Kofunima Fakamoʻoní
Kuó ke ʻosi tui ha kofunima? ʻOku maluʻi ʻe he kofunima ʻe niʻihi ho nimá ʻi he taimi ʻokú ke ngāue aí. ʻOku fakamāfanaʻi ʻe he kofunima ʻe niʻihi ho nimá. ʻOku tui e faʻahinga kofunima ʻe niʻihi ʻi he taimi ʻokú ke kau ai ha sipotí. ʻI he ʻekitivitī ko ʻení te ke lava ʻo ngaohi ai ha “kofunima fakamoʻoni” ke tokoni atu ke ke manatuʻi e konga ʻe nima ʻo hoʻo fakamoʻoní.
Ko e fakamoʻoní ko ha fakamoʻoni fakalaumālie ia ki hono moʻoni ʻo e ongoongoleleí ʻa ia ʻoku fakahā kiate kitautolu ʻe he Laumālie Māʻoniʻoní. ʻOku ʻi ai ha ngaahi konga mahuʻinga ʻo ha fakamoʻoni. Kapau ʻokú ke fie maʻu ke ke tui ki he ngaahi meʻa ko iá, ʻe lava ke tupulaki hoʻo tuí ʻo hoko ko hano ʻiloʻi ʻoku nau moʻoni.
KO ʻEKU FAKAMOʻONÍ
-
ʻOku ou ʻiloʻi ko e ʻOtuá ʻa ʻetau Tamai Hēvaní pea ʻokú Ne ʻofa ʻiate kitautolu.
-
ʻOku ou ʻiloʻi ko Hono ʻAlo ko Sīsū Kalaisí ʻa hotau Fakamoʻuí mo e Huhuʻí.
-
ʻOku ou ʻiloʻi ko Siosefa Sāmitá ko ha palōfita ia ʻa e ʻOtuá. Naʻá ne toe fakafoki mai ki he māmaní ʻa e ongoongolelei ʻo Sīsū Kalaisí pea liliu e Tohi ʻa Molomoná ʻi he mālohi ʻo e ʻOtuá.
-
ʻOku ou ʻiloʻi ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ni ko e Siasi ia ʻo e ʻEikí ʻi māmani he ʻaho ní.
-
ʻOku ou ʻiloʻi ʻoku taki e Siasí ni ʻe ha palōfita moʻui ʻa ia ʻokú ne maʻu fakahā.
Ngaahi Fakahinohinó: Kumi mai ha kofunima lanu hinehina.* Kosi ʻo toʻo e ngaahi fakatātā ʻi he peesi ko ʻení pea fakapipiki kinautolu ʻi ha pepa fefeka. Tui e kofunimá. ʻI hoʻo leaʻaki e konga ʻe nima ʻo ha fakamoʻoní, fakapipiki tahataha ha fakatātā ki he ʻuluʻulutuhu ʻo e kofunimá ʻo kamata pē mei he motuʻatuhú. Te ke lava ʻo fakapipiki e ʻū fakatātaá ki he kofunimá ʻaki haʻo fakaʻaongaʻi ha meʻa fakapipiki tupenu (velcro), tepi fakapipiki, kulū, pine hui, meʻa fakamaʻu, pe afo.
ʻI hoʻo fakatupulaki hoʻo fakamoʻoní, ʻoua te ke manavasiʻi ke vahevahe ia mo e niʻihi kehé! ʻI hoʻo fai hoʻo fakamoʻoní, ʻe lava ke ke fakaʻaongaʻi ha ngaahi kupuʻi lea hangē ko e “ʻOku ou fakamoʻoni ʻoku … ” pe “ʻOku ou ʻiloʻi ʻoku … ” ʻE toe mālohi ange hoʻo fakamoʻoní ʻi he taimi te ke vahevahe ai ia mo e niʻihi kehé.