E a Toki Aia Waaki ni Bwarannano n te Reirei Ataein te Reirei n te Ekaretia

Ngkai e a rikirake mwaitiia ataein te reirei aika kairake ni bwarannano man te reirei, ni kaineti ma te ribooti man ana bootaki ni ibuobuoki te U.S ibukiia te roronrikirake, a mwaiti kaain te Ekaretia aika a kairake ake a aki tii tiku n te reirei, ma a anai riki aia reirei aika a raka.

E a tia ni kateretereaki n aia reirei ao n aia katei Aika Itiaki bwa te reirei n taekan te aro ao te reirei n rabakau aika uoua aikai n ana tai te Burabeti ae Iotebwa Timiti ngke e koroboki n te katebwi ma ruaiwa n tienture, ae mimitongin te Uea bon te wanawana (tara D&C 93:36).

Beretitenti Henry B. Eyring, te Moan Kauntira n te Moan Beretitentii, e nora kakaawakin te reitaki i marenan te kamatebwai n taekan te aro ao n rabakau n te aonaaba n ana taetae nakoia taan kamatebwai n te Ekaretia n 2001.

“Uringnga, kam kukurei n te reirei, tiaki tii ibukin te maiu ae mamaate ma ibukin te maiu ae akea tokina. Ngkana kam noora raoi te maiu ni koaua ma te iango n tamnei, kam na karimoa moa te reirei n tamnei ni kaakea bonganan te reirei n rabakau n te aonaaba. Ni koauana, kam na mwakuri korakora riki n te reirei n rabakau n te aonaaba nakon are kam bon kona n akean te iango n tamnei anne,” e taku.

Tangiran te reirei ni bwain te tamnei aei rouia kairake Aika Itiaki e bon koreaki n te ribooti teuana, te Kamatebwai Irouia te Roronrikirake ao Taekan te Aro n te Aonaaba, are e kamatebwaia taekan te aro ibuakoia ana roronrikirake te U.S. E kabwarabwara aroia ana roronrikirake te LDS bwa a rianako n te ataibwai n taekan te aro ao n aia anganano n te tai are e kerikaaki iai kaean te taromauri ao te kamatebwai n taekan te aro i buakoia te roronrikirake ni kabuta.

E a tia mwiin te kamatebwai ni karekea irouia aika bati bwa a na tabeaianga bwa tera rongorongon aia katei ao aia reirei Aika Itiaki are e buokiia kaaro ni karaoa te banna ae onimakinaki, te reirei, ao kanakoraoan maiuia aomata aika a kairake. Ni iteran kaekaana e kaineti ma waaki ake a reiakinaki n rongorongon katein te LDS, ao iterana e irekereke ma katanean kawai aika kakawaki man te roro ni maiu teuana nakon teuana [1] angiina man te ririki ni maiu 14 nakon 18 ibukiia Aika Itiaki—ake a bane aia tai man te tieminari.

Ibukiia angiin te roronrikirake n te LDS, a kainnanoaki ibukin karekean aia beeba ni bwaati man te tieminari bwa a na reirei nimaua te bong n te wiiki, man tao te aoa 6:00 nakon 7:00 n te ingabong, ibukin aua te ririki ni kamatebwaian koroboki aika tabu ao ni marooroakin aron moan tuua ni booki aika tabu bwa a na kanga ni maiuakin i nanon maiuiia ni katoa bong. A bane n riki aikai i tinanikun aia reirei ae a tane iai n reirein te kauarinan—ma e ngae n anne a mwaiti ake i maeao n te U.S ake a kariaiakaki bwa a na kaitibo i nanon aoan te reirei—ao ni iri reirei n taekan te aro ae e kaania 1,056 te aoa.

Kaean te tieminari e bon kainnanoa te nanomwaaka ao te anganano ae korakora ibukiia ataein te reirei ake a maeka n aono ake a karako iai aomata Aika Itiaki. Ma te teimatoa ni baronga arom e moanna ni bitaki nakon te nanomatoa ao te anua, ao e otara ni kateini maiuia tabeua kairake aikai.

Teuana bukin te bootaki n taromauri n te moaningabong aei e reke man ana reirei te Beretitenti n te Ekaretia Gordon B. Hinckley (1910–2008), te ka-15 ni Beretitenti n te Ekaretia, e taku: “E roko te Ekaretia aio bwa mwiin te wanawana ni kan ataibwai. Ti kakoaua te reirei, ao ti kabanea te mwaiti ae bati man ara kataumwane iaon reireia ara kairake. Ti kaantaningaia bwa a na iango. Ti kaantaningaia bwa a na ukeuke nako. Ti kaantaningaia bwa a na kabongana aia iango ao ni kakorakoraia ni ukeuke ibukin te rabakau n aekakina nako. Ngkana iai ara boto ni iango, bon aio: ‘Mimitongin te Atua bon te wanawana’” (Teachings of Gordon B. Hinckley [1997], 127).

E raka iaon 360,000 ataein te reirei n te kauarinan are a kabaei araia n te tieminari, 211,000 mai buakoia a kaea n te ingabong.