Agbalinto a Nasayaat ti Amin Gapu Kadagiti Katulagan iti Templo
Awanen ti napatpateg pay ngem ti panangdayaw kadagiti katulagan nga inaramidyo wenno mabalin nga aramidenyo iti templo.
Patpatgek a kakabsatko, daytoy a sesion ti sapasap a komperensia ket para kaniak, maysa a sagrado a panawen. Agyamanak ta naitudingak nga agsarita kadagiti minilion a Santo iti Ud-udina nga Aldaw ken kadagiti gagayyemtayo iti intero a lubong. Ay-ayatenkayo, ken ammok nga ay-ayatennakayo ti Apo.
Nasurok a 50 a tawenen ti napalabas, idi naaddaanak iti pribilehio nga agserbi kas presidente ti Ricks College iti Rexburg, Idaho. Iti agsapa ti Hunio 5, 1976, nagbiyahekami ken baketko a Kathy manipud Rexburg agingga iti Idaho Falls Idaho Temple tapno tumabuno iti pannakailantip ti nasinged a gayyemmi. Siempre, gapu ta uppat nga ubbing nga annak a lallaki ti adda iti balaymi iti dayta a panawen, maibanag laeng ti panagbiahemi iti templo babaen ti tulong ti natured a babysitter! Imbatimi kenkuana dagiti napateg nga annakmi ket nagbiahekami iti 30 a minuto.
Nagsayaat ti padasmi iti templo iti dayta nga aldaw, kas met la iti kanayon a padasmi. Nupay kasta, kalpasan ti temple sealing—ken bayat ti panagsagsaganami nga agawid—nadlawmi ti adu a temple worker ken patron a madanagan nga agsasarita iti lobby ti templo. Di nagbayag, imbaga kadakami ti maysa kadagiti temple worker a narba ti baro a naibangon a Teton Dam iti makindaya ti Idaho! Nasurok nga 80 a bilion a galon (300 a milion a kubiko a metro) a danum ti agay-ayus iti dam ken iti 300 milia kuadrado (775 km a kuadrado) kadagiti kabangibang a katanapan. Kaaduan a paset ti siudad ti Rexburg ti nalayus, a dagiti balay ken lugan ket inyanud iti layus. Dua a kakatlo kadagiti 9,000 nga agnanaed ti kellaat a naawanan iti pagtaengan.
Kas iti namnamaenyo, dagus a napanunotmi ken nadanagankami iti kinatalged dagiti annakmi, dagiti ginasut nga estudiante ken mannursuro iti kolehio, ken iti komunidad a patpatgenmi. Awan pay 30 a milia (50 a km) ti kaadayo manipud iti balaymi, ngem iti dayta nga aldaw, sakbay a nausar dagiti selpon ken text messaging, awan ti aniaman a pamay-an tapno dagus a makasaritami dagiti annakmi, wenno saankami met a makaruar manipud iti Idaho Falls aginga iti Rexburg, ta naserraan amin a kalsada.
Ti laeng pagpilianmin ket umian iti rabii iti lokal a motel iti Idaho Falls. Nagparintumengkami ken Kathy iti siledmi iti motel ket sipapakumbaba nga impakaasimi iti Nailangitan nga Ama para iti kinatalged dagiti patpatgenmi nga annak ken kadagiti rinibu a naapektaran iti nakalkaldaang a pasamak. Malagipko pay ni Kathy a nagpagnapagna iti parbangon a madanagan gapu kadagiti annakna. Nupay adda dagiti pakadanagak, nabalinak a pinatalna ti panunotko ket nakaturogak.
Di nagbayag, riniingnak ti naayat nga agnanayon a kaduak ket kinunana, “Hal, kasano a makaturogka iti panawen a kas iti daytoy?”
Dagitoy a sasao kalpasanna ket nalawag a dimteng iti puso ken panunotko. Kinunak iti asawak: “Kathy, uray ania ti mapasamak, agbalinto a nasayaat ti amin gapu iti templo. Nakitulagtayo iti Dios ket nailantiptayo kas agnanayon a pamilia.”
Iti dayta a kanito, impatalged ti Espiritu ti Apo iti puspuso ken panunotmi no ania ti ammomi nga agpadpada a pudno a: dagiti ordinansa ti pannakailantip, a masarakan laeng iti balay ti Apo ken imatonan ti umiso nga autoridad ti priesthood, ti nangbegkes kadakami a sangkamaysa kas agassawa, ken nailantip kadakami dagiti annakmi. Pudno nga awan ti rumbeng a pagbutnganmi, ket nagyamankami idi naammuanmi a natalged dagiti annakmi.
Nalabit daytoy a sasao manipud ken ni Presidente Thomas S. Monson ti kasayaatan a mangiladawan no ania ti nariknami ken Kathy iti dayta di malipatan a rabii. “Iti papantayo iti templo, mabalin a manayonan ti kinaespirituantayo ken makariknatayo iti talna. … Maawatantayo ti pudno a kaipapanan dagiti balikas ti Mangisalakan idi kinunana: ‘Ibatik ti talna kadakayo, ti talnak itedko kadakayo. … Saan koma nga agpulkok ti pusoyo, ken di agbuteng [Juan 14:27].’”
Naparaburanak a makarikna iti dayta a talna tunggal sumrekak iti sagrado a templo. Malagipko ti umuna nga aldaw a simrekak iti Salt Lake Temple Maysaak idi a barito.
Tinangadko ti nangato a puraw a kisame a nanglawag unay iti siled a kasla nakalukat daytoy iti tangatang. Iti dayta a kanito, immay iti panunotko dagiti nalawag a balikas: “Immayakon ditoy a nalawag a lugar idin.” Ngem dagus nga immay iti panunotko, saan nga iti bukodko a timek, dagitoy a balikas: “Saan, dika pay pulos immay ditoy idi. Malaglagipmo ti maysa a kanito sakbay a nayanakka. Addaka idi iti sagrado a lugar a kas iti daytoy a mabalin nga umay ti Apo.”
Kakabsat, sipapakumbaba a paneknekak a bayat ti itatabunotayo iti templo, maipalagip kadatayo ti agnanayon a saguday dagiti espiritutayo, ti relasiontayo iti Ama ken ti nadiosan nga Anakna, ken ti kangrunaan a tarigagaytayo nga agsubli iti nailangitan a pagtaengantayo.
Kadagiti nabiit pay a mensahena iti komperensia, insuro ni Presidente Russell M. Nelson:
“Ti katatalgedan a lugar tapno naespirituan ket ti panagbiag a mayannurot kadagiti katulaganyo iti templo.”
“Amin a patientayo ken tunggal inkari ti Dios kadagiti natulagan a tao ket agkaykaysa nga umay iti templo.”
“Tunggal tao a makitulag … kadagiti templo—ken mangtungpal kadagitoy—ket ad-adda a makagun-od iti bileg ni Jesucristo.”
Insurona pay nga “apaman a makitulagtayo iti Dios, awanen ti sasaadentayo nga agbalin a neutral iti agnanayon. Saanto a baybay-an ti Dios ti relasionna kadagiti nangbukel iti kasta a begkes Kenkuana. Kinapudnona, amin a dagiti nakitulag iti Dios ket makagun-od iti naisangsangayan a kita ti ayat ken asi.”
Iti babaen ti naparegta a panangidaulo ni Presidente Nelson, pinapardas ti Apo, ken agtultuloyto a papardasenna, ti pannakaibangon dagiti templo iti intero a lubong. Daytoy ti mangted iti gundaway kadagiti amin nga annak ti Dios nga umawat kadagiti ordinansa ti pannakaisalakan ken pannakaitan-ok ken mangaramid ken mangtungpal kadagiti sagrado a katulagan. Ti panagbalin a kualipikado nga agaramid kadagiti sagrado a katulagan ket saan a maminsan laeng a panagregget no di ket maysa a pagtuladan iti tungpal biag. Kinuna ti Apo a kasapulan ti amin a puso, kabaelan, panunot, ken pigsatayo.
Ti masansan a pannakiraman kadagiti ordinansa ti templo ti mangpataud iti pagtuladan ti debosion iti Apo. No tungpalenyo dagiti katulaganyo iti templo ken laglagipenyo dagitoy, awisenyo ti pannakikadkadua ti Espiritu Santo a mangpapigsa ken mangdalus kadakayo.
Mabalin a mapadasanyunto a marikna ti lawag ken namnama a mangpaneknek a pudno dagiti kari. Mabigbigyunto a tunggal katulagan iti Dios ket gundaway nga umasideg Kenkuana, a mangparnuay iti tarigagay iti pusoyo a mangtungpal kadagiti katulagan iti templo.
Naikari kadatayo a, “Gapu iti katulagantayo iti Dios, saanto a pulos a mabannog kadagiti panagreggetna a tumulong kadatayo, ken pulos a dinanto maibus ti naasi nga anusna kadatayo.”
Babaen kadagiti katulagan iti pannakailantip iti templo a makaawattayo iti pammatalged dagiti naayat a koneksion ti pamilia nga agtultuloyto kalpasan ti ipapatay ken agpaut iti kinaagnanayon. Ti panangdayaw kadagiti katulagan ti panagasawa ken pamilia a naaramid iti templo ti Dios ti mangipaay iti salaknib manipud iti kinadakes ti kinaagum ken kinatangsit.
Ti agtultuloy a panangaywan dagiti agkakabsat iti tunggal maysa ket dumteng laeng babaen ti agtultuloy a panagreggetyo a mangidaulo iti pamiliayo iti dalan ti Apo. Ikkanyo dagiti annak iti gundaway nga agkararagda para iti maysa ken maysa. Dagus mga ammuenyo dagiti pangrugian ti di panagtutunos, ken positibo a bigbigen dagiti aramid ti saan a managimbubukod a panagserbi, nangnangruna iti maysa ken maysa. No agkararag ken agserbi dagiti agkakabsat iti tunggal maysa, agbalinda a naasi ken mayasideg dagiti pusoda iti tunggal maysa ken kadagiti nagannakda.
Daytoy ket paset ti inladawan ni Malakias iti panangipadtona iti iyaay ni propeta Elias: “Ket imulananto iti puso dagiti annak dagiti kari a naaramid kadagiti amma, ket umasidegto ti puso dagiti annak kadagiti ammada. No saanto a kasta, awan duadua a madadaelto ti sangabukel a daga iti yaayna.”
Sigurado a dumteng kadatayo amin dagiti pannubok, karit, ken sakit ti nakem. Awan kadatayo ti nawaya manipud iti “siit ti lasag.” Nupay kasta, bayat ti itatabunotayo iti templo ken pananglagiptayo kadagiti katulagantayo, makapagsaganatayo nga umawat iti personal a panangiturong manipud iti Apo.
Idi nagkasarkami ken Kathy ken nailantip iti Templo ti Logan Utah, inaramid ni Elder idi a ni Spencer W. Kimball ti pannakailantipmi. Iti sumagmamano a balikas nga insaona, intedna daytoy a balakad, “Hal ken Kathy, agbiagkayo tapno no dumteng ti awag, nalaka a makapanawkayo.”
Idi damo, saanmi a maawatan no ania ti kaipapanan dayta a balakad kadakami, ngem inaramidmi ti amin a kabaelanmi nga agbiag iti wagas a nakasaganakami a pumanaw nga agserbi iti Apo no dumteng ti awag. Kalpasan ti dandani 10 a tawen a panagasawami, dimteng ti di ninamnama nga awag manipud iti Commissioner of Church Education, ni Neal A. Maxwell.
Ti naayat a balakad nga inted ni Presidente Kimball iti templo a kabaelan ti “nalaka a makapanaw” ket pimmudno. Naawatmi ken Kathy ti maysa nga awag a panawan ti kasla gagangay a personal a situasion ti pamilia tapno agserbi iti maysa a rebbengen iti lugar a saanko nga ammo. Nupay kasta, nakasaganan ti pamiliami a pumanaw gapu ta ti maysa a propeta, iti nasantuan a templo, maysa a lugar ti paltiing, nakitana ti masakbayan a pasamak a nakaisaganaanmin.
Patpatgek a kakabsatko, paneknekak nga awanen ti napatpateg ngem ti panangdayaw kadagiti katulagan nga inaramidyo wenno mabalin nga aramidenyo iti templo. Uray sadino ti ayanyo iti dana ti katulagan, paregtaenkayo nga agbalinkayo a kualipikado ken maikari a tumabuno iti templo. Tumabunokayo agingga nga ipalubos dagiti kasasaadyo. Mangaramid ken tungpalen dagiti sagrado a katulagan iti Dios. Ipanamnamak kadakayo ti isu met laeng a kinapudno nga imbagak ken ni Kathy iti tengnga ti rabii, dandani lima a dekada ti napalabasen, iti maysa a siled ti motel iti Idaho Falls: “Uray ania ti mapasamak, agbalinto nasayaat ti amin gapu kadagiti katulagan iti templo.”
Ipaayko kadakayo ti natibker a pammaneknekko a ni Jesus ti Cristo. Sibibiag ken idadauluanna ti Simbaanna. Balay ti Apo dagiti templo. Ni Presidente Russell M. Nelson ti sibibiag a propeta ti Dios ditoy daga. Ay-ayatek isuna, ken ay-ayatek ti tunggal maysa kadakayo. Iti sagrado a nagan ni Jesucristo, amen.