Ko e Pulusinga ‘o Mā‘asi 2008: Ko ha Līpooti

Taʻu ʻe ua hono palaní mo fokotuʻutuʻú.

Lahi hake ʻi he tatau ʻe 2.3 miliona kuo tufaki ʻi ha ngaahi lea fakafonua ʻe 51.

Ne Fie maʻu ke toe paaki tuʻo ua ke feau e fiemaʻú.

Lahi hake he toko 340,000 ne ʻaʻahi ki he tuʻasila Uepi saiti makehé.

Neongo e fakaofi e ngaahi fiká ni, ka ʻoku ʻikai ke ne fakamatalaʻi ʻa e meʻa kotoa ne hokó. Ne toki hā e mahuʻinga ʻo e pulusinga ʻo Māʻasi 2008 ʻo e ongo makasini Ensign mo e Liahona, “Ko e ʻEiki ko Sīsū Kalaisí,” ʻi he taimi ʻokú te vakai ai ki he founga naʻá ne liliu ai ha ngaahi moʻuí.

ʻI ha Tuʻunga Fakafoʻituitui

ʻI hono fakaafeʻi kinautolu ke nau vahevahe ʻa e ngaahi ongo mo e ngaahi meʻa naʻa nau aʻusia ʻi he pulusinga ʻo Māʻasi 2008, naʻe tokolahi e kāingalotu naʻa nau tohi ʻo fakamatala ki he anga ʻo ʻene liliu ʻenau moʻuí. Naʻe tohi mai ʻa Malia Felina mei he ʻOtu Filipainí ʻo pehē: “Ko e fuofua taimi ʻeni ʻi he taʻu ʻe 29 kuó u moʻui ai, kuó u lea mo tohi ʻo kau kiate Iá, naʻá ku ongoʻi ʻa e moʻoni ʻa e Fakamoʻuí ʻi heʻeku moʻuí. ʻOku ʻikai ko ha tefito pe ha talanoa pē. ʻOkú Ne moʻoni… . Naʻá ne fakatupu ha liliu lahi ʻiate au. Ko e feituʻu kotoa pē ʻoku ou ʻalu ki ai mo e meʻa kotoa pē ʻoku ou fai he taimí ni, ʻoku ou ʻiloʻi ʻokú ʻafioʻi au ʻe he ʻEiki ko Sīsū Kalaisí, ʻi Hono mafimafí, pea ʻokú Ne ʻi hoku tafaʻaki. ʻOku hanga ʻe he moʻoniʻi meʻa ko iá ʻo ʻai au ke u fie hoko ko ha tokotaha lelei ange.”

Naʻe pehē ʻe Tomu Kanisi ʻo Makinōlia, Tekisisi, ʻAmelika: “Naʻá ku ongoʻi lelei ʻaupito hili ʻeku lau ʻa e makasiní pea naʻá ku fie hoko ʻo lelei ange ʻi he tapa kotoa pē ʻo ʻeku moʻuí… . Naʻá ku ongoʻi ʻa e ʻofa ʻa e Fakamoʻuí kiate aú pea mo e fakaofo ʻo e Fakaleleí ʻi ha tuʻunga ʻoku toe fakafoʻituitui ange.”

Vahevahe mo e Niʻihi Kehé

Naʻe lolotonga folau ʻa Linitā Paisi-Veakaueni, ʻa ia ʻoku faiako ʻi ha tautohi ʻi Pelisiume ʻi ha polokalama ako mo hano kaungāngāue peá ne ʻoange ki ai ha tatau ʻo e pulusinga ʻo Māʻasí fakataha mo ha kiʻi tohi mo ha fakaafe ke ne ʻalu ange ʻo fanongo ki heʻene malanga ʻi he Sāpate Pekiá. Naʻe ʻalu hono kaungāmeʻá pea naʻá ne aʻusia ha meʻa lelei. Naʻe pehē ʻe Sisitā Paisi-Veakaueni, “Naʻe hanga ʻe he pulusinga makehe ʻo e Liahona ʻo ʻomai ha faingamālie ke u tō ha kiʻi tenga ʻi he loto ʻo ha kaungāmeʻa.”

ʻI Kalefōnia, ʻAmelika, naʻe ʻalu ʻa Lōlie Lāseni mo ʻene Ensign ʻo Māʻasí ki he fale ngaohi ʻulú peá ne fuʻu tokanga ki hono laú. Naʻá ne toutou fakakaukau ki he founga ʻe lava ke hoko ai e ngaahi talanoá ko ha meʻa lelei ke vahevahe mo ha taha mei ha tui fakalotu kehe pea mo e founga te ne lava ʻo fakatonutonu e ngaahi maʻu hala fekauʻaki mo e Siasí. Naʻe toki ʻeke ange ʻe heʻene fefine ngaohi ʻulú fekauʻaki mo e makasini naʻá ne laú. ʻI he taimi naʻe ʻosi ai e ngaohi ʻulú pea mo ʻena fepōtalanoaʻakí, naʻe kole ange he fefine ngaohi ʻulu ke ʻaʻahi ange ʻa e kau faifekaú kiate ia.

Naʻe fakatau ʻe Telemā Kāsione ʻo Kuatemala Siti, Kuatemalá, ha tatau ʻe 12 ʻo e Liahoná peá ne ngāueʻaki e faʻahitaʻu Pekiá ke ne vahevahe ʻa e ngaahi makasiní mo ʻene fakamoʻoní mo hono ngaahi tuongaʻane mo e tokoua. Naʻe meili ʻe Petulisa Hesetasi ʻo Katisoni, ʻAlapeta, Kānatá, ha tatau ʻo e makasiní ki ha ongomātuʻa Siamane naʻá na fakakaumeʻa ki ai mo hono husepānití ʻi ha ngaahi taʻu ki muʻá. Naʻá na maʻu ia mo ha loto houngaʻia mo palōmesi te na lau ia. Naʻe fakatau ʻe he fāmili ʻĀlani Havi ʻo Kulukasitope ʻi Saute ʻAfiliká ha tatau ʻe 12 ʻo e makasiní pea nau tufaki ia ki he ngaahi fāmili ʻi honau feituʻú.

Ngaahi Feinga ʻa e Uōtí mo e Siteikí

Ne maʻu ʻe he ngaahi ʻiuniti ʻa e Siasí ha ngaahi tatau taʻetotongi ʻo e Ensign pe Liahoná ke fakaʻaongaʻi ʻi he fakafeohí, fakamālohiá mo e ngāue fakafaifekaú. Naʻe fokotuʻutuʻu ʻe he siteiki Soulí ʻi ʻIngilani, ha koniseti makehe lolotonga e Pekiá pea naʻe fakaafeʻi ki ai ha ngaahi kaungāmeʻa, kaungāʻapi, kāingalotu māmālohi mo ha kau Fakaafe Makehe (VIP). Naʻe foaki ki he fakaafe taki taha ha Tohi ʻa Molomona mo ha tatau ʻo e Ensign ʻo Maʻasi 2008.

Naʻe fakaʻilongaʻi ʻe he Kau Fineʻofa ʻi he vahe fonua ʻIle-Ife, ʻi Naisīliá, ʻa e ʻaho ʻo e Fineʻofá ʻaki ʻenau ʻaʻahi ki he pilīsoné ʻo tufaki ha ngaahi tatau ʻo e pulusinga ʻo Māʻasí. Naʻe fakapapauʻi ʻe he siteiki Niukasā-ʻAnitā-Laimi ʻi ʻIngilaní ʻoku maʻu ʻe he fāmili kotoa pē ʻi he siteikí ha tatau mo ha fakaafe ke maʻulotu ʻi ha polokalama sakalamēniti makehe ʻi he Sāpate Pekiá. Ko e taha ʻo e ngaahi ola ʻo e fakaafé ni ko hono ueʻi ʻo ha tangata naʻe māmālohi hili pē hono papitaiso ia ʻi he 1980, pea ʻokú ne fiefia ʻi he ngaahi tāpuaki ʻo e ongoongoleleí kuó ne toe maʻú.

ʻIo, ko e Kau Kalisitiane Kimautolu

Naʻe tokolahi e niʻihi naʻa nau tohi mai ʻo fakamatala ki he founga naʻe tokoni ai ʻa e pulusinga fekauʻaki mo e Fakamoʻuí ke fakamahino ha ngaahi fetaʻemahinoʻaki fekauʻaki mo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻe fakamatala ʻe Pāpulā Meisi ʻo Felekisitafi, ʻAlesona, ʻAmelika ki he pehē ʻe ha fefine ʻoku ngāue ʻi hono ʻapí: “ ʻOku ou fakatokangaʻi e ngaahi meʻa lahi ʻokú ne ʻomi e fakakaukau ʻoku mou tui kia Sīsū. ʻOku anga fēfē ia? Ko e ongo Māmonga Kimoua. Ko ha ongo Kalisitiane Kimouá?” Naʻe ʻoange ʻe Sisitā Meisi ha tatau ʻo e Ensign ʻo Māʻasí pea kamata ai ʻena fepōtalanoaʻakí. Naʻe pehē ʻe Sisitā Meisi, “ ʻI heʻene lau e makasiní, naʻá ne toutou fai he ngaahi fehuʻi mahuʻinga pea kuo fakaava e loto naʻe tāpuní.”

Naʻe fakahoko ʻe he fāmili ʻo Maika mo Sesi Kuleima ʻo Kāuoti, Niu Seisī, ʻAmelika, ha fakafiefia ʻi he kamataʻanga ʻo e taʻu ní pea naʻe fakaafeʻi ki ai ha ngaahi fāmili ne ʻikai kau ki he Siasí. Naʻe ʻi ai ha fāmili naʻa nau vave ange koeʻuhí ke fai ʻe he husepānití ha fehuʻi fekauʻaki mo e Siasí. Naʻe ʻi ai hano kaungāmeʻa ko ha faifekau naʻá ne pehē ʻoku ʻikai ke tau tui kia Sīsū Kalaisi. Naʻe pehē ʻe Misa Kuleima, “Naʻá ku toʻo hake leva ʻa e Ensign ʻo Māʻasí, ʻa ia ʻoku hā ʻa e ʻīmisi ʻo Kalaisí ʻi he takafí mo fehuʻi ange, ʻ ʻOkú ke pehē nai ko ha siasi ʻeni ʻoku ʻikai ke tui kia Sīsū?“Naʻe ʻave ʻe he tangatá ni ʻa e makasiní peá ne fakataha mo e kau faifekaú ʻi he konga ki mui ʻo e uiké ʻo ne fai mo ha toe ngaahi fehuʻi.

Ko ha Pōpoaki Taʻengata

ʻOku kei lava pē ke maʻu ʻa e pulusinga ʻo e Ensign mo e Liahona ʻo Māʻasi 2008 ʻi he tufakiʻanga nāunau ʻa e Siasí. ʻOku hoko ʻa ʻene pōpoaki taʻengata fekauʻaki mo e Fakamoʻuí ko ha meʻa mahuʻinga ke ʻoua naʻa ngata hono vahevahe pē lolotonga e ngaahi faʻahitaʻu Kilisimasi mo e Pekia ʻi he kahaʻú, ka ʻi ha faʻahinga taimi pē ʻe fie maʻu ai ʻe he kāingalotú ke ʻoatu ha fakafiemālie, akoʻi e tokāteline moʻoní mo vahevahe mo e niʻihi kehé ha fakamoʻoni mālohi ki he ʻEiki ko Sīsū Kalaisí. ʻOku ʻi ai e faingamālie ke ueʻi ai ha moʻui ʻa ha niʻihi tokolahi.