Tibwauaan te Tai

I Kona n Riki Bwa Te Mitinare Ngkai

IROUN Linda Christensen

Ngkana ti kaira temanna te aomata nakon te Atua, ao e na korakora kimwareireira (tara D&C 18:15).

Bon te mitinare ae korakora te Abotoro Bauro. E taku, “Ba I aki maama n te euangkerio ibukin Kristo” (I-Rom 1:16). E mwananga Bauro nakon taabo aika mwaiti n tibwaua te euangkerio. E kunea te kimwareirei n tibwauaan te euangkerio ao e buokiia aomata bwa a na kukurei.

Tarin te Burabeti Iotebwa Timiti ae Samuel bon te moan mitinare i nanon boong aika kaitira. Man te tai anne, e raka nakon teuana te mirion mwaane ao aine ake a tia ni mwakuri ni mitinare. Mitinare aikai n tatabemania, n aron Samuel Smith ao Bauro, a karekea te koaua ibukin te euangkerio ao n tangiria n tibwauaia ma tabeman.

E taku Beretitenti David O. McKay (1873–1970), “Kaain te Ekaretia ni kabane bon mitinare.”¹ Nanon anne bwa ko kona n riki ni mitinare ngkai! Tibwauaan te euangkerio ma tabeman e na kauringko ibukin am berita ae tabu n te bwabetito man ururinga Iesu Kristo n taai nako. Uringi taeka aikai:

I kona n riki bwa te mitinare ngkai.
I aki kona n tataninga ni karokoa ae I a ikawai.
N na maiu ni katoa bong n aron ae te kabanea n  tamaroa ae I ataia,
Ao a na nooria ae iai oin au koaua,
Oin raoi au koaua.2

Waakin te Reirei

Kanakoa iteraniba R4. Koroia ni kanakoa te mweenga ao nimaua wintoo. Kanim wintoo n tatabeua i aon nnen te wintoo n te mweenga n tibwauaan-te euangkerio. Taekin iango i aon te mweenga, ma am utu. Uaia ni baireia bwa tera ae ko na kona ni karaoia n riki bwa te mitinare ngkai. Katuka te mweenga n tibwauaan-te euangkerio n te tabo are a na kona iai kaain am utu ni kabane n nooria.

Iango i aon Tibwauaan te Tai

Ikoti bwaai ibukin te mwakuri ae bebete karaoana ae riai ni karaoaki iai te katauraoi ibukin katiaana. (N aron te katooto aei, te mwakuri: tebokan bwain amwarake—bwaai a kona n ae te toobu ao te kunnikai n tebo bwain amwarake; mwakuri: kuuka—bwaai a kona n ae aron te kuuka ao renganan kuuka.) Katauraoa te baeki ma mwakuri aika kakaokoro ibukin kiraati n tatabeua. Tuangia kiraati n tatabeua bwa a na kauka te baeki, baireia bwa tera mwakuri ake a riai ni katiaaki, ao kamataata bukina ae mwakuri n tatabeua a riai ni katiaaki. Kaoia kiraati n tatabeua bwa a na tibwaua te tai ma te Moanrinan. Kamataata n aron riain ae ti na katauraoi bwaai tabeua ni karaoan te mwakuri, ti riai ni karaoi bwaai aika a onoti ni katauraoi n riki bwa te mitinare ae tamaroa. Kaota te Kete n Tamnei n te Euangkerio 605 (E Tataro te Ataei ae te Mwaane) ao 617 (Kakaean Booki aika Tabu) iaon te burakibooti, ao koroia iaaia, “N na katauraoi n riki bwa te mitinare man te tataro ao warekan booki aika tabu ni katoa bong.” Titirakiniia ataei bwa a na tibwaua aron maiuakinan te koaua aei ni kona ni katauraoia nakon te mitinare. Kakimototoa karakinan Aramwa te Teei ao natin Motiaea mwaane. Buokia ataei ni kakaea Aramwa 17:2–3, ao ikotaki ni warekia. Koroi rain iaan ikotan taeka aika “a bon tia n ukoukora ana koroboki aika tabu ma nanomwaakaia” ao “a bon tia naba ni kakorakoraia n tataro.” Kaota koauan mwaakan te tataro ao warekan booki aika tabu ni katoa bong bwa a na kanga ni katauraoira n riki bwa mitinare.
Koroia iaon te konteina ae akea kanoana “Kakaonimaki ao Ongeaba.” Katauraoi tabeua waaki ni kakae n taekan te onimaki ao te ongeaba ibukiia ni kauoman aika uarereke ao aika ikawai riki (tara Teaching, No Greater Call [1999], 161–62). Moana tibwauaan te tai n te koroboki “N na katauraoi n riki bwa te mitinare man te kakaonimaki ao te ongeaba” iaon te burakibooti. Warekia ma ataei. Kaoa te ataei bwa e na rinea te waaki ni kakae. Karekea aia tai ataei ke te kiraati ni kaeka bwa tera ae a riai ni karaoia. Katerea bwa aia kaeka e riai ni kaineti ma te onimaki ao te ongeaba, ao angan te ataei bwa e na katukui tabeua bwaai aika uarereke (biin ke taian atama, n aron te katooto) i nanon te konteina. Imwiin waaki ni kakaei n tatabeua, anenea te ikotaki n taeka “I’ll do what is right; I’ll follow his light. His truth I will proclaim” man “The Church of Jesus Christ” (Children’s Songbook, 77). Te ikota n taeka ae “N na tataekina Ana koaua” e nanonaki bwa ti na riki bwa mitinare. Reitianako ni karokoa ae onrake te konteina.