Kataia Ni Katotonga Iesu
Te Aki Mamatam n te Utu
“Ane irai ao e na bon aki nakonako n te ro, ma e na karekea te ota ni kamaiu” (Ioane 8:12).
Tabeua ririki n nako a baireia ara utu bwa a na karaoa te aki mamatam ae onoti ibukiia naake a rootaki man te angibuaka ae raroa nako. I kaota au iango bwa i mwiin ara aki mamatam, ti na anga ara tianti ake ti kaikoikoi inanon ara tiaa nakon ana mwane te Ekaretia ni karikirakea aroia aomata. Iai uoua taian tiaa ake ti katukui iai ara tianti. Teuana bon te tiaa ibukin te katei ae tamaroa, ni katoa te tai ae temanna e ibuobuoki ke ni karaoa te mwakuri n akoi, I karina te tianti inanon te tiaa. N tokin te ririki ao ti taneiai ni kabongana te mwane ibukin ara waaki ni kakukurei n ara utu. Te tiaa are teuana bon ibukin te katei ae buakaka, ao ni katoa te tai ae temanna e kakai un ke ni kakaun taeka, teuanne ke neieinne e na karina te tianti inanon te tiaa ibukin te katei ae buakaka. Te mwane inanon te tiaa aei e bwain tangiraki nakoia ataei ake a kainnanoa te ibuobuoki.
Ngke ti a moana ara aki mamatam, ti bon moana naba warekan ara tianti. Leonardo, ae 9 ana ririki, i mwiina e nako n anaa oin ana bangke. E anai ni kabane ana mwane ao tabeua ana bwai n takakaro ao e taku bwa e tangiria ni bwain tangiraia naba. Mariana, ae 12 ana ririki, e anai naba ana mwane ao ni ikotia nakon te bwaintangira n angamwane. E ngae ngke ataei bon ti tabeua aia mwane ake a na anga, bon ti anne ae iai irouia.
Te aki mamatam bon te anga karea ibukiia Leonardo ao Mariana, ao n anga naba te mwane ake inanon te tiaa. Ma ngke a bwain tangirai oin aia kawakin mwane, I a ataia ae a bon mwannanoiia raoi natin Tamara are i Karawa ake a korakai n rawawata n iteran te aonaaba are teuana.