pagilasinan iti Dios, saan a pagilasinan kadagiti dadduma.
Agyamanak unay iti Mangisalakanko a ni Jesucristo. Ti pannubbot a sakripisiona kadatayo ti kangrunaan a simbolo ti awan patinggana nga ayat ti Amatayo iti Langit para iti tunggal maysa kadatayo, nga addaan kadagiti nabatad a simbolo dayta nga ayat ken sakripisio—dagiti marka iti ima, saka, ken sikigan ti Mangisalakan—a nagtalinaed uray kalpasan ti Panagungarna.
Bayat ti panangtungpalko kadagiti katulagan ken obligasionko iti Dios, agraman ti panangikawes iti garment ti nasantuan a priesthood, ti mismo a biagko ti agbalin a personal a simbolo ti ayat ken panagyamanko iti Mangisalakanko, ni Jesucristo, ken ti tarigagayko a kanayon nga adda Isuna iti dennak.
No saanyo pay nga inaramid dayta, awisenkayo a mangpili iti naun-uneg a relasion iti Dios babaen ti pannakitulagyo Kenkuana iti balay ti Apo. Adalenyo dagiti mensahe ti propetatayo (pakairamanan dagiti napintas a pannursuro iti footnotes dagiti mensahena, nga adda iti kaaduan a mensahe iti komperensia). Namin-adu a nagsaon maipapan kadagiti katulagan iti adun a tawen ken nangnangruna manipud idi nagbalin a Presidente ti Simbaan. Agsursuro kadagiti pannursurona maipapan kadagiti napintas a bendision ken napapigsa a bileg ken kapasidad a mabalinyo a gun-oden babaen ti panangaramid ken panangtungpal kadagiti katulagan iti Dios.
Ibaga ti Sapasap a Handbook a saan a kasapulan a maaddaan iti mission call wenno dandanin agkasar tapno makaaramid kadagiti katulagan iti templo. Nasken nga agtawen iti di kumurang nga 18 ti maysa a tao, saanen nga agad-adal iti haiskul wenno ti katupagna, ken miembro ti Simbaan iti di kumurang a maysa a tawen. Adda pay dagiti kasapulan a pagalagadan para iti personal a kinasanto. No adda tarigagayyo a mangpauneg iti relasionyo iti Amayo iti Langit ken ni Jesucristo babaen ti panagaramid kadagiti sagrado a katulagan iti balay ti Apo, awisenkayo a makisarita iti bishop wenno branch president-yo ket ipakaammoyo kenkuana dagiti tarigagayyo. Tulongannakayo a mangammo no kasano ti agsagana nga umawat ken mangdayaw kadagita a katulagan.
Babaen ti relasion ti katulagan iti Dios, ti bukodtayo a biag ket agbalin a sibibiag a simbolo ti panagkumit ken nauneg a panagayattayo iti Amatayo iti Langit, ti hesed-tayo Kenkuana, ken ti tarigagaytayo a dumur-as tapno iti kamaudianan agbalintayo a kas iti Mangisalakantayo, a nakasagana a sumrekto iti sidongda. Paneknekak a dagiti naindaklan a bendision dayta a relasion ti katulagan ket maikari unay iti gatadna. Iti nagan ni Jesucristo, amen.