Manatuaina o Iowa

Saunia E Caroline H. Benzley

O taavaletosolima ma paionia o e na savavali atu i Siona ua avea ma se faailoga o le malaga a le Au Paia ma le fausiaina o le Ekalesia.

I se tasi taeao o le taumafanafana i le 1856, na amata ai ona savali ia Janetta McBride e 16 tausaga mai Iowa e oo atu i le Vanu o Sate Leki.

O lana malaga na amata i ni masina muamua atu ina ua latou tuua ma lona aiga Egelani ae folau atu i le Vasa Atalani. O le taimi lava na taunuu ai i le Iunaite Setete, na faaauau ai la latou malaga i le nofoaafi e agai atu i le Aai o Iowa, i Iowa, lea e gata ai le auala o le nofoaafi e agai atu i sisifo.

O le Aai o Iowa na faatasia ai le aiga o Janetta ma le Au Paia o Aso e Gata Ai, a o latou faasaosaoina lo latou malosi ma sapalai mo le vaega faaiu o le malaga—o se savaliga ma toso ni taavaletosolima i le 1,300 maila (2,090-km). Na tofia Janetta McBride i le vaega o taavaletosolima a Matini, o se tasi o vaega e fitu na tuua le Aai o Iowa i le va o le 1856 ma le 1857.

Vaai atu i Sisifo

O lenei ua 150 tausaga mulimuli ane, o le aso 9 o Iuni, 2006. Ua toe tuua nei e se vaega e tasi o taavaletosolima le Aai o Iowa.

O le taimi lenei o le vaega e aofia ai le pe tusa ma le 70 alii ma tamaitai talavou mai le Siteki o le Aai o Iowa. I o latou lavalava paionia, faatasi ma a latou taavaletosolima na tutumu i sapalai, na potopoto ai nei tagata talavou i le Paka o Mormon Handcart e i tua tonu lava o le Aai o Iowa—o le nofoaga lava lenei na tuua ai e le vaega muamua o taavaletosolima i le 150 tausaga ua mavae i le aso 9 o Iuni, 1856. I le vaai atu i sisifo, ua le mafai ona taofiofi le mafaufau atu i uluai paionia o e na tutu iinei i aso lava ia ua leva.

Ua mafaufau Kameron Hansen o le Uarota a le Aai o Iowa Muamua i le lona fa o le faasologa o ona tinamatutua o Janetta McBride. O Kameron, ua 14 ona tausaga, toeitiiti lava a tutusa ma le matua o Janetta i le taimi na amata ai ona savali atu i Siona.

“Ou te fiafia e mafaufau atonu ua fiafia lava o ia i lona vaai mai ia te au o ou faia lenei mea,” o le tala lea a Kameron. “Ou te faamoemoe o loo mitamita o ia ona o loo faamaoni pea lona aiga i le Ekalesia.” Ua iloa e Kameron o lana malaga o le a sili atu ona puupuu ma faigofie nai lo Janetta, ae na te lagonaina pea le agaga faafetai mo lenei avanoa e manatua ma faamamalu ai ona tuaa.

Ua fiafia foi Anna Shaner o le Paranesi a Fairfield i le faamamaluina o paionia. E maofa o ia ona sa latou agai i luma ma le le iloa pe o le a latou ola pea e faamaeaina lenei aafiaga. E maua mai e Anna le tele o le malosiaga mai tagata o e, e pei ona ia faaupuina ai, “na faatuatua i le mea na tatau ona latou faia ma le lototoa e faia ai.”

O le faigamalaga o se avanoa lelei lea mo le autalavou uma o le Aai o Iowa e faamamaluina ai o latou tuaa. Tusa pe i ai ni paionia o taavaletosolima i o latou aiga pe leai, ae o le autalavou o tagata o le Ekalesia, ma o paionia o taavaletosolima o o latou tuaa faaleagaga ia.

Aisea [Ua Filifilia ai] Iowa?

O aso nei, o le Aai o Iowa, i Iowa, o loo i le totonugalemu o sisifo tutotonu o le Iunaite Setete, ae o le 150 tausaga ua mavae, sa i ai i le pito i luma—e mamao ese i sisifo i le mea e mafai ona ave oe i ai e le nofoaafi. O le toatele o uluai tagata liliu mai o e na tolauapi i fafo mai o le Aai o Iowa i le 1856 o tagata na malaga mai mai Europa. Sa latou malaga mamao mai ma na itiiti se seleni na i ai e faatau ai ni taavale solofanua ma ni sapalai. Na faapalepale tagata o le Aai o Iowa i le Au Paia o Aso e Gata Ai, ma o loo faamatalaina i api o talaaga a paionia ia galuega agalelei a tagata Iowa.

Ina ua faasilasila atu e Peresitene Polika Iaga o le malaga i taavaletosolima o le filifiliga taugofie ma le vave lea e malaga ai i Siona, sa naunau nei Au Paia e faataitai i ai. O le vaega muamua o taavaletosolima na tuua le Aai o Iowa i le aso 9 o Iuni, 1856.

O le toatele lava o vaega o taavaletosolima na faataunuuina ma le saogalemu le malaga na sili ona faavaivai tagata agai atu i le Vanu o Sate Leki, ae sa sili atu ona faigata i le vaega a Janetta McBride, o le vaega a Matini, ma le vaega a Uili. Na maua uma nei vaega e lua i le amataga o matagi aisa, ma e silia i le 200 tagata na maliliu ai. O la latou malaga na manaomia ai se osigataulaga tele, lea na o le pau le ala na mafai ona onosaia ai o le faatuatua i le Tama Faalelagi ma Lana fuafuaga. O lenei lava faatuatua e tasi na uunaia ai vaega uma o taavaletosolima ia na tuleiina ma tosoina o latou ala agai atu i Siona.

I le 2006 o le ala o taavaletosolima na avea o se vaega o le faamanatuga o le 150 tausaga e faamamaluina ai lenei faatuatua. Na talimalo tagata o le siteki a le Aai o Iowa i polokalama e pei o se fonotaga aloaia faaakatemia, o se faafiafiaga faapaionia, ma se faigalotu a ekalesia tuufaatasi. O nei polokalama e le gata ina faamamaluina ai paionia o taavaletosolima ae faapea foi i tagata o Iowa o e na fesoasoani ia i latou.

Mulimuli i le Perofeta

Ina ua maea se aso umi o savaliga i luga o mauga o Iowa, ua maua nei e le autalavou se taimi e manatunatu ai i o latou aafiaga. Na toe faitauina e Emma Pauley le Eteru e 12, o se mataupu e faatatau i le faatuatua na te manatuaina mai lona a’oga ai i le seminare.

“Ou te le iloa pe mafai ona ou savali i le ala atoa e tau atu i Iuta,” o le tala lea a Emma, “ae na mafai ona faia e paionia, ma ou te iloa ona o lo latou faatuatua. O mea maoae uma lava e faia i le faatuatua.”

O le faatuatua o paionia o taavaletosolima na mafai ai ona latou tali atu i le valaau a Peresitene Iaga ina ia faapotopoto i le Vanu o Sate Leki. O a latou faataitaiga ua faigofie ai i le autalavou o le Aai o Iowa ona mulimuli i fautuaga a le perofeta i aso nei.

O se tasi auala e mafai ai e alii talavou e pei o Kameron Hansen ona mulimuli i le perofeta e ala lea i le faamaeaina o le polokalama o le Tiute i le Atua. E pei ona ia faamatala mai, “Pe a ou mafaufau i paionia ma la latou osigataulaga, ou te manao ai lava e faauma ou tulaga manaomia ina ia mafai foi ona ou mulimuli ai i le perofeta.”

O le mulimuli i le perofeta e taua i nei tagata talavou, a o latou faatalitali ma le totoa e vaai ia te ia i le Aso Sa e sosoo ai i se faeasaite e faamanatu ai paionia. O le avanoa e faalogo ai i le siufofoga o se perofeta o le a avea ma faatumutumuga o le faamanatuga.

Atonu foi na lagona e paionia anamua lenei lava lagona fiafia a o latou savavali atu i le Vanu o Sate Leki, ma le iloa, o a latou laa uma latou te latalata atu ai i lo latou taitai ma faalogo i lona siufofoga.

“E pei lava o se oa o loo faatalitali mai mo au i le iuga,” o le tala lea a Skylar Hansen o le Uarota a le Aai o Iowa Muamua.

O le faamaeaina o la latou malaga, ua latalata atu ai nei le autalavou a le Aai o Iowa i la latou oa, ae latou te le’i oo lelei atu i ai. O le aso e sosoo ai o le Aso Toonai, ma e tele naua ni galuega e faia ai.

O Le Fai Atu Faafetai Lava

O le 2006 na pisi ai tagata o le Siteki a le Aai o Iowa Iowa i le tautuaina o i latou na manaomia le fesoasoani i le eria atoa. O le auala lea a tagata o le ekalesia e faafetai atu ai i se alalafaga na tuuina atu le fesoasoani i na uluai tagata o le Au Paia.

O le taimi nei, ua maua e le autalavou lo latou avanoa e auauna atu ai. E ui lava ina vave tele le 6:30 i le taeao, ae fai mai Marc Humbert o le Uarota a le Aai o Iowa Muamua, o le malaga i le aso ua tea na faigofie ai ia te au ona ou nofo i luga ma amata ai ona auauna atu. “O le alu ai i le malaga na fesoasoani ia te au e manatua ai le mea sa taua,” o lana tala lea, “ma sa faigofie ai ona ou auauna atu.”

Sa le na o Marc le tagata sa naunau e auauna atu. E ui lava i le tetele o timuga, na iloga lava le fiafia a o auauai le autalavou i le asia o fale e tausi ai tagata matutua, fufuluina o taavale a leoleo, teuina o fata meaai i fale mo sulufaiga i le lotoifale, ma le faamamaina o se paka.

O le tuuina atu o lenei auaunaga o le mea aupito faatauvaa lea e mafai ona latou faia e faafetaia ai se aai na faapea ona fesoasoani i le Au Paia anamua.

O Le Talafaasolopito o Taavaletosolima o Lo’u Talafaasolopito Lena

Ina ua maea ona savavali i le Aso Faraile atoa ma le tuuina atu o galuega auauna atu i le Aso Toonai, ua fiafia le autalavou ua oo i le Aso Sa—o le taimi e faafesagai ma faalogologo ai i le perofeta. Ua nonofo nei faatasi ma o latou aiga i le faeasaite mo le faamanatuga, ma ua lagona e alii ma tamaitai talavou le agaga faafetai mo lo latou malamalamaaga fou e uiga i le aafiaga o taavaletosolima. O saunoaga a Peresitene Gordon B. Hinckley na musuia ai i latou e faaauau pea lena talatuu o le faatuatua lea na tuua e paionia o taavaletosolima. Na ia tau atu ia i latou, “E tatau lava ona tatou tepa pea i tua ia i latou o e na totogia se tau matautia i le faataatiaina o faavae o lenei galuega maoae i aso e gata ai.”

E le taumateina e alalaga paionia o e na tuua le Aai o Iowa i le 1856 i le faalogo mai e uiga i paionia o aso nei o loo nonofo i le siteki o le Aai o Iowa. Atonu o le a musuia i latou i le lototetele o le autalavou i aso nei o e o loo taumafai e ola i le talalelei i se lalolagi ua matuai le mautonu.

O Anna Shaner, o se tasi, o loo galue malosi ina ia avea ma se faataitaiga amiotonu i ana uo ma lona aiga. O lona faatuatua e tuu atu ai ia te ia le malosiaga na te manaomia e tumau ai i le ala [sao]. Fai mai o ia, “O le aafiaga i paionia e tele se aoga ia te au aua sa latou faia lea mea mo au. O lou talafaasolopito lena.”

TALAFAASOLOPITO O TAAVALETOSOLIMA

O sina vaaiga lenei e uiga i paionia o taavaletosolima:

• Na faatonuina e Peresitene Polika Iaga le Au Paia o Aso e Gata Ai, ina ia malaga atu i Siona e ala i taavaletosolima ona sa taugofie atu nai lo taavale solofanua e fai fale, ma e toatele atu le Au Paia e mafai ona malaga ai.

• E 10 le aofaiga atoa o vaega o taavaletosolima, mai le 1856 i le 1860.

• Sa malaga atu le Au Paia e ala i nofoaafi i le Aai o Iowa, i Iowa. Ina ua uma ona uta [taavaletosolima], o le 7 o vaega mai vaega e 10 o taavaletosolima na tuua le Aai o Iowa. O isi na o ese mai Florence, Nebraska.

• O le toatele lava o paionia o taavaletosolima na malaga ese mai Europa. Sa latou o mai mai Egelani, Uelese, Sikotilani, Aialani, Tenimaka, Suetena, Nouei, Suitiselani, ma Italia.

• Sei vagana ai vaega a Uili ma Matini (o e na o ese mai i le faaiuga o le vaitau ma na maua ai i le vave oo mai o matagi kiona), e fai si laiti o tagata na maliliu i le ala a vaega o taavaletosolima.

• E ui lava ina sa onosaia e paionia o taavaletosolima ia faigata, ae sa mausali pea le faatuatua o le toatele. Fai mai Priscilla M. Evans o le kamupani a Bunker, “Sa ula mai tagata ia i matou a o matou savavali ma toso a matou taavale, ae sa manaia le tau ma sa lelei tele foi auala, ma e ui lava ina sa ou ma’i ma sa matou le lavava i po, ae sa matou mafaufau pea, o se auala matagofie lea e o atu ai i Siona.”

Mai ia LeRoy R. Hafen ma Ann W. Hafen, Handcarts to Zion (1960).

• FAAMATALA MAI IA TE AU SE TALA