NGAAHI KAUNGĀMEʻÁ
Naʻe Mei Lava Pē Ke Hoko Mai Ia Kiate Au
Fili hao ngaahi kaungāmeʻa ʻoku mou feʻinasiʻaki ʻi ho ngaahi tuʻunga ʻulungāanga māʻolungá. Anga lelei mo anga fakaʻapaʻapa ki he tokotaha kotoa pē. Fakaafeʻi ho ngaahi kaungāmeʻa [mei he] ngaahi tui fakalotu kehé ki he ngaahi ʻekitivitī ʻa e Siasí. Ala atu ʻo tokoniʻi e kau papi ului foʻoú pea mo kinautolu ʻoku māmālohí.
ʻI hoku taʻu fitú naʻe hiki mai ai ha kiʻi taʻahine ki homau feituʻú pea naʻá ma kaungāmeʻa. Naʻá ma saiʻia ʻi he ngaahi meʻa tatau pē, pea naʻá ma fetokoniʻaki lelei. Naʻá ma fai ʻa e ngaahi fili naʻe leleí he naʻe ʻosi akoʻi kimaua ʻe heʻema mātuʻá ke ma fili fakapotopoto.
Ka ʻi heʻema aʻu hake ki he kalasi onó, naʻá ma fai ha ngaahi fili hala koeʻuhí pē ke tali kimaua ʻe homa ngaahi kaumeʻa naʻe māʻulalo ange ʻenau ngaahi tuʻunga moʻuí. ʻI he taʻu hokó pē, ne u fakakaukau ai ke kumi haku ngaahi kaungāmeʻa kehe koeʻuhí kae lava ke u toe kamata fai e ngaahi fili ʻoku totonú ʻaki ʻeku moʻuiʻaki e ngaahi tuʻunga moʻui ʻoku māʻolunga angé. Ko e meʻá pē he ne ma kei kaungāmeʻa pē ko hoku kaumeʻá, pea naʻá ku fie maʻu ke ma kei ō holo pē.
Ko e fili faingataʻa ne fie maʻu ke u faí. Naʻe akoʻi maʻu pē kiate au ke u fili haku ngaahi kaumeʻa ʻoku leleí peá u tauhi ki he ngaahi tuʻunga moʻui māʻolunga ne u maʻú. Ka naʻe ʻikai te u maʻu ha fakamoʻoni ki hono ʻuhinga naʻe mahuʻinga ai ʻení, ko ia, naʻe pau ke u falala ko e meʻa totonú ia. Lolotonga e faʻahitaʻu māfaná pea lolotonga ʻeku ʻi he kalasi valú, naʻe ʻikai ke ma kei ō holo pea ma fili ke ma takitaha maʻana.
ʻI he konga ki mui ʻo e taʻu pē ko iá, ne u sio ai ki he ngaahi tāpuaki ʻo e fili ko ʻení. Naʻe fakakaukau hoku ngaahi kaumeʻa ki muʻá ke ʻomi e kava mālohí ki ʻapiako. Naʻa nau fakalotoʻi ha fānau fefine kehe ke nau inu, pea naʻe hoko ai ha palopalema kiate kinautolu kātoa. Ne u fakatokangaʻi hake ne u mei hoko ko e taha ʻo e tamaiki fefine ko iá. Kapau naʻá ku kei ʻalu holo mo kinautolu, ʻoku ʻikai te u ʻiloʻi pe ne u mei mālohi feʻunga ke kei taukaveʻi e meʻa ne u tui ki aí.
ʻI heʻeku fakakaukau atu ki he ngaahi nunuʻa ne u mei fehangahangai mo iá, ne u ongoʻi lōmekina. Mahalo pē ne u mei fāinga mo hano maʻunimā au ʻe he kava mālohí, maumau lao, ʻikai toe falala mai ʻeku mātuʻá, kae mahulu haké, ne mei toʻo e falala ʻa e Tamai Hēvaní kiate aú.
ʻOku ou ʻiloʻi ʻoku ʻuhinga ʻa e lea ʻa e palōfitá kau ki he moʻuiʻaki e ngaahi tuʻunga moʻui māʻolungá ke maluʻi kitautolu. Neongo te tau pehē ʻoku fakapiko ke fai ʻeni, ka ʻokú ne tokoniʻi fakalaumālie, fakatuʻasino, mo fakaʻatamai ai kitautolu, pea mo ha ngaahi founga kehe ʻoku ʻikai ke tau ʻiloʻi.