Naordenan idin nga Agserbi
Tarigagayan ti Nailangitan nga Amatayo nga ibaga kadakayo ti personal a pannakaordenyo idin, ket aramidennanto dayta bayat ti panangikagumaanyo a mangadal ken mangsurot iti pagayatanna.
Ita a rabii, kasaritak dagiti agtutubo iti Simbaan, ti tumantanor a henerasion dagiti agtutubo a mangidadaulo iti sumaruno a henerasion.
Idi Oktubre 2013, indeklara ti patpatgentayo a propeta, ni Presidente Russell M. Nelson: “Nabayagen nga am-ammonakayo ti Nailangitan nga Amayo. Sika, a kas anakna, pinilinakan nga umay iti daga iti daytoy umisu a panawen, nga agbalin a maysa a lider ti naindaklan nga aramidna iti daga.”
Dua a tawenen ti napalabas, intuloy ni Presidente Nelson:
“Ita sipipigsa nga ipatalgedko nga indawat ti Apo iti tunggal maikari, makabael a barito tapno agsagana ken agserbi iti mision. Para kadagiti babbarito a Santo iti Ud-udina nga Aldaw, pagrebbengan iti priesthood ti serbisio a misionario. Dakayo a babbarito, nailatangkayon para iti daytoy a panawen a maar-aramiden, ti naikari a panangummong iti Israel. …
“Para kadakayo nga agtutubo ken makabael a kakabsat a babbai, nabileg met ti mision, ngem opsional, a gundaway. … Agkararagkayo a mangammo no kayat ti Apo nga agserbikayo iti mision, ket sungbatan ti Espiritu Santo iti puso ken panunotyo.”
Ti panangibasar ti propetatayo iti panangilatang ti Apo kadagiti agtutubo iti panawentayo para iti panangummong ti Israel ken ti awisna nga agkararagkayo tapno maammuanyo no ania ti kayat ti Apo nga aramidenyo, ket paset, ti panangibasarna iti wagas ti panagbiagyo ken bendision nga inawatyo manipud iti Dios sakbay a nayanakkayo ditoy daga. Datayo amin a nayanak iti daytoy a daga ket immuna a nakipagnaed iti Nailangitan nga Amatayo kas espiritu nga annakna. Impakdaar ti Apo ken ni Moises, “Ta siak, ti Apo a Dios, pinarsuak amin a banag … a naespirituan, sakbay a nagbalinda a gagangay iti rabaw ti daga.”
Idi pinarsuanakayo iti naespirituan, inayatnakayo kas espiritu nga annakna ken inkabilna iti uneg ti tunggal maysa kadakayo ti nadiosan a kababalin ken pagtungpalan.
Bayat ti biagyo sakbay daytoy a biag, “napadur-asyo ti pakaam-ammuan[yo] ken napaadu[yo] dagiti naespirituan a kabaelanyo.” Naparaburankayo iti sagut ti kinawaya nga agpili, ti abilidad nga agpili para iti bagiyo, ken nagaramidkayo kadagiti napateg a pangngeddeng, kas iti panangsurot ti plano ti kinaragsak ti Nailangitan nga Ama, nga isu ti “pakagun-odan iti nagtagilasag a bagi ken pakaaddaan iti padas iti daga tapno dumur-as … ket iti kamaudiananna maragpat ti nadiosan a pagtungpalanyo a kas agtawid iti agnanayon a biag.” Daytoy a pangngeddeng ti nangaring iti biagyo idi, iti biagyo sakbay daytoy a biag, ket agtultuloy a mangaring iti biagyo ita. Kas maysa nga anak ti Dios a nagbiag sakbay ti yaay iti daga, “dimmakkelkayo iti kinasaririt ket nasursuroyo nga impateg ti kinapudno.”
Sakbay a nayanakkayo, dinutokan ti Dios ti tunggal maysa a mangtungpal kadagiti espesipiko a mision bayat ti mortal a panagbiagyo ditoy daga. No agtalinaedkayo a maikari, dagiti bendision dayta a bilin ti biag sakbay ti yaay iti daga, ti mangpalubos a maaddaankayo kadagiti gundaway iti daytoy a biag, agraman dagiti gundaway a panagserbi iti Simbaan ken pannakipaset iti kapatgan nga aramid a mapaspasamak ditoy daga ita: ti panaguummong ti Israel. Dagita a kari ken bendision ti biag sakbay ti yaay iti daga ket maawagan iti pannakaorden idin sakbay a nayanakkayo. “Agaplikar ti doktrina ti pannakaorden idin sakbay a nayanak kadagiti amin a kameng ti Simbaan. Ti pannakaorden sakbay a nayanak ket saan a manggarantia nga umawatkayto kadagiti masinunuo nga awag wenno pagrebbengan. Dagitoy a bendision ken gundaway a dumteng iti daytoy a biag ket resulta ti nalinteg a panangusaryo iti kinawaya nga agpili, kas met lang ti pannakaordenyo idin, dimteng kas resulta ti kinalinteg. Bayat ti panangipakitayo a maikari ken rumang-aykayo iti dalan ti katulagan, umawatkayto iti gundaway nga agserbi iti klaseyo iti Young Women wenno korum ti priesthood. Maparaburankayto nga agserbi iti templo, agbalin a ministering brother wenno sister, ken agserbi iti mision kas disipulo ni Jesucristo.
Apay a napateg ti mangammo ken maawatan ti pannakaordenyo idin sakbay a nayanakkayo? Iti panawen a nakaad-adu dagiti saludsod, nga adu ti agsapsapul a mangammo iti pudno a kinasiasinoda, ti kinapudno nga ammo ti Dios ken binendisionanna ti tunggal maysa kadatayo sakbay a nayanaktayo ditoy daga kadagiti “kangrunaaan a talugading ken panggep ti … biag sakbay ti yaay iti daga, mortal, ken agnanayon a kinasiasino ken panggep” ket mangyeg iti nasam-it a talna ken pammatalged iti panunot ken pusotayo. Ti pannakaammo no siasinokayo ket mangrugi iti pannakaawat kadagiti naituding a bendision ti Dios a naited kadakayo sakbay a nayanakkayo ditoy daga. Tarigagayan ti Nailangitan nga Amatayo nga ipalgak kadakayo ti personal a pannakaordenyo idin, ket aramidennanto dayta bayat ti panangikagumaanyo a mangadal ken mangsurot iti pagayatanna.
Pagay-ayatko a basaen dagiti Instagram post ni Presidente Nelson. Maysa kadagiti paboritok ket idi Hulio 20, 2022. Insuratna:
“Mamatiak a no direkta a makisarsarita kadakayo ti Apo, ti umuna a siguraduenna a maawatanyo ket ti pudno a kinasiasinoyo. Patpatgek a gagayyemko, dakayo ket literal nga espiritu nga annak ti Dios. …
“… Saankayo koma a maallilaw iti dayta: Nadiosan ti potensialyo. Babaen ti napasnek a panangsapulyo, ikkannakayto ti Dios kadagiti pakakitaan no siasino ti mabalin a pagbalinanyo.”
Mabalin kadi nga ibinglayko kadakayo no kasano nga insuro kaniak ti naindagaan nga amak a maammuak ti kinasiasinok ken ti plano ti Dios iti biagko?
Maysa a bigat ti Sabado idi agtawenak iti 13, agtabtabasak iti ruot kas paset ti linawas a trabahok iti balay. Idi nalpaskon, nangngegko a nairikep ti ridaw iti likud ti balaymi ket nakitak ni tatangko a mangay-ayab kaniak tapno kadwaek. Nagnaak iti makinlikud a beranda, ket inawisnak a makitugaw iti agdan. Maysa idi a nagpintasan nga agsapa. Malagipko pay laeng ti panagtugawna nga asideg kaniak nga agsagid dagiti abagami. Inrugina babaen ti panangibagana nga ay-ayatennak. Dinamagna no ania dagiti panggepko a tun-oyen iti biag. Napanunotko, “Nalaka laeng dayta.” Dua a banag ti sigurado nga ammok: Kayatko ti agbalin a nataytayag, ken ti masansan a mapan ag-camping. Maysaak lang a simple a tao. Immisem, nagsardeng iti apagbiit, ket kinunana: “Steve, kayatko nga ibinglay kenka ti maysa a banag a napateg unay kaniak. Inkararagko nga ipalubos ti Nailangitan nga Amatayo a ti ibagak ita ket maimaldit iti panunotmo ken iti kararuam tapno dimunto pulos malipatan.
Adda ti naan-anay nga atensionko ken ni tatang iti dayta a kanito. Kinita ken pinerrengnak, ket kinunana, “Anak, salaknibam dagiti pribado a panawen ti biagmo.” Nagsardeng ket binay-anna a maipasagepsep ti kaipapananna dayta iti pusok.
Kalpasanna intuloyna, “Ammom, dagiti panawen a sika laeng ti adda iti aglawlaw ket awan ti sabali a makaammo iti ar-aramidem? Dagiti panawen no panunotem nga, ‘Aniaman nga ar-aramidek ita ket saan a mangapektar iti asinoman, no di ket siak laeng’?”
Intuloyna nga imbaga, “Kadagiti amin a panawen iti biagmo, no ania ti ar-aramidem bayat dagiti pribado a kanito iti biagmo ti addaan iti kadakkelan nga epekto no kasano a sanguemto dagiti karit ken sakit ti nakem a pakaipasanguam; ket no ania ti ar-aramidem bayat dagiti pribado a kanito ti biagmo, ti addaan met iti dakdakkel nga epekto no kasano a sanguemto dagiti balligi ken rag-o a mapasaram ngem iti aniaman a panawen iti biagmo.”
Naawat ni tatangko ti tarigagay ti pusona. Ti uni ken panagbaliw ti timekna, ken ti ayat a nariknak kadagiti sasaona, ket naimaldit iti panunot ken kararuak iti dayta nga aldaw.
Nasursurok iti panaglabas dagiti tawen a ti kadakkelan a milagro dayta nga aldaw iti agdan ti balay a nagubingak, a kadagiti pribado a panawen ti biagko, mabalinko ti agkararag iti Dios tapno umawat iti paltiing. Insuronak ni tatangko no kasano a maammuak dagiti naituding a bendision ti Dios. Kadagidiay a pribado a kanito, naammuak a ti Libro ni Mormon ket sao ti Dios. Naammuak a naordenannak ti Dios nga agserbi iti mision. Naammuak nga am-ammonak ti Dios ken denggen ken sungbatanna dagiti kararagko. Naammuak a ni Jesus ti Cristo, ti Mangisalakan ken Mannubbottayo
Nupay adu ti biddutko manipud iti dayta nakallalagip nga aldaw a kaduak ni tatangko, ti panangikagumaak a mangsalaknib kadagiti pribado a panawen ti biagko ket nagtalinaed nga angkla bayat dagiti pannubok iti biagko ken nangtulong kaniak a mangsapul iti natalged a pagkamangan ken ti makaagas, makapabileg a bendision nga ayat ken pannubbot a sakripisio ti Mangisalakantayo.
Kakabsatko nga agtutubo, bayat ti panangsalaknibyo kadagiti pribado a panawen ti biagyo babaen ti nasayaat a paglinglingayan; panagdengngeg iti makapabang-ar a musika; panagbasa iti nasantuan a kasuratan; kaadda iti regular, napateg a panagkararag; ken panangikagumaan nga umawat ken mangutob iti bendision ti patriarka, umawatkayto iti paltiing. Kadagiti balikas ni Presidente Nelson, agbalinto a dagiti matayo “silulukat iti kinapudno a daytoy a biag ket ti panawen nga ikeddengyo no ania a kita ti panagbiag ti kayatyo iti agnanayon.”
Sungbatanto ti Amatayo iti Langit dagiti kararagyo, nangnangruna dagiti kararagyo a naidaton bayat dagiti pribado a panawen ti biagyo. Ibagananto kadakayo dagiti naituding a sagut ken talentoyo, ket mariknayonto ti ayatna a mangsakup kadakayo, no sipapasnek nga agkiddawkayo ken pudno a tarigagayanyo a maammuan. Bayat ti panangsalaknibyo kadagiti pribado a panawen ti biagyo, ad-adda nga addaan kaipapanan ti pannakiramanyo kadagiti ordinansa ken katulagan ti ebanghelio. Ad-adda a naan-anay nga agtalinaedkayo a nasinged iti Dios kadagiti katulagan nga aramidenyo Kenkuana, ket maitag-aykayto tapno maaddaankayo iti dakdakkel a namnama, pammati, ken pammatalged kadagiti kari nga inaramidna kadakayo. Kayatyo kadi a maammuan ti plano ti Dios para kadakayo? Paneknekak a kayatna a maammuanyo, ken pinaregtana ti propetana iti lubong tapno mangawis iti tunggal maysa nga agkararag ken umawat iti daytoy mangipabigbig a padas para kadatayo. Paneknekak ti kinapudno ken ti bileg ti pannubbot a sakripisio ti Mangisalakantayo nga isu ti mamagbalin a posible ti agbiag a maitunos ken mangtagiragsak iti amin a naituding a bendision ti Dios, iti nagan ni Jesucristo, amen.