LEÁ

Fakaʻaongaʻi ʻa e ngaahi lea ʻokú ne langaki hake, poupouʻi mo fakahīkihikiʻi ʻa e niʻihi kehé. Fakaʻaongaʻi maʻu pē ʻa e huafa ʻo e ʻOtuá mo Sīsū Kalaisí ʻi he loto ʻapasia mo e fakaʻapaʻapa. ʻOua naʻá ke fakaʻaongaʻi ha ngaahi lea pe tūkuhua kapekape, fakalielia pe taʻefeʻunga.

“Ko e fetalanoaʻakí ko e tefito ia ʻo ha feohi fakasōsiale ʻi he anga fakakaumeʻa. ʻOku lava pē ke fakafiefia. ʻE lava pē ko ha talanoa hua. ʻE lava ke fakamātoato. ʻE lava ke fakaoli. Ka kuo pau ke ʻoua naʻa taʻefeʻunga, pe fakalaveaʻi ai ha taha, pe fakalielia kapau ko ha tokotaha kita ʻoku tui moʻoni kia Kalaisi… .

“Ko e [tokotaha ko ia] ʻokú ne fakaʻaongaʻi e faʻahinga lea pehení ʻokú ne talamai pē ʻe ia ʻoku siʻi e ngaahi lea ʻokú ne ʻiloʻí. ʻOku ʻikai ke ne maʻu ʻe ia ha ngaahi lea lelei feʻunga ke ne lava ai ʻo lea lelei taʻe te ne kapekape pe fakaʻaongaʻi ha ngaahi lea kovi… .

“ ʻOua naʻá ke kapekape. ʻOua ʻe fakaʻaongaʻi e ngaahi lea fakalieliá. Fakaʻehiʻehi mei he ngaahi tūkuhua ʻoku koví. Fakamamaʻo mei he fetalanoaʻaki ʻoku fonu he ngaahi lea kovi mo fulikivanú. Te ke fiefia ange ʻo ka ke ka fai ia, pea ʻe hanga ʻe hoʻo sīpingá ʻo fakamālohia e niʻihi kehé.”

Palesiteni Gordon B. Hinckley (1910–2008), “Take Not the Name of God in Vain,” Ensign, Nov. 1987, 48.