TAUʻATĀINA KE FILÍ MO E ʻEKEA MEIATE KITA ʻA ʻETE NGAAHI NGĀUÉ
Mavahe Hake ʻi he Ngaahi ʻAó
Fili ki he māʻoniʻoní mo e fiefiá, neongo pe ko e hā ʻa e tūkunga ʻokú ke ʻi aí. [Fatongiaʻaki e ngaahi fili ʻokú ke faí]. Fakatupulaki e ngaahi meʻa ʻokú ke lavá mo ho ngaahi talēnití, pea fakaʻaongaʻi kinautolu ki he leleí. Fakaʻehiʻehi mei he fakapikopikó peá ke [loto fiemālie] ke ngāue mālohi.
Ne ʻikai fuoloa mei heni ʻeku maʻu ha faingamālie ke u puna ai ʻi ha kiʻi vakapuna siʻisiʻi. ʻI he teuteu ke mau heká, naʻe fehuʻi ange ʻe ha taha ʻo e kau pāsesé ki he pailaté pe ko e hā e māʻolunga te mau puna aí. Naʻá ne talaange te mau puna ʻi ha fute ʻe 9,500 (mita ʻe 2,900). Naʻá ne pehē ange, “ ʻA ia te tau kiʻi mavahe siʻi hake he ngaahi ʻaó.” Hili iá naʻá ne fakamatalaʻi mai, “Kapau te tau puna ʻi lalo he ngaahi ʻaó, ʻe kiʻi ʻalotāmaki ʻetau folaú. Ka ʻo kapau te tau mavahe hake ki ʻolunga he ngaahi ʻaó, ʻe kiʻi tokamālie ange ʻetau puná.”
Ko ha fakakaukau ʻeni naʻe hoko ia ʻo hangē ha kikité. Kiate kimautolu ʻi he loto vakapuná, naʻe kiʻi lahi ange ʻa e feingá, kiʻi lahi ange e lolo naʻe fakaʻaongaʻí, pea lahi ange mo e kiʻi ʻalotāmaki ne fepaki mo e vakapuná ʻi heʻene feinga ke hū hake he ʻaó. Ka ko e taimi pē ne mau mavahe hake ai ʻi he ʻalotāmakí naʻe lelei ʻaupito e konga lahi ia ʻo ʻemau puná. Neongo ne ʻi ai ha ʻalotāmaki ne fepaki mo e vakapuná pea fie maʻu ke tokanga e pailaté ki he tuʻunga naʻe ʻi ai ʻemau puná, ka naʻe fakafiemālie ange.
Ne u fakakaukau ki mui ange ki he ngaahi lea ʻa e pailaté: “Kapau te tau mavahe hake ki ʻolunga ʻi he ngaahi ʻaó, ʻe kiʻi tokamālie ange ʻetau puná.” Ne u fakakaukau ki he ʻuhinga lahi ʻo e lea ko iá ki he moʻuí. ʻI heʻetau moʻui ʻi he māmaní, ʻoku lahi ʻaupito ai ʻa e ngaahi meʻa palakū mo taʻemaʻa mo koví ʻa ia kuo pau ke tau mavahe hake ʻo māʻolunga ange ai kapau ʻoku tau fie moʻuiʻaki e moʻui ʻa e tokotaha Siasí. ʻE lava leva ke nofoʻia kitautolu ʻe he Laumālié pea tau ongoʻi ʻa e nonga ʻoku totonu ke tau maʻú. ʻOku fie maʻu ʻa e ngāue, ʻa e loto vilitaki, loto toʻa, pea fai mo ha ngaahi fili totonu kae lava ke tau mavahe hake mei he ngaahi faingataʻa ʻokú ne takatakaiʻi kitautolú. ʻOku kau ʻi he ngaahi faingataʻa ko ʻení ʻa e ʻuli ʻoku takatakai ʻiate kitautolu ʻi he mītiá. ʻOku kau ai ʻa e loto-foʻí, mole ʻa e ʻamanakí, mo e ngaahi faingataʻa kotoa pē ʻoku fetaulaki mo e “tangata fakakakanó” (Mōsaia 3:19).
Ka ʻo kapau te tau fakaʻaongaʻi totonu ʻetau tauʻatāina ke filí, kapau te tau moʻuiʻaki e ngaahi tuʻunga moʻui kuo tuku mai ʻe he Kau Palesitenisī ʻUluakí ʻi he Ki Hono Fakamālohia ʻo e Toʻu Tupú, pea kapau te tau feinga mālohi ʻi he ʻaho kotoa pē ke ikunaʻi e ngaahi meʻa ʻo e māmaní, ʻe toe fakafiefia ange ʻetau fononga ʻi he moʻui ní. ʻE lava ke tau ongoʻi ʻa e nonga lolotonga ʻetau ʻi he halá pea te tau lava ʻo tūʻuta hao ʻi he fakaʻosinga ʻo ʻetau fonongá.
ʻOku ʻikai pehē ia he ʻikai ke hoko ha meʻa he fonongá pe ʻe nonga e meʻa kotoa. Ne teʻeki ai ha palōmesi pehē, koeʻuhí ʻe ʻi ai e ngaahi faingataʻa ʻi he halá, pea ʻe fie maʻu ke kei hokohoko atu ʻetau tokanga ki he fonongá. Neongo ia, kapau te tau fili ke ʻi he tafaʻaki ʻo e ʻEikí, ʻe lava ke tau ikunaʻi e ngaahi ʻahiʻahi ʻo ʻetau moʻui ʻi he māmaní, pea ʻe fakapapauʻi ai te tau maʻu ʻa e melino mo e fiefia ʻi he moʻuí ni pea ʻi he moʻui ka hoko maí.