“Agtalnakayo, ken Ammuenyo a Siak ti Dios”
Mabalintayo ti agtalna ken ammotayo a ti Dios ti Nailangitan nga Amatayo, annaknatayo, ken ni Jesucristo ti Mangisalakantayo.
Bayat ti nabiit pay nga aldaw ti open house ken media para iti baro a balay ti Apo, indauluak ti grupo dagiti periodista iti panagpasiar iti sagrado a pasdek. Inladawak dagiti panggep dagiti templo iti Ti Simbaan ni Jesucristo dagiti Santo iti Ud-udina nga Aldaw ken sinungbatak ti adu a napipintas a saludsodda.
Sakbay a simrek iti celestial a siled, inlawlawagko a daytoy partikular a siled iti balay ti Apo ket naisimbolo a mangibagi iti talna ken ngayed ti nailangitan a pagtaengan a pakapagsubliantayo kalpasan daytoy a biag. Impakitak kadagiti sangailimi a dikami agsao no addakami iti celestial a siled, ngem maragsakanak a mangsungbat iti aniaman a saludsod kalpasan nga umakarkami iti sumaruno a pagsardengan iti panagpasiar.
Kalpasan ti iruruarmi iti celestial a siled ken iti panaguummongmi iti sumaruno a lokasion, dinamagko kadagiti bisitami no adda napaliiwda a kayatda nga ibinglay. Kinuna ti maysa kadagiti periodista, “Diak pay pulos napadasan ti aniaman a kas iti dayta iti unos ti biagko. Diak ammo nga adda naulimek a kas iti dayta iti lubong; Diak patien a posible ti kasta a kinaulimek.”
Nasdaawak iti agpada a kinapasnek ken kinatangken ti sao daytoy a tao. Ket ti reaksion ti periodista ti nangitampok iti maysa a napateg nga aspeto ti kinaulimek—ti panangparmek ken panangitunos iti riribuk ti akinruar nga aglawlawtayo.
Idi inutobko idi agangay ti komento ti periodista ken ti masansan a naaliwaksay a kapartak ti moderno a biagtayo—ti kinaokupado, ringgor, dibersion, pakasingaan, ken panagliklik a kasla masansan kasapulan ti atensiontayo—maysa a scripture ti napanunotko: “Agtalnakayo, ken ammuen a siak ti Dios.”
Ikararagko a lawlawagannatayo ti Espiritu Santo no ibilangtayo iti nangatngato ken nasansantuan a dimension ti kinaulimek iti biagtayo—maysa nga akin-uneg a naespirituan a kinaulimek ti kararua a mangpakaammo ken mangpalagip kadatayo a ti Dios ti Nailangitan nga Amatayo, annaknatayo, ken ni Jesucristo ti Mangisalakantayo. Daytoy a naisangsangayan a bendision ket magun-od ti amin a miembro ti Simbaan a sipupudno nga agkagkagumaan nga agbalin a “natulagan a tattao ti Apo.”
Agtalnakayo
Idi 1833, dagiti Santo iti Missouri ti puntiria ti nakaro a pannakaidadanes. Pinapanaw ida dagiti mangriribuk iti balbalayda iti Jackson County, ket pinadas ti dadduma a miembro ti Simbaan nga ipasdek ti bagbagida iti sabali a probinsia iti asideg. Ngem nagtultuloy ti pannakaidadanes, ket adu dagiti pangta ti ipapatay. Kadagitoy makakarit a kasasaad, impalgak ti Apo ti sumaganad nga instruksion ken ni Propeta Joseph Smith iti Kirtland, Ohio:
“Ngarud, bay-anyo a maliwliwa dagiti pusoyo maipanggep iti Zion; ta adda kadagiti imak ti amin a lasag; agtalnakayo ket ammuenyo a siak ti Dios.”
Patiek a ti balakad ti Apo nga “agtalna” ket ad-adda nga amang ngem iti saan a panagsao wenno saan a panaggaraw laeng. Nalabit a panggepna a manglagip ken agpannuraytayo Kenkuana ken iti bilegna “iti amin a panawen ken iti amin a banag, ken iti amin a lugar.” Gapuna, ti “agtalna” ket mabalin a wagas a mangipalagip nga agpokustayo iti Mangisalakan kas ti ultimo a pagtaudan ti naespirituan a kinaulimek ti kararua a mangpabileg kadatayo nga agaramid ken mangparmek kadagiti narigat a banag.
Bangonen iti Bato
Ti pudno a pammati kanayon a maipokus ken Apo Jesucristo—Kenkuana kas Nadiosan ken Bugbugtong nga Anak ti Agnanayon nga Ama ken Kenkuana ken ti makasubbot a mision nga impatungpalna.
“Gapu ta nasungbatanna ti gibus ti linteg, ket adda kalinteganna iti amin nga adda pammatina kenkuana; ket kadakuada nga addaan pammati kenkuana agtalek iti tunggal nasayaat a banag; gapuna imbabaetna ti panggep dagiti annak ti tao.”
Ni Jesucristo ti Mannubbottayo, Mangibabaettayo, ken Advocate-tayo a kadua ti Agnanayon nga Ama ken ti bato a pangibangonantayo iti naespirituan a pamuon ti biagtayo.
Inlawlawag ni Helaman, “Laglagipen, laglagipen a babaen ti bato ti Mannubbottayo, nga isu ni Cristo, ti Anak ti Dios, a nasken a bangonenyo ti pamuonyo ; tapno no yeg ti sairo ti nabileg nga anginna, wen, dagiti gayang iti alipugpog, wen, no amin dagiti uraro ken nabileg a bagyona sumaplit kadakayo, awanto ti bilegna kadakayo a mangirarem, iti taaw ni ladingit ken awan inggana a kinaay-ay-ay, gapu iti bato a binangonyo, nga awan duadua a pamuon, ti pamuon a no bangonen dagiti tao saanda a matuang.”
Ti simbolismo ni Cristo kas “bato” a nasken a pangibangonantayo iti pamuon ti biagtayo ti kangrunaan a makaisuro. Laglagipen koma iti daytoy a bersikulo a saan a ti Mangisalakan ti pamuon. Ketdi, mabalakadantayo a mangbangon iti personal a naespirituan a pamuontayo Kenkuana.
Ti pamuon ket paset ti maysa a pasdek a mangisilpo daytoy iti daga. Ti natibker a pamuon ti mangipaay iti proteksion kadagiti natural a didigra ken adu pay a makadadael a puersa. Ti umno a pamuon ket mangiwaras pay iti dagsen ti maysa a pasdek iti nalawa a lugar tapno maliklikan ti panaglablabes ti panagkarga ti daga iti baba ken mangted iti patad a rabaw para iti konstruksion.
Nasken ti natibker ken mapagtalkan a koneksion ti daga ken ti pamuon no agtalinaed a natibker ken natalged ti pasdek iti panaglabas ti panawen. Ket para kadagiti naipangruna a kita ti konstruksion, dagiti anchor pin ken landok a baras ti mausar a mangikapet iti pamuon ti maysa a pasdek iti “bedrock,” ti napuskol, solido a bato iti baba dagiti materiales iti rabaw kas iti daga ken graba.
Iti isu met la a wagas, ti pundasion ti biagtayo nasken a maikonekta ken Cristo no agtalinaedtayo a natibker ken natalingenngen. Maidilig dagiti sagrado a katulagan ken ordinansa ti naisubli nga ebanghelio ti Mangisalakan kadagiti anchor pin ken landok a baras a mausar a mangikonekta iti maysa a pasdek iti bato (bedrock). Tunggal sipupudnotayo nga awaten, amirisen, laglagipen, ken pabaruentayo dagiti sagrado a katulagan, ad-adda a natibker ken natalged dagiti naespirituan nga angklatayo iti “bato” ni Jesucristo.
“Gapuna, dakkel ti namnama ti mamati iti Dios iti nasaysayaat a lubong, wen, uray pay iti lugar iti makanawan ti Dios, a yeg ti pammati dayta a namnama, a mangaramid iti angkla a lumansad iti kararua dagiti tao, a mangikkat iti duaduada ken mamatibker kadakuada, a kanayon a mangsursurot kadagiti naimbag nga aramid, ta naibagnosda a mangigloria iti Dios.”
In-inut ken umad-adu nga “iti proseso ti panawen,” “[taraonan] koma ti saguday ti pampanunottayo nga awan ressatna,” “[mapapigsa] ti panagtalektayo iti imatang ti Dios,” ken “ti Espiritu Santo [isu] ti kanayon a kaduatayo.” Agbalintayo nga ad-adda a naipadaga, nairamut, naipasdek, ken natalged. No mabangon ti pamuon ti biagtayo iti Mangisalakan, nabendisionantayo nga “agtalna”—a maaddaan iti naespirituan a pammatalged a ti Dios ti Nailangitan nga Amatayo, annaknatayo, ken ni Jesucristo ti Mangisalakantayo.
Dagiti Sagrado a Panawen, Nasantuan a Lugar, ken ti Pagtaengan
Ipaay ti Apo ti agpada a sagrado a panawen ken nasantuan a lugar a mangtulong kadatayo a mangpadas ken mangsursuro itoy akin-uneg a kinaulimek ti kararuatayo.
Kas pagarigan, ti Sabbath ti aldaw ti Dios sagrado a panawen naituding a manglaglagip ken agdayaw iti Ama iti nagan ti Anakna, a makipaset iti ordinansa ti priesthood, ken umawat ken mangpabaro iti sagrado a katulagan. Tunggal lawas agdaydayawtayo iti Apo bayat ti panagadaltayo iti pagtaengan ken kas “makipagili kadagiti santo” kabayatan ti sakramento ken dadduma pay a miting. Iti nasantuan nga aldawna, dagiti panunot, tignay, ken kababalintayo ket pagilasinan nga itedtayo iti Dios ken pakakitaan iti ayattayo Kenkuana. Tunggal Domingo, no kayattayo, mabalintayo ti agtalna ken ammotayo a ti Dios ti Nailangitan nga Amatayo, annaknatayo, ken ni Jesucristo ti Mangisalakantayo.
Ti kangrunaan a tampok ti panagdayawtayo iti Sabbath ket ti “mapan iti balay a pagkararagan ket mangidaton kadagiti sakramento[tayo] iti nasantuan nga aldaw [ti Apo].” “[Dagiti] balay a pagkararagan” a paguummongantayo iti Sabbath ket dagiti balay a pagmimitingan ken dadduma pay a naanamongan a pasilidad—nasantuan a luglugar ti pagraeman, pagdaydayawan, ken pagsursuruan. Tunggal balay a pagmimitingan ken pasilidad ket maidedikar babaen ti turay ti priesthood kas lugar a mabalin a pagnaedan ti Espiritu ti Apo ken makagun-od dagiti annak ti Dios “iti pannakaammo iti Mannubbotda.” No kasta, “makapagtalnatayo” iti nasantuan a luglugar a pagdaydayawan ken ammotayo a sigsigurado a ti Dios ti Nailangitan nga Amatayo, annaknatayo, ken ni Jesucristo ti Mangisalakantayo.
Ti templo ti maysa pay a nasantuan a lugar a naipangruna a naituding iti panagdaydayaw ken panagserbi iti Dios ken panagsursuro iti agnanayon a kinapudno. Naiduma ti panagpanunot, panagtignay, ken panagkawestayo iti balay ti Apo iti aniaman a sabali a lugar a masansan a papanantayo. Iti nasantuan a balayna, makapagulimektayo ken ammotayo a ti Dios ti Nailangitan nga Amatayo, annaknatayo, ken ni Jesucristo ti Mangisalakantayo.
Agpada dagiti kangrunaan a panggep ti sagrado a panawen ken nasantuan a lugar: a mangulit-ulit nga ipamaysa ti pasnektayo iti Nailangitan nga Amatayo ken ti planona, ni Apo Jesucristo ken ti Pannubbotna, ti mangitantandudo a bileg ti Espiritu Santo, ken dagiti kari a mainaig iti sagrado nga ordinansa ken katulagan ti naisubli nga ebanghelio ti Mangisalakan.
Ita ulitek ti prinsipio nga immuna nga inyunay-unayko. Nasken a ti pagtaengantayo ti ultimo a panagkadua ti sagrado a panawen ken nasantuan a lugar a mabalin a “pagtalnaan” dagiti indibidual ken pamilia ken ammoda a ti Dios ti Nailangitan nga Amatayo, annaknatayo, ken ni Jesucristo ti Mangisalakantayo. Ti panangpanaw iti pagtaengantayo nga agdayaw iti Sabbath ken iti balay ti Apo ket sigurado a kasapulan. Ngem iti laeng panagsublitayo iti pagtaengantayo nga addaan naespirituan a pannirigan ken pigsa a nagun-od kadagita a nasantuan a lugar ken aktibidad a mangtarabay iti pokustayo iti kangrunaan a panggep ti mortal a biag ken mangparmek iti sulisog a nasaknap unay iti natnag a lubongtayo.
Ti agtultuloy a padastayo iti Sabbath, templo, ken pagtaengan ti mangpatibker koma kadatayo iti bileg ti Espiritu Santo, iti agtultuloy ken napigpigsa a koneksion ti katulagan iti Ama ken Anak, ken iti “naan-anay a kinaraniag ti namnama” iti agnanayon a panggep ti Dios.
No aguummong ti pagtaengan ken Simbaan ken Cristo, mariribukantayo iti agsumbangir, ngem ditay mariribukan iti panunot ken pusotayo. Mabalin a mariribukantayo kadagiti kasasaad ken karittayo, ngem saantayo a maupay. Mabalin a maidadanestayo, ngem mabigbigtayo pay a saantayo nga agmaymaysa. Makaawattayo iti naespirituan a pigsa tapno agtalinaed a natibker, natalingenngen, ken pudno.
Kari ken Pammaneknek
Ikarik a no bangonentayo iti pamuon ti biagtayo iti “bato” ni Jesucristo, mabendisionannatayo ti Espiritu Santo nga umawat iti indibidual ken naespirituan a kinaulimek ti kararua a mangpabalin kadatayo a mangammo ken manglagip a ti Dios ti Nailangitan nga Amatayo, annaknatayo, ni Jesucristo ti Mangisalakantayo, mabendisionantayo nga agaramid ken mangparmek iti naririgat a banag.
Sirarag-o a saksiak a ti Dios ti Nailangitan nga Amatayo, annaknatayo, ken ni Jesucristo ti Mannubbottayo ken ti “bato” ti pannakaisalakantayo. Paneknekak daytoy iti sagrado a nagan ni Jesucristo, amen.