O Le Polokalama o Faatoaga a Aiga ua Siitia ai Tagata o le Ekalesia i Aferika i Saute

O se vaega o aiga o le uarota a Richards Bay, i le Siteki a Durban Aferika i Saute, ua fiafia i fua o fualaauaina—poo fualaau faisua—o se polokalama ua tasi le tausaga o faatoaga laiti, na amata e ala atu i le fesoasoani a faifeautalai faamisiona ma le Matagaluega o Uelefea a le Ekalesia.

O le toatele o tagata o le Ekalesia i nofoaga tu taulaga i le faataamilosaga o le falelotu i Richards Bay, e tauivi lava ma le faigata o le tulaga tautupe ona o le maualuga o le numera o e e leai ni galuega po o le maualalo tele foi o totogi.

O Elder Jack Davidson, o se faifeau faamisiona matua sa galue i le eria i le 2006, na ia vaaia se avanoa taua i se vaega o eleele e le o faaaogaina a le Ekalesia o loo faataamilo i le falelotu i Esikhawini faatasi ai ma le lelei o tomai faifaatoaga o nisi o tagata lotu. E mafai ona totoina ai fualaau faisua i soo se taimi o le tausaga, ma o ni faasiliga o le a mafai ona faatau atu i tagata o le nuu.

Na faatauina e le Ekalesia le fanua lea o loo fau ai nei ni fale le tumau se tolu o le Ekalesia (o le falesa ma ni seti se lua o potuaoga laiti) na fausia e tautuaina ai manaoga o tagata o le Ekalesia i lea taimi. O nei fale, mutia, fugalaau, ma le paka o taavale e na o le tasi vae tolu o le eleele o loo faaaogaina ai. O le fanua o loo totoe, e tusa ma le 45 mita le lautele ae 80 mita le umi, ua na o vao o loo ola ai. O lenei fanua o le a faaaogaina mo ni fale tumau pe a manaomia i le lumanai. O loo iai foi se pa o loo siomia ai le fanua mo lona saogalemu.

Na toetoe atoa le ono masina na faaputu ai e Elder Davidson tupe e faatau ai mea faigaluega, mea e fai ai alavai, ma isi masini ma fausia ai se fale mautu e tuu ai mea faigaluega ma sapalai. Na maua mai le seleni i le LDS Humanitarian Services [Auaunaga o Fesoasoani Alofa a le AAG] faapea ma foai alofa mai aiga ma uo.

O lenei fale mautu e teu ai mea faigaluega, e le gata ina aoga mo le malupuipuia o meatotino ae mo le faaaogaina tatau o le nofoaga e tagata o le Ekalesia. E toaitiiti lava tagata o le ekalesia i Esikhawini e i ai taavale. Afai latou te mananao e galulue e aunoa ma lenei fale, e tatau ona latou amoina mai ma toe amoina atu mea faigaluega mamafa i o latou aiga. Soo se mea e taatia solo i le fanua o le a gaoia. Ma, e le mafai e nisi faifaatoaga fou ona gafatia le faatau o ni mea faigaluega. O le i ai o le fale lenei, ua mafai ai e tagata ona ave mea faigaluega mo le faaaogaina ma toe faafoi atu. O se tasi o vaega o lenei fuafuaga lautele faa-faatoaga a le uarota, ia mafai e tagata o le uarota ma faifeautalai ona ave aitema mai lenei faaputuga o mea faigaluega i isi pitonuu o le uarota e fesoasoani ai i tagata e amatalia ai a latou faatoaga. O mea faigaluega uma lava e alu i le uila e mafai ona feaveai i se taavale pikiapu.

Na amata atu ia Mati 2006, e sili atu ma le sefululua faifeautalai faamisiona i le Sone a Richards Bay i le Misiona a Durban Aferika i Saute ua saunia e galulue e fesoasoani i le tapenaina o laufanua mo faatoaga ma ni fale ma nofoaga e saunia ai faalelei eleele faanatura.

O le epikopo a le uarota a Richards Bay o Ted Baldwin na ia faataatitiaina poloka mo le fale mautu, ae o isi na fesoasoani e pei ona moomia ai ma le faia o le galuega o le sima.

Na feagai lava Elder Davidson ma le toatele o alii faifeautalai ma le faamamaina o le laueleele ina ia mafai ona faatulaga poloka, ua tatau ona faagaoioi ma le malosi le galuega, ua tatau ona faapipii alavai, ma aveese maamaa. E masani ona auai atu le autalavou e fesoasoani ma aoao i le faaaogaina o mea faigaluega. O le tetele o nei poloka e tusa ma le 6 mita i le 10 mita ma ala savali e tai tasi mita le lautele e faataamilo ai.

A maea ona saunia poloka taitasi mo le totoina, ua saunia foi aiga o le aai o Esikhawini e faaauau ma toto fualaau faisua o le taumalulu. O nisi o aiga ua uma ona saunia fatulaau i o latou aiga e faatalitali ai mo a latou faatoaga.

O le aofai o poloka taitasi na fausia na ausia ai le sini faamoemoe e 30 i le amataga o Iuni. I le faagasologa atoa, sa matauina e tagata o le nuu ia gaoioiga sa faia. O le tele o aso e i ai tagata e oo atu ma fesili i tagata o le ekalesia po o faifeautalai foi. O nisi o nei talanoaga na oo atu ai ina fai lesona a faifeautalai.