Fesoasoani le Ekalesia i Polokalama a Mekisiko
Talu mai le 1929 na taumafai ai le malo i Mekisiko e faaleleia olaga o tamaiti e ala i le polokalama ua taua nei o le National System for the Integral Development of the Family (DIF). O loo faatautaia i tulaga faalemalo, setete ma aai, ua avea ai le DIF ma mea faigaluega e faamalosia ai aiga ma fesoasoani i tagata e maualalo tupe maua. O le taimi nei ua auau faatasi ai le Ekalesia ma le DIF e faaauau le faaleleia o olaga o tamaiti.
O Luis Camarillo, o le pule o le uelefea i le eria mo le Eria o Mekisiko i Matu, na ia maitauina faafitauli o loo feagai ma tamaiti o lana eria ma manao ai e fia fesoasoani i ia tamaiti. Na amata ona latou vaavaai ma isi tagata i faafitauli o loo feagai ma tamaiti i le eria ma iloa ai o le toatele o i latou o loo mafatia i ni tulaga se lua.
“O le Setete o Nuevo Leon e leai ni tamaiti e nonofo i magaala; ae peitai, e i ai tamaiti o loo mafatia mai le sauaina po o le tuulafoaiina,” o le saunoaga lea a Brother Camarillo.
Na iloa e Brother Camarillo ma isi tagata o le Ekalesia faamatalaga e uiga i taumafaiga a le DIF e fesoasoani ai i tamaiti, e ala i se polokalama i le lotoifale e vaai ai tamaiti mo se taimi le tumau, ma manatu ai e fia fesoasoani i le DIF. Sa ia faafesootai atu ia Dr. Alejandro Alberto Morton Martínez, o le faatonu o le vaega e puipuia tamaiti ma aiga i le DIF, ma ofo atu e faipaaga ma le faalapotopotoga e fesoasoani i le polokalama. Talu mai lava lena taimi, o loo galulue pea tagata o le Ekalesia ma Dr. Morton i le polokalama i le vaaia o tamaiti mo se taimi le tumau.
Faafetai i ofo mai le Ekalesia ma le polokalama o le vaaia o tamaiti mo se taimi le tumau a le Setete o Iuta, ua mafai ai e le DIF ma isi o loo aafia ona maua ni aoaoga aoga i mataupu e uiga i le tausiaina o tamaiti mo se taimi le tumau.
Na saunoa Brother Camarillo, “Na malaga mai iinei i Monterrey ni faifeau faamisiona tautua se toalua mai Iuta ma tuuina mai ni aoaoga faavae mo le toa 50 o i latou o loo i ai le agavaa e avea ai ma faiaoga.”
E ala i vaega o Auaunaga Fesoasoani (Humanitarian Services,) na mafai ai e Brother Camarillo, Dr. Morton, ma nisi ona malaga atu i Iuta mo nisi aoaoga loloto mai le Matagaluega mo Tamaiti ma Auaunaga i Aiga a Iuta. O nei aoaoga na aoaoina ai faavae o le faatuina ma le faatumauina o le galueaiina o le polokalama o le vaaia o tamaiti mo se taimi le tumau, ma ofoina atu i tagata na auai le poto masani i le galulue lea ma mea moni o loo tutupu. A o i ai i Iuta, na asiasi i latou na auai i le Matagaluega o le Uelefea a le Ekalesia faapea foi ma le Vaega o Auaunaga mo Aiga a le AAG.
E ui ina o loo agai pea i luma le polokalama o le tausia o tamaiti mo se taimi le tumau i Nuevo Leon, ae o aoaoga uma ua maea ona maua e Brother Camarillo ma isi, ua amata ona fua mai.
“Ona o lenei aoaoga, ua mafai ai e le DIF ona faaleleia atili auala mo le sailia ma le filifilia o aiga agavaa e tausia tamaiti i se taimi le tumau,” o le saunoaga lea a Brother Camarillo. “O loo i ai le manatu maualuga e maua e tamaiti se isi malamalama ma se olaga sili atu … nai lo i latou ua tuuina atu i aiga e le i filifilia i le faiga fou lea na aoao mai i le Ekalesia.”
O le aafiaga i le galulue ai ma le DIF e oo mai i le taimi nei, ua matua lelei lava mo i latou uma na auai, faapea foi ma Brother Camarillo. “E faigata ona saili se faalapotopotoga e i ai ni tagata e mafai ona tuuina atoa mai le taimi mo se lelei, e pei o i latou o loo galulue mo le DIF,” o le saunoaga lea a Brother Camarillo. “O se aafiaga matagofie tele le galulue faatasi ma se faalapotopotoga faapenei.”
E faaopoopo atu i le fesoasoani e amataina le polokalama o le tausia o tamaiti mo se taimi le tumau, na fesoasoani foi Brother Camarillo e faatulaga ni galuega fesoasoani alofa faatasi ma le DIF, lea na foaifuaina ai ni nofoa faataavalevale, masini faafomai faapea foi ma ni meaafale.