Faia se Konaseti a Lotu Tuufaatasi i le Lotoa o le Malumalu

E sili atu ma le 700 tagata o sui mai le tele o faatuatuaga eseese na faapotopoto ia Fepuari 2007 i le Fale Tele mo Potopotoga i le Lotoa o le Malumalu e auai i se konaseti faaletausaga o le Salt Lake Interfaith Roundtable [Faataamilo a Lotu Tuufaatasi i Sate Leki] e faamanatu ai le faaiuga o le Vaiaso o Lotu Tuufaatasi.

O le konaseti, “O Se Valaau mo Talosaga—o se Valaau mo le Filemu,” sa tuuina atu o se faaeaea maualuga e ala i pesepesega mo agaga o tagata. Na faafiafia faapitoa ai ni tagata pepese lauiloa se toatolu mai le faatuatuaga Isalama, Kerisiano ma Iutaia, lea na valaauina ai le aofia i se tatalo. E fitu ni vaega na fai ma sui o se faataitaiga o le tamaoaiga o tu ma aga faatapuaiga i Iuta, na faatinoina ni faafiafiaga o pesepesega ma siva e faatatau i le autu o tatalo ma le filemu.

O Dr. James Pingree o le Fono o Mataupu Tau Va i Fafo a le Ekalesia i Sate Leki na faafeiloaia e na auai ma faasoa atu lona fiafia tele i le faamoemoe. Sa ia saunoa e uiga i le pese faaiu, “Ia i ai le Filemu i le Lalolagi,” ma faailoa mai o le afafine o le na fatuina le pese, na tuuina atu le faatagaga i e na fuafuaina le konaseti e faaaoga le pese. Na tauina mai e Dr. Pingree le saunoaga a lenei alo tamaitai e faapea: “O le ituaiga fuafuaga tonu lava lenei na mafua ai ona tusia lenei pese. Ma o lo outou faaaogaina o le a matua faafiafiaina ai i laua.”

Na faafeiloai foi e le kovana o Iuta o Jon M. Huntsman Jr. le aofia na auai i lona faitauina lea o se tautinoga i le taua o fesootaiga ma le galulue faatasi o faatuatuaga eseese. Na faamamafa e Kovana Huntsman le tatau ona galulue faatasi ona o loo agai pea i luma le faatupulaia o le tele o aganuu ma lotu eseese i totonu o Iuta. Na ia saunoa,“O le alofa ma le faamoemoe o le lua ia o upu pito i mamana o le gagana Peretania. Ma o loo faasalalauina e lenei faalapotopotoga tele le alofa ma le faamoemoe e ala i le faatauaina o tagata eseese.”

O le Wesley Bell Ringers mai le Ekalesia Metotisi Tuufaatasi a Keriso na amataina le vaega o pesepesega o le polokalama i lo latou taina o le “La Paix” (“Filemu”). O Arvol Looking Horse na ia tuuina atu le Tatalo i Itu e Fa lea e paia i Tagatanuu o Amerika.

O Gayatri Jayaraman, i ona laei faaleaganuu Initu, na faatinoina le “Ganesha Kautuvam,” o se siva Bharatanatyam. O le Aufaipese Uesiliana a Toga na latou usuina le “O le a Ifo Atu le Lalolagi Uma Ia Te Oe, Iesu” i lalo o le taitaiga a Anitoni Ma’u.

O le au ta talipalau a le Buddhist Taiko, i lalo o le taitaiga a Stan Hirai ma le Ekalesia Puta i Ogden, na faatinoina se faafiafiaga ta talipalau. Mo tagata Puta Jodo Shinshu, o talipalau e faatusaina lea i le leo o Puta.

O tamaiti aoga mai le Iqra Academy of Islamic Society na usuina ni pese faa-Isalama se lua i le gagana Arapi: “O le Lejla Ramie” ma le “Talitha Two Moons.” O le vaega pepese a tamaiti aoga (University Student Vocal Ensemble) mai le Iunivesite o Iuta, o ona sui auai o loo fai ma sui o le tele o tu ma aga masani a faatuatuaga eseese, ona usuina ai lea o se fatuga o le pese “Sa Fanau Maulalo Iesu.”

O Jan Saeed, o se sui o le Faatuatuaga Baha’i, na ia faia le tatalo faaiu o le filemu ona tutulai ai lea o le aofia ma o latou lagiina le pese “Ia i ai le Filemu i le Lalolagi.”

E toatele i latou ua faailoa lo latou agaga faafetai i le Salt Lake Interfaith Roundtable mo le fuafuaina o lenei konaseti. Na saunoa Heather Whiteblume “O le po nei ua faatusaina i le nonofo filemu, lotogatasi, ma le femalamalamaai. O tagata uma iinei ua faaalia le faaaloalo i tatalo, talitonuga ma tu ma aganuu a isi.”

O le Salt Lake Interfaith Roundtable na faafoeina le konaseti i lalo o le lagolago a le Komiti Faafoe o le Olimipeka a Sate Leki 2000 ina ia mafai ona aofia uma ai aganuu a faatuatuaga i le tautuaina o tagata taaalo o le Olimipeka ma ia “fesoasoani i le faaaloalo i le va o lotu tuufaatasi, malamalama, ma le agaga faafetai e ala atu i fesootaiga i le va o lotu tuufaatasi.” E faaauau pea ona fono lenei vaega i masina taitasi.