Reitan Iango Ibukin Tibwauaan Te Tai, Turai 2008

Aika i nano bon reitan iango ake a kona ni kabonganai taan kairiiri n te Moanrinan ma Tibwauaan Te Tai are e boretiaki i nanon te Riaona n Tuurai 2008. Ibukin te reirei, kaetieti, ao waaki ake a nakoraoi ma iango aikai, tara “I Kona ni Mitinare Ngkai” n te iteraniba R4 ao R5 n aia mwakoro ataei n te maekatiin aei.

1. Imwaain tibwauan te tai, rinanoa te karaki iaon rongorongon Richard are e tibwauaia Beretitenti Gordon B. Hinckley. (1910–2008) (tara “The Need for Greater Kindness,” Liahona, Meei 2006, 59–60). Bwaina te tauraoi n tibwaua te karaki n oin am taeka.

   Kakibei taekan te rongorongo “Maiuakinan koaua n te euangkerio e buokai n riki bwa te mitinare ngkai.” Kaoia ataei bwa a na kaeti taeka n angaia ae eti. Tuanga te ataei bwa e na taekini tabeua man Au Kainibaire n te Euangkerio, ao marooroakini teutana.

   Tuanga te ataei bwa e na kakauongo nakon ana koaua te euangkerio ngkai ko tibwaua ana karaki Beretitenti Hinckley. Marooroakina aron kakaawakin te akoi nakoia tabemwaang. Ngkana e riai, kaoia mitinare aika a bwanin aia tai ke te tia kairiiri n te mition n te uoote ke te mwaanga bwa e na taetae iaon taekan ae e kanga karaoan te akoi nakoia tabemwaang ao te riki bwa te rao ae raoiroi n riki bwa bwaai aika kakaawaki ngkana ko mitinare.

   Karekei bwaai n reirei aika tau ibukiia ataei n tatabemaniia bwa a na karaoa te taore ae te mitinare (tara Moanrinan 3, 120–21). Ngkana a tia taore, kaoiia ataei bwa a na rinea teuana te kawai ni kaota iai te akoi ao ni koreia i aon akuun te taore. Kabonganai taore n anenea te anene ke anenen taromauri iaon te mwakuri ni mitinare. Kaota am kakoaua bwa man te ongeaba n taian koaua n te euangkerio a na buokiira ngaira ni kabane n riki bwa mitinare.

2. Bwenaua te Moanrinan nakon teniua kurubu, ao katabea te kurubu n tatabeua nako bwa a na reiakini taekan D&C 18:15. Kaokioka te koroboki ae tabu tabeua te tai, ao imwiina atonga ni kabane n te kurubu. Anenea te anene ke anene n taromauri iaon te mwakuri ni mitinare. Tuangiia ataei bwa tera bwaai ae a kona ni karaoi bwa a na riki iai bwa mitinare ngkai, ao karinanna iaon te burakibooti.

   Kanimwa te mweenga ae tibwaua te euangkerio man iteraniba R4 i aon te burakibooti. Tuanga te ataei bwa e na rinea te winto ao ni katikua i aon te mweenga. Wareki taeka ake i nanon te winto. Ngkana akea te iango anne n am rinan are i aon te burakibooti, karinna. Marooroakin kawai iaon maiuakinan te bwai ae kabwarabwaraaki n te winto. Reitinako ni katukui winto i aon te mweenga ao marooroakinan kawai ni karekea te mweenga ae tibwaua te euangkerio.

   Karekea katooton te mweenga ae tibwaua te euangkerio ibukiia ataei n tatabemaniia, ao anganiia te tai bwa a na katiaa te mwakuri ae baireaki i nanon tain tibwauaan te tai.

   Karakina te namakin teuana ae raoiroi are ko a tia ni karekea n tibwauaan te euangkerio, ke karakina teuana man te Riaona. Kaota am kakoaua n taian kakabwaia ake ti karekei ngkana ti tibwaua te euangkerio.

3. Te Anga Reirei iaon te Anene: “Called to Serve” (Children’s Songbook, 174–75; ke Hymns, nambwa 249). Anenea een te anene ke katangnga teuana te tai. Tuangiia ataei bwa a na katei baia ngkana a kina te anene. Titiraki bwa tera ae a namakinna n te anene. Tuangiia aran te anene, ao kaota Ana Kete n Tamnei te Ekaretia 612 (Mitinare A Reirei Ana Euangkerio Iesu Kristo). Kabwarabwara bwa te anene aei bon mamaten nanoia mitinare ake a tia ni weteaki bwa a na beku.

   Reiakina te koorati moa. Anenea kabanean te bota n taeka “God our strength will be; press forward ever, called to serve our King.” Kamenaia ataei bwa a na tabeki baia ngkana a ongo taeka aika “called to serve.” Anenea te bota n taeka nakoia ataei, ao kamenaia bwa a na kakauongo bwa antai ae a na beku ibukina. Bwenaua te Moanrinan nakon teniua te kurubu. Kamenaia te moan kurubu bwa a na anenea “God our strength will be,” te kauoua ni kurubu a na anenea “press forward ever,” ao te kateniua ni kurubu a na anenea “called to serve our King.” Anenea te kibu ni kabatia taina bwa a aonga kurubu n tatabeua nako ni karekea aia tai n anenea te bota n taeka n tatabeua nako.

   Ngkai ko reirei kiibu n te anene, kabwarabwarai taeka, n aron ae e kainnanoaki, ibukiia ataei.

   Tibwaua te katooto ae kimototo iaon te mitinare are e weteaki bwa e na beku ao e karaoia ma korakoran te Atua (n aron te katooto, Bauro, Ammon, Samuel Smith, te Mataniwii ni Kabuta, te tia kairiiri n te Ekaretia n am tabo, ke kaain am utu).