FĀMILÍ
Fai ho fatongia ʻoʻoú ke fokotuʻu ha ʻapi fiefia. Fakaʻapaʻapa ki hoʻo mātuʻá, pea fakamālohia ho ngaahi vā fetuʻutaki mo ho ngaahi tokoua mo e tuofāfiné.
Kuo fakahā ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá: “Ko e fiefia ko ia ʻi he moʻui fakafāmilí ʻoku meimei ke toki aʻusia pē ia ʻi he taimi kuo langa ai ʻa e fāmilí ʻi he ngaahi akonaki ʻa e ʻEiki ko Sīsū Kalaisí. ʻOku faʻu mo pukepuke ʻa e nofo-malí mo e ngaahi fāmili ʻoku fiefiá ʻi he ngaahi tefitoʻi moʻoni ʻo e tuí, lotú, fakatomalá, faʻa fakamolemolé, fakaʻapaʻapá, ʻofá, manavaʻofá, pea mo e ngaahi ʻekitivitī ʻoku fakatupulakí.”1
Ko e meʻa ʻoku mālié ko e ofo ʻa e māmaní he taimi ʻe niʻihi ʻi he ngaahi moʻoni mahinongofua ko ʻení ʻa ia ʻoku makatuʻunga ʻi he palani ʻo e fiefia ʻa ʻetau Tamai Hēvaní. Ka ʻoku hā mei ha fakatotolo kimuí ni mai ʻoku fiefia foki mo e toʻu tupu ʻoku ʻikai ke nau kau ki he Siasí ʻi he tuʻunga fakalaumālié pea mo ʻenau ngaahi fetuʻutaki fakafāmilí. ʻI he 2007, ne fai hano saveaʻi ʻo ha kau talavou ʻi he vahaʻa ʻo e taʻu 12 ki he 24 ʻe ha ongo kautaha ongoongo lalahi ʻi ʻAmelika ke ʻiloʻi pe ko e hā e meʻa ʻokú ne ʻai kinautolu ke nau fiefiá.
Ko ha ngaahi meʻa ʻeni ʻe niʻihi mei he ngaahi meʻa naʻe maʻu mei he saveá:
-
ʻOku “fakafalala [ʻa e toʻu tupú] ki he mātuʻá ko ha maʻuʻanga tokoni mahuʻinga ke maʻu ai ʻa e malú mo e fiefiá.”
-
“ʻE fakautuutu e fekumi ʻa e toʻu tupú ki he fiefiá ʻo fakafou ʻi he anga-fakalaumālié mo e tuí.”
-
“ʻE toe mālohi ange hono manakoa ʻe he toʻu tupú ʻa e ngaahi faʻunga tukufakaholo fakafāmilí.”
-
ʻI ha taha ʻo e ngaahi fakamatala fakanounou ʻo e saveá ʻoku pehē ai, “Neongo naʻe ʻilo ʻi heʻemau ʻuluaki fakatotoló ʻoku lahi ange ʻa e muimui ʻa e toʻu tupu ʻo e ʻaho ní ki he ngaahi tukufakaholo fakafonuá ʻi he ngaahi toʻu tangata ki muʻa atú, ka naʻa mau ʻohovale ʻi heʻemau ʻilo ʻa e lahi e nofo ʻa e toʻu tupú ʻo hanganaki fiefia atu ki haʻanau mali pea mo haʻanau fāmili.”2