Beretitenti Henry B. Eyring
Te Weewete Mairoun te Atua
Tabeua te ririki imwiin rinean Henry Bennion Eyring bwa te beretitenti n te Ricks College (arana ngkai Brigham Young University–Idaho), e anganaki te nakoa ae bubura iai te bo, man kakaawaki i California maiaki.
“E tara n ae te tibwanga ae rangi ni kakaawaki,” e tuangnga Beretitenti Spencer W. Kimball ngke e tabe ni kabwarabwara te tibwanga arei ma bonganana. “Ti ataa te tabo are ko mena iai ngkana ti kainnanoiko.”
E a tia Henry ni kaantaninga Beretitenti Kimball, ai tamana, bwa e na tuangnga bwa e na waaki nako ma ana mwakuri i Ricks. Ma n etina raoi, a kantaningaaki Henry ma kaain abana, Kathleen, bwa a na tataro ao a na aki mamatam ibukin aia babaire anne, ao a karaoia. Imwaain banen te wiiki, ao e karekea ana wirikiriki te Tamnei Henry bwa e na tiku riki i Ricks College “n te tai ae maan riki.”
E tareboniia Jeffrey R. Holland, te Kamitina n te Bootaki n Reirei Aro, man tuangnga bwa e aki butimwaea te mwakuri are e a tia n anganaki. N te tairiki anne ao e karekea te tareboon mairoun Beretitenti Kimball.
“I ataia bwa ko a tia n iangoia bwa ko na tiku,” e taku Beretitenti Kimball.
“Eng,” e kaeka Henry.
“Ko ataia ae ko a tia ni karaoa te anganano?” e titiraki Beretitenti Kimball.
“I aki,” e taku Henry.
“Eti anne!” e kakoaua nakoina Beretitenti Kimball. Ikai are e a katoka naba iai te marooro, Beretitenti Kimball.
Irouia naake a kina Henry B. Eyring, nanona ae korakora ni kan ira ana wirikiriki te Tamnei ae Raoiroi—e ngae ngke karaoakina e na anai bwaai ake a rangi ni bongana n te aonaaba aei—bon tiaki te bwai ae rangi ni kamiimi. E a tia n reiakinna ibon irouna bwa te onimaki ao te nanorinano, n raonaki ma te ongeaba, bon kaotan ae a tau natin te Atua ni karekei kakabwaia aika riaon kaubwain te aonaaba.
Imwiin maten Beretitenti Gordon B. Hinckley n Tianuare 27, 2008, ao e a weteaki Beretitenti Eyring iroun Beretitenti Thomas S. Monson bwa e na riki bwa te Moan Kauntira n te Moan Beretitentii. E a bon tia n riki Beretitenti Eyring bwa te Kauoman ni Kauntira inanon aua namwakaina, ni kanoa te mwaawa are riki man maten Beretitenti James E. Faust.
“Hal”—arana ae kinaaki iai irouia ana utu ma raoraona—e bon bungiaki ni Meei 31, 1933, i Princeton, New Jersey. Te kauoman mai ibuakoia teniman mwaane irouia Henry Eyring ao Mildred Bennion Eyring, e bon kaaina te utu ae rangi ni katuua te reirei n te itera n tamnei ao n rabwata.
Tamana bon te tia rabakau iaon bwai n aoraki ao e tia reirei n te kuura ae rietata i Princeton. Tinana bon te kauoman n tia reirei ae rabakau are e mataniwi ni mwaangana are tabe ma te reirei ibukin te kamarurung irouia aine n te kuura ae rietata i Utah, e bon anganaki ana motirawa man ana mwakuri ibukin karekean ana beeba ae te taokita n te kuura ae rietata i Wisconsin ike e a kaitibo iai ma teuare e na riki bwa buuna. A uaia ni katuka nakoia natiia mwaane aia onimaki iroun te Uea ao aia onimaki inanon Ana Ekaretia.
Am Bwaibwai n te Onimaki
E kauringa moan karakinan ana utu Beretitenti Eyring n aia onimaki ae korakora n ongeabaia ao n irii ana kairiri nako te Tamnei ao aia kairiri taan kairiri n te nakoanibonga. Tibutoruna ae Henry Eyring, are e kitana Tiaman n 1853 ngke 18 ana ririki, e moan kaongoraeaki rongorongon te Ekaretia n te ririki are imwiina i St Louis, Missouri. E kaekaaki nanona ni kan ataa taekan te Ekaretia n te mii are e tuangaki iai iroun Unimwaane Erastus Snow man aia Kooram Abotoro ake Tengaun ma Uoman, are tuai ni kaitibo ma ngaia ma e kaitibo ma ngaia rimwii riki. Te mii naba ae kuri n titebo ma ngaia are e a tibwa moan noora iai Beretitenti Brigham Young, e riki imwiina n 1860 ngke tabe ni karaoa ana mwakuri ni mitinare i Oklahoma ao Arkansas.3
E kaitibo Tibutoruna ae Eyring ma te aine ae roko mai Switzerland ae Mary Bommeli ngke e ira neiei ma ana kurubu ni bwaeoniia inanon kawaina nako Utah imwiin ana mitinare. A kaman kaaina te Ekaretia ana utu Mary ngke 24 ana ririki, e kabureaki i Berlin, Germany, ibukin tataekinan te Ekaretia. Te tairiki are e kabureaki iai, ao e korea ana reta nakon te tia moti are e na ongoraea ana tang. E tuanga te tia moti, “te aomata ae tabe ma bwain te aonaaba,” rongorongon te Mangauti ao taekan te aba n tamnei, ni kaunga nanona bwa e na raira nanona bwa e aonga ni kamaiuaki ma ana utu man “te nanokaawaki ae korakora.” Imwiina ao te tia moti e a kakea ana moti ao e a kabwaraaki Mary man te karabuuti. E aki maan imwiin rokoia i Salt Lake Valley ao a mareaki Henry ma Mary.
Mai Europe nakon rereua ake i maiakin Utah ao Arizona nakon korone ake mai Mexico meang, ao ikanne are a maekana te aba ae tuai maekanaki irouia ana bakatibu Beretitenti Eyring, ni kabuta te euangkerio, a birinako man te bwainikirinaki, a katei reirei, ao a reireiniia natiia.
Ana Kairiri te Buuaine
Inanon moan waakin te Kauoua ni Buaka, ao tiatianakin te bwaa e a totokoa aron rokoia Eyring ma ana utu man mwanangaia ae 17 te maire (27-km) nakon te Mwaanga ae New Brunswick ibukin aia bootaki n Taabati. Ao ibukin anne, a karekea te kariaia bwa a na waakina aia bootaki inanon mweengaia, i Princeton, New Jersey. E kona ni manikangare Hal n taekinna ae e bae n roko ni kaea te Moanrinan ikekei—te bwai ae e aki kanganga karaoana ngkai bon ti teuana te tai ae e karaoaki iai te Moanrinan ni mweengaia.
E aki toki n taetaekina aron te tamnei ae rangi n tamaroa n aia bootaki n toa are waakinaki inanon aia mwaanga ae uarereke aei, are e kaainaki irouia ana utu ao tabeman irua aika roroko. E aki tabe e ngae ngke ana utu bon tii ngaiia ake a bon roroko ao ngaia ma tarina bon ti kaain te Nakoanibonga ae te Aaron. Ma inanon aia tai ataeinimwaane aikai n roko n te roro ae rikirake, ao e rangi ni ingainga tinaia ni kani maeka n te tabo ae e mwaiti riki iai kaain te Ekaretia.
N 1946 ao e a rangi ni kukurei Henry n aron ana konabwai n ana mwakuri i Princeton. E karekei kaniwangana aika mwaiti angiina bon iaon rabakauna n te chemistry. Ibukin ana mwakuri ae rianako n neneri bwaai aika kona ni kakoauaki n raonaki ma taan rabakau aika rangi ni kinaaki, e reke iai ana tai bwa e na konaa n reke irouna te Kaniwanga ae te Nobel.
Bon inanon te tai aei ao e roko ana wewete Henry mai iroun A. Ray Olpin, te Beretitenti n ana Kuura ae Rietata Utah, n tuanga bwa e na riki bwa te tia tararua n te reirei ibukiia naake a na karekea aia beeba ae rietaata riki ao man reita ana ukeuke iaon te chemistry. E katuka nakoina te rinerine aei iroun buuna ae Mildred, ma e tii kauringa ana berita nakoina inanon ririki aika bwakanako. E berita Henry bwa e na uotiia ana utu ni kaniia riki ma ana etekuata te Ekaretia ngkana a ikawai riki ataei. Ngke e a karautaeka nakon te wewete, Mildred are e bon ikawai rake i Utah, e tuanga bwa e na tataro ibukin ana rinerine are e a tia ni karaoia ao e a anganna ana reta bwa e na warekia ngkana e roko n ana tabo ni mwakuri.
Ngke e wareka te reta, ao e kaota nanokawakina Mildred, ao imwiin ana tataro ma iangoana, e a tareboon ngkanne Henry nakon Beretitenti Olpin, n tuangnga bwa e nang kariaia nakoana ni karikirakea mwaangan te kuura ae rietata ibukin neneran bwaai aika kona ni kakoauaki. E ootara ana anganano ngke e kitana Princeton bwa e bitaki bwa te kakabwaia ibukina ma ana utu. Teuana te kakabwaia bon kukurein nanon Hal n toua mwiin maiun tamana ngke e kaitara ma te babaire ae titebo n ririki ake imwiina.
Katauraoi ibukin taai aika ana roko
“I bon ataia ngke te kairake tariu bwa e okoro ma kairake ake tabeman,” e taku Harden Eyring, are e ararana tarina ae te ikawai bwa ana tia kairiri ao raoraona. Ngke e mena n te kauarinan Hal, ao e taku Harden, bwa e kabanea ana tai ma koroboki aika tabu, ni wawareka Ana Boki Moomon nimaua te tai.
E aki iangoia Hal bwa e kakannato nakoia raona ake temwaangina, ma e rarawa ni iri bobotaki ake e na raroa iai ma te Tamnei. E kataua ana tai n takakaro n te bwatiketi booro ibukin te East High School i Salt Lake City, ma e moani bwai ana kamatebwai.
“Ngke te kairake ngai, ao I aki toki n nanako nakon te tabo ni karao aitikuriim are e aki toki ni kakawaraki irouia aomata,” E taku Harden. “Ma n te tairiki ao e aki kona Harden n nanako n ira te mwairiri. Ma, e wareware ao e kamatebwai.”
Tarina are te ikawai riki, Ted, te tia reirei ae rabakau n te chemistry n ana Kuura ae Rietata Utah, boni kaain te kaaua n ririki ngke a kaain reirei ma Hal. E nooria Ted bwa Hal e konabwai n ai aroia raona n reirei. “Ngkana e katuua ana iango iaona Hal, ao e konaa ni katiai bwaai ni kabane,” e taku. “Bon te aomata ae kamanga ao e teimatoa ni kukurei e ngae ngkana e rootaki ni kataaki aika kanganga.. Hal bon katotongan raoi tamana.”
Ngke e a tabe n ikawai rake, ao e kunea Hal te okoro imarenana ma tamana.
E kaunga nanoia natina Henry Eyring bwa a na kamatebwai iaon aron mwakurin bwaai ma korakora (physics) ao ni katauraoi bwa e na reke aia mwakuri n neneran bwaai aika kona ni kakoauaki. E karaoa mwiokoana ni karekea ana beeba ni bwaati Hal iaon mwakurin bwaai ma korakora (physics) n ana Kuura ae Rietata Utah, ma n te bong teuana ngke e titirakinna tamana buokana iaon teuana te titiraki iaon te numera, e rangi ni mataata iroun Henry bwa Hal e bon aki nano iai.
“E tei tamau n te buraki booti are ti kawakinna n ara ruu inano,” e ururing Beretitenti Eyring. “E waekoa ni katoka are e karaoia. ‘Hal,’ e taku, ‘ti bon mwakuri naba iaon te aekaki n titiraki aei teuana te wiiki n nako. Titebo ma tein ae ko aki ota iai ngkai ni kabotauaki ma ngkoa. Ko bon mwakuri iaona?’ ”
E kaeka Hal bwa e bon aki. Imwiina ao e a kaotia nakon tamana bwa te rabakau iaon mwakurin bwaai bon tiaki te bwai ae rangi n iangoia. E tei moa tamana n te tai ae uarereke ao imwiina, ma taeka n akoi aika kainaomata natina bwa e na karaoa te bwai ae bon mate nanona iai, ao e taku, “Ko bon riai ni kakaea te bwai ae ko rangi n tangiria bwa ngkana akea te bwai ae ko iangoia, ao bon anne te bwai ae e na mena n am iango.”
E ngae n anne ma e boni karekea ana beeba ni bwaati iaon te rabaku iaon mwakurin bwaai ma korakora imwain rinna n ana taanga ni kibakiba te U.S. n 1955. E a tibwa toki te Buaka are i Korea, ao mwaitiia ataei ni mwane ake a weteaki bwa ana mitinare man taian uoote e bon aki tau. Inanon te tai ae teuana ao e a kainaki Mweengaia Mitinare are i Salt Lake City, ao aakea mitinare aika mwakuri. E ngae n anne, n te kakabwaia teuana, ao e berita ana bitiobi bwa tabena n te taanga ni buaka e na riki bwa e na riki bwa te mitinare. Uoua te wiiki imwiin rokona n nneia tautia i Sandia irarikin Albuquerque, New Mexico, ao e a weteaki Hal bwa e na mitinare n te aono ae te Western States Mission—te wewete ae karaoia n te tairiki koraki ma taian wiikente inanon uoua te ririki ngke e mena n te taanga ni buaka.
Ni banen ana tai man te taanga ni buaka, ao e a manga rin Hal n ana Reirei ni Kareke Beeba Harvard n te Bitineti, ike e a karekea iai ana beeba ae te mwatita n 1959 ao ana beeba n taokita n 1963, ni kauoua iaon waakinan te bitineti. E ngae ngke iai ana konabwai ae konaa ni karekea n te tiaienti, e kunea Hal bwa e nano n te tia reirei, boutokakiia, ao kakorakorakiia tabeman.
Kakauongo nakon te Tamnei
Ngke e reirei i Harvard n tain te kabuebue n 1961, ao e kaitibo Hal ma Kathleen Johnson, natiia J. Cyril ma LaPrele Lindsay Johnson, mai Palo Alto, California. E bon kaea te reirei are waakinaki n tain te kabuebue i Boston, ao ngke e moan nooria Hal ao e bon bwaka irouna. E namakina nanona ni kan karaoa ana kabanea n tamaroa ngkana e mena irarikina—te namakin ae teimatoa ni waaki inanon maiuiia.
A mamaroro inanon tain te kabuebue anne ao n reitanako aia iraorao rinanon tareboon ma reeta ngke e oki rikaaki Kathleen nako California. A mareaki n Tuurai 1962 n te Logan Utah Tembora iroun te Unimwaane Spencer W. Kimball. Ni bon te ririki naba anne are e a riki iai bwa te tia ibuobuoki n tia reirei ae rabakau n te Reirei ni Kareke Beeba ibukin Bitineti i Stanford.
Ruaiua te ririki imwiina ao e a rangi ni kukurei Hal n ana mwakuri i Stanford ao n riki bwa te bitiobi n ana Moan Uoote Stanford. Ma ana koraki buuna aika maeka ni uakaan, “a bon nakoraoi aron maiuiia,” e ururing rikaaki. Ma n te nukanibong teuana n 1971, e kautia Kathleen ma titiraki aika kamimi: “Ko bon koaua raoi bwa eti te bwai ae ko a karaoia ni maiu?”
E mimii bwa n te aro raa ae ana kukurei riki iai, ao e kaeka Hal, “Tera iai ae ko nanonna?”
E kaeka Kathleen, “Ko aki riai ni karaoi am kamatebwai ibukin Neal Maxwell?”
E a bon tibwa tia ni weteaki Neal A. Maxwell bwa te Kamitina ibukin ana Bootaki n Reirei te Aro. A bon aki kinaa raoi Hal ao Kathleen, ma e namakinna Kathleen bwa tao e konaa riki ni karaoa ae mwaiti buuna ni biiti maiuia aika bati.
“N na kamatebwai ibukin Neal Maxwell—inanon te tai aei n au mwakuri?” E kaeka Hal. I rarikin anne, ao e iango, “‘Te mwakuri ni kamatebwai’ bon te bwai ae kakaraoia ataein te reirei ae iai ana beeba.”
E aki karongoa, ao e taku Kathleen, “Ko konaa n tataro iaon anne?”
Inanon te tai arei n ana mare, ao e ataa riki ae riai Hal nakon ae e na kakeaa bonganan ana reirei buuna. E teirake man ana kainiwene, e katorobubua, ao e tataro. “Akea te kaeka ae I anganaki,” e taku, “ao e namakina te kukurei iai ibukina bwa e rawa ni manga nakon te tabo teuana.”
N te bong are imwiina inanon ana bowii te bitiboburiki, ao e roko te bwanaa ae e rangi ni kinaa Hal n ana iango ao man boaia ibukin ana kabarabae nakon ana kauring buuna. “Ko aki konaa n ataa ae kakaawaki ibukim inanon am mwakuri,” e tuangaki. “Ngkana e a manga reke am mwakuri teuana, ko na taetae ma Ngai ibukina.”
E ringaaki Hal n te bwai are e riki nakoina ao e kabaitiia n oki nakon mweengana. “E a reke ara kanganga,” e tuanga Kathleen. E roko te maaku bwa e a tia ni kaairua ngke e kakeai tabeua mwakuri ake e karekei ni menana i Stanford. “I bon aki te roko n tataro ibukin naba teuana mai ibuakoia,” e taku. E nanorinano, ao e a moana ana tataro ibukin taai aika ana roko.
E kan wiiki imwiin ana titiraki Kathleen n te nukanibong arei, ao e a tareboon Kamitina Maxwell nakon Hal bwa a na kaitibo i Salt Lake City. E kiba nako n te bong are imwiina, ao a kaitibo mwane akanne n ana auti ana karo Hal. Moan taeka ake e taekin Kamitina Maxwell e kangai “I tangiriko bwa ko na Beretitenti n te Ricks College.”
N ana kauring buuna ao boakina roun te Tamnei aki rangi ni katauraoia nakon te nakoa are anganaki. E tuanga Kamitina Maxwell bwa e na tataro moa ibukina. E ngae n anne, bon tii teutana ae ataia iaon te Ricks College. N te ingabong are imwiina ao e kaitibo ma te Moan Beretitentii. Imwiin anne ao e a tuanga Kamitina Maxwell bwa e konaa n reke te mwakuri anne ngkana e tangiria.
N okina nako California, ao e teimatoa n tataro Hal. E roko kaekaana, ma e kuri n aki ooia. “I ongo te bwanaa ae maraara ngaia are I aki rangi ni kabanebuakaa au tai iai,” e uringa. “E taku te bwanaa, Bon au reirei.’” E tareboonia Kamitina Maxwell ao n tuangnga, “N nang nakoati.”
N te tai naba anne, e kitani kabwaia n te nakoa are e taua i Stanford ni kabanea maiuna ao e maeka n te auti ae te kaa, i Idaho. Tabeua te namwakaina imwiin butimwaeana nakon nakoana bwa te beretitenti n te Ricks College n Ritembwa 10, 1971, are e a mwaing iai ana utu nakon mweengaia ae boou are e buokia ni kateia.
“I nakon Ricks ma tabeua bwaai aika I atai,” e taku. “Teuana bon tiaki ngai te aomata ae rangi ni kakannato n aron au iango ibukina bwa e rangi n rietata nakoau i Stanford. Teuana riki ae I ataia bwa kaainabau e a kaman karekea te kaotioti imwaain ae I karekea. N tokina I ataia bwa ni menau ikekei bon te kakabwaia nakoiu. N onea mwiin kaekaan te titiraki I taku, ‘N na kanga ni kitana au mwakuri i Stanford?’ ‘E na bon tabe ibukin anne Tamau are i Karawa. Bon tiaki te anganano’
Onoua te ririki are kabanea Beretitenti Eyring i Rexburg e kakoaauaki bwa bon te kakabwaia nakon ana utu ao te kuura n reirei. Te kauntira ae wanawana mai iroun te tia reirei n te mweenga ae mangori e buoki ririki akanne bwa ana ururingaki. Te tia reirei n te mweenga, te tia kawakin man ae korakora ana onimaki, e kaungaa Beretitenti Eyring bwa e na otinako man ana aobiti bwa e aonga ni kona ni kaitibo, ni kaungaia ao n anga te kakaitau nakoia taan ni mwakuri n te kuura n reirei ao ataein te reirei.
E tataro Hal ibukin te bwai ae riki, e namakina te wirikiriki bwa e na toua mwiin te reirei, ao e moana kabanean riki ana tai ma ataein te reirei aika kakaonimaki ao taani mwakuri aika nanomwaaka. E anga reirei naba n te kiraati n taekan te aro ma temanna te tia reirei. N ana tai ni mwakuri korakora ni katabwanina te moani waaki ni katea aan te reirei n rabakaun te aonaaba ao rabakau n te tamnei, ngaia ma Kathleen a rikirake n tangiriia kaain te tabo n reirei ao aomata i Rexburg.
Te Utu Moa
I nanon aia ririki i Rexburg, ao e rikirake te itangitangiri imarenaia kaain ana utu Eyring. Ai bon aman natiia mwaane Hal ao Kathleen n te tai anne: Henry J., Stuart, Matthew, ao John. Imwiina ao a kakabwaiakaki ma natiia aine aika uoman: Elizabeth ao Mary Kathleen. Ma a na bon riai ni karaurau Hal ao Kathleen n te kaawa ae te tabo niman itinanikun te kaawa ae bubura. Teuana tabeaiangan nanoia bon mwaitin ao tamaroan buroukuraem n te terewition are e mamatakuakin natiia. Henry J., natiia te mwaane are te ikawai, e uringa te bwai are e rinanona are e noora iai kaokoron te namakin ni mweengaia Eyring.
“Ngai ma tariu ti tekateka imatan te TV n tairikin te Kaonobong teuana ngke e a kaan nukanibong,” e taku Henry J. “Tamnein te kamanga ae buakaka are ti riai n aki mataku iai e oti n te tai anne. Te ruu are iaan tano e roo ma iai te oota man te terewition. Akea atakin te tina ngke e a rin naba. E bwaina te kunnikai ni matu ae mainaina ao e uota te tati. E nako bukin te terewition n aki karongoa, e katika uaeana, man boobotia. Imwiina e karina wiin te tati inanon te uaea ao e koroia n te tai ae ti teuana. E kia te ura man te uaea ao e mate te terewition, ma tiaki imwain ae e tanrikaaki te Tina ao e nakonako ni karaurau ni kitana te ruu.”
E okira ana kainiwene, Henry J. ma te aki raunnano. Tarina ae niniwana, e korea te uaea man te mitiin n temeka te bubu ae uruaki ma n tomaia ma te terewition. E aki maan ao a manga oki n tekateka imatan te terewition, man aki bua aia tamnei are a mataku iai.
“Ma te tina, e tokanikai n tokina,” e taku Henry J. “Ngke ti okira mweengara imwiin ara reirei n te Moanibong are imwiina, ti kunea te terewition inuuka ma te raeuaaki ae korakora i nuukan kiraatin te tikuriin ae matoatoa. N te tai naba anne ao e nako ara iango nakon Tinara. Ngke ti taraia, ao e katokaa matana n taraira man taku: ‘I taea bubun aan te TV, ao e a marannako naba.’”
E karinea ana iango buuna Beretitenti Eyring, a karinea naba ana kaantaninga tinaia ataei, ao anne tokin te terewition ni mweengan Eyring. “Ma ni bon etina, te Tina e kairiiri ma te karaurau,” e nooria Henry J. “Ma, e karekea te kairi mai iroun te Atua man aki kona ni maaku. E a tia n riki bwa te kakabwaia ae korakora nakoia natina ao tibuna aron te Tina ae nanomatoa. E a tia ni bita aron maiura n taai aika kakaawaki ao n ara mwakuri ni katoabong.”
E rangi ni kamoamoaa kaainabana Beretitenti Eyring ibukin ae e anganna te nano ni kani karaoa te kabane n tamaroa ao n riki bwa te kabanea n nakoraoi, ao e kakaitau bwa e a tia ni kakabwaiaia natina n te aro naba anne. E waekoa ni kamoamoaa ibukin ana banna ni katooto ao n ana kairiiri n te maiu n tamnei nakon aia utu. Neiei e bon kamoamoaa, ni kaota ana kakaitaua nakon teuaei ibukin namakinan te Tamnei ao te kawai ae nakoraoi are e a tia n reirei iai ao ni maiuakina te euangkerio ni mweengaia.
“Akea te nanokokoraki n ana iango Hal bwa antai ae moanibwai inanona,” e taku. “E maeka n tabo ae korakora iai te kaiangatoa ma taan mwakuri aika iai irouia te konabwai i Stanford, ma e moamoa irouna n taainako ana utu. N tokin te bong koraki, ngkana ti bane ni ikotaki n te tairiki, e na bae n titiraki, ‘Antai ae ti tuai n tarebonia?’ Ma man ana kairiiri te Tamnei, ao e bae n nakon te tareboon n reitaki ma kaain te utu ae kainnanoa te reitaki n te tairiki anne.”
N akean te terewition n te mweenga, e a anganiia kaain te utu aia tai riki imarenaia ao aia tai riki ni karaoi oin nanoia, karikirakei aia taarena, ao ni waakini takakaro ao mwakuri ni kakukurei tabeua ibukin te utu. Inanon ririki aika bati e a tia Beretitenti Eyring ni karaoiroa riki rabakauna ni kuuka (e karaoa oin ana kariki), e karioi rabakauna ni karaoan bwaai man te kai, ao e reiakina aron te koro tamnei man te kara ae renganaki ma te ran. N tabetai ao e kanakoi reeta aika uarereke ni kakaitau ke koro tamnei man te kara ae renganaki ma te ran bwa kanuringa.
N te bong aei ao mweengan Eyring e a onrake n taian korobanna, bwaai aika karaoaki man te kai, ma bwain nanon auti ake e bon karaoi ma aia ibuobuoki naake a mwaatai iaon te mwakuri. Mwakorokoro ni kai aika bati a kaoka te ururing nakon reirei aika kakawaki ke namakinan te tamnei. Irarikin anne, e karekea naba ana tai ni kanakoi ana i-meeri ni katoabong, e rangi ni kinaki n arana ae “Bwaatua Ake a Uarereke,” irouia ana utu, ma tibuna aika 25.
“Te boki ibukin rongorongoia ana utu tamau, are e kanakoa rinanon te i-meeri ni katoa bong ma tamnei ao aia rongorongo natina, e a tia ni buokiira n anganiira te namakin ae ti tebo bwa ti kakaraki ni katobibia te taibora n amwarake n te tairiki koraki,” e taku Henry J.
Te Nano ni Kani Beku
E aki ataia Beretitenti Eyring n te tai anne, ma e katuka mwakurin te aonaaba ngke e butimwaea te nakoa i Ricks College. Ana mwakuri bwa te beretitenti ngaia n te kuura n reirei n te tai naba anne ao e mwakuri bwa te tia tei ibukin te aono arei ao kaain te baba n tararua ni kabuta ibukin te Reirei n Taabati a tia ni karekea riki te reitaki i marenana ma taani kairiiri n te Ekaretia, ake a kina raoi ana tarena ao bwaai n tituaraoi nakoina mai iroun te Tamnei. N te tai anne ao te Uea e ata nanona ni kani karaoa te beku.
E reitinako te wewete ae kakaawaki nakon Beretitenti Eyring i mwiin onoua ana ririki i Ricks College, taani kairiiri n te Ekaretia a ukoukora te kairiiri are e kairiia nakoina. N tain te kakatauraoi ibukin wewete aikanne, e reireinaki iroun te Tamnei n ana tai ni mwakuri, e ukoukora nanon te Atua, e kakauongo nakon taiani kaeka, ao, n aroia naba ana bakatibu, a karaoa nanon te wirikiriki are roko. Ngke a roko taian wewete, ao e a bon tauraoi.
N te 1977 Jeffrey R. Holland, te kamitina ae boou n te CES, e butia Beretitenti Eyring bwa e na riki bwa te kauoman ni kamitina. Teniua te ririki imwiina, ngke e a riki Kamitina Holland bwa te Beretitenti n te Brigham Young University, ao e onea mwiina Hal bwa te kamitina n te CES. E mwakuri n nakoana anne ni karokoa ae roko te wewete nakoina n Eberi 1985 bwa e na Moani Kauntira n te Bitioburiki n Tararua. N te wewete anne ao e kamanenai ana konabwai aika mwaiti ni karaoi mwakuri ibukin tararua, babaire ibukin kateitei n taabo, tamnei ibukin ao katean tembora, ao waaki tabeua ni bwain aon te aba. N Tebetembwa 1992 e a manga weteaki bwa te kamitina n te CES ao, teuana te namwakaina imwiina, e weteaki nakon te Moan Kooram n te Itingaun.
N Eberi 1, 1995, e kamatoaaki Henry B. Eyring nakon aia Kooram Abotoro ake Tengaun ma Uoman. Man te tai anne ao e a tia karikirakea irouna Tamnein te Uea ngkai e a tia ni kakabwaiaia kaain te Ekaretia ni kabutaa te aonaaba mai imwiin ana taeka aika korakora man roota te nano, ana mwakuri n tangira, ao ana koaua aika korakora ibukin te Tia Kamaiu ao Ana Euangkerio.
Konabwaina ae Onoti
Ngke e kaota ana koaua Beretitenti Eyring n te maungatabu ni kabuta are e bo n Okitobwa 2007 ibukin kakabwaia n taraakin bain te Atua inanon maiura, e taetae man oin ana atatai. Mai mwiin tauan mwiin ana mwakuri Tamara are i Karawa, e a tia n namakina ana koaua bwa e rikirake ao e a tia “ni kakoaua riki bwa e ongo ao e kaekai tataro Tamara are i Karawa.”4
Te kiing ibukin ataakin kaeka aikanne ao ataakina ae iai nanon te Atua ni maiura, e taku, bon man karikirakean ara kakauongo. “Ti riai n aki kakarongoa man kakauongo. Inanon maiu, ngke I a tia n aki karekea te namakin ae itiaki ke n tia n aki ongo ana wirikiriki te Tamnei, bon bukina bwa I rangi n tabetabe, I rangi n tabeakini bwaai riki tabeua, ao I rangi n tabeakina oin nanou.”
E a tia n taainako Beretitenti Eyring ni maiuakina te reirei are n te katebui ma teniua n taekan te onimaki. A rangi ni kakabwaiakaki kaain te Ekaretia ngkai e kona ni beku irarikin Beretitenti Thomas S. Monson ao Beretitenti Dieter F. Uchtdorf. E burenibwai reken katiteuanaakin taian tarena, karekean te onimaki, te maiu ni katauraoi, te nano ni kan beku, ao te botumwaaka ni ukoukora te Atua man karaoi Ana kaantaninga ma te kororaoi e boni karika konabwaina ae onoti n taua te beku n te Moan Beretitentii.