E Reitinako n te Ekaretia te Katei ae “E Uki te Mataroa”

Ni mweengana i New York, Ohio, Missouri, ao Illinois, e butimwaia iruwa te Burabeti Iotebwa Timiti—naake e kaoiia ao naake a mwananga rinanon te kaawa. Ni bon arona, e katea te outero i Nauvoo, Illinois, ni kamaekaia iruwa ake a roroko n angiin te tai ake a roko ni kawaria ma tabeman riki taan kairiiri n te Ekaretia.

E reitinako kaotan te mwakuri n akoi ngke a maeka kaain te Ekaretia i Maeao. A mwaiti aomata aika a kakannato ake a roko i Salt Lake City n tain moan tein te Ekaretia.

Ni boong aikai, kawaran nako ana tabo te Ekaretia n aron ana tabo te Temple Square e a rangi ni korakora iaon bairean mwamwanangaia taan neweaba ao taan mwamwananga nako Salt Lake City.

Mirion iruwa ake a toua ana tabo te Temple Square ae kateimatoaki itiakina ni katoa ririki, tiaki ti ana tabo te Tabanaeko ae kakannato aron ana kateitei ma ai uana naba ma tinanikun te tembora ae karaoaki man te bwaa ae kaokoro are e a riki bwa te kanikina ae titebo nanona ma te Ekaretia.

A roko aomata n te Temple Square ao ana tabo atuun te Ekaretia are otabwaninia—te Tienta ni Maungatabu, Nnen Kaawakinan Rongorongon te Utu, Te Umwanibong ibukin Rongorongon te Ekaretia ao Korobanna, Ana Auti ni Kanuring Iotebwa Timiti, ke Ana Aobiti te Ekaretia naba—bwa iruwa aika motirawa ma aia utu ke temanna ibon irouna, bwa taan bitineti ake a motirawa man aia bwabwaro ke bootaki tabeua, bwa taan mwamwananga, ke iruwa aika a kakannato ke iruwa aika a kaoaki.

Ngke a roko n te Temple Square, a kamauraki iruwa irouia ataeinaine man mwakoron te aonaaba ni kabuta ake a beku bwa mitinare ae bwanin aia tai ibukin te Ekaretia. A boutokaaki mitinare aika a kairake aikai irouia taan ibuobuoki aika aki kaboaki ae kaaniia 1,300 mwaitiia—taian taanga ke aomata ake, a raoniia mitinare aika a kairake, n anga aia kaneweaba aika kimototo ao kabwarabwaraan te Ekaretia ao aia koaua nakoia iruwa aika a kukurei n ongora. Taan ibuobuoki aika aki kaboaki a kabanea e kaaniia 240,000 te aoa ni katabeaia ni kairuwa n 2007 n te Temple Square.

N 2007 e katautauaki bwa nimaua te mirion aomata aika tiku ni mataku n te Temple Square, teuana mai buakon taabo ni kamataku nakoia irua ae rangi ni kakawaraki n aban America.

E aki kanganne bwa a roko mai iaa iruwa, taan iriiriia aika ingainga ma ni kakaonimaki aika a beku bwa mitinare aika bwanin aia tai ao ake a aki bwanin aia tai a kaota te anua n akoi are e a kaman riki n te Ekaretia i nanon ana bong ni maiu Iotebwa Timiti.