Pōpoaki ʻa e Faiako ʻAʻahí

Ko e Tuʻunga Tangata pe Fefiné Ko ha ʻUlungāanga Mahuʻinga ia ʻo e Taumuʻa mo e ʻUlungāanga Taʻengatá.

Akoʻi ʻa e ngaahi potufolofola mo e ngaahi fakamatala te ne feau e ngaahi fie maʻu ʻa e kau fefine ʻokú ke ʻaʻahi ki aí. Fakamoʻoni ʻo kau ki he tokāteliné. Fakaafeʻi ʻa kinautolu ʻokú ke akoʻí ke nau vahevahe atu ʻa e meʻa naʻa nau ongoʻi mo akó.

Ko e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá: “Ko e kakai kotoa pē—ʻa e tangata mo e fefine—naʻe fakatupu ia ʻi he tatau ʻo e ʻOtuá. Ko e tokotaha fakafoʻituitui kotoa pē ko e foha mo e ʻofefine ia ʻo ha mātuʻa fakalangi, pea ʻi heʻene peheé, ʻoku maʻu ai ʻe he tokotaha kotoa pē ha natula fakalangi pea mo ha ikuʻanga pau. Ko e tuʻunga tangata pe fefiné ko ha ʻulungāanga mahuʻinga ia ʻoku ʻiloʻi ai ʻa e tuʻunga mo e taumuʻa ʻo e tokotaha fakafoʻituituí, ʻi he maama fakalaumālié, mo e moʻui fakamatelié, pea mo e taʻengatá” (“Ko e Fāmilí: Ko ha Fanongonongo ki Māmani” Liahona, ʻOkatopa 2004, 49).

Ko e Hā ʻOku Mahuʻinga ai e Tuʻunga Tangata pe Fefiné?

ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻOkú ne [tuʻunga tangata pē fefiné] fakamahinoʻi ko hai kitautolu, ʻuhinga ʻoku tau ʻi he māmaní aí, pea mo e meʻa ʻoku fie maʻu ke tau fakahoko mo hoko atu ki aí. Koeʻuhí ko ha ngaahi taumuʻa faka-ʻOtua, ʻoku kehekehe, mahino, mo kakato ai ʻa e laumālie ʻo e tangatá mo e fefiné… . Naʻe fie maʻu ʻa hono fakatahaʻi makehe ko ia ʻo e ngaahi tuʻunga fakalaumālie, fakatuʻasino, fakaʻatamai, mo fakaeloto ʻo e tangatá mo e fefiné kae lava ke fakahoko ʻa e palani ʻo e fiefiá”(“ʻOku Mahuʻinga ʻa e Malí ki Heʻene Palani Taʻengatá,” Liahona, Sune 2006, 50).

Suli B. Peki, palesiteni lahi ʻo e Fineʻofá: “ʻI he hoko ko ia ʻa e kakai fefiné ko ha ngaahi ʻofefine fakalaumālie ʻo e ʻOtuá, naʻa nau ‘maʻu ai ‘i he maama ʻo e ngaahi laumālié, ʻa ʻenau ngaahi ʻuluaki lēsoní pea teuteuʻi ai ʻa kinautolu ke nau haʻu’ (T&F 138:56) ki he māmaní. Naʻa nau kau he ʻkakai ʻeiki mo tuʻukimuʻa’ (T&F 138:55) naʻe ʻkalanga fakafiefia’ (Siope 38:7) ʻi hono fakatupu ʻo e māmaní koeʻuhí ʻe foaki ange ai kiate kinautolu ha sino fakaemāmani pea mo ha faingamālie ke ʻahiʻahiʻi ai ʻa kinautolu ʻi he māmaní (vakai, ʻĒpalahame 3:25). Naʻa nau loto ke ngāue fakataha mo ha kau tangata angatonu ke fokotuʻu ha ngaahi taumuʻa taʻengata he ʻikai ke nau lava ʻo takitaha fai ʻiate kinautolu pē. Naʻe ʻikai kamata e ngaahi fatongia fakaefefiné ʻi he māmaní pea ʻoku ʻikai ngata ia heni. Ko e fefine ko ia ʻokú ne makakoloaʻaki ʻa e tuʻunga fakafaʻeé ʻi he māmaní, te ne makakoloaʻaki ia ʻi he maama ka hoko maí” (“Ko e ʻManavaʻi Faʻeé,’” Liahona, Mē 2004, 75).

Ko e Hā ʻe Lava Ke u Fai Ke Fakakakato Ai ʻa Hoku Fatongia ʻi he Palani ʻa e Tamai Hēvaní?

Makeleta D. Natolo, palesiteni lahi ki muʻa ʻo e Kau Finemuí: “He ʻikai teitei lava ke tatau ʻa e kakai fefine ʻo e ʻOtuá mo e kakai fefine ʻo māmaní. ʻOku maʻu ʻe he māmaní ha kakai fefine feʻunga ʻoku mālohi; ka ʻoku tau fie maʻu ha kakai fefine ʻoku ongongofuá. ʻOku tokolahi feʻunga ha kakai fefine ʻoku makaka; ka ʻoku tau fie maʻu ha kakai fefine ʻoku anga-ʻofá… . Kuo tokolahi feʻunga hotau kakai fefine ʻoku ʻiloa mo maʻu meʻá; ka ʻoku tau fie maʻu ha kakai fefine tokolahi ange ʻoku tuí” (“Ko e Fiefia ʻo e Tuʻunga Fakaefefiné,” Liahona, Sānuali 2001, 17).

ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá: “Ko e natula fakalaumālie mo fakamatelie ʻo e tangatá mo e fefiné naʻe tuʻutuʻuni ia ʻe he ʻOtua pē taha… .[“ʻOku faʻa fehuʻi e kakai fefiné ʻo pehē]: ‘ʻOku makatuʻunga ʻataʻatā pē nai ʻa e mahuʻinga ʻo ha fefine ʻi hono fatongia ko e uaifi mo e faʻeé?’ Ko e talí ʻoku faingofua mo mahino: ʻIkai… . ʻOku ʻi ai ha fatongia mahuʻinga ʻo e tangata mo e fefine angatonu kotoa pē ke ne fakahoko ʻi he laka atu ko ʻeni ʻa e puleʻanga ʻo e ʻOtuá… .

“… ʻE hoku ngaahi tuofāfine ʻofeina, ʻoku mau falala atu kiate kimoutolu. ʻOku mau tui mo falala atu ki hoʻomou ngaahi leleí pea mo homou iví, … Pea ʻoku mau tui ko e palani ʻa e ʻOtuá maʻamoutolú ke mou hoko ko e ngaahi kuini mo maʻu ʻa e ngaahi tāpuaki māʻolunga taha ʻe lava ke maʻu ʻe ha fefine ʻi he moʻuí ni pea mo e taʻengatá” (“Kau Fefine ʻo e Angatonú,” Liahona, Tīsema 2002, 34–37).