Manatu Faaopoopo mo Taimi o Fetufaaiga, Iulai 2007

O manatu faaopoopo nei e mafai e taitai o le Peraimeri ona faaaoga faatasi ma le Taimi o Fetufaaiga na lomia i le Liahona o Iulai 2007. Mo le lesona, faatonuga, ma gaoioiga ia e o faatasi ma manatu nei, tagai “Faatuatua Faaleaiga” i itulau U4 ma U5 o le vaega mo tamaiti i lenei lomiga.

1. Vaevae le Peraimeri i ni vaega se lua. Sue e le tasi vaega le Esoto 20:12 ae sue e le isi vaega le Mosaea 13:20. Valaaulia i latou e faitau mai a latou fuaiupu i le taimi e tasi. Ia faamatala atu o le mau i le Esoto o se vaega o Tulafono e Sefulu, lea na tuuina atu ia Mose i le Mauga o Sinai. I le Mosaea, o loo taua ai e Apinati ia Mose. Fesoasoani i tamaiti e tauloto lenei mau e ala i le faasolosolo i laina ona tau mai lea e tamaiti taitoatasi se upu se tasi. Faataga i latou e faaaoga a latou tusitusiga paia mo ni nai taimi i le amataga.

   Ia taitai se talanoaga faavaega (tagai “Talanoaga Faavaega,” O Le Aoao Atu E Leai Se Isi Valaauga E Sili Ai [1999], 184–85). Valaaulia ni tagata se toatolu e oo i le toalima o le uarota po o le paranesi e eseese le matutua, ia aofia ai tamaiti, ina ia o mai i le Peraimeri e tali fesili e uiga i le ava i matua. Ia faailoa i tagata o le talanoaga faavaega ia fesili o le a e fesiligia. Mo se faataitaiga, “O le a se mea se tasi ua faia e lou alo e faailoa atu ai lona ava ia te oe?” po o le, “O le a le matua e tatau ona e oo i ai ona tuu lea o lou toe faalogo i ou matua?” Ia matuai faamanino atu le taua o le ava i matua i taimi uma—e le gata i ou matua faalelalolagi ae faapena foi i ou matua faalelagi.

   Faaali atu se ata o ou matua, ma faasoa atu se tala pe na faapefea ona faamanuiaina oe i le ava i matua. Tuuina atu lau molimau e uiga i le alofa o le Tama Faalelagi i Lana fanau.

2. Fesoasoani i tamaiti e saunia se afiafi faaleaiga e fetufaai ai ma o latou aiga (i lalo o le faatagaga a o latou matua). Ia faatulaga ni nofoaga po o ni potu se tolu (tagai “Nofoaga po o Potu,” O Le Aoao Atu E Leai Se Isi Valaauga E Sili Ai, 189). Vaevae tamaiti i ni vaega se tolu, fesuiai i latou i nofoaga nei e tolu. I le nofoaga 1 ia faamanatu le “O Loo Tautalagia Iinei le Alofa” (Tusipese a Tamaiti, 102–3)—po o se isi pese e faatatau i aiga—ina ia mafai e tamaiti ona aoaoina o latou aiga i upumoni o loo i le pese. I le nofoaga lona 2 faamatala se tala e uiga i se tagata muamua o le aiga na auai i le Ekalesia. Tuuina atu se lui i tamaiti e saili a latou lava tala o se tuaa po o se isi tagata o le aiga e faasoa atu i le afiafi faaleaiga. I le nofoaga lona 3 aoao tamaiti ia saunia ni meaalofa laiti ma faigofie. Filifili se meaalofa e faigofie ma e le taugata e fai e se tamaitiiti.

   Usu le pese “O Le Aiga” (Liahona, Ape. 2004, U11). Tuuina atu le molimau i auala e mafai ai e tatalo faaleaiga, suesueina faaleaiga o tusitusiga paia, ma afiafi faaleaiga ona aumaia faatasi aiga.

3. Aoaoina o le pese: “O Loo Tautalagia Iinei le Alofa” (Tusipese a Tamaiti, 102–3). Ia faaali faataamilo i le potu ia ni faailoilo e pei o le “O Loo Tautalagia Iinei le faaPeretania,” “O Loo Tautalagia Iinei le faaRusia,” “O Loo Tautalagia Iinei le faaFarani.” Fesili atu i tamaiti e faamatala mai po o fea e faaaoga ai lea gagana. Ia faaali atu se isi faailoilo e faitauina, “O Loo Tautalagiina Iinei le Alofa.” Fesili atu po o le a lea ituaiga nofoaga. Ia faamatala atu, e taua le tautala i upu o le alofa i totonu o le aiga, e tusa lava po o le a le gagana latou te faaaogaina.

   Fai i tamaiti e fesoasoani ia te oe i le faatulagaina o se ata o se nofoaga e talanoaina ai le alofa. Fai atu ia i latou e faalogologo ao e amataina le ata. Usu le pese, “E tootuli lou tina.” Valaaulia se teineitiiti e fai ma tina. E mafai e le teineitiiti o loo fai ma tina ona faamalosia upu o le pese e ala i le faia o taga. Mo se faataitaiga, e mafai ona faanounou ona tulivae pe a oo i upu e taua ai le “tootuli”; e mafai ona faasino atu i lona gutu pe a fai mai le pese, “tatalo”; e mafai ona tuu lona tamatamailima i luga o lona gutu pe a fai mai le pese “le [fefe ai].” I le faaiuga o le fuaiupu, e tatau ona tusi atu le lima o le teineitiiti i le faailoilo “O Loo Tautalagia Iinei le Alofa.”

   Ia valaaulia se tamaitiiti e fai ma tamā i le vaega lona lua o le pese. Faaaoga taga e pei ona faia muamua e faamalosia ai upu o le pese. Ma ia faasino atu lona lima i le faailoilo pe a uma le pese. Aoao le laina mulimuli o le pese i le tuu lea o se ata o le Faaola i tafatafa o le faailoilo “O Loo Tautalagia Iinei le Alofa.”

   Ia faamalamalama atu i tamaiti, o le vaaiga lea sa e faia atonu e le o le vaaiga lea o loo latou vaaia i le taimi nei. Na saunoa Vicki F. Matsumori, o le fesoasoani lua o le au peresitene aoao o le Peraimeri e faapea: “Talu ai ona sa ou ola ae i se aiga e le lolotu, ou te le i vaai o tootuli lou tina e tatalo, pe na faaaogaina e lou tama le perisitua. O loo tuuina mai e le pese se faataitaiga ou te faamoemoe o le a maua e la’u fanau i totonu o lo’u aiga, ma le tulaga ou te faamoemoe o le a faaauau ai pea i tupulaga uma o lo matou aiga.” Ia tuuina atu se lui i tamaiti e sauniuni ia maua ni o latou lava aiga e faavavau.