Ngaahi Fakakaukau Makehe ki he Taimi Fe‘inasi‘akí, ‘Okatopa 2008

ʻOku ʻoatu heni ha toe ngaahi fakakaukau ʻe lava ke fakaʻaongaʻi ʻe he kau taki ʻo e Palaimelí fakataha mo e Taimi Feʻinasiʻaki ʻoku paaki ʻi he Liahona ʻo ʻOkatopa 2008. Vakai ki he “Te u Hoko ko Haʻane Tamaioʻeiki” ʻi he peesi K4 mo e K5 ʻo e konga maʻá e fānaú ʻi he makasini ko ʻení, ki he lēsoní, ki ha ngaahi fakahinohino mo e ʻekitivitī fekauʻaki mo e ngaahi fakakaukau ko ʻení.

1. Ki muʻa pea fai e taimi feʻinasiʻakí, kumi mai ha ngaahi laʻi tā lolotonga ʻo e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá. Fakapipiki kinautolu ʻi he palakipoé. Tohi ʻi ha laʻi pepa honau ngaahi hingoá pea fakapipiki ia ʻi he tafaʻaki ʻo e palakipoé.

   Kamataʻaki hono kole ki he fānau ke nau fakahoa e ngaahi hingoá mo e ngaahi laʻi tā ʻo e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá. Tokoniʻi e fānau ke nau fokotuʻutuʻu e ngaahi laʻi taá ʻo fakatatau mo honau uiuiʻí mo e taʻu ngāué.

   Filifili mei he konifelenisi lahi fakamuimuitahá pe ko ha ngaahi Liahona kehe ha ngaahi malanga mei he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ʻoku fekauʻaki mo e tauhí. Vahevahe e ngaahi pōpoaki ko ʻení pea aleaʻi e ngaahi founga ʻe lava ʻe he fānaú ʻo fakaʻaongaʻi e meʻa naʻa nau akó ke tokoniʻi kinautolu ʻi heʻenau tokoniʻi e niʻihi kehé. Kumi e Tokāteline mo e Ngaahi Fuakavá 4:2 ke fakamanatu ki he fānaú ʻoku tau ngāue tokoni ʻaki hotau lotó, iví, ʻatamaí mo e mālohí. Hivaʻi ha hiva pe himi fekauʻaki mo e kau palōfitá. Fakamoʻoni ki he tāpuaki ʻo e ʻi ai ha kau palōfita, kau tangata kikite mo e kau tangata maʻu fakahaá, ʻoku nau akoʻi kitautolu ʻi heʻenau ngaahi leá mo ʻenau ngaahi faʻifaʻitakiʻanga ʻi he fetauhiʻakí.

2. Hikiʻi ʻa e tefitoʻi moʻoni fakauike ʻo e ongoongoleleí ki he palakipoé: “Koeʻuhí ʻoku tauhi au ʻe he niʻihi kehé, ʻoku ou fie ngāue pe foki mo au.” Fakaafeʻi e fānaú ke nau hivaʻi ha ngaahi hiva pe himi fekauʻaki mo e Fakamoʻuí, palōfitá, fāmilí, kaungāmeʻá mo e ngaahi tefito pehē. Hiki hifo ha lisi ʻo kinautolu naʻe fakalau atu he ngaahi hivá pe himí ʻi lalo he kupuʻi lea Koeʻuhí ʻoku tauhi au ʻe he niʻihi kehé.

   Fakatatau e Tokāteline mo e Ngaahi Fuakava 4:2 mo e 59:5. Tokoniʻi e fānaú ke nau kumi e ngaahi lea lotó, iví, ʻatamaí mo e mālohí ʻi he ongo potu folofolá. Fakatokangaʻi ange ʻoku fiemaʻu ke tau ʻofa mo tauhi ki he Tamai Hēvaní mo e niʻihi kehé ʻaki hotau lotó, iví, ʻatamaí mo e mālohí. Teuteuʻi ʻa e ngaahi nāunau ʻoku fie maʻu maʻá e fānaú ke nau fakakakato e fakatātā ʻi he peesi K4.

   ʻI he taimi ʻoku kakato ai e fakatātaá, fakaafeʻi e fānaú ke hivaʻi ha ngaahi hiva te ne tokoniʻi kinautolu ke nau ʻiloʻi e ngaahi founga te nau lava ʻo ngāue tokoni aí. Hivaʻi leva ha ngaahi hiva pe himi fekauʻaki mo e ngāue tokoní. Hiki e ngaahi tali ʻoku nau maʻu mei he ngaahi hivá mo e himí ʻi lalo ʻi he kupuʻi lea ʻOku ou fie ngāue pe foki mo au. Fakamoʻoni ki he ngaahi tāpuaki ʻoku maʻu mei he ngāue tokoni ki he niʻihi kehé mo hono tokoniʻi koe ʻe he niʻihi kehé.