Savali a Faiaoga Asiasi

Avea ma se Tufugaaao o le Atua e ala i le Ola i le Paia

Filifili ma faitau ma le agaga tatalo mai lenei savali ni mau ma aoaoga e fetaui ma tulaga o loo manaomia e uso o loo e asia. Fetufaai atu i ai ou aafiaga ma molimau. Valaaulia foi i latou o loo e aoaoina ia faapena foi ona fai.

O le a le Ola i le Paia?

Peresitene James E. Faust, Fesoasoani Lua i le Au Peresitene Sili: “O le paia o le malosiaga lea o le agaga. E oo mai e ala i le faatuatua i tulafono ma sauniga a le Atua. Ona faamamaina lea e le Atua le loto e ala i le faatuatua, ona mama ai lea o le loto mai mea leaga ma le le mama. Afai e maua le faapaiaina e ala i le gauai atu i le finagalo o le Atua, e vave ona iloa e se tasi le mea e sese… .

“… E tatau ona tatou o atu i le malumalu, faatasi ai ma isi mafuaaga, ina ia faasaoina lo tatou lava faapaiaina faapea i o tatou aiga.

“E faaopoopo atu i malumalu, e mautinoa lava o le isi nofoaga paia i le lalolagi e ao ona i ai o o tatou fale ia… .

“… Ia faamanuia e le Alii i tatou uma taitoatasi i lo tatou tiutetauave faapitoa ina ia maua le paia i le Alii e ala i le tutu i mea paia. O iina o le a tatou maua ai le puipuiga faaleagaga tatou te moomia mo i tatou lava ma o tatou aiga” (“Tutu i Mea Paia,” Liahona, Me 2005, 62, 67–68).

Elder Dieter F. Uchtdorf o le Korama a Aposetolo e Toasefululua: “O le atiina ae o uiga faaKeriso i o tatou olaga e le o se galuega e faigofie… . E mafai ona tatou siakiina lo tatou alualu i luma i lea tulaga pe afai e moomia ona atagia atu ia uiga faaKeriso i o tatou olaga—i le avea ai ma se tane po o se ava, i le avea ai ma se tama po o se tina, o se atalii po o se afafine, i a tatou faauooga, i a tatou galuega, i a tatou pisinisi, ma mea tatou te fiafia i ai. E mafai ona tatou iloaina lo tatou alualu i luma, e faapena foi ia i latou o loo siomia i tatou a o tuputupu ae pea lo tatou malosi i le ‘faia o mea uma i le paia atoatoa i [Ona] luma’ (MFF 43:9)” (“Uiga FaaKeriso—o le Mana Lea e Siitiaina i Tatou i Luga,” Liahona, Nov. 2005, 102).

E Mafai Faapefea Ona Ou Ola i le Paia ma Avea o se Tufugaaao o le Atua?

Kathleen H. Hughes, fesoasoani muamua i le au peresitene aoao o le Aualofa: “O ai o i tatou e le moomoo ia faapelepele, tausia, ma faamafanafanaina ma aoaoina i mea a le Atua? E faapefea ona tupu? Tasi se agalelei, tasi se faaalia o le alofa, tasi se taga faatino lelei, tasi se lima naunautai i le taimi. Peitai o la’u savali e le mo i latou e mauaina na galuega o le alofa, ae mo i latou uma e tatau ona ola ai i na tulaga paia i aso uma. Ina ia avea atili e faapei o Iesu Keriso, ua aoao mai e le Perofeta o Iosefa, ‘e ao ona faateleina lo outou alolofa mo isi’” (“Ina ia Mafai Ona Tatou Toe Nonofo Uma Faatasi i le Lagi,” Liahona, Nov. 2005, 110).

Bonnie D. Parkin, peresitene aoao o le Aualofa: “O feagaiga—po o folafolaga mausali i lo tatou va ma le Tama Faalelagi—e taua mo lo tatou atinaega e faavavau. O lea laasaga ma lea laasaga, Na te aoaoina ai i tatou ina ia avea e faapei o Ia e ala i le valaauina o i tatou e auai i le faatinoga o Lana galuega. O le papatisoga tatou te osi feagaiga ai e alolofa ia te Ia ma o tatou loto atoa, ma alolofa foi i o tatou uso ma tuagane e pei ona tatou alolofa ia i tatou lava. O totonu o le malumalu tatou te osi feagaiga ai foi e usiusitai, ia le manatu faapito, faamaoni, faamamalu, ma agaalofa. Ua tatou osi feagaiga e ositaulaga ma faapaiaina a tatou mea uma… .

“Ua valaauina i tatou e le Alii e faia mea uma tatou te faia ma le ‘paia o le loto’ [MFF 46:7]. O le paia o se taunuuga lea o le ola ai i feagaiga… . O le paia e oso vave mai ai upu nei ‘O Au lenei; auina atu au’” (“Ma le Paia o le Loto,” Liahona, Nov. 2002, 103, 105).