FAIKAUMEʻÁ
ʻOua naʻá ke teiti pe faikaumeʻa [kae ʻoua kuo hoko] ho taʻu 16. Faikaumeʻa pē mo kinautolu ʻoku māʻolunga ʻenau ngaahi [tuʻunga moʻuí]. ʻI he kamata pē ke ke faikaumeʻá, ʻalu fakatokolahi pe kaungā ʻalu mo ha taha. Palani ʻa e ngaahi ʻekitivitī ʻe tokoni kiate koe ke ke vāofi mo e Laumālie ʻo e ʻEikí.
Ko e ngaahi kulupu teiti fakatokolahi lelei tahá ʻoku palani pē ke faingofua, ʻikai ha fakamole ki ai kae fakafiefia. ʻAi ke ke mohu fakakaukau; ʻoku fiefia ʻa e kakaí ʻi ha ngaahi meʻa ʻoku kehekehe pea lava ke nau ʻiloʻi ai mo ha niʻihi kehe lolotonga ko ia ʻoku nau fiefiá. Kole ki hoʻo mātuʻá, ngaahi kaungāmeʻá, pe kau taki ʻo e toʻu tupú ke nau ʻoatu ha ngaahi fakakaukau fekauʻaki mo e teiti fakatokolahí. Ko ha ngaahi fakakaukau ʻeni ʻe niʻihi ke ke kamataʻaki:
-
Ō ʻo ʻeva ki ha fale ngaohiʻanga lole, fale ngaohiʻanga siisi, pe ha toe feituʻu pē ʻe fakamānako e sio aí.
-
Fokotuʻutuʻu ha houa kai efiafi pea vahe ki ha kakai ke nau ʻomi ha ʻū tisi meʻakai pau pe ngaahi meʻa ke ngaohiʻaki e meʻakai ko iá.
-
ʻEva ki ha paʻake pē he koló ʻe lava ke mou fafanga ai e fanga manupuná, lue holo ai, hapohapo, heka pasikala, pe kaimeʻakai ai.
-
ʻAʻahi ki ha musiume, feituʻu ʻoku tauhi ai e fanga iká, pe ha tauhiʻanga ʻo e fanga manú. Kumi he nusipepá pe ʻInitanetí ha ngaahi feituʻu ʻe maʻu ha ngaahi tikite taʻetotongi pe maʻamaʻa ke hū ʻaki.
-
Fai ha teiti ʻo tokoni ai ki ha taha. Tafi e laʻiʻakau he kaungāʻapí, fufulu matapā sioʻata, pe tokoni ʻi ha faʻahinga meʻa pē ʻe fie maʻu ke fai.
-
Kapau ʻoku mou fie maʻu ke ʻoua naʻa fakahohaʻasi kimoutolu, ʻaʻahi ki he laipeli fakakoló pe ha falekoloa tohi ʻo mou sio fakataha ai he ngaahi tohí.
-
Kapau ʻoku mou nofo ʻi ha feituʻu ʻoku lahi ai e sinoú, mou faʻu fakataha ha tangata sinou. Kapau ʻoku mou nofo ofi ki he matātahí, mou langa ha ngaahi fale fakatuʻi ʻaki e ʻoneʻoné. Pe ko haʻamou takitaha faʻu pē ʻene fale fakatuʻi pea fai haʻamou feʻauhi pea tuku ke fakamāuʻi ʻe he kakai ʻoku nau felueʻaki holó pea ʻikai ke mou mahení.