Panagtalek iti Katulagan babaen ken ni Jesucristo
No sumrektayo iti balay ti Apo, rugiantayo ti sagrado a panagdaliasat ti panagsursuro nga agbalin a nangatngato ken nasansantuan a disipulo ni Cristo.
Patpatgek a kakabsatko, ikarkararagko a mapabarotayo koma iti naespirituan babaen kadagiti naparegta a mensahe manipud kadagiti lidertayo iti daytoy a ngudo ti lawas ken agrag-otayo iti pagay-ayatko nga awagan a “panagtalek iti katulagan babaen ken ni Jesucristo.” Daytoy a panagtalek ket ti naulimek ngem sigurado a pammatalged iti panangawat kadagiti bendision nga inkari ti Dios kadagiti mangtungtungpal kadagiti katulaganda ken kasapulan unay iti baet dagiti narigat a kasasaad ita a panawentayo.
Ti pannakaibangon dagiti baro a balay ti Apo iti intero a lubong, iti babaen ti naparegta a panangidaulo ni Presidente Russell M. Nelson, ti nakaigapuan ti dakkel a panagrag-o kadagiti miembro ti Simbaan ken agserbi a kas napateg a simbolo ti panagsaknap ti pagarian ti Apo.
Iti panangutobko iti nakaskasdaaw a padasko iti dedikasion ti Templo ti Feather River California idi Oktubre, pinampanunotko a no dadduma masingatayo iti gagartayo a maaddaan iti baro a templo iti siudad ken komunidadtayo ket mabaybay-antayo ti nasansantuan a panggep dagiti sagrado a katulagan a naaramid iti templo.
Naikitikit iti sango ti tunggal templo ti nadayaw a sasao a: “Kinasanto iti Apo.” Dagitoy a naparegta a balikas ket nalawag nga awis a no sumrektayo iti balay ti Apo, mangrugitayo iti sagrado a panagdaliasat ti panagsursuro nga agbalin a nangatngato ken nasansantuan a disipulo ni Cristo. Bayat ti panagaramidtayo kadagiti katulagan iti kinasanto iti sanguanan ti Dios ken panagkumittayo a suroten ti Mangisalakan, umawattayo iti bileg a mangbalbaliw iti pusotayo, mangpabaro iti espiritutayo, ken mangpauneg iti relasiontayo Kenkuana. Mangyeg ti pannakapasanto ti kasta a panagregget iti kararuatayo ken mangbukel iti sagrado a relasion iti Dios ken ni Jesucristo, a nangikari a tawidentayo ti sagut nga agnanayon a biag. Ti resulta daytoy sagrado a panagdaliasat ket magun-odtayo ti nasansantuan ken nangatngato a panagtalek iti inaldaw a panagbiagtayo kadagiti katulagantayo a naaramid babaen ken Jesucristo.
Ti kasta a panagtalek isu ti kangrunaan iti nadiosan a koneksiontayo iti Dios ken makatulong kadatayo a mangpapigsa iti debosion ken panagyamantayo ken ni Jesucristo ken ti pannubbot a sakripisiona. Patibkerenna ti abilidadtayo nga agayat ken agserbi iti dadduma, ken papigsaenna ti kararuatayo nga agbiag iti di nasantuan a lubong nga umad-adu ti kinasipnget ken pannakaupay. Pabilgennatayo a mangparmek kadagiti panagduadua ken pannakaupay, buteng ken pannakapaay, sakit ti nakem ken kinaawan namnama nga ikagkagumaan ti kabusor nga iserrek iti pusotayo nangruna no narigat ti biag, napaut dagiti pannubok, wenno narikut dagiti kasasaad. Maysa a bersikulo ti Biblia ti mangipaay iti nasayaat a balakad kadatayo bayat a sanguentayo dagiti nakaro a nailubongan a karit ita a panawen: “Isu ti gapuna a diyo pukawen ti namnamayo.”
Patpatgek a kakabsatko, dagiti makagun-od iti napudno a panagtalek kadagiti katulagan a naaramid iti balay ti Apo babaen ken Jesucristo ket addaan iti maysa kadagiti kabibilgan a puersa a mabalintayo a gun-oden iti daytoy a biag.
Bayat ti panangadaltayo iti Libro ni Mormon iti Umaykayo, Sumurot Kaniak ita a tawen, nakitatayo no kasano a nasayaat nga impakita ni Nephi ti bileg daytoy a kita ti panagtalek iti katulagan babaen ti kinapudnona idi naipasango kadagiti pannakapaay ken karit, a kas iti pananggun-od kadagiti pinanid nga imbilin ti Apo. Ni Nephi, iti laksid ti kasta unay a ladingitna gapu iti buteng ken kinakurang ti pammati da Laman ken Lemuel, nagtalinaed a nagtalek nga ited ti Apo kadakuada dagiti pinanid. Kinunana kadagiti kabsatna, “Agingga a sibibiag ti Apo, ken sibibiagtayo, nasken a saantayo nga agsubli iti amatayo iti langalang agingga a matungpaltayo ti imbilin ti Apo kadatayo.” Gapu iti panagtalek ni Nephi kadagiti kari ti Apo, naitungpalna ti naibilin nga aramidenna. Idi agangay, iti parmatana, nakita ni Nephi ti impluensia daytoy a kita ti panagtalek, insuratna, “Siak, ni Nephi, naimatangak ti bileg ti Kordero ti Dios, a bimmaba kadagiti santo ti simbaan ti Kordero, ken kadagiti natulagan a tao ti Apo, … ket naarmasanda ti kinalinteg ken addaanda iti nadayag a bileg ti Dios.”
Nakitak a mismo dagiti naayat a kari ken pannakabalin ti Apo nga agayus iti biag dagiti annak ti Dios, a mangpappapigsa kadakuada a mangsango kadagiti kasasaad ti biag. Itay nabiit, nagawid ti asawak kalpasan ti panagdaydayawna iti templo ket imbagana no kasano a natignay ti pusona iti napadasanna sadiay. Bayat ti iseserrekna iti balay ti Apo, nakakita iti maysa a lalaki a naka-wheelchair a nabannayat ti garawna ken maysa a babai a nakasarukod a marigatan a magmagna, nga agpada a situtured a mapan agdaydayaw iti Apo iti balayna. Bayat ti iseserrek ti asawak iti initiatory area, nakitana ti maysa a sister nga awan ti maysa a takiagna—ken addaan laeng iti paset ti sabali a takiagna—a nakasaysayaat ken nailangitan nga ar-aramidenna ti aniaman a trabaho a naited kenkuana.
Bayat ti panagsaritami ken baketko maipapan iti dayta a padas, nakunami a ti laeng nadalus ken naimpusuan a panagtalek kadagiti agnanayon a kari nga ipaay ti Dios babaen iti nasantuan a katulagan a naaramid Kenkuana iti balayna ti makagapu a panawan dagidiay a disipulo ni Cristo ti pagtaenganda iti dayta a nakalamlamiis nga aldaw, iti laksid ti personal a kasasaadda iti biag.
Patpatgek a gagayyemko, no adda maysa a napateg nga adda kadatayo—ken maysa a napateg nga ipatawidtayo kadagiti annak ken appokotayo a makatulong iti tunggal maysa kadagiti pannubok ken pakasuotan iti masanguanan—ket ti panagtalek kadagiti katulagan a naaramid babaen ken Jesucristo. Ti pananggun-od iti nadiosan a pammaregta ket makatulongto kadakuada nga agbiag a kas inkari ti Apo kadagiti napudno a pasurotna: “Agtakderto dagiti disipulok kadagiti nasantuan a lugar, ket saandanto a matignay.”
Kasano a magun-odtayo ti kasta a panagtalek babaen ken Jesucristo? Dumteng daytoy babaen ti kinapakumbaba, panangisentro iti biagtayo iti Mangisalakan, panagbiag a mayannurot kadagiti prinsipio ti ebanghelio ni Jesucristo, panangawat kadagiti ordinansa ti pannakaisalakan ken pannakaitan-ok, ken panangdayaw kadagiti katulagan nga aramidentayo iti Dios iti nasantuan a balayna.
Iti panggibus a saritana iti sapasap a komperensia ti Oktubre 2019, impalagip ti patpatgentayo a propeta ti napateg nga addang iti pananggun-od iti panagtalek iti katulagan, a kinunana: “Ti bukod a pannakaikari tapno makastrek iti balay ti Apo ket agkasapulan iti adu a bukod a naespirituan a panagisagana. … Agkasapulan ti bukod a pannakaikari iti naan-anay a panagbalbaliw iti panunot ken puso tapno agbalin nga ad-adda a kas iti Apo, agbalin a napudno a makipagili, agbalin a nasaysayaat a pagwadan, ken agbalin a nasansantuan a tao.” Ngarud, no balbaliwantayo ti panagsaganatayo a sumrek iti templo, balbaliwantayo ti padastayo iti templo, a mangbalbaliw iti biagtayo iti ruar ti templo. “Kalpasanna mapapigsa ti panagtalekmo iti imatang ti Dios; ken mailimog koma iti kararuam ti doktrina ti kinasaserdote a kas iti linnaaw nga aggapu iti langit.”
Maysa a bishop nga am-ammok ti nangdakamat iti klase dagiti in-inauna iti Primary a saan a klase ti “Primary” no di ket klase ti “panagsagana iti templo”. Idi Enero, inawis ti bishop dagiti miembro ti klase ken dagiti mannursuroda iti opisinana tapno pagsaritaanda no kasano a busbosenda ti intero a tawen nga agsagana para iti iseserrekda iti templo. Nangipaay ti bishop iti panawen a nangrebyu kadagiti mayaplikar a saludsod iti interbiu ti temple recommend, a nairaman kadagiti leksionda iti Primary. Awisenna dagiti ubbing nga agsagana tapno inton mapanda iti opisina ti bishop kalpasan ti maysa a tawen, agtalekdanto ken agtalekdanto iti katulagan, sisasagana nga umawatda iti temple recommend ken sumrekda iti balay ti Apo. Iti daytoy a tawen addaan ti bishop iti uppat a babbalasitang a magagaran, nakasagana, ken agtalek a mapan iti templo, ta kayatda pay ketdi nga iyimprenta ti bishop dagiti recommend-da iti Aldaw ti Baro a Tawen iti alas 12:01 a.m.
Ti panagsagana ket saan laeng a para kadagiti mapan iti templo iti umuna a gundaway. Nasken a kanayon nga agsaganatayo amin a mapan iti balay ti Apo. Adda maysa nga stake nga ammok a mangus-usar iti pagsasao a “Naisentro iti pagtaengan, suportaran ti Simbaan, ken mapan iti templo.” Tibegkes ket makapainteres a sao ta kaipapananna ti nakapokus iti maysa a direksion, ngem kaipapananna pay ti naikapet wenno patalgeden iti, narisut ken determinado, sigurado. Isu a ti kanayon a panagatendar iti templo ti mangpatalged kadatayo iti Mangisalakan, a mangted iti umno a pangiwanwan ken kinatalged bayat a siguraduentayo nga addaantayo iti panagtalek iti katulagan babaen ken Jesucristo. Ngarud, nasken a sipapakinakem a pasayaatentayo ti kasta a pannakapatalged babaen ti pannakaiskediul ti sumaruno nga appointment-tayo iti Apo iti nasantuan a balayna, asideg man wenno adayo ti templo.
Ti patpatgentayo a propeta, ni Presidente Russell M. Nelson, ipalagipna kadatayo dagitoy a napateg a prinsipio ket kinunana: “Ti templo ti sentro a pangpapigsaan iti pammatitayo ken naespirituan a pangpatibker gapu ta ti Mangisalakan ken ti doktrinana ti mismo a sentro ti templo. Amin a banag a maisursuro iti templo, babaen ti instruksion ken ti Espiritu, mangnayon iti pannakaawattayo ken Jesucristo. Dagiti napapateg nga ordinansa ti mangibegkes kadatayo Kenkuana babaen kadagiti sagrado a katulagan iti priesthood. Kalpasanna, no tungpalentayo dagiti katulagantayo, ipaayannatayo iti pagpaimbagna , pangpapigsa a bilegna. Ken, talaga a kasapulantayo ti bilegna kadagiti sumangbay nga aldaw.”
Tarigagayan ti Mangisalakan a nakasaganatayo tapno maawatantayo a nalawag no kasano ti eksakto nga agtignay bayat ti pannakitulagtayo iti Nailangitan nga Amatayo iti naganna. Kayatna a nakasaganatayo a mangpadas kadagiti pribilehio, kari, ken rebbengentayo; tapno nakasaganatayo a maaddaan kadagiti naespirituan a pannakaawat ken pannakaammo a kasapulantayo iti daytoy a biag. Ammok a no makita ti Apo ti uray bassit a tarigagay wenno siray ti panagregget iti kinalinteg iti kinatuloktayo a mangisentro iti biagtayo Kenkuana ken kadagiti ordinansa ken katulagan nga aramidentayo iti balayna, bendisionannatayo, iti naan-anay a wagasna, kadagiti milagro ken nadungngo nga asi a kasapulantayo.
Ti balay ti Apo ti pakabalbaliwantayo kadagiti nangatngato ken nasansantuan a wagas. Gapuna, no rummuartayo iti templo, a nabalbaliwan babaen ti namnamatayo kadagiti kari ti katulagan, a nakabalan iti pannakabalin manipud iti ngato, ikuyogtayo ti templo iti pagtaengan ken biagtayo. Ipanamnamak kadakayo a ti kaadda ti espiritu ti balay ti Apo kadatayo ket naan-anay a balbaliwannatayo.
Nasursurotayo pay manipud iti templo a no kayattayo a saan a masinga ti Espiritu ti Apo iti biagtayo, rumbeng a di tayo maaddaan iti saan a nasayaat a rikna iti asinoman. Ti panangpalubos iti puso wenno panunottayo kadagiti saan a nasayaat a rikna wenno kapanunotan ti mangpataud iti makapasakit a sasao ken aramid, iti man social media wenno pagtaengantayo, a pakaigapuan ti ipapanaw ti Espiritu ti Apo manipud iti pusotayo. Gapuna, diyo koma pukawen ti panagtalekyo, no di ket papigsaenyo ti panagtalekyo.
Ti agtultuloy ken naparpartak a pannakaibangon dagiti templo ket agtultuloy a mangparagsak, mangparegta, ken mangbendision kadatayo. Ngem ti napatpateg pay, bayat a balbaliwantayo ti panagsaganatayo a sumrek iti templo, balbaliwantayo ti padastayo iti templo, a mangbalbaliw iti biagtayo iti ruar ti templo. Sapay koma ta punnuennatayo daytoy a panagbalbaliw iti panagtalek kadagiti nasantuan a katulagantayo iti Dios babaen ken Jesucristo. Sibibiag ti Dios, ni Jesus ti Mangisalakantayo, ket daytoy ti naisubli a Simbaanna ditoy daga. Siraraem nga ipakdaarko dagitoy a kinapudno iti sagrado a nagan ni Jesucristo, amen.