Karaoan Ana Maekatiin te Ekaretia
Ko a tia ni iangoia bwa e kanga ana maekatiin am Ekaretia ni moan karaoaki? Ngkana ko tara te maekatiin are ko taua ni baim, ko kan ataia raoi bwa antai ae e katomatomai ao e kanga ni karaoaki?
Kaaraki nako mai nakon ana kaneweaba te eteta n ana maekatiin te Ekaretia, bwa e na kaotia bwa a kanga maekatiin aikai ni katomatomaaki.
Ngkai ko a wareka te maekatiin aei, e a kaman moanaki te babaire ibukina teuana te ririki imwain boretiakina. Ni katauraoana, taan eteta n te maekatiin a na irii kaetieti mai rouia kaain te Itingaun aika mwaiti, ake a tibwauai reirei man aia Kooram Abotoro ake Tengaun ma Uoman ao te Moan Beretitentii iaon atuu ni iango ake a na buokiia kaain te Ekaretia ni kakorakoraia. A rineaki ke ni karaoaki taian karaki, ake a boboto iaon aia reirei Taari.
Babairean te Maekatiin
E moa te babaire n taai nako ma te Riaona, are e bon boretiaki nakon te boki n taetae ae kaania 51. E bon boretiaki nakon te boki ni katoa namwakaina n taetae aika 21. N taetae ake a karako mwaitiia n anaaki, a kona ni karekea aia Riaona taan wareware aua ke onoua te tai n te ririki. Te taetae are te kabanea ni karako n anaaki, a kona ni karekea aia maekatiin, teuana, uoua, ke teniua te tai n te ririki.
Iai i nanon te Riaona karaki ibukiia ikawai, te roronrikirake, ao ataei, ao ni mwakorona teuana iai i nanona, rongorongo ibukiia kaain te Ekaretia n aonon te Ekaretia anne.
A tia n tuangaki taan kairiiri n te Ekaretia bwa e na kuri ni boraoi kanoan te Riaona ma kanoan ana maekatiin te Ekaretia ake a boretiaki n te taetae ni Ingiriti: te Ensign, New Era, ao Friend. Ni baireakin te maekatiin ae te Riaona ni katoa namwakaina, a tataro mwaaka taan eteta ni kataia n rineia bwa karaki raa aika a na kainnanoaki riki i rouia kaain te Ekaretia ni kabuta te aonaaba. Karaki aika a rineaki a manga rinanoaki irouia Mataniwi ni Kabuta ake bon taan tia ibuobuoki nakon Aobiti ibukin Karikuram.
Aua Boton Kawai Ibukin Karekean Karaki n te Maekatiin
Aia marooro ke aia koroboki te burabeti ao Mataniwi ni Kabuta ake tabeman ke taan kairiiri n te Ekaretia a kona n riki bwa taian karaki.
Kaain te Itingaun ao beretitentii ni bootaki nako a koroi taian karaki ni boutokai ana reirei ni kamatebwai te Ekaretia.
Taan eteta n ana maekatiin te Ekaretia a korei karaki imwiin karaoan aia kakae iaon te atuu ni iango ke kawarakiia Aomata aika Itiaki n taabo aika kaokoro.
Ngkami, taan wareware, kam na koroi taian karaki. Karokoan ami karaki e anga bwanaia Aomata Aika Itiaki ni katobibia te aonaaba bwa e na ongoraeaki i nanon taian maekatiin.
Katomatomaana Ni Kabane
N te bong teuana ma teuana n te ririki, taan mwakuri n te maekatiin a na katauraoi katooton te maekatiin aika kakaokoro ibukin namwakaina aika a na roko. A na karaoaki aikai ni mwaneka aika kakaokoro, man moanakin te babaire nakon tuoakin kairua n te tibering ke te kuramwa ao nakon boretiakina ibukin te maekatiin n te namwakaina are imwiina. (Ana tienta ni boreti te Ekaretia are i Salt Lake City, Utah, e boreti ana maekatiin te Ekaretia are bon tii te taetae ni Ingiriti ao angiina katooton te Riaona.) Koreakin ao kaetan karaki a riai n tia raoi tao waniua namwakaina imwaain bongin namwakaina are e na boretiaki iai ni katoa otinakon katooton te maekatiin. E ngae n anne, ngkana iai te bwai teuana ae kaoti i nanon teniua ke aua namwakaina imwiina ae e na riai ni karinaki n ana maekatiin te Ekaretia, a kona taan eteta ni katuka te karaki ae e a kaman baireaki taina ao n onea mwiina ma te karaki ane e boou.
A bane ana maekatiin nako te Ekaretia n rinanon manga rinanoakin kanoaia n te mwaneka ae raka riki nakon teuana. Imwiin ae a tia ni katamaroaki karaki, a warekaki irouia taan rinanona aika a tia ni mwiokoaki, ni ikotaki ma tabeman kaain te Itingaun. Imwiin manga rinanoakina aei te karaki are e kariaiakaki e a nakoia taan mwakuriia tein kanoan te boki, ake a bairei tein kanoan baana. A kona n rinei tamnei ao korobanna aika a karaoaki n te tai anne ke ni karaoi babaire ibukin tamnei ao korobanna aika boou. Ibukina bwa baan te Riaona a riai ni karekei nnen abwabwakin taian raitaeka n taetae nako, e baireaki te tabo ae mwaawa n te karaki n tatabeua nako. Ngkana e a tia te babaire, a rinanoaki iteraniba irouia kaain te Itingaun ao temanna ke e raka riki i rouia kaain aia Kooram Abotoro ake Tengaun ma Uoman.
Waakinan karaon te maekatiin e kairaki ma tao teuana namwakaina ibukin te raitaeka i aon taian karaki n te Riaona. Taan raitaeka bon kaain te Ekaretia aika a maeka ni kabuta te aonaaba. A kaibibiti taian karaki n te Riaona rinanon te bwai ni kanako meeri n te kaombiuta ma te etekuata n te Ekaretia.
Mwakurian Tein Kanoana ao Karaoakina
Tenaan eteta n te Riaona ao te Ensign a marooroakina aron barongaan taian karaki i nanon te maekatiin are imwiina.
Taan mwakuriia tein kanoana a rinea teina ma korobanna ke rawe tamnei bwa a na ibuobuoki n angareirei moan tuua ibukin te tamnei ake a kuneaki i nanon taian karaki. Ikai, te tarekita n te koro tamnei n te Riaona e kaota te iango iaon barongaana nakoia taan mwakuri n te eteta ao taan mwakuria tein kanoana.
Ngkana a karaoa tein barongaan taian karaki taan mwakuria tein kanoana, a bairei kabwarabwara n te korobanna, n aron kainnanoana, mai rouia taan rabakau n te koro tamnei ao n te rawe tamnei.
Nakon te angatai: Te mwakuri rinanon te i-meeri(email) ,taan rabakau ni karaoan te beebwa a reitaki ma taan raitaeka ni kabuta te aonaaba. Angatai: Karaoan te maekatiin n ae mwaiti n aron ae 51 taian taetae a tangira karaoakin barongaan i teraniba n te kaombiuta ao ni manga rinanon manga warekakiia n aekan taetae nako.
Karokoan Taian Maekatiin Iroumi
Te kabanea ni babaire iaon tein boretiakin baan te maekatiin a kanakoaki nakoia taan eteta ibukin rinanoan kaetan kaairua. A kanakoaki ngkanne baana rinanon te bwai ni kanako meeri n te kaombiuta nakon te tienta ni boreti nimaua te namwakaina i mwaain tain otinakon te maekatiin ibukin te Riaona n te Ingiriti, ao uoua namwakaina ibukin taetae ake tabeua n te Riaona, ao uoua namwakaina ibukin te Ensign, New Era, ao te Friend. Te mwakoro iaon tenaan kaongora n te Riaona a nako nakon te beeba ni kaongora tao uoua te namwakaina imwaain tain otinakon te maekatiin ao ibukin te Ensign tao teuana te namwakaina imwaain tain otinakon te maekatiin.
Maekatiin ake a boretiaki a baketenaki ao ni kanakoaki nakon taabo i tinanikun te United States ibukin kanakoakiia rinanon aanga aika bati, ni ikotaki ma waakin te kanako meeri n te tabo. Inanon te United States, a bon kanakoaki n te meeri rinanon Waakin te Kanako Reta n te United States. A kanakoaki taian maekatiin nakon taabo aika a raroa nako moa ao ni meerinaki nakoia taan wareware i Utah n te kabane. Ti baireia bwa taian maekatiin a na roko imwaain te moan Taabati n te namwakaina n aron te namwakaina are koreaki i aona, ma aio e kona ni bitaki n tabetai.
Ngkai e a reke te maekatiin aei i nanon baim, ara kaantaninga bwa ko na kunea bwa e ibuobuoki nakon rikiraken maiun tamneim. Taian karaki a kona ni marooroakin rongorongo i aon marurungin te rabwata, taekan te mwane, ke atuu ni iango tabeua ake ti na bane ni irekereke ma ngaia n te maiu ae mamaate aei, ma bon oin raoi aia kaantaninga iai bon buokan kakorakoraan maiun tamneimi.
Ngkana iai te bwai ae ko kan taekinna i aon taian karaki ake ko wareki ikai, ti na rangi ni kukurei n ongora mai roum (tara ara atureti nakon te angatai). Ngkana ko tangiria ni uoti rake iango ake ti na kona ni katamaroa riki aron ara marooro i aon kainnanomi n te maiu n tamnei, ti rangi ni kukurei n ongora naba i aon anne. Bwaai ni kabane ake ti kona n reiakinna bwa e na buokiira ni beku ibukiia taan wareware n te aro ae tamaroa riki a na bon kakabwaiako ma ngaira naba.
Boretiakina ao Tibwatibwaakina
Beeba aika boretiaki a bwaatinaki rinanon te mitiin are e kaeti baaia, kanimwa tinanikuna, ao imwiina a bootaki ni “ituaki” (kanimwaki n te titeibira). Imwiina a koreaki ni kaboraoaki rakanakon beeba ni katoa maekatiin nako.
Maekatiin aika a tia a batianaki ibukin kanakoaia n te meeri ke n te kaibuke man ana tienta n tibwatibwa te Ekaretia i Salt Lake City.
N te auti ni kawakin bwai aika bubura ike a kaawakinaki iai ana boki tabeua te Ekaretia ake a tia ni boretiaki, te tia mwakuri e tuoi taian maekatiin ake a batianaki ibukin kanakoaia n te kaibuke.