O Le Fefiloi o Tagata o le Ekalesia ua Taofia ai le Faasinosinolima

I Harlem, o loo taitaiina ai e se epikopo Aferika-Amerika lana aulotu i se tatalo. I Miami, e ulufale atu tagata tuaoi i se falesa samasama sesega ma faafeiloai le tasi i le isi i le faaHaiti. I le Aai i Sate Leki, e aoao atu e se faiaoga lana vasega faaleTusi Paia i le faaSaina. Ao o le taimi lea, i Florida, o loo pepese le faalapotopotoga atoa i solo faatino o le Gagana Fai i Taga faaAmerika. Ma, i Kalefonia o loo faia ai e se tamaitiiti sana uluai lauga i le Peraimeri i le faaSipaniolo.

O lenei ata e matuai eseese mamao mai uiga e masani ona iloa ai e le toatele ia tagata o le Ekalesia i le Iunaite Setete, o tagata papae, o le vasega faaleogolua mai Iuta. Ui i lea, ua faaalia tonu ai le suiga o tagata o atunuu eseese ua auai i le Ekalesia, ma ua faasolo ina faateleina le fefiloi, ma ua atagia ai le tele o ituaiga aganuu ma aafiaga eseese.

O lenei fefiloi o tagata eseese na le mafai ona lilo i le au tusitala ia na faalauiloaina i ulutala e pei o le “Faatupulaia Mamona i Nofoaga Tutotonu o Aai—Ua Toatele Tagata Uli ma Tagata Sepania Ua Tosina i le Ekalesia” na taua ai e le Philadelphia Inquirer, “E Saili e le Ekalesia a Iesu Keriso o le Au Paia o Aso e Gata Ai ona tagata i Nofoaga Tutotonu o Aai” na tusia i le Denver Post, “O le Faatuatuaga e le Faatauaina le Lanu o le Tagata” i le Chicago Reporter, ma le “Manaomia se Nofoaga Tele mo Faatasiga a Mamona i Harlem” i le New York Times.

O Jan Shipps, o se polofesa faamalolo faamamaluina o suesuega o talafaasolopito ma mataupu tau lotu i le Iunivesite o Indiana, na saunoa e faapea, e masani ona valaau atu le au tusitala ia te ia, e faateia i le ola o le Ekalesia i nofoaga tutotonu o aai. “Latou te fesili, ‘O fea o i ai Mamona?’ Ou te tau atu ia i latou, ‘O loo i ai i soo se mea.’”

Mo se faataitaiga, i le Iunaite Setete, e sili atu ma le 150 faalapotopotoga o le Au Paia o Aso e Gata Ai e tautatala i se aofaiga e 20 o gagana eseese, e aofia ai le faaPolani, Navajo, Rusia, Sipaniolo, ma le faaSiamani.

O le tupu olaola o le Ekalesia o le faailoga lea ma le amanaiaina o le polokalama volenitia faafaifeautalai i le kelope, e pito i tele o lea ituaiga i le lalolagi. E sili atu ma le 52,000 faifeautalai o loo aoao atu i misiona e 347 i le sili atu ma le 140 atunuu.

“Matou te galulue malosi e tuuina atu le savali e maua ai le faamoemoe,” na saunoa ai Elder Earl C. Tingey o le Au Peresitene a le Fitugafulu. “Matou te faasoa atu savali e fesoasoani ai i aiga. Matou te aumaia le faamoemoe i le ala e avea ai se tamā ma se tamā, se tina o se tina—ma e faavae uma lava i aoaoga a Iesu Keriso.”

I le taimi foi lea, na vave lava ona faamanino mai e Elder Tingey le maioio lelei o le tulaga ese o le Ekalesia o le Au Paia o Aso e Gata Ai i le lalolagi faa-kerisiano. Na ia saunoa, o le Ekalesia e le o se Katoliko po o se Porotesano, ae o le toefuataiina o le Ekalesia a Iesu Keriso anamua.

O loo ua tupu olaola foi le Ekalesia i le toatele o ituaiga tagata eseese faavaomalo. Ua sili atu nei ma le afa o tagata o le Ekalesia i latou o loo alaala i fafo atu o le Iunaite Setete, o se matatia na ausia ia Fepuari 1996.

Ua toeitiiti lava ona ausia lea e le aofai o tagata o le Ekalesia a Iesu Keriso o le Au Paia o Aso e Gata Ai, le 13 miliona ma e tulaga mamao lava mai le na o le toaono tagata ia Aperila i le 1830, ina ua faatuina e Iosefa Samita le Ekalesia i le nofoaga i matu o Niu Ioka.

O lena tupu olaola o tu ma aga eseese ma atunuu ua avea lea ma se lui pito i taua a le Ekalesia. Ina ia fesoasoani e ausia, ua faaliliuina e le Ekalesia tusitusiga paia, taualumaga o konafesi, faasalalauga i satelite, taiala mo mataupu aoaoina, mekasini, polokalama faakomepiuta, faamatalaga i luga o tuatusi faavaomalo, ma isi mea i le sili atu ma le 100 gagana eseese. O le faatulagaina o faaliliuga maeaea o se tasi lea o fesootaiga pito i tele i le lalolagi.

I se lauga i le National Press Club i Uosinitone, D.C. i le 2000, na saunoa ai le Peresitene o le Ekalesia o Peresitene Gordon B. Hinckley, o le faatupulaia ma le olaola o le Ekalesia ua tuuina mai ai ni lui faigata. “Muamua o le aoaoina o tulaga faaleautaitai i lotoifale,” saunoa ai Peresitene Hinckley. “lona lua … o le fausiaina lea o fale tapuai ona o le televave o le tupu olaola o le Ekalesia.”

I se taumafaiga ina ia foia le manaoga mo nisi fale mo tapuaiga, e tusa ma le faitau selau fale fou e fausiaina i tausaga taitasi i le lalolagi atoa.

Ae o le aoaoina o taitaiga i aulotu e leai se isi ua leva ona avea ma tagata o le Ekalesia, e aumaia ai ni lui faapitoa. I nisi o atunuu ia e le’i leva ona faatu ai le Ekalesia, o nisi taitai ua maua o latou tofiga faaleautaitai i ni nai masina talu ona auai i le Ekalesia. Ma e tau leai nisi e avea ma faataitaiga mo ia taitai fou.

O le amanaiaina o nei lui, ua faatuina ai e le Ekalesia ofisa o eria i le tele o itu o le lalolagi, ma e vaavaai e le Au Pulega Aoao. Latou te fono i le tele o taimi ma taitai fou i le lotoifale ma aoao i latou i le latou lava gagana.

Faatasi ai ma le maoae o le tupu olaola o le Ekalesia ua tulai mai ai foi se lui o le tuufaatasia lea e le Au Paia o Aso e Gata Ai o aganuu e tele. Na saunoa Elder Dallin H. Oaks o le Korama a Aposetolo e Toasefululua, o le tupu olaola o le toatele o tagata eseese o le Ekalesia ua na o se vaega o mea e tutupu, ae le o se sini lena a le Ekalesia. O le sini moni o le tasi, ae le o le eseese. “Tatou te aoao atu le lotogatasi i tagata o le Au Paia ma le faapalepale i eseesega faaletagata e le maalofia i talitonuga ma amioga o se faalapotopotoga o tagata eseese.”

O le taunuuga la, ua faatulagaina nei ni taumafaiga e aoaoina ai le Au Paia o Aso e Gata Ai i le lalolagi atoa, i mataupu faavae o le Ekalesia ma aoaoina taitai i lotoifale e aunoa ma le uunaiina atu i ai o aganuu faaAmerika.

“O nisi o taimi e matuai le tutusa ai a tatou aganuu ma aganuu a le Itulagi i Sisifo,” na saunoa ai Seung Hwun Ko, o se tagata o le Ekalesia mai Seoul, Korea, “ae a tatou talanoa loa i le talalelei a Iesu Keriso, ona tatou tasi ai lea.”