Haʻu ʻo Fanongo ki he Leʻo ʻo e Palōfitá
Ko e Founga ʻo e Foakí
Mei he “Foaki Fiefia,” Liahona, Tīsema 1996, 11–14.
Ko ha ʻaho māfana ʻeni. Naʻe siʻi mālōlō ʻeku fineʻeikí ʻi he taimi hoʻataá. Ne u fononga mo ʻeku tamaí mo hoku tokouá mei he falemahakí ki homau ʻapi fakafāmilí, ko kimautolu toko tolu pē. Naʻa mau ngaohi ʻemau kiʻi kai maʻamaʻa pē; hili iá naʻa mau talanoa mo kinautolu naʻe ʻaʻahi angé. Naʻe fakaʻau ke fakapoʻuli, peá u manatuʻi hake kuo teʻeki ai ke mau fakaulo e māmá.
Naʻe tatangi e fafangu e matapaá pea ʻalu e tangataʻeikí ʻo fakaava. Ko hoku mehikitanga ko Kataliná mo hono husepāniti ko Pilá. Ne u sio atu ʻoku toʻotoʻo ʻe Pila ha hina fuamelie. ʻOku lava pē ke u kei sio loto atu ki he ngaahi foʻi fuamelie kulokula mo meimei lanu vāletí mo e tāpuni lanu koula ngingila ʻo e foʻi hiná. Naʻá ne pehē mai, “Mahalo pē te mou saiʻia heni. Pau pē kuo teʻeki ai haʻamou hikingaua.”
Ne teʻeki ai ke kai haʻamau hikingaua. Ne mau ʻai ha ngaahi foʻi fuamelie ʻi ha ʻū poulu pea mau nofo takatakai he tēpile ʻi peitó ʻo kai lolotonga ko iá ʻoku fakamāʻopoʻopo atu ʻe Katalina mo Pila e ʻū peleti ʻe niʻihi.
Ko e ofi taha ʻeni ʻi heʻeku ʻiló, ʻoku konga tolu maʻu pē ʻa e foaki atú mo e maʻu maí. Pea ʻoku fakatātāaʻi atu heni ʻi he fuamelie naʻe foakí.
ʻUluakí, ne u ʻiloʻi naʻe ongoʻi ʻe Pila mo Katalina e ongo naʻá ku maʻú. Kuo pau pē naʻá na ongoʻi te mau fuʻu helaʻia ke ngaahi ha meʻakai lahi. Kuo pau pē naʻá na ongoʻi ʻe hanga ʻe he poulu kuo fakafonuʻaki e fuamelie ne fakatolongá ʻo ngaohi kimautolu ke mau toe ongoʻi ʻi ha kiʻi momeniti ko e fāmili kimautolu. ʻOku ʻikai te u manatuʻi pe naʻe ifo fēfē ʻa e fuamelié, ka ʻoku ou manatuʻi naʻe ʻiloʻi ʻe he tokotaha e meʻa naʻá ku ongoʻí pea naʻá ne tokanga mai kiate au.
Uá, naʻá ku ongoʻi ko e meʻaʻofa ko iá naʻe taʻetotongi. Naʻá ku ʻiloʻi naʻe fili tauʻatāina pē ʻa Pila mo Katalina ke na ʻomi e meʻaʻofá. Hangē naʻá na maʻu mei he meʻaʻofá ʻa e fiefia ʻo e foakí.
Pea tolú, naʻe ʻi ai mo e feilaulau. Naʻá ku ʻiloʻi naʻe fakatolonga ʻe hoku mehikitanga ko Kataliná e fuamelié maʻa hono fāmilí. Kuo pau pē naʻa nau manako he fuamelié. Ka naʻá ne toʻo e fiefia ko iá meiate kinautolu ʻo foaki mai ia kiate au. Ko ha feilaulau ia. Kae talu mei ai mo ʻeku ʻiloʻi ʻa e foʻi moʻoni fakaʻofoʻofa ko ʻení: kuo pau pē naʻe pehē ʻe Pila mo Katalina ʻe lahi ange ʻa e fiefia te na maʻú ʻo kapau ʻe ʻomai maʻaku e fuamelié ʻi haʻana kai pē ʻe kinaua.
ʻOku ʻi ai e meʻa ʻe tolu ʻoku kaunga ki hono foaki atu ʻo ha meʻaʻofa: ʻokú ke ongoʻi e meʻa ʻoku ongoʻi ʻe he tokotaha kehé, ʻokú ke foaki tauʻatāina, pea ʻokú ke lau pē ʻa e feilaulaú ko ha tokoni.
Naʻe foaki mai ʻe he ʻOtua ko e Tamaí ʻa Hono ʻAló, pea foaki mai ʻe Sīsū Kalaisi kiate kitautolu ʻa e Fakaleleí—ko ha ongo meʻaʻofa ʻoku taʻe malava ke fakafuofuaʻi hono lahí mo hono mahuʻinga kiate kitautolú. Naʻe foaki tauʻatāina mo loto fiemālie ʻe Sīsū ʻEne meʻaʻofá kiate kitautolu kātoa. Ko e taha ʻo e ngaahi fakaʻilonga pau ʻo ha taha kuó ne tali e meʻaʻofa ʻo e Fakalelei ʻa e Fakamoʻuí ko ʻene loto fiemālie ke foakí.