Uo i le Uo
Faamanuiaga o le Malumalu
“O aso e gata ai … ina faatumauina ai o le mauga o i ai le fale o Ieova i tumutumu o atu mauga … ona gasolo ane ai lea o nuu uma i ai” (Isaia 2:2).
Ou te fiafia i le malumalu. A o ou laitiiti, na aveina atu e lou faiaoga o le Peraimeri lau vasega i lotoa o le Malumalu o Sate Leki. O se savaliga matagofie i laufanua, ma maofa i fugalaau mananaia, ma lagona ai le Agaga o le Tama Faalelagi i tafatafa o le maota o le Alii.
Na tau mai e lou faiaoga o le malumalu e fai i maamora. Sa talanoa mai e uiga i osigataulaga na faia e paionia mo na maa taua—le ala na latou faaaluina ai aso e lima e aumai ai se maa se tasi i le tulaga o le malumalu. “O outou iloa mai nei maa uma?” na ia fesili ai. “Mafaufau la pe fia ni aso na faaalu e paionia e aumai ai maa e fausia ai lenei malumalu matagofie.” Ou te manatuaina lou iloaina o le ositaulaga na faia e o tatou augatama
O se aafiaga e manatua pea. O se faataitaiga foi o le ala e mafai ai ona fiafia outou o tamaiti i faamanuiaga o le malumalu i le taimi nei. Afai e te nofo latalata i se malumalu, e mafai ona e oo i le siosiomia faaleagaga i laufanua o le malumalu. A uma ona e papatiso ma faamauina, e mafai ona e auai i faapaiaga o malumalu. Ma o le a tele foi nisi faapaiaga; e 11 ua fuafuaina i le taimi nei! A atoa lou 12, e mafai ona e faia papatisoga mo e ua maliliu. E le afaina po o le a lou nofo mamao mai le malumalu, e taua lava lou saunia i le taimi nei mo lena avanoa paia.
E i ai i tamaiti se aafiaga mamana mo le lelei i tagata matutua ma isi foi tamaiti. O nisi o tamaiti o le Peraimeri o le itu o le Malumalu o Houston Texas na tusi atu i le konekarate na fausia le malumalu iina. Fai mai le tusi: “Matou te mananao ia outou iloa e taua tele le malumalu ia i matou. Talu ai ona sa faapaiaina le laueleele e se Aposetolo a le Alii, o lea e paia ai le fale ma le fanua ia i matou. O le malumalu o le a matou o atu i ai ina ia faaipoipoina. O le a matou o atu i ai e aoao ai mea e tatau ona matou iloa e toe foi atu ai i lo tatou Tama Faalelagi. Ia faamanuia outou e le alii mo le galuega o loo outou faia mo i matou.”
Na aveina atu e le konekarate lenei tusi matagofie ma tuu i totonu o le latou ofisa. Sa latou faitauina i aso uma. Ina ua maea le malumalu, sa aumai e le konekarate a latou lava fanau e matamata faataamilo i le malumalu ma lagona ai le agaga e pei ona faaalia e tamaiti Peraimeri i le latou tusi.
O le isi faamanuiaga i lou olaga o le galulue vavalalata lea ma Peresitene Gordon B. Hinckley. O le iva tausaga ua mavae ua see atu le Ekalesia mai le i ai o ni malumalu se 51 i le 124. O lenei vavega ua faamalosia ai lou faatuatua ma fesoasoani ou te malamalama ai i le taua o malumalu.
O le 1998 e 51 a tatou malumalu na faaaogaina ae 17 na fausia. Ae i le konafesi aoao, na saunoa ai Peresitene Hinckley e manaomia le i ai o ni malumalu se 100 i le faaiuga o le tausaga 2000.1 O lona uiga e 32 malumalu fou o le a fausia e faaopoopo atu i le 17 ua amata ona faagasolo. Sa matou manatu o se galuega faigata. Ae e leai se mea e faigata pe a faamanuiaina e le Alii. E tele vavega na faatupuina ai lenei mea i lena taimi puupuu. O lea taimi ma lea taimi, na maopoopo mai ai mea uma i le taimi tonu lava na tatau ai—o vavega e pei o le mauaina o mutia e toto i le fanua o le malumalu na oo mai ae toe o nai itula amata le faapaiaga.
O le tausaga 2000 e 34 malumalu na faapaiaina ai. O le tausaga sili lea i le tele o malumalu na faapaiaina i se tausaga se tasi i le talafaasolopito o lenei lalolagi. Na musuia Peresitene Hinckley e fausia ni malumalu se tele. Ona faamanuia tele mai lea o i tatou e le Alii ma fesoasoani ia tupu lena mea, aua Na te faamamaluina Ana perofeta. Ou te faamoemoe tou te faamamaluina foi ia perofeta. Ma ou te faamoemoe o le a outou faatauaina ma saunia i taimi uma mo faamanuiaga o le malumalu.