Bumangonka! Awagannaka
Ti ebanghelio saan a wagas tapno maliklikan dagiti karit ken parikut no di ket pangrisut a mangpapigsa iti pammatitayo ken masursuruantayo no kasano a sarangten ida.
Itay napalabas dinamagko iti asawak, “Maibagam kadi kaniak no apay, agingga a malagipko, a ditayo pulos a naaddaan iti dadakkel a parikut iti biagtayo?”
Kinitanak ket kinunana, “Wen. Ibagak kenka no apay a ditayo naaddaan iti ania man a dadakkel a parikut; gapu ta dimon malagip!”
Ti napardas ken nasirib a sungbatna ti nangpabigbig kaniak manen a ti panagbiag iti ebanghelio ni Jesucristo saan a mangikkat iti saem ken pannubok, a kasapulan tapno dumur-as.
Ti ebanghelio saan a wagas tapno maliklikan dagiti karit ken parikut no di ket pangrisut a mangpapigsa iti pammatitayo ken masursuruantayo no kasano a sarangten ida.
Nariknak daytoy a kinapudno sumagmamanon a bulan ti napalabas, idi magmagnaak iti maysa nga aldaw, ket kellaat a nagbalin a nakudrep, nasipnget, ken naallon ti panagkitak. Nagbutengak. Sa imbaga kaniak dagiti doktor, “No dika rugian a dagus ti panagagas, mabalin a mapukawmo ti panagkitam uray iti sumagmamano a lawas.” Ad-adda a nagbutengak.
Ket kalpasanna kinunada, “Kasapulam dagiti intravitreal injection—injection iti mismo a mata—nakamulagat—kada uppat a lawas, iti unos ti biagmo.”
Maysa dayta a di komportable a wake up call.
Kalpasanna dimteng ti panagutob nga agsalsaludsod. Dinamagko iti bagik: “OK! Saan a nasayaat ti pisikal a panagkitak, ngem kasanon ti naespirituan a panagkitak? Kasapulak kadi ti panagagas? Ket ania ti kayat a sawen ti maaddaan iti nalawag a naespirituan a panagkita?”
Inutobko ti estoria ti maysa a bulsek a lalaki, nga agnagan iti Bartimeo, a nailadawan iti ebanghelio ni Marcos. Kuna ti nasantuan a kasuratan, “Ket idi nangngegna a ni Jesus a taga Nazaret, rinugianna ti nagpukkaw, ket kinunana, Jesus, sika nga Anak ni David, kaasiannak.”
Mainaig iti teknikal, ti imatang ti adu, anak laeng ni Jose ni Jesus, apay nga inawagan ni Bartimeo nga “Anak ni David”? Gapu laeng ta nabigbigna a pudno a ni Jesus ti Mesias, a naipadto a mayanak kas kaputotan ni David.
Makapainteres ta daytoy bulsek a tao, a saan a pisikal a makakita, nabigbigna ni Jesus. Naespirituan a nakitana ti saanna a pisikal a makita, idinto nga adu a dadduma pay ti pisikal a makakita ken Jesus, ngem naan-anay a naespirituan a bulsekda.
Ditoy nga estoria masursurotayo iti ad-adu pay maipapan iti nalawag a naespirituan a pannirigan.
Mabasatayo, “Ket adu ti nangbilin kenkuana a nasken nga agulimek: ngem ad-adda nga impukkawna, Sika nga Anak ni David, kaasiannak.”
Ibagbaga ti amin nga aglawlawna nga agulimek, ngem ad-adda pay a nagsangit gapu ta ammona no asino a talaga ni Jesus. Dina inkankano dagita a timek ket ad-adda pay a nagikkis.
Nagtignay isuna imbes nga agpatignay. Iti laksid ti limitado a kasasaadna, inusarna ti pammatina nga aglabes kadagiti limitasionna.
Isu a, ti umuna a prinsipio a masursurotayo ket Pagtalinaedentayo ti nalawag a naespirituan a sirmata no ipamaysatayo ni Jesucristo ken agtalinaedtayo a napudno iti ammotayo a pudno.
Kakabsat, tapno agtalinaed ti naespirituan a panagkitatayo, nasken nga ikeddengtayo a ditay dumngeg kadagiti timek ti lubong iti lawlawtayo. Ditoy nariribuk ken natikaw a lubong, nasken nga agtalinaedtayo a napudno iti ammotayo, kadagiti katulagantayo, iti panagtungpal iti bilbilin, ken pasingkedantayo dagiti panamatitayo, a napigpigsa pay, kas iti inaramid daytoy a tao. Nasken nga ipigpigsatayo pay nga ipeksa ti pammaneknektayo iti Apo iti lubong. Am-ammo daytoy a tao ni Jesus, nagtalinaed a napudno iti panamatina, ken saan a nasinga kadagiti timek iti lawlawna.
Adu dagiti timek ita a mangpadpadas a mangibaba iti timektayo kas disipulo ni Jesucristo. Padpadasen dagiti timek ti lubong a pagulimekendatayo, ngem dayta ti gapuna a nasken nga isawangtayo ti pammaneknektayo iti Mangisalakan a napigpigsa ken nabilbileg pay. Iti amin a timek ti lubong, ibilangnatayo ti Apo a mangisawang iti pammaneknektayo, mangipigsa iti timektayo, ken agbalintayo a timekna. No ditayo aramiden, asino ti mangpaneknek ken Jesucristo? Asino ti mangisao iti naganna ken iti nadiosan a misionna?
Adda naespirituan a rebbengentayo manipud iti pannakaammotayo ken Jesucristo.
Ngem ania ti inaramid ni Bartimeo kalpasan dayta?
Iti bilin ti Apo a bumangon, nagtignay manen iti pammati.
Kuna ti scripture, “Ket isu, inwaksina ti kawesna, bimmangon, ket immasideg ken Jesus.”
Naawatan daytoy napakumbaba ken matalek a tao a makabangon iti nasaysayaat a biag iti bilin ni Jesus. Ammona a nasaysayaat ngem iti kasasaadna, ket ti immuna nga inaramidna idi nangngegna nga umaw-awag kenkuana ni Jesus imbellengna ti kagayna nga agpalpalama.
Manen nagtignay isuna imbes nga agpatignay.
Nalabit napanunotna, “Diakon kasapulan daytoy, ita ta immay ni Jesus iti biagko. Baro nga aldaw daytoy. Nalpaskon ditoy a biag ti kinarigat. Babaen ken Jesus marugiak ti baro a naragsak a biag Kenkuana, ken babaen Kenkuana. Diak maseknan no ania ti ipagarup ti lubong kaniak. Aw-awagannak ni Jesus, ket tulongannakto nga agbiag iti baro a biag.”
Anian a nakakaskasdaaw a kari!
Idi imbellengna ti kagayna nga agpalpalama, naikkatna ti amin a pambar.
Ken daytoy ti maikadua a prinsipio:pagtalinaedentayo ti nalawag a naespirituan a pannirigan no panawantayo ti natural a tao, agbabawi, ken rugiantayo ti baro a biag ken Cristo.
Ti wagas nga aramiden daytoy ket babaen ti panagaramid ken panagtungpal iti katulagan a bumangon iti nasaysayaat a biag babaen ken Jesucristo.
No agpambartayo tapno agladingittayo para iti bagitayo, agladingittayo kadagiti kasasaad ken parikuttayo ken iti amin a dakes a mapaspasamak iti biagtayo, ken iti amin a dakes a tattao nga ipagaruptayo a magpaliday kadatayo, agtalinaed ti kagay ti agpalpalama iti abagatayo. Pudno a no dadduma dangrandatayo dagiti tao, sipupuot man wenno saan. Ngem nasken nga agtignaytayo iti pammati ken Cristo babaen ti panangikkat iti mental ken emosional a kagay a nalabit a baklayentayo pay laeng tapno ilemmeng ti pambar wenno basol, ken ibelleng daytoy, nga ammotayo nga Isu ti makaagas kadatayo.
Saan a nasayaat a pambar ti agkuna, “Siak ti wagasko gapu iti sumagmamano a daksanggasat ken di makaay-ayo a kasasaad. Ket diak makapagbalbaliw, ket nainkalintegak.”
No kasta ti panunottayo, ikeddengtayo ti matignay.
Pagtalinaedentayo ti kagay ti agpalpalama.
Ti panagtignay iti pammati kayatna a sawen ti agpannuray iti Mangisalakantayo, panamati a babaen ti Pannubbotna, mabalintayo ti bunangon iti labes ti amin, iti bilinna.
Ti maikatlo a prinsipio adda iti maudi nga uppat a balikas, “[isu] immay ken Jesus.”
Kasano a nakapan ken Jesus idinto a bulsek? Ti laeng wagas ket ti magna nga agturong ken Jesus babaen ti idedengngegna iti timekna.
Ken daytoy ti maikadua a prinsipio:pagtalinaedentayo ti nalawag a naespirituan a pannirigan no denggentayo ti timek ti Apo ken mangpalugod Kenkuana a tarabayennatayo.
Kas iti panangipigsa daytoy a lalaki iti timekna kadagiti timek iti lawlawna, nangngeganna ti timek ti Apo iti baet ti amin a dadduma pay a timek.
Daytoy met laeng ti pammati a nangpalubos ken Pedro a magna iti danum no la ket napagtalinaedna ti naespirituan a pokusna iti Apo ken saan a nasinga iti angin iti lawlawna.
Kalpasanna maigibus ti estoria daytoy a bulsek a tao iti balikas nga “inawatna ti panagkitana, ket sinurotna ni Jesus iti dalan.”
Maysa kadagiti kapatgan a leksion iti daytoy nga estoria ket inaramat daytoy a tao ti pudno a pammati ken Jesucristo ken immawat iti milagro gapu ta kiniddawna iti pudno a panggep, ti pudno a panggep a sumurot Kenkuana.
Ket daytoy ti ultimo a rason kadagiti bendision nga awatentayo iti biag, nga isu ti panangsurot ken Jesucristo. Daytoy ti panangbigbig Kenkuana, panagaramid ken panagtungpal iti katulagan iti Dios gapu Kenkuana, panagbalbaliw iti ugalitayo babaen Kenkuana, ken panangibtur agingga iti udina babaen ti panangsurot Kenkuana.
Para kaniak, ti mangpatalinaed iti nalawag a naespirituan a pannirigan ket maipapan iti panangipokus ken Jesucristo.
Isu a nalawag ti naespirituan a panagkitak, no awatek dagiti indieksion ti matak?| Asinoak nga agkuna? Agyamanak no ania ti makitak.
Silalawag a makitak ti ima ti Apo iti daytoy sagrado nga aramid ken iti biagko.
Makitak ti pammati ti adu sadino man a papanak, a mangpatibker iti pammatik.
Makitak dagiti anghel iti aglawlawko.
Makitak ti pammati ti adu a saan a pisikal a makakita iti Apo ngem naespirituan a mabigbigda, gapu ta nasinged nga am-ammoda.
Paneknekak a daytoy nga ebanghelio ti sungbat iti amin, gapu ta ni Jesucristo ti sungbat iti tunggal maysa. Agyamanak iti makitak no surotek ti Mangisalakanko.
Ikarik a bayat ti pannakangngegtayo iti timek ti Apo ken palubosantayo a mangiwanwan kadatayo iti dana ti katulagan ti Mangisalakan, mabendisionantayo iti nalawag a sirmata, naespirituan a pannakaawat, ken talna ti puso ken panunot iti unos ti biagtayo.
Maisawangtayo koma ti pammaneknektayo Kenkuana, napigpigsa ngem dagiti timek iti lawlawtayo, iti lubong a kasapulan nga ad-adda pay a dumngeg ken Jesucristo. Maikkattayo koma ti kagay ti agpalpalama a nalabit a suottayo pay laeng, ken bumangotayo a mangrimbaw iti lubong, iti nasaysayaat a biag ken babaen ken Cristo. Maikkattayo koma ti amin a pambar a ditayo sumurot ken Jesucristo ken mangsapul iti amin a nasayaat a gapu a sumurot Kenkuana, no denggentayo ti timekna. Daytoy ti kararagko, iti nagan ni Jesucristo, amen.