E Riki Bwa Te Ka-125 N Tembora Ae Waaki Ni Mwakuri Te Rexburg Tembora

E kaukaki ao e waaki mwakurin te Rexburg Idaho Tembora imwiin katabuana ni Beberuare 10, 2008, iroun Beretitenti Thomas S. Monson n teuana mai buakon ana moan mwakuri ngkai ai te ka-16 n Beretitenti n te Ekaretia.

E tararua Beretitenti Monson n taian tetere ake aua n te katabu ao e raonaki iroun Unimwaane Russell M. Nelson ao Unimwaane David A. Bednar n aia Kooram Abotoro ake Tengaun ma Uoman.

E tei i maiakin ana tabo te Bringham Young University–Idaho, te Rexburg Idaho Tembora are bon ana ka-125 n tembora te Ekaretia ae mwakuri ngkai n te aonaaba ao te kateniua i Idaho. E kaania 200,000 aomata ake a kaea te kaneweaba n te namwakaina are imwaain te katabu.

E moan katanoataki te tembora ae 57,504 te tikuea butu (5,100-tikuea miita) n Ritembwa 2003, ao e moanaki te kateitei n Tuurai 2005. Bwain tinanikun te tembora bon te atibu kiraati ao 700 wintoona kiraati aika korobannaki. Te tembora e buokiia e kaania 47,000 kaain te Ekaretia i Idaho mainiku.