Tohi ki he ʻĒtitá
Kuo Fai Tāpuekina ʻe he Liahoná ʻEmau Moʻuí
ʻOku mau fakamālō ʻi he lava ke mau maʻu ʻa e Liahoná ʻi Vanuatu ní. Meʻa fakaʻofoʻofa ʻemau lau ai kau ki he kakai ʻi he ngaahi feituʻu kehekehe mo e tupulaki ʻa e Siasí ʻi he māmaní. Kuo mau ako e meʻa lahi mei he makasiní. Kuó ne fai tāpuekina ʻemau moʻuí pea he ʻikai pē kei tatau ʻemau moʻuí koeʻuhí ko ia.
ʻĀmosi Talohati Solo, Vanuatu
Ko ha Fakatafenga Vai ʻi ha Vaitupu ʻOku Maʻa
Ko au ʻoku faiako ʻi he Tokāteline ʻo e Ongoongoleleí ʻi homau uōtí, pea ʻoku ou houngaʻia lahi ʻi he ngāue maʻongoʻonga kuo mou fai ʻi he LDS.org. ʻOku mātuʻaki fakangatangata ʻaupito ʻi homau feituʻú ʻa hono maʻu e ngofua ke mau lava ke fakaʻaongaʻi e ngaahi nāunaú ʻa e Siasí. ʻOku hangē ʻete lava ko ia ke fakaʻaongaʻi e ngaahi folofola mo e nāunau ʻa e Siasí ko ha ʻi ai haʻate fakatafenga vai ʻoku taki mei ha vaitupu ʻoku melié. Mou fakamolemole pē ʻo ʻiloʻi ko e fuʻu lelei lahi kuo ʻomi ʻe hoʻomou ngaahi ngāué ki he moʻui fakaʻaho ʻa homau kāingalotú. Ko ha mana ia kiate kinautolu ke maʻu e pōpoaki ʻa ʻetau Tamai Hēvaní ʻi heʻenau lea pē ʻanautolú.
ʻOku ʻikai fakahā e hingoá
Ngaahi Lea ʻe Lava ʻo Tokoni ki he Kakai Kotoa Pē
ʻOku ou houngaʻia lahi ʻi heʻeku maʻu e Liahoná ʻi heʻeku moʻuí! ʻOku ou ʻilo ai ha ngaahi lea fakalaumālie ʻe lava ʻo tokoni ki he kakai kotoa pē, pe ʻoku nau kau ki he Siasí pe ʻikai. ʻOku fakahā mai ʻe he ngaahi pōpoaki mei he Kau Palesitenisī ʻUluakí ʻa honau ʻofa kiate kitautolú, pea fonu mo e konga ki he Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní ʻi he ngaahi faʻifaʻitakiʻanga lelei ke tau muimui aí. ʻOku ou lau e makasiní mei he peesi ʻuluakí pē ki heʻene ʻosi he ʻoku ou ʻilo ʻe ueʻi pea fakamālohia au ʻe he Laumālié ʻi heʻeku lau iá. ʻOku ou ʻilo ʻoku aʻu atu e Maama ʻo Kalaisí ki he kakaí ʻo fakafou ʻi he makasini ko ʻení, pea ʻoku ou fakamālō atu kiate kimoutolu hono kotoa ʻoku tupu ai hono lava ke fakahoko ʻení.
Kulisitofei Seimi, Potukali
Ko e Liahoná ko ha Kaumeʻa
ʻI heʻeku lau e Liahoná, ʻoku ou ʻiloʻi ai ʻeku monūʻia ke hoko ko ha konga ʻo e ngāue maʻongoʻonga ko ʻeni ʻa e ʻEikí. ʻOku tokoniʻi au ʻe he Liahoná ke u hoko ko ha mēmipa lelei ʻo e Siasí. ʻOku ou ʻilo ʻe lava foki ke hoko e Liahoná ko ha meʻangāue maʻongoʻonga ki he ngāue fakafaifekaú. ʻE lava ke tau fakaʻaongaʻi ia ʻe kitautolu kāingalotú ke tokoni ki hono ʻomi ʻo e niʻihi kehé kia Kalaisí. Ko e Liahoná ko e taha hoku kaungāmeʻa mamae tahá.
Kalasanisemi Tasitava, Mongokōlia
ʻOku ʻI ai Hotau Ngaahi Tuongaʻane mo e Tokoua
ʻOku ou fakamālō ʻi hono tokoniʻi au ʻe he Tamai Hēvaní ke u ʻiloʻi ʻa Hono Siasí peá u kau ki ai. Kuó u ako ha ngaahi moʻoni maʻongoʻonga, hoko ko ha tokotaha lelei ange, pea ʻoku ou teuteu atu ki he moʻui taʻengatá. ʻOku ou fiefia ʻaupito ʻi he hoko ʻa hoku fāmilí ko ha konga ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní pea ʻoku ʻikai ko kimautolu pē—ka ʻoku ʻi ai homau ngaahi tuongaʻane mo e tokoua. Kuo hoko e Siasí ko homau mālohinga ʻi ha ngaahi taʻu faingataʻa. ʻOku mau fakamālō ki he Tamai Hēvaní mo Sīsū Kalaisi, pea ki he palōfitá mo e kau ʻaposetolo ʻoku nau tokoniʻi kimautolú.
Sūsana Matilosova, ʻAmīniá