Na Ou Manatuaina Paionia
Ina ua 19 ou tausaga, sa valaauina au i le vaegaau a Suetena. I le avea ai ma se tagata e faapitoa i fesootaiga e faaaoga ai auupega, sa ou tautua ai i le vaega Lona Valu ma o le vaega taitai lea.
I le ta o le 4:00 i se tasi taeao o Ianuari, na faatonuina ai i matou e o matou taitai ina ia fai o matou lavalava ma tapena a matou mea faigaluega uma ma faapotopoto i fafo i le 20 minute. O le vaivai ma le fiaai mai gaoioiga o le aso na muamua atu, na ou lagonaina ai e pei lava e le’i moeiini ou mata, ae o lenei foi ua toe tapena e faafetaui se suega fou. Ou te manatua pea ou lagona na i ai, i le laa ese mai le mafanafana o le fale i se malulu e le mafaamatalaina.
Na taunuu mai se pasi tele a le militeli e ave i matou, ma na tau mai matou te o i Stockholm mo se suega tele e vaai pe matou te agavaa e faaauau le aoaoga. O le taunuu atu i le taulaga, sa vaevaeina ai i matou i ni vaega se tolu, faatasi ai ma ni faafanua eseese ma ni taunuuga eseese.
Sa matou savalia magaala o Stockholm, sa i ai uma a matou auupega, fana, ma isi mea. O tulaga atofaina taitasi e suesueina ai, sa manaomia ai ona matou faia se suega o le malosi, e pei o le fetaiai ma se tulaga o le ave faamalosi o se tagata, fetauaiga i le auala, tamomoe i ana ma fale, ma togafitiga faafesoasoani muamua. A uma suega taitasi, e tau leai se taimi e malolo ai, ae toe o atu foi i le isi tulaga atofaina e suesueina ai.
O le auala maluluina na pepe ai ou vae, ma na tiga ou tauau ona o le mamafa o mea na feaveai. Ae sa ou alu pea ma taumafai e aua nei ou faitio. Sa oo le matou vaega i le maatiati o le tau ma tofotofoga faigata, ae sa matou savavali pea o ni uso. I le ala, sa matou tau atu ai i tagata o le lotoifale na faateia [i le vaaia o i matou] ma e na talie, ma tusitusi lima, ma feei mai ia i matou.
Sa ou lelava, maalili, palapala, ma tiga ina ua matou taunuu i le matou taunuuga faaiu ma piki ai matou e le pasi. I le taimi o le malaga e toe foi atu i le fale, sa ou mafaufau i tofotofoga na matou onosaia ma le matou vaega, ma ou fesili ai ia te au lava, pe na i ai se aoga o lenei aoaoga e ese mai i pine na tauaaoina i le faaiuga. Na ou fesili ifo ia te au lava, pe na i ai se isi e ese mai ia i matou na oo i nei tofotofoga e pei ona matou oo i ai i lena aso.
Na faafuasei, ona ou mafaufau i faigata ma le ositaulaga a paionia i aso popofou o le Ekalesia. Na ou manatuaina tala i lo latou fiaaai, maluluina, ma tiga; o le tauemuina; ma le savavali i maila e tele—e tutusa lava ma mea na ou oo i ai i lena aso. O le eseesega tele lava, sa na o le tasi le aso na ou onosaia ai lenei mea. Sa malaga paionia i le malulu ma le kiona, timuga ma le la, savavali i le palapala ma le pefu. Sa latou savavali ma ni meatotino faalelalolagi laiti e puipuia ai i latou, ae sa na o le faatuatua o le a puipuia i latou e le Alii. Sa savavali le au paionia e sue Siona aua sa i ai se galuega ofoofogia a le Alii mo nei tagata o le ekalesia e faataunuuina.
Sa faafuasei lava, e aunoa ma le mafaufauina ona amata ona ou pese “Omai, Omai, Le Au Paia” (Viiga, nu. 17), ma o iina tonu lava i luga o le pasi, na amata ai ona ou lagonaina se suiga i totonu ia te au. Na oo mai se lagona mafanafana ma le fiafia tele i lou tino. Ou te le’i malosi i le Ekalesia i lena taimi, ma sa ou manatu ailoga a ou toe foi [i le ekalesia], ae na faafuasei lava ona oo mai se lagona ia te au na faapea mai, “Toe foi mai i le ekalesia.”
Ina ua ou taunuu atu i le nofoaga o le tolauapiga, na ou valaau atu i ou matua ma tau atu i ai ou te alofa ia i laua ma ua ou manao ou te toe foi i le lotu. O le Aso Sa na sosoo ai, o se suega tele lea mo au, e iloa ai pe na ia te au le lototele e toe foi atu, aua ua umi o ou aluese mai le ekalesia. Sa le’i faigofie le toe foi atu, ae sa aoga lava. Na fesoasoani lou aiga ma isi tagata o le ekalesia ina ia ou lagona le taliaina.
Sa amata ona ou sauni e fai se misiona ma o le lua tausaga mulimuli ane, na maua ai lou valaauga e auauna atu i le Misiona a Cape Verde Praia. Ina ua ou taunuu atu i le Aai o Sate Leki i lou malaga atu i le Nofoaga Autu e Aoaoina ai Faifeautalai, sa ou vaaia ai le faataunuuina o le galuega ofoofogia e paionia i le fausia o se malumalu matagofie ma le fuafuaina o se aai mataina. Na ou faapea lemu ifo, “Faafetai lava.”
O le aso, pe a ou fesili ifo ia te au lava pe na i ai se aoga o lena suega i le militeli, ou te tali, na i ai, i soo se itu lava, aua o lena taimi o manatunatuga maoae i luga o se pasi faatasi ai ma se vaegaau o uso a fitafita, na ou iloaina ai le taua o le galuega a le Alii. Sa aoga lava aua na ou toe foi mai ai i le Alii ma ua ou faia nei Lana galuega ma Lona finagalo.