O Misiona Fou ua Maua ai le Aofaiga Atoa e 347

O le faatupulaia pea o le ola o le Ekalesia ma le naunautai o taitai perisitua ina ia faamalolosia atili tagata ma taitai i le lalolagi atoa, ua uunaia ai le faatuina o ni misiona fou i Europa, Aferika, ma le Atu Karipeane, ma le toe fetuunaiga o misiona e fa i Iapani.

Na faamaonia e le Au Peresitene Sili ma le Korama a Aposetolo e Toasefululua le faatuina o misiona e tolu—o le Misiona a Iukerane Dnepropetrovsk, le Misiona a Sierra Leone Freetown, ma le Misiona a Puerto Rico San Juan i Sasae. O lenei ua maua ai le aofaiga atoa e 347 o misiona i le lalolagi. O le a tatalaina nei misiona fou i ni nai masina o lumana’i.

Toe Fetuunaiga o Iapani.

I Iapani, o tuaoi o Hiroshima, Nagoya, ma Tokyo na toe fetuunai i le amataga o Mati 2007.

Ua tuufaatasia nei se vaega o le Misiona a Iapani Tokyo i Matu ma le Misiona a Iapani Tokyo i Saute ma o le a taua o le Misiona a Iapani Tokyo. O le Misiona a Iapani Tokyo i lalo o le faatulagaga fou, o le a feagai lea ma se vaega tele o le taulaga o Tokyo ma lona faataamilosaga ma ona siteki e 10.

O le Misiona a Iapani Kobe o le a aofia ai le eria o Osaka-Kobe, ma ona siteki e fa ma le isi siteki o Kyoto e lata ane. O le tasi lea o eria e tolu i Iapani e tele ni siteki o loo i ai i totonu i ona nofoaga i taulaga.

Misiona a Iukerane Dnepropetrovsk

O le Ekalesia i Iukerane i le itu i sasae ua matua olaola lava ma ua sili atu ma le tulaga e gafatia ai ona faatautaia lelei e se peresitene o le misiona e toatasi. O le faatuina o le Misiona a Iukerane Dnepropetrovsk mai le Misiona Iukerane Donetsk o le a mafai ai e le peresitene o le misiona ma faifeautalai ona taulai atu i le faamalolosia o paranesi o loo i ai ma faalauteleina atu i isi aai tetele o loo tutu i le mamao talafeagai i le feoai i Dnepropetrovsk.

I le faaopoopoina o le misiona fou, ua faamoemoe ai Peresitene Dale E. Anderson o le Misiona a Donetsk, o le a faamalosia ai le taitaiga i Iukerane tutotonu. Na saunoa o ia “O le a mafai ona tatou faaleleia atili le auaunaga i ia eria.”

Na faaauau lana saunoaga i le faapea mai “O taitai i le lotoifale o ni tagata lelei ma le faatuatua. O loo alualu lelei taualumaga o le Ekalesia i Iukerane. E tele le faatuatua o i latou ua liliu mai ma o loo lelei foi le faatumauina o i latou.”

Misiona a Sierra Leone Freetown

I le Eria o Aferika i Sisifo, na faatuina ai le Misiona a Sierra Leone Freetown mai se vaega o le Misiona a Ghana Accra. O atunuu o Togo ma Benin o le a suia mai i le Misiona a Ghana Cape Coast i le Misiona a Ghana Accra.

O le a aofia i totonu o le misiona fou ia atunuu tu tuaoi ina ia faaitiitia ai le femalagaai ma feuiaiga faaofisa ma fuafuaga. O le a tele foi le avanoa o taitai Perisitua e vaaia lelei ai tagata fou o le Ekalesia ma faatino galuega a le Ekalesia i lea eria.

E tusa ma le 38,000 tagata o le Ekalesia o loo alala i totonu o misiona e tolu o Ghana Accra, Ghana Cape Coast, ma Sierra Leone Freetown, ma le 10,000 o loo alala i le Misiona a Freetown.

Misiona a Puerto Rico San Juan i Sasae

I le Atu Karipeane, o le Misiona a Puerto Rico San Juan i Sasae ua faatulagaina mai se vaega o Misiona a Puerto Rico San Juan ma le West Indies.

O le Misiona o loo i ai nei a Puerto Rico San Juan o loo aofia ai le atumotu o Puerto Rico, o motu o Virgin Islands a le I. S. ma Peretania, ma atumotu o Aruba, Bonaire, ma Curaçao.

O le Misiona a West Indies e aofia ai atumotu o loo totoe i le Lesser Antilles ma atunuu tuaoi o Amerika i Saute o Guyana, Suriname, ma French Guiana.

O le vavaeina o ia misiona e lua o le a faatuina ai le Misiona a Puerto Rico San Juan i Sisifo, ua suia le igoa mai le Misiona a Puerto Rico San Juan. O le ofisa tutotonu o le misiona o le a i San Juan, ma o le a aofia ai i le misiona le afa i sisifo o Puerto Rico. O le a aofia ai foi ma atumotu o Aruba, Bonaire, ma Curaçao.

O le Misiona fou a Puerto Rico San Juan i Sasae o le a tutotonu i San Juan ma o le a aofia ai siteki e lua ma le itu e tasi i le itu i sasae o Puerto Rico, e aofia ai foi ma atunuu e faaaogaina le gagana Peretania o Virgin Islands, British Virgin Islands, Anguilla, St. Kitts ma Nevis, Antigua ma Barbuda, Montserrat, Dominica, ma Barbados.

O le Misiona o loo i ai nei a West Indies o le a tumau pea lona nofoaga tutotonu i Trinidad ma o le a suia le igoa i le Misiona a Trinidad ma Tobago. O le a aofia ai atunuu e faaaogaina le gagana Farani ma le gagana Take ma atumotu o le Atu Karipeane ma o le a faaauau lava ona vaaia ai tagata e faaaogaina le gagana Peretania o Trinidad ma Tobago, Guyana, Grenada, St. Lucia ma St. Vincent, ma Grenadines.

O eria o le gagana Farani o Guadeloupe, Martinique, French Guiana, ma St. Martin. O eria o le gagana Take e i ai Suriname ma atumotu i matu o Netherlands Antilles, e aofia ai ma St. Maarten, St. Eustatius, ma Saba.

O le a faaitiitia manaoga tau femalagaaiga a le misiona fou ma o le a mafai ai e le peresitene o le misiona ona fesootai atu i faifeautalai ma taitai perisitua i le lotoifale.

Sii mai le Church News, 10 Fepuari, 2007.