Faamatalaga

O Se Savali mo Lo’u Tama

E ese le manaia o le Liahona o Setema 2006. Ou te iloa na musuia moni Peresitene James E. Faust e tusia lenei savali “O Le Tama e Alofa.” Na foliga mai na faatatau tonu lava ia te au ma lou aiga. O lou aiga e toaono tamaiti, ma ua maliu lo matou tina. Ina ua uma ona [ou] faitauina le tusitusiga, ou te le’i toe faatali i le pasiina atu i lou tama, o le ua le toe toaga. Ou te iloa o le a faamalosia ai o ia.

Tshibasu M. E. Baron, Malo Temokalasi o Congo

O Se Fuafuaga mo Lo’u Olaga

O se tasi afiafi na ou faitauina ai le lomiga o le Liahona o Ianuari 2006. O le tusiga a Peresitene Gordon B. Hinckley i le O Mai e Faalogo i le Siufofoga o se Perofeta, na faaautuina “Savali i le Auala Maualuga,” na vave lava ona ou tosina atu i ai. A o ou faitauina lenei savali sili ona musuia, na faamalamalamaina lou tagata atoa i ona upu uma. Ua avea o se fuafuaga mo au e mulimuli ai i lau malaga i le olaga.

Coleen Emily G. Mabilog, Filipaina

Ua Aoao Ai Se Faifeautalai

I lou toe foi atu i le iunivesite ina ua maea lau misiona, na ou iloa ai le faigata tele o galuega faaakatemia mo au. I le avea ai o se tagata aoga i le saienisi ma le matematika, na foliga mai na galo ia te au ia aoaoga faavae o le kemisi [chemistry], fisiki [physics], ma le matematika a o ou i ai i lau misiona. E ui lava ina fai si faigata i le amataga o lou toe foi atu i le iunivesite, ae o mea na ou aoaoina i lau misiona—e pei o suesuega e sue ai tali—na uunaia ai lou lagona mautinoa a o ou suesue i le aoga. Ou te fiafia ona sa ou faamuamuaina le Alii i lou olaga ma alu atu i se misiona. O le tusiga “I le Au a le Alii,” na saunia e R. Val Johnson i le Liahona o Mati 2006, na faamautuina ai nei lagona.

Aristotle Kyeremanteng Fokuo, Kana

Faamanatuina i Manaoga o Isi

Ou te manatu o le Liahona o Oketopa 2006, o se tasi lea o lomiga aupito sili ona manaia ua lomiaina. Ou te iloa e toatele tagata o loo sailiili i le Ekalesia ua latou lagonaina o lenei lomiga ua talanoa sao atu ia i latou. O au foi ua avea ma se tagata o le Ekalesia mo le tele o tausaga. Ua ou iloa o tagata ua leva i le ekalesia, e mafai foi ona faatauasoina i popolega, atugaluga, ma manaoga a i latou o e faatoa auai i le Ekalesia, po o e foi o loo sauniuni e auai ai. O le Liahona o Oketopa ua faamanatu mai ai ia te au o latou manaoga.

Volker P. Gebhard, Siamani

Faamalamalamaga Tonu

Sa ou laki i le feiloai atu i faifeautalai mai la outou ekalesia. Faafetai i nei alii talavou, ua ou iloa ai le Liahona. O se mekasini ofoofogia! E aumaia ai se vaaiga atoa o le misiona ma aoaoga faavae o la outou ekalesia. E talanoaina ai faafitauli faapea foi ma auala e foia ai. E talanoa foi e uiga i taitaiga i le agai i le lumanai o la outou ekalesia.

Sa ou faitauina le tusiga “O Le Pau o Atamu ma Eva” i le Liahona o Iuni 2006. Ou te fia faafetai atu ia te outou mo le tauamiotonuina o lo tatou uluai tina o Eva, faapea ma a outou suesuega maelega mo faamalamalamaga moni e uiga i mea taua na tutupu o loo faamatalaina i totonu o le talalelei.

Alla R. Muriseva, Rusia