Talanoa atu i le Autalavou e uiga i Ponokarafi

Saunia E Dan Gray

O se tagata faigaluega ua laiseneina e fesoasoani i tagata lautele

A o talanoa atu matua ma taitai perisitua i le autalavou e uiga i lagona faalefeusuaiga, o le a mafai ona latou fesoasoani atu ia i latou ia malamalama ma aloese mai le matautia faaleagaga, faalelagona, ma le faaletino o ponokarafi.

Ua lofituina le autalavou i aso nei i vaaiga faaaliali—o le tele lava o le tino ma tuinanauga. Ae talu ai ona o le faigata ma le maaleale o le natura o mataupu e uiga i feusuaiga, o lea e toatele ai matua e le mananao pe matamumuli e talanoaina le mataupu ma a latou fanau. Ae o le taimi lava foi lea, o le toatele o le autalavou ua aoaoina e uo ua taitaiseseina po o ala leaga o faasalalauga, ma e masani ona tutupu ai ni manatu le sa’o e uiga i tulaga o feusuaiga. O na manatu e ono oo atu ai i amioga le talafeagai.

Tatou te mananao e aoao a tatou tagata talavou i tulafono o le legavia ma fesoasoani ia latou aloese mai le tiga o le ola le mama. O le a la se mea e mafai ona faia e matua ma taitai? E tatau ona tatou talanoa ma o tatou tagata talavou i le natura paia o lagona faalefeusuai o le tagata, ma fesoasoani ia latou malamalama ma taofiofi ia lagona e faatatau i lena lagona faalefeusuai.

Afai e na o le faaaoga seseina o feusuaiga tatou te aoaoina atu, atonu o le a le malu puipuia ma le mautonu o tatou tagata talavou. Atonu tatou te faailoa atu ma le le manatu i ai le savali le manino lenei: “O mafaufauga ma lagona i feusuaiga e leaga, agasala, ma sese—ia faapolopolo mo se tasi e te alofa i ai.” O le autalavou o e mauaina na o savali sese e uiga i feusuaiga e ono mafaufau faapea, “Talu ai ona o lagona i feusuaiga po o le faaosofia [i lagona faalefeusuai] e leaga, ma ua malosi lava ona ou lagonaina, o lona uiga foi o au ou te leaga.” O lenei ituaiga mafaufauga e ono oo ai i lagona o le le taua o le tagata lava ia, le agavaa, ma le ma, ma tuu ai le tagata talavou e lagona le taumamao mai le Agaga.

O talanoaga tuusao e mafai ona taofia ai le tele o lenei le mautonu. A o tatou talanoa i o tatou talavou e uiga i le natura paia o o tatou tino ma le muai foafoaga, o le a mafai ona tatou fesoasoani atu ia i latou ia malamalama ma aloese ai mai le matautia faaleagaga, faalelagona, ma le faaletino o ponokarafi.

O o Tatou Tino: O Lo Latou Natura Paia

E masani ona faaalia e ala o faasalalauga ni vaaiga le moni o le tulaga e tatau ona i ai o tatou tino ma mea ua faatusaina i ai. O lenei manatu e taitai atu ai tagata ia vaai i le tino o se aitema nai lo se vaega taua o le agaga o se tagata. O le taliaina o lenei manatu e mafai ona oo atu ai i le toetoe a tapuai i le “tino manaia atoatoa” ma, afai e le oo atu le tino o se tasi i se tino manaia atoatoa, o le a oo atu i le inoino o le tagata ia te ia lava.

Nai lo le tuu atu i ala o faasalalauga e aoaoina o tatou tagata talavou i lenei manatu faatafunaina a le lalolagi, e mafai ona tatou aoaoina i latou e faapea, o o tatou tino, i o latou tulaga eseese uma lava, o ni meaalofa matagofie, mai le Atua, ua foafoaina e aumaia ai le olioli ma le faamalieina. I le 1913 na taua ai e Elder James E. Talmage (1862–1933) o le Korama a Aposetolo e Toasefululua: “Ua aoaoina i tatou … ina ia vaai atu i o tatou tino o ni meaalofa mai le Atua. O i tatou o le Au Paia o Aso e Gata Ai, tatou te le manatu i le tino o se mea e tausalaina, o se mea e inoino i ai… . Tatou te manatu [o le tino] o se faailoga o lo tatou tofi tautupu… . E tulaga ese lava i le aoaoga a le Au Paia o Aso e Gata Ai, tatou te manatu o le tino o se vaega taua o le agaga.”¹ O lenei malamalamaaga e mafai ona fesoasoani ai i le autalavou ia vaai atu i o latou lava tino ma tino o isi ma le faaaloalo loloto.

Na saunoa foi Elder Jeffrey R. Holland o le Korama a Aposetolo e Toasefululua e uiga i le natura paia o o tatou tino:

“E tatau lava ona tatou malamalama e uiga i le aoaoga faavae na faaalia ma toefuataiina mai a le Au Paia o Aso e Gata Ai e uiga i le agaga, ma le vaega maualuga ma tatau ma le taua e faia e le tino i lena aoaoga faavae.

“O se tasi o upumoni ‘manino ma le taua’ ua toefuataiina mai i lenei tisipenisione e faapea ‘o le agaga ma le tino o le ola atoatoa lea o le tagata’ [MFF 88:15; faaopoopo le faamamafa]… .

“… O le fai faatautala o le tino (faamolemole faaopoopo i ai ma le upu agaga iina) o le, pe a mafaufau atoa i ai, o le faatautala foi lea ia te Ia o le Malamalama ma le Ola o le lalolagi.”²

O A Tatou Feusuaiga: O Se Meaalofa

E faaopoopo atu i le faamanuiaina i tino faaletino, ua tuuina mai foi ia i tatou le mana paia o le foafoaga. Ua faatagaina e lo tatou Tama Faalelagi le faataunuuina o feusuaiga i faaipoipoga ma mafai ai e ulugalii ua faaipoipoina ona iloa le fiafia, alofa, ma le faamalieina i lena faaalia o lagona feusuai. Na taua e Peresitene Spencer W. Kimball (1895–1985): “I totonu o faaipoipoga faaletulafono, o le sootaga vavalalata faalefeusuaiga e tonu ia ma ua faamaonia foi faalelagi. E leai se mea le paia pe faatauvaa e uiga i le feusuaiga lava ia, aua o le auala lena e auai faatasi ai alii ma tamaitai i se faiga o le foafoaga ma le faaalia o le alofa.”³ O o tatou lagona faaosofia e feusuai—pe a faia ma le tatau— e tatau ona vaaia o ni meaalofa matagofie ma paia.

Sa saunoa Peresitene Boyd K. Packer, o le Sui Peresitene o le Korama a Aposetolo e Toasefululua, i le autalavou o le Ekalesia e uiga i lenei mataupu. O ana aoaoga mamana e mafai ona fesoasoani ai i matua e aoao atu e uiga i le itu e lelei ai ma le natura paia o nei mana:

“Na tuuina i totonu o o tatou tino—ma o se mea paia lenei—se mana o le foafoaga, o se sulu, e ono taua ai e se isi, lea e i ai le mana e tutuina ai isi sulu. O lenei meaalofa na pau lava le taimi e faaaoga ai o totonu o noataga paia o le faaipoipoga. E ala i le faaaogaina o lenei mana o le foafoaga, e mafai ai ona fausia se tino faaletino, e ulufale atu i ai se agaga, ma fanau mai ai se tagata fou i lenei olaga.

“O lenei mana e lelei. E mafai ona foafoaina ma lagolagoina ai le olaga faaleaiga, ma o totonu o le olaga faaleaiga tatou te maua ai punavai o le fiafia. Ua tuuina mai e toetoe lava o tagata uma o e ua fananau mai i le tino. O se mana paia ma taua, ma ou te toe faapea atu, au uo talavou e, o lenei mana e lelei… .

“O le tele o le fiafia lea e mafai ona oo mai i lou olaga o le a faalagolago lea i le auala e te faaaogaina ai lenei mana paia o le foafoaga.”⁴

O Aafiaga Leaga o Ponokarafi

O se tasi o mea e mafai ona faaleagaina ai lenei mana paia o ponokarafi. Ua saunoa mai Peresitene Gordon B. Hinckley, o lona faaaogaina “ua faaletonu ai mafaufau o le autalavou i manatu sese. O le faaauau pea ona matamata i ai e taitai atu ai i le fai ma mausa lea e toetoe lava a le mafai ona momotu.”⁵

O le toatele o tagata taitoatasi, e oo foi i nisi o faufautua atamamai, ua alo pe sisi’o i le matamata i ponokarafi o se amioga lea e leai se leaga. Ua latou taumamaina e faapea o se tulaga ua “masani” ai ma e leai se leaga o i ai pe a fai toatasi ma faalilolilo. O lenei lava foi manatu ua faaaoga e fai ma alofaga o le amio lea e o faatasi ai o le faaosofia e le tagata ia te ia lava o lagona feusuai. O le a la le tatou tali pe a fesili le autalavou, “O le a le mea e leaga ai ponokarafi ma le faaosofia e le tagata ia te ia lava o lagona feusuai?” O manatu nei e fa atonu e aoga i le taliina o lenei fesili.

E faaleaga ai le agaga—o agaga ia na togiolaina e Iesu Keriso. O le tino o se vaega o le agaga; o le mea lea, a tatou vaai atu i le tino o se isi tagata ina ia faamalieina ai le tuinanau o o tatou manao, ua tatou le faaaloalo ma faaleagaina le agaga o lena tagata faapea foi ma o tatou lava agaga. Na lapatai mai Elder Holland e uiga i taunuuga o le taumamaina poo le le manatu mamafa i nei mea: “O le tau faatauvaaina o le agaga o se isi [tagata] (faamolemole ia aofia ai le upu tino iina) ua tatou tau faatauvaaina ai foi le togiola, lea na laveaiina lena agaga ma faamautinoaina ai lona i ai pea. Ma afai e taalo se tasi i le Alo o le Amiotonu, o le Fetuao Lava Ia, ua taalo lea tagata i le vevela paepae ma se afi e sili atu le vevela ma sili atu le paia nai lo le la i le aoauli. E le mafai ona e faia lena mea e aunoa ma [lou] mu ai.”⁶ O ponokarafi e faaleagaina ma faatoilaloina ai le tino ma le agaga. E tatau ona tatou faaaloalo i le natura paia a isi ma i tatou lava.

E mafai ona taofia ai i tatou mai le oo atu i tulaga atoatoa e gafatia e o tatou agaga. Ua foafoaina e lo tatou Tama Faalelagi o tatou tino ma o tatou agaga. Na te silafiaina le ala e sili atu ai ona la galulue faatasi. Ua Ia silafia le mea o le a fesoasoani ia i tatou e ausia ai o tatou gafatia ma mea o le a vaatuia ai lo tatou alualu i luma. Na te silafia mea e tatau ona tatou tuuina i o tatou tino ma mea e tatau ona tatou tuueseina. Ua aoao mai i tatou e Perofeta e faapea, o le tuuina o ata ponokarafi i o tatou mafaufau e le lelei mo o tatou agaga ma o le faia o lena mea, tatou te tuu ai i se tulaga lamatia lo tatou mafai ona maua le fiafia ma le olioli. Ae peitai, afai tatou te mulimuli i taitaiga a le Alii mai tusitusiga paia ma perofeta, o le a mafai ona tatou maua le gafatia atoatoa o o tatou agaga.

E mafai ona avea ma mausa. O le matamata soo i ponokarafi, ae maise lava pe a o faatasi ma le faaosofia e le tagata ia te ia lava o lagona feusuai, e mafai ona avea ma masani, e oo lava ina avea ma mausa. O mausa e faatupuina pe a faalagolago se tagata i le “faateleina faafuasei” o kemikolo lea e fausia e le tino pe a matamata se tagata i ponokarafi. E faalagolago o ia i lenei gaoioiga e solaese mai ai pe taulima ai foi luitau o le olaga ma atugaluga faalelagona e pei o le tiga, ita, ‘iva, tuua toatasi, po o le vaivai. O lenei faalagolagomaga e oo ina faigata tele ona tuu ma o nisi taimi e oo atu ai i feusuaiga i tua atu o noataga o le faaipoipoga.

E fausia ai faamoemoega le lelei mo faaipoipoga. Pe a matamata se tagata i ponokarafi ma tutupu ae ai lagona o le fia faatino o feusuaiga, e lagona foi e le tino ia mamanu o lagona fia feusuai e pei lava o faatinoina ni feusuaiga moni. Afai e faia pea lava pea lenei amioga, o le a masani ai le tino ma le mafaufau i ni vaaiga ma amioga masani o feusuaiga, lea e mafai ona tupu ai ni faamoemoega le aoga ma le lelei o le ituaiga o feusuaiga e tatau ona i ai pe o le a i ai. O ia foi faamoemoega e aafia ai faaipoipoga, e tupu ai le mafatia, le faatuatuaina, feteenai, le mautonu, ma le faalataina o le faatuatuaga i va o ulugalii.

Mama E Le Aunoa

Ua tuuina mai e le Alii ia faamanuiaga e tele ia i latou e i ai mafaufauga mama ma amioga mama faatasi ai ma le alofa mama: “Ia teuteuina ou manatu i le mama e le aunoa; ona malosi ai lea o lou faatuatua fai ifo i luma o le Atua; ma toto ifo i lou agaga le mataupu faavae o le perisitua e pei o le sau mai le lagi. E avea le Agaga Paia mau aumea tumau” (MFF 121:45–46).

E faapefea ona faatumauina e se tasi ia mafaufauga mama “e le aunoa”? O i latou o e mafai ona faatoilaloina mafaufauga ma amioga le talafeagai, o i latou ia ua iloa ona faia amioga mama i aso uma lava. O nei gaoioiga e aofia ai mea nei:

Faalogologo i musika faagaeetia.
Fiafia i foafoaga o le natura a le Atua.
Tausia o o tatou tino ia mama ma maloloina.
Faitauina o tusitusiga paia ma tusi lelei.
Fiafia i taliega ma uo lelei ma aiga.
Auai i talanoaga e le leaga pe e le masoa.
Tuuina atu le faafetai i le tatalo ma augani atu mo le mana e tetee ai i faaosoosoga.
Siomia o i tatou lava i mea mama i totonu o o tatou aiga ma galuega, e aofia ai ata, ata vali, meaalofa mai e pele [ia i tatou], aitema e faaata ai i tatou, poo mea e fesoasoani tatou te manatua ai mea aoga na tutupu.

O nei mea uma e mafai ona avea ma faailoga o le mama, lea e mafai ona taulai atu ai o tatou mafaufau ma tau le maua ai se avanoa e mafaufau ai i tuinanau a le tagata o le lalolagi. Afai e mafai ona aoao ma faaaoga e le autalavou ia nei metotia i o latou olaga, o le a amata ona latou maua faamanuiaga maoae e pei ona taua i le Mataupu Faavae ma Feagaiga e 121.

E taua foi ona latou malamalama e tofu uma lava i tatou ma vaivaiga e faatoilalo. E le avea vaivaiga ma mea tatou te le agavaa ai mo le alofa a le Atua. O le mea moni, o le faatoilaloina o o tatou vaivaiga o se vaega lea o le fuafuaga a le Alii mo i tatou. A faailoa mai e le Alii ia i tatou o tatou vaivaiga ma tatou mulimuli i Lana taitaiga ia lotomaulalo ma usiusitai (e le o le le fiafia ma leai se faamoemoe), o le a amata ona tutupu ni mea matagofie. E mafai ona gauai atu o tatou loto i le Alii i le faatuatua. Ma, e ala i Lona alofa tunoa ma le mana—ae le na o lo tatou lava naunautai—o le a Ia “faia mea vaivai ma mea malolosi” (Eteru 12:27) ia te i tatou.

E le o tau mai e faapea, o le a Ia aveesea o tatou vaivaiga. Atonu e faaauau pea ona faaosoosoina ma faalavelaveina [i tatou] e o tatou vaivaiga, ae a tatou lotomaulalo ma tumau i le faatuatua, o le a fesoasoani mai le Alii ina ia tatou teteeina ia faaosoosoga.

Pe a i ai faafitauli a tagata talavou e faatatau i ponokarafi, e tatau ona latou iloa e le o leiloloa i latou, ma faatasi ai ma le Alii, tatou te alolofa ia i latou, ma o loo i ai se auala e aluese mai ai. Ua saunoa mai Peresitene Hinckley: “Ia e ole atu i le Alii mai le taele o lou agaga ina ia aveeseina e Ia mai ia te oe le mea ua fai ma au mausa lea ua faapologaina ai oe. Ma ia e maua le lototele e saili ai le taitaiga alofa a lau epikopo, afai e talafeagai ai, o le fautuaga a ni tagata atamamai manatu popole.”⁷ E le tatau ona matamumuli o tatou tagata talavou e saili le fesoasoani faamatua, faaleperisitua, ma faapolofesa.

I le avea ai o ni matua ma ni taitai, e tatau ona tatou aafia i olaga a o tatou tagata talavou, ma taumafai e fausia se siosiomaga saogalemu mo i latou. E tatau ona tatou lototetele i a tatou talanoaga ma i latou e uiga i nei mataupu taua, ma uunaia i latou e faalatalata atu i mataupu faavae o le talalelei ma ia latou malolosi atu nai lo mana o le tiapolo. E tatau ona tatou mataala ma mataitu gaoioiga a o tatou tagata talavou—e aofia ai lo latou faaaogaina o le Initoneti—ma talanoa faamaoni i faamanuiaga ma tulaga matautia o feusuaiga a le tagata, ma faalogo ma tuuina atu faatonuga ma taitaiga lelei.

Ioe, tatou te le faasoaina atu tala patino e uiga i o tatou lava aafiaga i lagona feusuai. Ae o le faaaogaina o mataupu faavae ua talanoaina i lenei tusiga, e mafai ai ona tatou fesoasoani atu i o tatou tagata talavou ia malamalama lelei i le mana ma le faamoemoega o lagona feusuai o loo ia i latou.

O le mea e sili atu le taua, e tatau ona tatou faia se faataitaiga i o tatou tagata talavou. O loo latou vaavaai mai pe faapefea ona tatou taulimaina ia aafiaga le lelei. E tatau ona iloa e o tatou tagata talavou tatou te iloa o faatosinaga a le fili e le taitai tutusa ma le mana paia ma uunaiga a le Alii, lea tatou te tuu atu i ai lo tatou talitonuga.

FESOASOANI I LE FAATOILALOINA O PONOKARAFI

O le Ia Teuteuina Ou Manatu i le Mama o se tamaitusi fou ua fuafuaina e fesoasoani ia i latou o e o loo tauivi ma ponokarafi. O loo talanoaina ai le ala e:

Iloa ai faasalalauga faatamaia.
Tetee ma aloese ai i le faaosoosoga o ponokarafi.
Lafoai ai mausa o ponokarafi.

O le Ia Teuteuina Ou Manatu i le Mama (aitema nu. 00460 890) o loo lisiina ai foi mau ma isi punaoa a le Ekalesia e uiga i le salamo, o le paia o le tino, ma le faatoilaloina o faatosinaga a le lalolagi. E mafai e taitai o le Ekalesia ma tagata o le aiga ona fetufaai atu lenei tamaitusi ma e pele o loo tauivi ma le ponokarafi.