Taimi o Fetufaaiga

Faatuatua Faaleaiga

Saunia E Elizabeth Ricks

“E maua le fiafia i le olaga faaleaiga pe a faavae i aoaoga a le Alii o Iesu Keriso” (“O Le Aiga: O Se Folafolaga i le Lalolagi,” Liahona, Oke. 2004, 49).

Ina ua taunuu atu faifeautalai i le nuu o Viliamu Jarvis i Lancashire, Egelani, sa taumafai nisi o alii e taofi faifeautalai mai le talai atu. Ae sa latou faaauau pea lava, ma na auai ai Viliamu ma lona toalua o Sieni, i le Ekalesia.

Na tuua e le aiga o Viliamu ia Egelani ina ia malaga atu i Amerika i le 1859. I le mavae ai o le 13 vaiaso o folau i se vaa ma le tele o tietiega i nofoaafi, na faatasia ai loa i latou ma isi tagata malaga i le vaega o taavaletosolima a George Rowley. Na toso e Viliamu se taavaletosolima i le silia ma le 1,000 maila (1,600 km).

Na ma’i Sieni ma na maliu ai. Na matuai manaomia e le vaega le maua o ni meaai, o lea na nofo ai Viliamu e tanu lona toalua. E toalua ni tagata liliu mai Suetena na nonofo e fesoasoani ia te ia.

A o toe amata ona malaga ese atu nei alii, sa latou vaaia ni Initia o agai mai ia i latou. Sa popole Viliamu. Mafaufau i lona fiafia ina ua taunuu mai Initia e agaga faauo. Sa latou talie i taavaletoso na lave mai i nei alii. Ona lave foi lea e Initia i latou lava i taavaletosolima ma toso ia taavaletoso seia oo ina latou tau atu i le vaega! Na tusia mulimuli ane e le atalii o le atalii a Viliamu e faapea, “E moni lava, e le’i i ai se galuega agalelei faatauvaa na sili atu ona talisapaiaina.” (Tagai Jeston Jarvis, A Short Sketch of the Life of William Jarvis.)

O Iulai tatou te faamanatuina ai le taunuu mai o paionia i le Vanu o Sate Leki. E maoae le faatuatua na faaalia e paionia. Na faatuatua Viliamu Jarvis. O ia o se faataitaiga i lona aiga. O loo i ai foi ni faataitaiga o le faatuatua i totonu o lou aiga, ma e mafai foi ona avea oe ma se faataitaiga o le faatuatua. A o mulimuli lou aiga ia Iesu Keriso i le faatuatua, o le a faamanuiaina oe.

Gaoioiga

Aveese le itulau U4, ma oti ese laulaau. Oti ese le laau, ma faapipii i se pepa malo. Tusi le igoa o se tagata o le aiga i laulaau taitasi. (Atonu e manaomia lou lolomiina ma oti ese nisi laulaau se tele.) Faapipii laulaau i le laau o lou aiga. Atonu e te manao e tuu tagata o le aiga o lou tama i le isi itu o le laau ae tuu aiga o lou tina i le isi itu. O le a e manao e tuu lou lava laulaau i le tafue ona e te auai i itu uma na o le aiga!

Manatu mo Taimi o Fetufaaiga

1. 1. Taaalo i le taaloga o le “O Ai Tatou?” Tuu atu i ni tamaiti e faatusa i ai nisi o aiga o tusitusiga paia e pei o Atamu ma Eva, Liae ma Sarai, po o Iosefa ma Maria. Fesoasoani i lo latou taliina o fesili e uiga i le aiga i le ioe po o le leai. E ono fesili se tamaitiiti, “E i totonu o le Tusi a Mamona lou aiga?” A iloa uma loa ia aiga taitasi, ona faamatala lea e uiga i le aiga, ma faaali atu le vaega o tusitusiga paia e maua ai lenei aiga. Fai atu i tamaiti e mafaufau i se uiga lelei se tasi o le aiga latou te mananao e maua e o latou lava aiga. Mo se faataitaiga, “Ou te manao i lou aiga ia mulimuli i le finagalo o le Atua e pei o le aiga o Liae ma Sarai.” Faitau mai le parakalafa lona fitu o le “O Le Aiga: O Se Folafolaga i le Lalolagi” “E maua le fiafia i le olaga faaleaiga pe a faavae i aoaoga a le Alii o Iesu Keriso.” Molimau atu e uiga i le taua o aiga amiotonu.

2. 2. O ni nai vaiaso ao lei faia lenei taimi o fetufaaiga, ia fai atu i tamaiti matutua e sauni e faamatala e uiga i le tagata muamua o le latou aiga na auai i le Ekalesia. Afai e mafai, filifili ni tamaiti o o latou aiga na avea ma tagata o le ekalesia mo ni nai augatupulaga faapea ma tamaiti o o latou aiga e le’i leva ona liliu mai. (A le o lea, ia faamatala atu tala e uiga i taitai o le Ekalesia e pei o Polika Iaga ma Parley P. Pratt mai le lesona 13 o le tusi lesona Peraimeri 5.) Fai se lisi o uiga e manaomia e tagata ina ia mafai ona auai i le Ekalesia i le 150 tausaga ua mavae. Fai se isi lisi o uiga e manaomia e tagata i aso nei ina ia auai ai i le Ekalesia. Ia taua [uiga] e tutusa ai. Molimau atu e uiga i faamanuiaga e oo mai i se aiga e ala i le talalelei.