Ko ʻEku Misi Fakaofó
Naʻá ku lavelavea lahi ʻi ha fakatuʻutāmaki he halá ʻi he ngaahi taʻu lahi kuo hilí, pea ko e kovi tahá ne u tokoto ai ʻi ha māhina ʻe tolu ʻo ʻikai te u toe ʻilo ha meʻa. Koeʻuhí ko ha ngaahi tāpuaki ʻo e lakanga fakataulaʻeikí, fakataha mo e poupou ʻa hoku fāmilí, naʻe lava ai ke hoko e meʻa ko ʻeni naʻe ui ʻe ha taha ʻo ʻeku kau toketaá “ko ha fakaakeake fakaofo.”
Koeʻuhí ko e ngaahi lavelavea ne hoko ki hoku ʻulú, naʻe ʻikai sai ʻa ʻeku manatú ʻo ʻikai ke u toe lava ʻo manatuʻi ʻeku ngaahi misí. ʻOku ou faʻa ʻā hake ʻo fakakaukau, “ʻIo, naʻá ku misi,” ka ʻi he momeniti pē ko iá kuo ngalo e misí ia pea ʻikai pē ke u toe manatuʻi ʻe au.
Hili ha taʻu ʻe hongofulu mā fitu mei he fakatuʻutāmaki ko iá, ne uiuiʻi au ko e pīsope ʻo hoku uōtí. Lolotonga ha fakataha alēlea fakuooti ʻe taha, naʻe fokotuʻu mai ai ʻe he palesiteni ʻo e Palaimelí ke uiuiʻi ha ongo mātuʻa ke na faiako ʻi he kalasi FKT. Ne u ʻohovale mo hoku ongo tokoní ʻi he fokotuʻu naʻe faí ʻo mau fesiosiofaki.
Naʻe maʻu lotu e fefiné he taimi pē ʻe niʻihi, ka kuo taʻu lahi mo e ʻikai ke toe maʻulotu hono husepānití. Neongo iá, ne mau ongoʻi kotoa pē ʻoku totonu ke ʻoange kiate kinaua ha faingamālie ke na fakakaukau ki he uiuiʻí.
Ne u misi he pō ki muʻa peá u talanoa mo e ongo mātuʻá, pea naʻe mahino ʻaupito e misí. Ne u ʻā hake he pongipongi hono hokó ʻoku ou kei manatuʻi kakato pē ia. Naʻe fekauʻaki ia mo e meʻa kotoa pē ke u leaʻaki ʻi he ʻinitaviú koeʻuhí ka na tali e uiuiʻí. Ne u ʻohovale ʻi heʻeku manatuʻi ʻeku misí, ko ʻene fuofua hoko ʻeni ʻi ha taʻu ʻe 17, kae mahulu haké he naʻe hanga ʻe he misi ko ʻení ʻo fakafiefiaʻi mo fakaivia au.
ʻI he efiafi ko iá, ne ʻalu ange ha taha ʻo hoku ongo tokoní ke ma ō. ʻI heʻema fakaʻuli atú, naʻá ne pehē mai, ʻʻE Pīsope, te u tuku atu ke ke fai kotoa ʻe koe ʻa e talanoa mo kinauá.” ʻOku ou manatuʻi pē ʻeku malimali mo e loto falalá he ne u ongoʻi kuo ʻosi fokotuʻutuʻu mai ʻe he ʻEikí ʻa e meʻa ke u leaʻakí.
Ne u leaʻaki e meʻa kotoa pē ʻi heʻeku misí lolotonga e ʻinitaviú, pea naʻe tali ʻe he ongo mātuʻá ʻa e uiuiʻí. ʻI heʻema foki ki ʻapi he pō ko iá, naʻe pehē mai hoku tokoní, “ʻOku ou ongoʻi hangē ne toki akoʻí ni au ʻe he faiako tuʻukimuʻá.” Ne u toe malimali pē he naʻá ku ʻiloʻi naʻe moʻoni—ne akoʻi fakatouʻosi kimaua ʻe he ʻEikí.
Ne fua faivelenga ʻe he husepāniti mo e uaifi ko ʻení ʻa hona ngaahi fatongia ʻi he Palaimelí, pea naʻá na fakatou mālohi ʻi he uōtí. Hili pē ha ngaahi taʻu mei ai, naʻe silaʻi kinaua ʻi he temipalé.
ʻI heʻene aʻu mai ki he ʻaho ní, ko e misi pē ia ʻe taha kuó u manatuʻi ʻi he taʻu ko ʻeni ʻe 28 kuo hilí. ʻOku ou ongoʻi naʻe ʻafioʻi pē ʻe he Tamai Hēvaní ko e taimi totonu ʻeni ki he ongo mātuʻá ni. Ko e meʻa naʻe hokó, ko ʻEne ueʻi e palesiteni ʻo e Palaimelí, pea ʻi he pō pē ko ʻení ʻe taha, naʻá Ne tāpuakiʻi ai hoku ʻatamai ngalongaló ke ngāue lelei. Ne u toe ʻiloʻi ai foki ko e ʻulu ki he Siasí ni ko e ʻEikí pea “ʻe teka atu maʻu ai pē ʻa e ngaahi taumuʻa taʻengata ʻo e ʻEikí, kae ʻoua ke fakahoko ʻa ʻene ngaahi talaʻofa kotoa pē” (Molomona 8:22).