Panangsuporta iti Tumantanor a Henerasion
Dagiti relasion iti biag dagiti agtutubo ti addaan iti kadakkelan nga impluensia kadagiti pilida.
Iti panagsaganak a makisarita kadakayo, naallukoynak iti estoria ni Helaman ken dagiti agtutubo nga annak dagiti tao ni Ammon. Nariknak ti bileg dagiti propeta iti Libro ni Mormon a mangisursuro kadagiti nagannak, bishop, ken miembro ti ward babaen ti panangadal iti daytoy a salaysay.
Ni Helaman ket maysa a tao a mapagtalkan dagiti agtutubo nga Ammonite. Tinulonganna ida a rumang-ay ken dumur-as iti kinalinteg. Am-ammo ken ay-ayatenda isuna ket “kinayatda nga isu ti mangidaulo kadakuada.”
Ay-ayaten ni Helaman dagitoy nga agtutubo a lallaki a kas annakna ket nakitana ti potensialda. Insuro ni Elder Dale G. Renlund “tapno nasamsamay ti panagserbitayo iti dadduma nasken a kitaentayo ida … iti wagas a panangkita ti Nailangitan nga Ama kadakuada. Iti kastoy laeng a marugiantayo a maawatan ti pudno a pateg ti kararua. Iti kastoy laeng a maawatantayo ti ayat ti Nailangitan nga Ama para iti amin … nga annakna.” Naparaburan dagiti bishop ita iti pannakaawat tapno makitada ti nadiosan a kinasiasino dagiti agtutubo nga aywananda.
Ni Helaman ket “binilangna” dagiti agtutubo a lallaki nga adda iti aywanna. Impangrunana ti panangbangon iti natibker a relasionna kadakuada.
Iti napeggad a tiempo a ti biag ken ipapatay ket agpannuray, saan nga ammo da Helaman ken dagiti agtutubo a soldadona ti ayan ti armada a mangkamkamat kadakuada. Nakiinnuman ni Helaman kadagiti agtutubo:
“Kitaen, saantayo ammo ngem nagsardengda ta panggepda a mapantayo kadakuada. …
“Ngarud ania ti masaoyo, annakko … ?”
Simmungbat dagitoy napudno nga agtutubo, “Ama, kitaen adda kadakami ti Diosmi, ket saanna nga ipalubos a mataykami; ngarud mapankami.” Nangabakda iti gubat, ta sinuportaran ni Helaman dagitoy nga agtutubo a lallaki iti pangngeddengda nga agtignay.
Addaan iti naindaklan a panggep dagiti agtutubo nga Ammonite ket nagtignayda a situtured “iti suporta iti tattao.” “Daytoy bassit a puersa,” nga indauluan ni Helaman, ti nangisaknap iti “dakkel a namnama ken adu a ragsak” kadagiti puso dagiti aduan kapadasan a soldado dagiti Nephite. Idauluan dagiti bishop ita dagiti naisangsangayan nga agtutuboda iti panangbendision iti ward ken panangummong iti Israel. Insuro ni Presidente Russel M. Nelson a daytoy ti “mision a nakaibaonan[da] ditoy daga.”
Kas kadagitoy agtutubo nga Ammonite a “napudno iti amin a panawen iti ania man a banag a maitalek kadakuada,” sipupudno a sinurot ni Helaman dagiti liderna. Aniaman ti karit wenno pannakapaay, kanayon a nagtalinaed ni Helaman a “natibker ti determinasionna” a mangparang-ay iti panggepda. Idi naibaga kenkuana “nga agmartsa a kadua dagiti babassit a lallaki nga annakna.” nagtungpal.
Nabendisionan dagiti agtutubo ita bayat ti panangsurot dagiti bishop iti panangiwanwan dagiti lidertayo a “makiinnumanda [kadag]iti presidente iti Young Women iti ward.” Siguraduen dagiti stake president a maisuro dagiti bishop ken presidente ti Young Women tapno maipatungpalda dagiti pagrebbenganda kadagiti agtutubo.
Tinungpal ni Helaman dagiti katulagan. Idi insuro ni Ammon ti ebanghelio kadagiti nagannak dagiti agtutubo a lallaki, dagus nga inawat dagiti nagannakda daytoy. Kasta unay ti panagkumitda iti baro a biagda a kas nalinteg a disipulo ta nangaramidda pay iti katulagana nga “indissoda dagiti armas iti yaalsada.” Ti laeng banag a pakaigapuan ti panangsalungasingda itoy a katulagan, ken agsublida iti napalabas a pannakigubatda, ket no makitada nga agpeggad dagiti Nephite.
Kayat dagiti Ammonite a tulongan dagitoy a tattao a nangipaay kadakuada iti natalged a pagtaengan. Ni Helaman, agraman dagiti dadduma, inallukoyna ida a tungpalenda ti katulagan a dida pulos makigubaten. Ad-adda a nagtalek iti pigsa nga ipaay ti Dios ngem iti pigsa a mabalin nga ipaay dagitoy nga Ammonite babaen kadagiti kampilan ken panada.
Idi naipasango ni Helaman ken dagiti agtutubo a mannakigubatna kadagiti nakaam-amak a karit, determinado ni Helaman. “Ngem, kitaen, awan ti aniamanna daytoy—agtalekkami nga isalakannakami ti Dios.” Iti maysa a pasamak, idi dandanin matayda iti bisin, ti inaramidda ket “inbukbok[da] dagiti rikriknaen[da] iti panagkararag iti Dios, a papigsaenna [ida] ken isalakanna [ida] … [ket] sinarungkaran ida ti Apo … nga addaan kadagiti pammatalged nga isalakanna [ida]” “gapu iti naisangsangayan a pammatida iti dayta a naisuro kadakuada a patien.”
Maammuantayo ken ni Helaman a sinuportaran dagitoy nga agtutubo a lallaki dagiti nagannakda. Ammo dagitoy a napudno a nagannak nga addaanda iti kangrunaan a pagrebbengan a mangisuro kadagiti annakda. Insuroda dagiti annakda a mangtungpal kadagiti bilin ken “magna a sililinteg” iti sanguanan ti Dios. Insuro ida dagiti innada “a no saanda nga agduadua, isalakanto ida ti Dios.” Nangipaay dagiti ammada iti nabileg nga ulidan iti panagaramid iti katulagan. Ammo dagitoy dati a mannakigubat dagiti nakabutbuteng a kapadasan bayat ti pannakigubat. Intalekda dagiti awan kapadasanna nga annakda a lallaki iti panangaywan ni Helaman ket sinuportaranda ida babaen ti panangipatulodda iti “adu a probision.”
Saan nga agmaymaysa ni Helaman iti panagserbina iti agtutubo nga armadana. Adda dagiti tao iti aglawlawna a nagkiddawanna iti suporta ken panangiwanwan. Nagpatulong ken ni Kapitan Moroni, ket dimteng daytoy.
Awan ti asinoman nga agserserbi iti pagarian ti Apo nga agserbi nga agmaymaysa. Binendisionannatayo ti Apo kadagiti ward ken stake. Babaen ti naisubli nga organisasionna, addaantayo kadagiti resources, sirib, ken pammaregta a mangsango iti aniaman a karit.
Mangipaay ti bishop iti panangiwanwan iti ward babaen kadagiti konseho. Itandudona dagiti interbiu iti ministering iti kada-tallo a bulan ken paregtaenna ti korum dagiti elder ken Relief Society a mangitungpal iti pagrebbenganda a panagminister kadagiti pamilia. Dagitoy a panguluen ti mangidaulo iti panangtingiting kadagiti kasapulan ken panangbirok kadagiti naparegta a solusion. Mangipaay dagiti stake president iti suporta babaen ti panangisuro kadagiti panguluen ti korum dagiti elder ken Relief Society kadagitoy a pagrebbengan.
Masarakan ti kasapulan a panangiwanwan para kadagiti lider ken nagannak iti Gospel Library ken iti Gospel Living apps. Kadagitoy naparegta a resources, masarakantayo dagiti nasantuan a kasuratan, pannursuro dagiti moderno a propeta, ken ti Sapasap a Handbook. Ti tab para kadagiti Agtutubo iti Gospel Library ket addaan iti adu a resources para iti korum ken panguluen dagiti klase ken ti Para iti Pigsa Dagiti Agtutubo: Maysa a Pangiwanwan iti Panagpili Bayat ti panangadal dagiti amin a kameng ti ward kadagitoy naparegta a sources ken panagsapul iti pannarabay manipud iti Espiritu, iturong ti Apo ti tunggal maysa iti panangpapigsa kadagiti agtutubo.
Mabendisionan ken mapapigsa ti intero a ward bayat nga agpokus dagiti miembro iti tumantanor a henerasion. Iti laksid dagiti kinaimperpekto ken pagkurangantayo, awisennatayo ti Nailangitan nga Ama, babaen ti pannakikadkadua ti Espirituna, a tumulong iti dadduma. Ammona a dumur-astayo ken mapasantotayo bayat ti panangsurottayo kadagiti pannignay ti Espiritu Santo. Saan a napateg no saan a perpekto ti panagreggettayo. No makikaduatayo iti Apo, makapagtalektayo a maitunos dagiti panagreggettayo iti aramidenna para kadagiti agtutubo.
Babaen ti panangsurot iti panangiturong ti Espiritu Santo iti panangtulong kadagiti agtutubo, agbalintayo a saksi iti ayat ti Nailangitan nga Ama iti biagda. Ti panagtignay kadagiti pannignay manipud iti Apo ket mangbangon kadagiti relasion ti ayat ken panagtalek. Dagiti relasion iti biag dagiti agtutubo ti addaan iti kadakkelan nga impluensia kadagiti pilida.
Masursuro dagiti agtutubo ti pagtuladan ti paltiing bayat ti pannakiramanda kadatayo iti proseso ti panangsapul ken panangsurot kadagiti pannignay nga agserbi iti dadduma. Bayat nga agpatulong dagiti agtutubo iti Apo para iti daytoy naparegta a pangiwanwan, umuneg ti relasionda ken panagtalekda Kenkuana.
Ipakpakitatayo ti panagtalektayo kadagiti agtutubo babaen ti panangipaaytayo iti suporta ken panangiturong a ditay mangituray kadakuada. Bayat ti panangitulok ken panangpalubostayo kadagiti agtutubo nga agsursuro babaen ti panaggiinnuman, panangpili iti naparegta a dana, ken panangipatungpal iti planoda, mapasarandanto ti pudno a rag-o ken panagdur-as.
Insuro ni Presidente Henry B. Eyring a “no anianto ti kapatgan ket ti masursuroda [kadakayo] maipapan iti pudno a kinasiasinoda ken ti pudno a pakapagbalinanda. Panagkunak didanto masursuro unay daytoy manipud kadagiti lektiur. Maaladanto daytoy manipud iti rikna ti kinasiasinoyo, iti panagkunayo no asinoda, ken no ania iti panagkunayo a mabalin a pagbalinanda.”
Masmasdaawtayo kadagiti agtutubotayo gapu iti turedda, pammatida, ken abilidadda. Bayat a pilienda nga agbalin a naan-anay a disipulo ni Jesucristo, maikitikitto ti ebangheliona kadagiti pusoda. Ti panangsurot Kenkuana ket agbalinto a paset ti kinasiasinoda, saan laeng a ti ar-aramidenda.
Tinulongan ni Helaman dagiti agtutubo nga Ammonite tapno makitada no kasano ti panagbiag ti maingel a disipulo ni Jesucristo. Mabalintayo ti agbalin a nabileg nga ulidan kadagiti agtutubo no kasano ti panagbiag dagiti disipulo ni Cristo ita. Ikarkararag dagiti napudno a nagannak dagitoy a pagwadan iti biag ti annakda. Awan ti programa a makasukat iti impluensia dagiti naayat a nataengan a mangtungtungpal iti katulaganda.
Kas presidente ti korum dagiti priest, makaipaay ti bishop iti pagwadan kadagiti agtutubo no kasano ti agbalin a deboto nga asawa ken naayat nga ama babaen ti panangsalaknib, panangipaay, ken panangidaulo kadagiti nalinteg a wagas. Dagiti bishop, nga addaan iti kasla “panagpokus a kas iti laser kadagiti agtutubo,” ket addaandanto iti impluensia nga agpaut iti adu a henerasion.
Dagiti agtutubo ita ket karaman dagiti kataknengan nga espiritu ti Nailangitan nga Ama. Karamanda kadagiti natibker a manangidepensa iti kinapudno ken kinawaya nga agpili iti lubong sakbay daytoy a biag. Naipasngayda iti daytoy a panawen tapno ummongenda ti Israel babaen ti nabileg a panangsaksida ken ni Apo Jesucristo. Am-ammona ti tunggal maysa kadakuada ken ammona ti dakkel a potensialda. Isu ket naanus bayat ti panagdakkelda. Subboten ken salaknibanna ida. Paimbagenna ken iwanwanna ida. Paregtaennanto ida. Dakami, dagiti nagannak ken liderda, ket nakasagana a mangsuporta kadakuada. Adda kadatayo ti Simbaan ti Mangisalakan a tumulong kadatayo bayat ti panangpadakkeltayo iti sumaruno a henerasion.
Paneknekak a ti Simbaan ni Cristo, a naisubli babaen ken ni Propeta Joseph Smith ken idauluan ita ni Presidente Russell M. Nelson, ket naorganisar a tumulong kadagiti agtutubo a mangtungpal iti naindaklan a panggepda iti daytoy ud-udina nga aldaw. Iti nagan ni Jesucristo, amen.